Agregador de novas

Piden 1.600 millóns de dólares a Spotify por ofrecer milleiros de cancións sen licenza

códigocero - Mar, 01/02/2018 - 23:30

A xestión dos dereitos de autor por parte das plataformas de música en streaming é extraordinariamente complexa, e aínda que este xeito de consumir música é agora o máis popular entre boa parte da poboación, non sempre facilita a reprodución musical cos permisos pertinentes das discográficas, como vén de denunciar Wixen Music Publishing, compañía que presentou unha demanda ante un tribunal federal de California contra Spotify, compañía á que acusa de ofrecer temas como Free Fallin" de Tom Petty, Light My Fire de The Doors e uns dez milleiros de cancións máis sen ter licenza para iso nin compensar economicamente pola súa explotación comercial, de aí que pidan 1.600 millóns de dólares en concepto de danos.
Esta demanda de Wixen deixa en evidencia que o copyright está a converterse nun grande problema para Spotify, compañía que ten varias demandas e xa chegou a varios acordos extraxudiciais ante situacións semellantes, resultando especialmente rechamante que a demanda sostén que preto do 21% dos 30 millóns de cancións do catálogo de Spotify carecerían da licenza necesaria.
A demanda parecer ser unha chamada de atención, e incluso é posible que non prospere ante as dúbidas de que Wixen teña a autorización necesaria para emprender accións tan agresivas, xa que nun principio só estaría autorizada para negociar acordos de licenza. Entre os artistas representados por Wixen estarían Tom Petty, Zach de la Rocha e Tom Morello (Rage Against The Machine), Dan Auerbach (The Black Keys), Donald Fagen (Steely Dan), Rivers Cuomo (Weezer), David Cassidy, Kim Gordon (Sonic Youth), Stevie Nicks e Neil Young, entre outros.

Categorías: Ciencia

O servizo SmartPEME da Deputación de Pontevedra, adxudicado á empresa KPMG Asesores

códigocero - Mar, 01/02/2018 - 20:56

A rede TIC de formación e asesoramento impulsada pola Deputación de Pontevedra, a rede SmartPEME (con sedes operativas en Pontevedra, Vigo, Porriño, Ponteareas, Cambados e Lalín), afronta o novo ano con novidades. Segundo informa a entidade que preside Carmela Silva, a xunta de Goberno da Deputación aprobou a adxudicación, por procedemento aberto, do contrato de servizo de evolución e xestión da rede á empresa KPMG Asesores S.L, que presentou unha oferta de 986.271,00 euros. Esta contía, por certo, achega un aforro respecto ao licitado e abrangue unha serie de novidades importantes na cifra de accións complementarias mensuais a realizar en cada punto da rede. Tamén haberá novidades no equipo de traballo e no número de empresas asesoradas.
Recordar que SmartPEME é un modelo de servizo orientado á mellora competitiva das pequenas e medianas empresas e á procura dunha melloría nas vendas e na eficacia e eficiencia das súas tarefas. “Este proxecto”, explica a institución que preside Carmela Silva, “abre novos eidos de actuación e alcanza novos grupos de interese coma os emprendedores, as asociacións empresariais e os axentes de dinamización en concellos”.
Para o seu desenvolvemento, os asesores e asesoras TIC das oficinas do Porriño, Cambados, Pontevedra, Lalín, Ponteareas e Vigo póñense en marcha itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
No último ano SmartPEME bateu unha serie de récords importantes. Máis polo miúdo, aumentouse en preto dun 50% tanto as persoas que se formaron a través dos obradoiros e accións formativas, por unha banda, como o número de empresas e persoas ás que se lles realizaron asesoramentos, pola outra.

