Agregador de novas

A webserie Peter Brandon estrearase na Rede o vindeiro domingo

códigocero - Mér, 12/13/2017 - 12:14

Peter Brandon. Unha vida pola comedia é a terceira serie de Porco Bravú, que puido facerse realidade grazas a facerse co Premio ao mellor proxecto de webserie en galego do Carballo Interplay 2016, pero curiosamente, pese a ser un proxecto orientado á súa distribución en liña, a súa traxectoria por distintos festivais está a adiar a súa estrea en liña, que finalmente será o vindeiro domingo dun xeito moi especial, xa que, en vez de publicarse os contidos directamente para a súa reprodución baixo demanda, a emisión realizarase mediante un stream en directo a través de YouTube.
Dende Porco Bravú quixeron facer unha estrea en liña moi especial, de xeito que o día 17 ás 12:00 horas realizarán catro pases do primeiro capítulo de Peter Brandon, o falso documental protagonizado por Pedro Brandariz, completando as distintas retransmisións con conexións en directo antes e despois co equipo técnico que fixo posible esta produción e que responderá a preguntas a través de Facebook, Twitter e Instagram, onde conversarán a través dos cancelos #PeterBrandon e #BrandonDay.

Pedro Brandariz durante a presentación da webserie a pasada edición do Carballo Interplay

En Peter Brandon podemos ver numerosas caras coñecidas do panorama audiovisual galego, como María Tasende, Xosé A. Touriñán, Marcos Pereiro, María Costas, Evaristo Calvo, Isabel Risco ou Daniel Vilaverde, e incluso chega a introducirse na propia gala dos Premios Mestre Mateo, reforzando este formato no que quere amosarse a face máis triste do humor ao seguir os pasos de Pedro Brandariz na súa reformulación artística como Peter Brandon.

No Carballo Interplay 2017 puideron verse os primeiros episodios de Peter Brandon, webserie que pasou logo polo Teatro Rosalía da Coruña e o Teatro Principal de Pontevedra

Vídeo no que explican como será a estrea en liña de Peter Brandon o vindeiro domingo

Categorías: Ciencia

Vitae axúdanos a crear aplicacións limpas para seren entendidas e melloradas

códigocero - Mér, 12/13/2017 - 12:03

Para moitos desenvolvedores, materializar un programa significa dúas cousas esencias: achegar algo útil á sociedade e estar cen por cen disposto a que algún dos integrantes desa sociedade se apunte a mellorar o programa orixinal. O problema xorde cando a falta de clarificación impide que a ferramenta resulta se entenda e se optimice en todos os seus aspectos. Segundo os expertos en técnicas áxiles e eficaces de desenvolvemento, escribir programas para seren comprendidos é unha arte difícil pero, tamén, unha obriga ineludíbel. Para axudarnos neste punto e adestrarnos no que seria o deseño transparente de programas, Vitae Consultores vén de convocar a segunda edición do seu curso Clean Code: Crear e refacer aplicacións limpas (formato PDF). O obradoiro, de dez horas de duración, celebrarase os días 2 e 3 de febreiro do ano vindeiro no Hotel Attica 21 da Coruña.
En termos xerais, serviranos para ampliar ao máximo o noso coñecemento sobre técnicas de código limpo, recursos que, segundo informa Vitae, “axudan a escribir programas sinxelos de entender, que achegan valor e que, ademais, poden evolucionar”.
A consultora, a propósito dos porqués deste curso, lembra que “programar é expresar procesos con detalle nunha linguaxe non ambigua, feita, coma calquera linguaxe, para comunicar verbalmente ou textualmente”. Vitae engade que “ao escribir cómpre pensar no lector, sobre todo porque, en moitas ocasións, os lectores imos ser nós mesmos”. Os obxectivos do obradoiro son, polo tanto, desenvolver aplicacións difíciles de manter, reducir a cantidade de erros e facilitar o seu achado e distinguir as boas e malas prácticas de programación.
O curso está dirixido sobre todo a programadores con experiencia nalgunha linguaxe orientada a obxectos. O requirimento principal é sermos usuarios de editores de código, recomendándose o VSCode. A actividade formativa terá unha duración de 10 horas e cun enfoque eminentemente práctico.
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores. Entre as empresas e organismos que ten asesorado ou formado atópanse Tecnocom, ABANCA, Softek, GADISA, Inditex, Optare, Altia, Gradiant ou SIVSA.

Categorías: Ciencia

Chega un proxecto tecnolóxico galego para facilitar as tarefas do persoal sanitario

códigocero - Mér, 12/13/2017 - 11:41
O investigador Víctor Manuel Alonso, responsábel do sistema

O enxeñeiro vigués Víctor Manuel Alonso Rorís, a través da súa tese de doutoramento, vén de desenvolver un proxecto tecnolóxico para facilitar ao máximo as tarefas diarias dun centro médico. O sistema, que foi avaliado durante tres meses no Hospital Son Espase de Palma de Mallorca, consiste nunha tecnoloxía de seguimento flexíbel, de baixo custe e accesíbel a través de móbiles ou tabletas. No devandito hospital, empregouse o método para facer monitoraxe dos labores de elaboración e administración das mesturas de nutrición parenteral: a que achega ao paciente por vía intravenosa os nutrientes básicos que precisa. Estes labores son particularmente delicados (os erros humanos ou a contaminación poden causar danos nos pacientes) e demandan dende hai tempo recursos que permitan o máximo control nos procesos. Neste caso concreto, o sistema do enxeñeiro galego saldouse con valoracións moi positivas.
O seu proxecto ten o alicerce, como dixemos, na súa tese doutoral, defendida na Escola de Enxeñaría de Telecomunicación e dirixida polos profesores Juan M. Santos e Luis M. Álvarez Sabucedo. O traballo fai fincapé en até que punto no ámbito sanitario actual establecéronse xa múltiples mecanismos para o seguimento dos protocolos de actuación con maior repercusión (xestión do persoal, control de citas...), pero, pola contra, existen múltiples accións rutineiras que seguen sen estar monitorizadas e que afectan de forma directa á saúde dos pacientes.
En total, no devandito caso de estudo específico trazáronse máis de 500 mesturas, obtendo información exhaustiva sobre todo o seu ciclo de vida en case 4.000 rexistros de seguimento. O novo sistema púxose a proba do 1 de xuño ao 6 de setembro de 2016, tres meses de desenvolvemento que serviron para mellorar e evolucionar a proposta inicial e para conseguir, en base aos bos resultados, financiamento para iniciar un novo proxecto de investigación que terá como obxectivo a materialización dun sistema máis avanzado co que se pretende facer seguimento de novos escenarios de aplicación en novos contextos e organizacións.

Categorías: Ciencia

Relación fatal entre el traumatismo craneoencefálico y el intestino

Investigación y Ciencia - Mér, 12/13/2017 - 00:00
Descubren en ratones que las lesiones cerebrales pueden provocar efectos nocivos en el aparato digestivo, y viceversa.
Categorías: Ciencia

Las raíces de la Gran Mancha Roja

Investigación y Ciencia - Mér, 12/13/2017 - 00:00
La mayor tormenta giratoria del sistema solar, la Gran Mancha Roja de Júpiter, llega hasta bastante dentro del planeta, como se sigue de las mediciones de la sonda Juno.
Categorías: Ciencia

VozTelecom abre punto de servizo en Carballo

códigocero - Mar, 12/12/2017 - 23:36

VozTelecom, operador de comunicacións para empresas e de servizos na nube, vén de dar un novo paso no seu proceso de espallamento na nosa terra coa apertura do que sería o seu primeiro punto de servizo en Galicia, ou sexa, unha nova oficina comercial especializada en asesoramento, venda e apoio post-venda arredor dos seus servizos de comunicacións para empresas. O punto de servizo galego está emprazado no 22 da rúa Tarragona de Carballo, dende o que se quere crear un centro de operacións e actividade para dar cobertura ao puxante tecido empresarial da provincia, e máis en detalle ao seu tecido de PEME (máis de 12.000 empresas con entre 3 e 99 empregados).
A apertura destas dependencias, en palabras de Stéphane Quinnez, director comercial de VozTelecom, responde ao obxectivo de ofrecer ás PEME da nosa terra “unha atención máis próxima, personalizada e adaptada ás súas necesidades reais”. Por certo que o xerente do punto de servizo é Diego Iglesias, profesional cunha longa experiencia no sector de servizos TIC para empresas e que dirixe á súa vez a compañía DonClic Solucións Tecnolóxicas, firma que este 2017 cumpre 10 anos. O novo centro de operacións de VozTelecom conta con zona de tenda, taller e oficinas comerciais, onde ofrece os servizos de central virtual, telefonía fixa e móbil, acceso a Internet de alta velocidade, videoconferencia, copias de seguridade e almacenamento, ademais das aplicacións profesionais GSuite de Google.

Categorías: Ciencia

Instagram permite seguir cancelos

códigocero - Mar, 12/12/2017 - 22:30

Os cancelos, pese a ser unha característica moi asociada a Twitter, están presentes tamén no resto de plataformas sociais, e a que vai darlle un valor inusitado é Instagram, que dende hoxe ofrece a posibilidade de que os usuarios podamos seguir cancelos, como un novo xeito de descubrir fotografías, vídeos e persoas.
Deste xeito non teremos que limitar o uso de cancelos a un uso activo, xa que non será preciso facer unha exploración intensiva de perfís de Instagram afíns aos nosos gustos e intereses, senón que poderemos seguir directamente temáticas, o que tamén terá un grande impacto para os creadores de contidos, que terán que optimizar máis o uso de cancelos para chegar a un público máis amplo e axeitado.
Seguir cancelos é equivalente a seguir a amigos, de xeito que cada cancelo terá a súa propia páxina de perfil na que podemos premer o botón para seguir (e deixar de seguir) esa temática, e tamén estarán dispoñibles na páxina se seguidos do noso perfil (onde poderemos diferenciar agora entre persoas e cancelos, facilitando así a xestión destes últimos).
Cómpre matizar que, agás que mudemos a nosa configuración de privacidade, os cancelos que sigamos estarán visibles para outros usuarios.