Categorías: Ciencia

Facebook retransmitirá a alfombra vermella dos Globos de Ouro

códigocero - Mar, 01/02/2018 - 19:30

Aínda que as redes sociais xa levan moito tempo operando como segunda pantalla durante as retransmisións deportivas e de moitos outros acontecementos, non faltan as iniciativas para conseguir impulsalas aínda máis, como cando o ano pasado Twitter retransmitiu en directo a alfombra vermella dos Globos de Ouro, pero Facebook vén de usurparlles a posibilidade de facer o mesmo coa retransmisión deste ano, no que os Globos de Ouro celebran a súa edición 75ª.
Deste xeito o vindeiro domingo Facebook terá a exclusiva en streaming en directo da alfombra vermella dos Globos de Ouro, o que parece bastante sorprendente polo feito de que a plataforma social de Mark Zuckerberg non está orientada ao tempo real, aínda que nos últimos meses si avanzou nos EE.UU. como plataforma audiovisual, de feito que quere converterse nunha especie de servizo de televisión baixo demanda con diversos programas orixinais.
O programa que precederá os Globos de Ouros en Facebook contarán con AJ Gibson, Jeannie Mai, Scott Mantz e Laura Marano e, aparte da retransmisión en vídeo tradicional tamén incluirá vídeos en 360 graos capturados na alfombra vermella, que poderán verse na páxina de Facebook dos Globos de Ouros. Aparte da cobertura exclusiva en Facebook, os Globos de Ouro tamén farán uso da súa conta de Instagram (con contidos exclusivos nas súas publicacións e momentos entre bambolinas como historias) e durante a data dos premios a actriz e cantante Laura Marano será a encargada de publicar historias dende a conta oficial de Instagram (con 230 millóns se seareiros).

Categorías: Ciencia

As profesións dixitais, presentes na nova edición de Ben Empregado da Deputación de Lugo

códigocero - Mar, 01/02/2018 - 17:01

A nova edición de Ben Empregado máis social, a cuarta, tamén terá (como as anteriores convocatorias) vertente TIC. Máis polo miúdo, a través de oportunidades laborais para profesionais técnicos en informática ou xestores de comunidades en liña, expertos en redes sociais. Así se especifica hoxe no Boletín Oficial da Provincia, que publicou os 201 novos postos de traballo para lucenses no paro, en todos os sectores, ao abeiro do programa Ben Empregado impulsado pola Deputación de Lugo. Esta iniciativa materializarase (novamente) a través da concesión de axudas a autónomos, PEME e colectivos sociais. A contía total de apoios é de 2,4 millóns de euros. O BOP tamén recolle hoxe a listaxe completa de entidades e asociacións que resultaron beneficiadas de ditas subvencións.
Con ditos fondos, o Executivo provincial financia durante un ano os custos laborais dos novos traballadores (que serán todos lucenses a día de hoxe en situación de desemprego) que demandan e requiren entidades e asociacións da provincia para poder reforzar a súa actividade. Faino en diferentes porcentaxes, atendendo ao nivel de compromiso social dentro da súa aposta por unha Deputación social e coas persoas. En total, financiaranse ao cen por cen os custes laborais 60 lucenses con capacidades diversas ou en risco de exclusión social. Por outra banda, cubriranse ao 50% os custes doutros 141 veciños, actualmente desempregados, que comezarán a traballar en negocios na provincia de empresarios lucenses.
Na listaxe de postos de traballo a impulsar figuran os seguintes, entre outros moitos: técnico consultor enerxético, condutor de maquinaria, creativo audiovisual, técnico agrícola, técnico superior en administración de sistemas informáticos, axente de viaxe e administración, educador, responsábel de atención ao cliente, enxeñeiro técnico de obra pública, licenciado en ciencias químicas, técnico de emprendemento, técnico informático, técnico de atención á terceira idade, técnico superior en procesos de calidade na industria alimentaria, informador cultural, etc.