Os cancelos compórtanse agora coma se fosen contas de usuarios
Categorías: Ciencia

O ITG expón esta semana os seus proxectos en materia de drons

códigocero - Mar, 12/12/2017 - 21:00

O Instituto Tecnolóxico de Galicia (ITG) vai mostrar esta semana a súa experiencia en tecnoloxías aéreas, máis polo miúdo en Vehículos Aéreos non Tripulados (UAV polas súas siglas en inglés). O motivo? A celebración da Xornada Técnica sobre UAV que organiza o Consorcio Aeronáutico Galego en Vigo (CAG) na sede de seu. Neste encontro, desenvolvido en colaboración con ITG e o Centro Avanzado de Tecnoloxías Aeroespaciais (CATEC), Analía López Fidalgo, directora da área de Sensórica e Comunicacións de ITG, falará da experiencia do centro tecnolóxico no sector dos sistemas aéreos non tripulados e exporá a situación dos proxectos que está a desenvolver actualmente. Por exemplo a través de iniciativas como Civil UAVs Initiative, da Axencia Galega de Innovación, no que o ITG colabora con Babcock para dar forma a novos sistemas de control, un software de misión intelixente e un centro de simulación para formación de pilotos.
Ademais, López Fidalgo porá en valor a recente constitución da que sería a primeira Unidade Mixta de investigación (UMI) especializada en drons en Galicia, coa unión do Instituto Tecnolóxico de Galicia e Star Defence Logistics & Engineering (SDLE), ao abeiro do programa de alianzas de investigación e transferencia que impulsa o Goberno galego. Froito da devandita unión abrollou o proxecto FASTFly (Full Autonomous Systems for UAS), que dispón dun orzamento de máis de 2 millóns de euros e un plan de desenvolvemento até 2020, para o que se conta cun equipo de traballo dunha ducia de investigadores e coa previsión de xerar cinco novos postos de traballo.

Categorías: Ciencia

O CPEIG, a UVigo e a UDC volven pechar fileiras arredor da Hora do Código

códigocero - Mar, 12/12/2017 - 20:04
Fernando Suárez, presidente do CPEIG, na entrada da Facultade de Informática da Coruña

Chega a recta final de ano e, como de costume, é o intre de lembrar aos demais e anos mesmos a importancia de ter coñecementos, aínda que básicos, de programación. Por que? Pois por moitos motivos, comezando por un feito do que falamos recentemente dende Código Cero: os estudantes formados en cuestións informáticas seguen a ser os máis demandados do mercado laboral, e nada indica que esta situación vaia mudar a medio e curto prazo. Pór de relevo as vantaxes de contarmos con formación para programar, aínda que básica, é un dos grandes obxectivos da Hora do Código, posta en marcha pola entidade internacional Code.org, organismo público sen fins de lucro adicado a ampliar a participación en Informática. Con respecto á nosa terra, a Hora do Código ten un dos seus grandes valedores no Colexio Profesional de Enxeñaría en Informática de Galicia (CPEIG), que vén de anunciar, precisamente, a súa participación nas actividades preparadas para o día 16 nos nosos campus.
A edición galega da Hora do Código terá dous eixes de acción fundamentais, como vén sendo costume: por unha banda o Campus de Ourense (Escola Superior de Enxeñaría Informática, ESEI) da Universidade de Vigo e, pola outra, o Campus da Corruña (Facultade de Informática, FIC) da UDC. A cita (dupla) será este sábado día 16. Por suposto, haberá obradoiros cen por cen de balde, dirixidos a rapaces e rapazas de entre 6 e 18 anos de idade. Quen queira máis información sobre as actividades previstas ou formalizar a inscrición nas mesmas, ten unha páxina web específica á súa disposición, www.horadocodigo.gal.
Segundo nos conta o CPEIG, as accións programadas nos centros universitarios desenvolveranse coa participación de voluntarios desta entidade profesional. Persoas colexiadas impartirán tamén, a título individual, charlas en centros educativos en Galicia ao longo da presente semana.
Como lembraremos, a Hora de Código é un evento internacional que ten como obxectivo o de ensinar programación e as bases da Informática ás nenas e nenos partindo de titoriais básicos dunha hora de duración. A iniciativa busca estender os coñecementos de ciencias da computación aos máis pequenos e pequenas para que coñezan os conceptos e o mundo no que viven, “unha realidade na que a tecnoloxía está cada día máis presente en todas as facianas, desde o lecer á educación”, explica o CPEIG.
A cita na ESEI de Ourense
A Escola Superior de Enxeñaría Informática (ESEI) de Ourense organizará unha xornada o sábado día 16 en horario de mañá con máis de 300 prazas dirixidas a rapaces de 6 a 18 anos de idade. A escola universitaria ofrecerá estes obradoiros: Iniciación á programación, Iniciación á programación con Scratch, Iniciación á programación de dispositivos con Arduino, Rapazas nas TIC, iniciación á programación de dispositivos, Coñece a impresión en 3D, Coñece os Drons, Outra Vida do Hardware e Crea o teu mundo- Realidade Virtual.
Actividades na FIC
Pola súa banda, a Facultade de Informática da Universidade da Coruña tamén prevé obradoiros de programación para o vindeiro sábado a partir do mediodía, dirixidos a nenas e nenos de entre 8 e 14 anos de idade. Os talleres terán unha hora de duración, cun total de 120 prazas. Os requisitos para participar son a inscrición previa e que vaian acompañados por un adulto, ademais de levar unha tableta ou ordenador. No caso de non dispoñer deses dispositivos, a FIC emprestaralle un a quen o precise. As nenas e nenos asistentes recibirán un diploma acreditativo da súa participación na Hora do Código.
Code.org
A Hora do Código está promovida desde o ano 2013 pola entidade sen ánimo de lucro estadounidense Code.org. Trátase dun evento internacional que consiste nunha introdución dunha hora de duración ás ciencias da computación, deseñada para mostrar que todo o mundo pode aprender a programar e así comprender os fundamentos básicos desta disciplina. A nivel internacional a iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg.
Code.org® é un organismo público a dicado a ampliar a participación en Informática. O seu obxectivo é que todos os estudantes teñan a oportunidade de aprender programación.

Categorías: Ciencia

Twitter permitirá publicar fíos de chíos de vez

códigocero - Mar, 12/12/2017 - 19:30

Unha das grandes constantes de Twitter é o feito de que a plataforma vai incorporando como seus os comportamentos dos usuarios, de xeito que elementos como os rechouchíos ou as citas remataron converténdose en funcionalidades nativas da plataforma, e agora chega a quenda dos fíos, un elemento deseñado para poder seguir conversas, pero que algúns usuarios comezaron a empregar para narrar historias ou desenvolver conceptos complexos, de aí que decidisen facilitar esa práctica, e hoxe anuncian que están a iniciar a implantación dun novo xeito de fíar chíos, premendo nun botón de + para compor novos chíos e, cando se remate de escribir o fío enteiro, poder premer o botón de publicar para remitir todas as publicacións de vez.
Esta nova funcionalidade busca simplemente facer cómoda unha práctica cada vez máis frecuente. Nas vindeiras semanas chegará a iOS, Android e Twitter esta nova prestación que axudará a facer un uso máis creativo de Twitter.

Categorías: Ciencia

Dispárase o custo das cabinas telefónicas

códigocero - Mar, 12/12/2017 - 19:00

A Comisión Nacional dos Mercados e a Competencia leva tempo criticando a consideración das cabinas telefónicas como servizo universal, por ser un servizo innecesario e caro, e para ilustrar o tema publicaron hoxe no seu blog oficial un artigo no que desvelan que durante 2015 o custo de manter as cabinas foi de 2,07 millóns de euros, cantidade que non parou de medrar nos últimos 4 anos (nos anos anteriores custaba 1,33, 1,20 e 0,40 millóns de euros).
O Ministerio de Enerxía, Turismo e Axenda Dixital convocou un concurso para o mantemento das cabinas como servizo universal, que quedou deserto, polo que tiveron que forzar a Telefónica a facerse cargo até o 31 de decembro de 2018. Queda agora por ver se durante o ano que vén modifican a normativa para reformular o servizo universal e eliminar as cabinas, como pretende a CNMC, o que tamén poderían aproveitar para dicir adeus a outro produto obsoleto, como serían as guías telefónicas en papel.

Categorías: Ciencia

O Concello de Brión aposta pola información e a participación veciñal na súa nova app

códigocero - Mar, 12/12/2017 - 19:00

O Concello de Brión vén de poñer en marcha unha aplicación móbil de balde para mellorar ao máximo a comunicación entre a Administración local e a veciñanza, fomentando a participación, a cidadanía activa e a interacción. Trátase da app Brión Informa, que, como seu nome indica, foi desenvolvida para botar abaixo atrancos comunicativos tirando proveito das tecnoloxías, neste caso concreto as ferramentas móbiles. Segundo puidemos saber, Brión Informa permitirá aos usuarios recibir información municipal de interese e transmitir ao Concello información sobre incidencias, consultas e mesmo propostas. “Unha comunicación rápida e sinxela a través de mensaxes de texto que poden ir complementadas por imaxes e xeolocalización”, engade o Goberno local.
A app pode descargarse totalmente de balde na tenda de aplicacións de Google Play para os usuarios da plataforma Android ou na App Store para os dispositivos con iOS de Apple. Tamén se pode acceder dende a páxina web do Concello de Brión: www.concellodebrion.gal.
A aplicación, explica o Concello, inclúe un menú estruturado en catro categorías diferentes que o usuario poderá configurar e utilizar segundo as súas necesidades. A primeira é a sección que dá nome á aplicación, Brión Informa, e a través de notificacións emerxentes e instantáneas nos seus terminais móbiles, a veciñanza estará informada de todas as actividades que se realicen no municipio (culturais, deportivas e formativas), así como todos os bandos e convocatorias dos distintos departamentos municipais. Por certo que esta información complementarase cunha axenda e unha listaxe telefónica.
A derradeira sección, Comunica, permitirá que sexa o veciño ou veciña quen teña a opción de comunicarse co Concello, enviando consultas, facendo propostas ou mesmo trasladando incidencias xeolocalizadas e con fotografías, o que axilizará “a resposta e pronta solución por parte do Concello de Brión”, informou o equipo local de Goberno, engadindo que coa app tamén se lles abre aos veciños a posibilidade de faceren seguimento do estado das súas comunicacións en tempo real.
Esta nova ferramenta tecnolóxica súmase á outra aplicación municipal de promoción turística xa existente, tamén dispoñible nos devanditos acubillos en liña baixo a denominación "Concello de Brión".