Categorías: Ciencia

O fenómeno de HQ Trivia chega a Android

códigocero - Mar, 01/02/2018 - 14:11

Os creadores de Vine, Rus Yusupov e Colin Kroll, están a conducir a última revolución no ámbito das aplicacións móbiles nos EE.UU. con HQ Trivia, un xogo en liña bastante curioso que consiste nun concurso de preguntas e respostas en directo e con presentadores reais, no que a xente pode participar de balde dende o seu fogar para gañar premios económicos.
A mecánica é moi sinxela: o presentador realiza unha serie de 12 preguntas con 3 respostas posibles que haberá que responder antes de 10 segundos, quedando eliminados os usuarios tras errar (sendo posible continuar empregando vidas extra que poden conseguirse recomendado o xogo a outros usuarios). Entre os gañadores de cada partida repartirase un bote que normalmente é duns 2.000 dólares (que poden incrementarse bastante en datas especiais) converténdose en todo un fenómeno social que a pasada noite frustrou a moitos usuarios que non puideron participar no xogo por terse superado o límite de 750.000 xogadores simultáneos que tiñan establecido (e que agora van eliminar ao constatar que xa hai preto dun millón de usuarios interesados en participar en HQ Trivia).
Esta aplicación comezou sendo exclusiva para iPhone, pero decidiron comezar 2018 con bo pé, estreando aplicación para Android, que pese a estar aínda en probas, xa acumula centos de milleiros de descargas por parte de beta testers que queren coñecer este fenómeno de primeira man.
As aplicacións móbiles con toques de concurso televisivo non son ningunha novidade, e incluso en España puidemos ver no verán un orixinal formato no que a participación nun xogo e a súa retransmisión televisiva era simultánea, pero o fenómeno de HQ Trivia é moi rechamante por ser un formato exclusivo do contorno móbil que conseguiu entusiasmar a centos de milleiros de xogadores en poucos meses, conseguindo especial relevancia o pasado decembro.

HQ Trivia convida a competir xunto a amigos e familiares neste xogo en directo
Categorías: Ciencia

Máis de mil de empresas de 51 polígonos galegos xa contan con acceso á Rede de alta velocidade

códigocero - Mar, 01/02/2018 - 12:23
Vista aérea do Polígono da Tomada na Pobra do Caramiñal