Categorías: Ciencia

O sector TIC galego rexistra o maior volume de negocio desde 2011

códigocero - Mar, 12/12/2017 - 14:38

O número de empresas do sector TIC de Galicia acadou a cifra de 2.437, fronte ás 2.331 do ano anterior, o que representa un crecemento do 4,5% segundo datos que publica hoxe o Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega), dentro do Diagnóstico ás Empresas TIC sobre a Sociedade da Información en Galicia. Edición 2017, que tamén indica que o sector TIC galego deu emprego a 16.098 traballadores en 2016, o que supón un incremento do 2,6% no último ano.
O crecemento no volume de empresas TIC prodúcese, especialmente, nas empresas máis pequenas, o que pon de manifesto á tendencia ao emprendemento neste sector. Así, o 83,6% das empresas TIC galegas ten un máximo de dous empregados, 89 empresas máis que o ano anterior neste segmento empresarial.
O volume de negocio das empresas TIC galegas acadou os 2.522 millóns de euros no ano 2016, cun aumento do 2,8% con respecto ao ano 2015, e a cifra máis alta rexistrada desde 2011. En relación ao peso do sector na economía galega, o estudo do OSIMGA indica que o valor engadido bruto (VEB) do sector TIC galego en 2014 superou os 1.015 millóns de euros, o 1,8% do PIB total de Galicia.
Por outra banda, a porcentaxe de empresas do sector TIC galego que realizaron actividades de I+D+i durante os últimos 3 anos incrementouse en 4,1 puntos respecto ao dato do ano anterior, pasando dun 25,9% a un 31%. Entre as empresas TIC que realizaron actividades I+D+i, un 72,2% obtivo resultados comercializables. Cabe salientar que que o 18,4% das empresas TIC galegas colaboraron con outras empresas para realizar actividades de innovación.
O estudo pon de manifesto as dificultades que as empresas TIC galegas experimentan á hora de contratar profesionais TIC cos coñecementos e experiencia de interese para a súa organización. Máis da metade das empresas TIC (51%) sinala que é difícil ou moi difícil contratar persoal con formación específica en TIC, especialmente pola carencia de candidatos coa formación precisa.
Novamente increméntase a velocidade de conexión a Internet que teñen contratadas as empresas TIC galegas, de xeito que máis da metade (51%) posúe xa velocidades superiores a 100 Mbps fronte ao 38,3% no ano 2016.
Séguese a reafirmar o uso de servizos de tecnoloxías Cloud, acadando o 43,9% e aumentando respecto ao ano 2016 en 1,7 puntos. O crecemento total no período 2013-2017 foi de 10,9 puntos porcentuais. O software entendido como Servizo (SaaS), tales como Google Apps Bussiness, Office 365, SalesForce.com, Dropbox, etc é o que máis empregan as empresas TIC galegas.
Outra tendencia que se extrae do estudo do OSIMGA é o desenvolvemento de software para plataformas móbiles: Un 28,9% das empresas TIC ofreceron desenvolvementos específicos de software para plataformas móbiles. Entre estas empresas TIC aumenta a cifra de negocio xerada por estes desenvolvementos, acadando o 22,8% do volume de negocio total destas empresas, 3,7 puntos máis que no ano anterior.
A presenza en redes sociais segue a incrementarse nas empresas TIC galegas, situándose no 40,1%, cun incremento de 9,5 puntos porcentuais no período 2013-2017.

Categorías: Ciencia

Os nosos enxeñeiros de Telecomunicación pechan fileiras arredor do gran reto TIC do noso tempo: a ciberseguridade

códigocero - Mar, 12/12/2017 - 14:30
Julio Sánchez Agrelo, decano do COETG

Este ano están a acontecer, na nosa terra, moitas cousas TIC. Unha parte importante delas teñen estreita relación co Colexio Oficial e coa Asociación de Enxeñeiros de Telecomunicación de Galicia (COETG-AETG). Por exemplo a celebración recente da Noite Galega das Telecomunicacións. Para afondarmos no alcance deste acontecemento e nas outras accións que están a organizar as ditas entidades para conmemorar cadanseus aniversarios (os 25 anos da asociación e os 50 do colexio), falamos con Julio Sánchez Agrelo, decano do COETG e presidente da AETG. Asemade, tivemos ocasión de charlar arredor dun dos grandes retos do noso tempo, a ciberseguridade, e do papel que deben xogar nel os profesionais que representan estas entidades.

-Que representa para vostede a Noite Galega das Telecomunicacións?
-A Noite Galega das Telecomunicacións é o evento de referencia do sector TIC en Galicia a día de hoxe. Levamos xa 22 edicións celebradas e ano tras ano a nosa gala foi gañando visibilidade de forma que, tanto para os nosos colexiados e asociados como para o empresariado e a administración pública, este acto converteuse nunha cita obrigada para todos os axentes involucrados no desenvolvemento do sector TIC galego.

-Que tivo esta Noite, a 22 edición, que non tiveran as anteriores edicións, de por si significativas e importantes?
-Este ano dedicamos a Noite á ciberseguridade, tema do que aínda queda moito por falar e por facer. Quixemos dedicar esta edición do evento á ciberseguridade porque pensamos que os enxeñeiros de Telecomunicación somos os profesionais que temos que abordar este novo desafío e quixemos realizar un chamamento aos compañeiros sobre a importancia da seguridade no mundo dixital, como un dos piares básicos da economía do futuro e sobre as oportunidades profesionais que ofrece esta área de traballo para o noso colectivo.

-Na Noite Galega das Telecomunicacións falouse moito de ciberseguridade. Por que se elixiu esta cuestión? Vostede tamén comparte a opinión de que a seguridade TIC, ou mellor dito a inseguridade nas TIC, pode comprometer o futuro da revolución tecnolóxica e informativa que estamos comezando a vivir? Que podemos facer dende Galicia para cambiar o rumbo da situación?
-A facturación mundial por ciberseguridade ascendeu en 2015 a 62.540 millóns de euros e prevese que chegue a 79.292 millóns en 2018. O Observatorio Nacional de Telecomunicacións e para a Sociedade da Información (ONTSI) taxou esta cantidade en España en case 600 millóns en 2014. Este organismo contabilizou máis de 530 empresas que se dedican a esta actividade ou outras semellantes ou complementarias. Este colectivo, que investiu uns 80 millóns de euros fai un par de exercicios, dá traballo a practicamente 6.000 persoas, segundo apunta o Instituto Nacional de Ciberseguridad (INCIBE).
En Galicia xa están en marcha iniciativas para formar aos nosos enxeñeiros como a da Escola de Enxeñeiros de Telecomunicación en Vigo ou a da escola de negocios dixitais, HUB, na Coruña, que preparan senllos Máster en Ciberseguridade para preparar aos nosos profesionais.

-Que destacaría dos profesionais, das entidades e das empresas premiadas nesta edición? Que é iso que teñen en común e que lles valeu o recoñecemento dos nosos profesionais da Telecomunicación?
-Os premios Galicia das Telecomunicacións e da Sociedade da Información constitúen, por unha banda, unha excelente plataforma para a promoción e proxección de empresas e profesionais así como para os produtos e servizos que desenvolven e por outra banda, supoñen o recoñecemento a aquelas persoas ou entidades que, ao longo da súa traxectoria profesional ou segundo os seus programas, contribuíron de forma significativa ao desenvolvemento do sector TIC galego.
Bo exemplo disto é o enxeñeiro de telecomunicación galardoado co premio Enxeñeiro do Ano 2017, Paulino González Pan, cunha exemplar traxectoria profesional e do que salientamos ademais o seu compromiso co Colexio Oficial e a Asociación de Enxeñeiros de Telecomunicación de Galicia ao longo de todos estes anos.
Este ano quixemos salientar tamén o labor da administración pública na contribución á aceleración da economía dixital galega, outorgándolle a Mar Pereira, directora da AMTEGA, o título de Socia de Honra 2017 da AETG.
Empresas como Situm Technologies galardoada co premio da Fundación Enxeñeiro Gerardo García Campos ou Balidea Consulting & Programing galardoada co Mellor Proxecto TIC con Beneficios Sociais outorgado en colaboración coa AMTEGA, desenvolveron produtos tecnolóxicos de gran calidade e cun forte potencial. Tamén tivo cabida nos nosos recoñecementos o excelente traballo de Alejandro Ramos Soto coa súa tese doutoral, premio Gradiant. Ou o enxeñeiro de telecomunicación Víctor Manuel Segura Sieiro co premio ao Mellor Expediente Académico. A madeireira FINSA foi outra das empresas protagonistas, galardoada co premio Acuntia.

Participantes na edición 2017 da Noite das Telecomunicacións de Galicia

-Cónstanos nova equipa do Colexio Oficial de Enxeñeiros de Telecomunicación, que vostede dirixe e que comezou a súa andaina en primavera deste ano, xa está plenamente consolidada e, como se adoita dicir, co maquinaria ben engraxada. Proba diso son as actividades que están a xurdir, sen pausa, do Colexio. Que podemos ir agardando, a curto, medio e longo prazo, desta nova directiva que vostede representa?
-Os retos de cara a esta nova etapa do Colexio e da Asociación están xa moi definidos na axenda dos vindeiros meses. Temos por diante unha tarefa moi importante de consolidación do noso colectivo ante a sociedade como punto de referencia no que a servizos á cidadanía se refire.
Tamén temos xa en axenda actuacións específicas de cara a conseguir que os enxeñeiros de telecomunicación galegos estean en permanente contacto co Colexio e coa Asociación e fagan uso dos servizos que lles ofrecemos como colexiados e asociados. Canto máis unido e forte sexa o noso colectivo, de mellor forma poderemos contribuír ao progreso da sociedade dixital.

-Dicía vostede que un dos desafíos principais do Colexio é atraer novas colexiadas e colexiados. Como pensan facelo?
-Afrontaremos este reto con actuacións específicas como por exemplo a que celebramos o día 1 de decembro con motivo do 25 aniversario da AETG. Actuacións como esta, pensamos que poden servir para dar a coñecer aos telecos, o papel que xogan organizacións coma a nosa en beneficio do colectivo propio e en consecuencia de toda sociedade.

-25 anos da Asociación de Enxeñeiros de Telecomunicación de Galicia e tamén 50 anos do Colexio Oficial de Enxeñeiros de Telecomunicación. Que representa esta entidade para a sociedade?
-O Colexio, igual que a Asociación, desempeña un intenso labor de colaboración con universidades, coa administración local, autonómica e estatal, así como de empresas e axentes do sector co principal obxectivo de ser útiles e achegar os nosos coñecementos profesionais e a nosa experiencia ao conxunto da sociedade.

-Hai actividades previstas para conmemorar este fito?
-Celebramos estes 50 anos de historia, cun programa de actos e actividades entre os que destacamos a exposición itinerante da experiencia de realidade virtual inmersiva. Esta iniciativa percorre diferentes puntos da xeografía española amosando a historia das telecomunicacións e o rol fundamental dos enxeñeiros de Telecomunicación na transformación da sociedade. En Galicia realizouse concretamente no Museo Interactivo Domus da Coruña, no Museo de Pontevedra e na Escola de Enxeñaría de Telecomunicación da UVigo.

-O COETG forma parte do Consello Galego de Enxeñerías dende a súa fundación. Pode dicirnos para que foi creada esta entidade e cales son os seus obxectivos?
-O CGES constituíuse a principios do 2016 como organización de natureza asociativa da que forman parte os colexios profesionais de enxeñeiros presentes en Galicia correspondentes ás enxeñerías superiores que, ao igual que o COETG, están reguladas e posúen atribucións profesionais.
Os obxectivos fundamentais do CGES buscan potenciar o traballo interdisciplinar no marco da enxeñería promovendo a coordinación entre as diferentes especialidades e fomentar o desenvolvemento tecnolóxico e a súa aplicabilidade á sociedade. Complementa en certo modo os obxectivos do COETG, así como do resto de colexios profesionais que forman parte da entidade na procura de trasladar á sociedade o alcance e as achegas da enxeñería galega para o mellor desenvolvemento presente o futuro da humanidade.

Categorías: Ciencia

Investigadores do CITIC presentan o día 15 as súas memorias anuais de seguimento

códigocero - Mar, 12/12/2017 - 13:03

O vindeiro 15 de decembro, ás 11:30 horas, o Centro de Investigación TIC (CITIC) da Universidade da Coruña acollerá nas súas instalacións unha xornada na que investigadores pre-doutorais e post-doutorais do propio Centro presentarán as memorias anuais de seguimento dos traballos de investigación desenvolvidos desde a súa contratación o pasado mes de xuño. Os procesos de selección destes investigadores foron financiados pola Xunta de Galicia e a Unión Europea a través do Fondo Europeo de Desenvolvemento Rexional (FEDER) con cargo á axuda de Centros Singulares de Investigación para o período 2016-2019.
A vicecoordinadora e responsable científica do CITIC, Bertha Guijarro, será a encargada de inaugurar a xornada e clausúraa correrá a cargo de Manuel F. González Penedo, coordinador do Centro. Quen queira máis información sobre as actividades da xornada (o programa) pode consultalo xa na ligazón específica habilitada polo CITIC (formato PDF).

Categorías: Ciencia

A Coruña, a cidade que estaría máis favor do coche autónomo no ámbito estatal

códigocero - Mar, 12/12/2017 - 12:23

A semana pasada publicouse un estudo (a cuarta Radiografía dos Hábitos de Mobilidade dos Españois realizada polo Foro de Mobilidade de Alphabet) que sitúa a cidadanía da Coruña como a máis proclive ao emprego do automóbil autónomo. De feito, case a metade dos coruñeses estarían a favor do emprego e espallamento do coche smart (o 46%, oito puntos por riba da media estatal, que é do 38%) e arredor dun terzo considera que o vehículo eléctrico é “a solución ideal de mobilidade persoal na cidade”, o que representa a cifra máis alta de España, cun 67%. Practicamente a totalidade dos habitantes do concello recoñeceu estar disposto a empregar o vehículo autónomo de contado.
Por outra banda, e como complemento doutras medidas análogas a prol da sustentabilidade e o medio ambiente, máis da metade da poboación da Coruña estaría a favor de restrinxir o acceso ao centro dalgunha maneira. Outras das medidas con maior respaldo serían crear zonas peonís en rúas céntricas (39%) ou aumentar os carrís bici (48%).
O estudo tamén revela datos interesantes sobre o uso de novas tecnoloxías en mobilidade, mostrando a faciana máis positiva (navegadores para tránsitos seguros e sustentábeis, aplicacións que nos axudan atopar destinos e a aparcar) e, tamén, a máis negativa da cuestión (uso de servizos de mensaxes instantáneas durante o desprazamento). Segundo se desprende da investigación, o emprego de móbil ou smartphone ao volante, a nivel estatal, subiu de maneira considerábel respecto de 2016, pasando do 30% ao 42%. No caso dos coruñeses, o 42% recoñece facelo fronte ao 28% que afirmaba ter este hábito o ano pasado. No lado negativo, o 8% recoñece utilizalo sen mans libres, por exemplo para escribir mensaxes instantáneas (WhatsApp) ou consultar e responder correos electrónicos. Por outra banda, o 67% dos condutores da cidade galega utilizan aplicacións móbiles para evitar atoamentos, aforrar combustíbel ou aumentar a súa seguridade).
Pero as aplicacións móbiles tamén son útiles para xestionar a mobilidade, así o confirma o 44% dos coruñeses que os utilizan, máis alto que a media nacional cun 32%. A do autobús é a máis utilizada polos habitantes da cidade galega, cun 86,5%.
Se falamos de compartir coche, un 45% afirma facelo nalgunha ocasión, un dato máis elevado con respecto ao ano pasado, que obtivo un 41%. De feito, as modalidades máis populares son compartir coche entre amigos e familiares, seguido de opcións como BlaBlaCar cun 29%.

Categorías: Ciencia

A FIC introducirá á rapazada na programación informática o día 16

códigocero - Mar, 12/12/2017 - 12:20

O vindeiro sábado a Facultade de Informática da Coruña celebra A Hora do Código UDC 2017, un evento de balde que busca promover as Ciencias da Computación entre a rapazada (está aberto a público de entre 8 e 14 anos), con especial atención a incrementar o número de mulleres e estudantes de colectivos minoritarios que aprendan a programar.
A xornada pretende instruír en conceptos fundamentais de programación, dispoñendo para iso de bloques lóxicos que, amoreándose nunha orde axeitada, realicen unha acción concreta, como mover un personaxe nunha escena ou debuxar unha forma.
Os cativos que queiran participar nesta actividade teñen que reservar a súa praza, vir acompañados por un adulto responsable e traer un ordenador ou tableta (aínda que tamén se emprestarán dispositivos para quen non poida levar un). Distribuiranse por idades e niveis en grupos de 10-18 e contarán cun monitor que os dirixirá e orientará nas actividades.
Para esta introdución á programación realizaranse actividades deseñadas para a ocasión, que empregan programación visual para facilitar a aprendizaxe dos conceptos e, para facer máis atractivos os distintos desafíos a superar, estarán ambientados en escenarios de franquías populares como Vaiana, Frozen, Minecraft, Angry Birds ou Star Wars.

Categorías: Ciencia

VESA aproba unha norma para o HDR en monitores de ordenador

códigocero - Mar, 12/12/2017 - 11:55

Aínda que é frecuente que a porta de entrada de moitas innovacións tecnolóxicas no fogar sexa a informática, hai tecnoloxías que tardan en chegar, e nun momento no que os televisores 4K con HDR son a norma no mercado de consumo, vemos como nos ordenadores persoais nin sequera tiñamos normas para conducir estas interesantes melloras visuais, para o que a Video Electronics Stardards Association (VESA) anuncia a primeira especificación estándar aberta para o HDR.
As novas especificacións para monitores informáticos chámase DisplayHDR e diríxese inicialmente a pantallas LCD para portátiles e ordenadores de sobremesa (a tecnoloxía OLED estará soportada por futuras versións do estándar). O DisplayHDR v1.0 establece 3 niveis distintos de HDR para facilitar a adopción desta tecnoloxía en función da gama dos distintos equipos (indo dende equipos de entrada até monitores profesionais).
Este estándar busca principalmente evitar a confusión entre os distintos tipos de HDR, de xeito que en equipos informáticos haxa unhas especificacións claras para os fabricantes de hardware, que agora poderán lucir o logotipo de DisplayHDR 400 nos seus monitores básicos con HDR, DisplayHDR 600 nos de gama media e DisplayHDR 1000 nos de alta gama (o número que acompaña a cada norma e a luminancia máxima dos paneis medida en candeas por metro cadrado).
Para facernos unha idea da luminosidade dos monitores con certificación VESA para o HDR podemos comentar que as pantallas con DisplayHDR 400 teñen unha luminosidade un 50% maior que a meirande parte das pantallas de portátil, á vez que tamén soportarán imaxes de 8 bits (normalmente os portátiles procesan só 6 bits emulando os 8), polo que estas novas especificacións poden ser un impulso para a mellora da calidade das pantallas dos nosos equipos informáticos.

Categorías: Ciencia

Preocupación pola emerxencia de falso porno creado coa axuda da intelixencia artificial

códigocero - Mar, 12/12/2017 - 11:30
Imaxe dunha película pornográfica na que inseriron a cara da actriz Gal Gadot (protagonista de Wonder Woman)

No filme de Arnold Schwarzenegger de 1987 Perseguido (The Running Man) podiamos ver como simulábase a morte do protagonista de xeito dixital substituíndo a súa cara pola dun actor, efecto visual que naquel momento era pura ficción científica, pero que agora podería considerarse unha realidade arrepiante, polas consecuencias que ten, como vén de demostrar un usuario de Reddit co alcume de deepfakes, quen produciu vídeos pornográficos de celebridades como Scarlett Johansson, Maisie Williams, Taylor Swift, Aubrey Plaza e Gal Gadot valéndose de tecnoloxía de substitución facial.
Nos últimos anos afixémonos a filtros que permiten aplicar efectos nas nosas caras en aplicacións como Snapchat, que nalgúns casos incluso poden substituír un rostro por outro dun xeito un tanto cómico, pero a demostración práctica de que partindo dun bo número de imaxes do rostro dunha persoa pode chegar a implantarse a súa cara nun vídeo, conservando as expresións faciais, e sen precisar de pericia técnica, é algo sobre o que habería que preocuparse, xa que a falsificación de vídeos é agora extraordinariamente doado.
Os vídeos de mostra compartidos por deepfakes son secuencias pornográficas ás que aplicouse un algoritmo de machine learning (partindo de código aberto) que, aínda que non está totalmente depurado, fai un achegamento ao que permite actualmente a tecnoloxía de intercambio de caras baseada en intelixencia artificial que pode o falso porno a un novo nivel, podendo incluso aproveitarse para producir vídeos inculpando a persoas de cousas que nunca fixeron.
Os exemplos publicados na Rede terían como material gráfico de referencia fotografías atopadas en Google, imaxes de arquivo e vídeos de YouTube, ou sexa, material doado de conseguir para adestrar ao sistema para recoñecer a unha persoa e así poder inserir a súa cara nun vídeo, dando a entender que, de ter acceso a material de mellor calidade sería posible unha suplantación facial de grande realismo.
En vista do rápido que está a avanzar esta tecnoloxía, xorde agora un grande reto: poder identificar os vídeos manipulados mediante este tipo de algoritmos.

Categorías: Ciencia

O Concello de Ponteareas quere dotar aos seus bombeiros cun dron

códigocero - Mar, 12/12/2017 - 09:38

Os días pasados o Concello de Ponteareas, a través da Concellería de Seguridade Cidadá, informou da posíbel incorporación dun vehículo aéreo non tripulado (dron ou UAV polas súas siglas en inglés) aos equipamentos cos que contan os bombeiros locais. O aparello serviría para complementar o traballo dos efectivos en situacións emerxencia coma as vividas o pasado mes de outubro (coa vaga de lumes forestais) ou esta mesma semana cos efectos do temporal. Asemade, sería unha ferramenta de utilidade para o desenvolvemento diario das tarefas dos bombeiros de Ponteareas.
Vanesa Fernández, concelleira de Seguridade Cidadá, explicou de incorporarse este dron “para mellorar a calidade do servizo dos bombeiros e axilizar nas súas actuacións”, os integrantes do servizo terán que formarse nun curso básico de cincuenta horas de duración e nun curso avanzado de 70 horas teórico-práctico que lle permita obter a titulación de piloto de RPAS (Remote Pilot Authorized System) homologado por AESA (Axencia Estatal de Seguridade Aerea) a través de ATO.

Categorías: Ciencia

Páxinas

Subscribirse a IGACIENCIA lector de novas