A Axencia para a Modernización Tecnolóxica de Galicia, AMTEGA, pechou o ano 2017 facendo reconto do acadado nos polígonos industriais da nosa terra a través do Plan de Banda Larga da Xunta. Segundo fai saber a entidade que dirixe Mar Pereira, 2017 saldouse cun total de 51 polígonos con acceso a Internet de redes ultrarrápidas, o que significa, entre outras cousas, que máis dun milleiro de empresas instaladas nestes complexos empresariais teñen ao seu alcance servizos de Rede a través de fibra óptica cunhas velocidades de até 350 Mbps de baixada e 35 de suba, “cunha garantía de caudal do 80% sen límite de descargas”. Como lembraremos, estas melloras tecnolóxicas están a ser desenvolvidas polo operador R, adxudicatario do Plan, cuxa previsión para este ano entrante é engadir 30 polígonos á Rede de alta velocidade, imprescindíbel, por outra banda, para a súa plena dixitalización.
Como resultado destas medidas, en 2018, un total de 130 polígonos (nos que se concentra case o 93% da superficie empresarial ocupada), disporán de acceso a redes de máis de 100 Mpbs. O resto cubriranse nas seguintes actuacións previstas no Plan.
AMTEGA tamén pechou ano recordando que os procesos de incorporación dos nosos complexos industriais á Rede de alta capacidade abren un abano de posibilidades que vai alén do simple fornecemento de infraestrutura. En palabras de R, achandan o camiño para que as empresas “acometan a súa transformación dixital”. Ou sexa, para que boten man de servizos e solucións na nube como por exemplo a videoconferencia, o acceso á Internet das Cousas (IoT) ou os procedementos do que se coñece como Industria 4.0, vencellados a conceptos e metodoloxías como a eficiencia enerxética, o control de intrusións nas edificacións, os servidores virtuais e a analítica de datos (Big Data), entre outros eidos. “Todas estas cousas e outras moitas máis”, explica a compañía de raizame galega, “son posíbeis grazas ás vantaxes das redes FTTH (Fiber To The Home) que levan a fibra óptica ata a propia empresa nestes polígonos xa conectados ás redes ultrarrápidas de R”.
AMTEGA subvenciona estes despregamentos cunha axuda de 3,4 millóns de euros, que se estima que xeren un investimento total de 5,2 millóns de euros. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Axudas a empresas illadas
Outra das liñas do Plan de Banda Larga foi a convocatoria de axudas para empresas e autónomos das zonas máis illadas do rural, da que, tralo remate do período de xustificacións, beneficiáronse un total de máis de 30 entidades. A axencia investiu neste punto preto de 400.000 euros. As subvencións solicitadas polas empresas beneficiarias comprenden entre o 70% e o 100% dos custos das tarefas necesarias para dotar de banda larga de ata 350 Mpbs ás empresas. As firmas beneficiadas abranguen diferentes sectores produtivos: alimentación, agricultura, hostalaría, asesoría, xestión de residuos, inmobiliario ou enerxético, entre outros.
Os importes das axudas solicitadas polos beneficiarios van dende os 2.000 euros ata os 20.000 euros. Segundo lembra a axencia, os servizos de banda larga ultrarrápida a fornecer “permitirán velocidades de acceso a Internet dende os 50Mbps ata os 350Mbps”. AMTEGA tamén lembra que a mellora no acceso á Rede das empresas beneficiarias, con respecto aos servizos actuais dos que dispoñen, “superará os 80Mbps en case o 90% dos casos chegando incluso a acadar máis dos 300Mbps nalgunha das empresas beneficiarias das axudas”.
Estas liña de axudas co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR) e é a segunda das actuacións do Plan de Banda Larga 2020 para a extensión de redes de banda larga ultrarrápida na Comunidade.
Plan de Banda Larga de Galicia 2020
O Plan de Banda Larga de Galicia 2020, aprobado o 1 de outubro de 2015 no Consello da Xunta, asume os obxectivos establecidos na Axenda Dixital para Europa de garantir unha cobertura de banda larga de cando menos 30Mbps para a totalidade da poboación e impulsar a contratación nos fogares de servizos de banda larga por riba dos 100Mbps.
Polígonos xa cubertos en 2017
Parque Empresarial de Arzúa, Parque Empresarial A Piadela, Parque Empresarial de Coirós, Centro Loxístico do Transporte, Plan Sectorización Cerámicas Campo (Laracha), Parque Empresarial de Malpica, Parque Empresarial A Madanela (Melide), Polígono Industrial As Lagoas (Narón), Polígono Industrial Augalevada (Noia), Parque Empresarial de Ordes, Parque Empresarial de Sigüeiro e Oroso Pequeno, Polígono Industrial de Picusa (Padrón), Parque Empresarial da Picaraña (Padrón), Polígono Industrial A Tomada (Pobra do Caramiñal), Parque Empresarial de Ponteceso, Parque Empresarial de Penapurreira (As Pontes), Parque Empresarial de Rianxo, Polígono Industrial Arco Iris (Sada), Parque Empresarial de Santa Comba, Parque Empresarial de Vimianzo, Área Industrial de Carral, Parque Empresarial de Lourenzá, Parque Empresarial de Mondoñedo, Parque Empresarial de Outeiro de Rei, Polígono Industrial de Ribadeo, Parque Empresarial de Chorente (Allariz), Parque Empresarial do Barco de Valdeorras, Polígono Industrial de A Médua (O Barco), Parque Empresarial de Celanova, Parque Empresarial de Ribadavia, Parque Empresarial de Verín – Pazos, Parque Empresarial de Bueu – Castiñeiras, Polígono Industrial Arcos da Condesa (Caldas de Reis), Zona Industrial de As Veigas de Almorzar (Caldas), Área Empresarial de Forbesa (Caldas), Polígono Industrial de O Salnés (Cambados), Parque Empresarial de A Estrada – Toedo, Polígono de Porto Meloxo (O Grove), Polígono Industrial de As Covas (Meis), Polígono Industrial de Vilanoviña (Meis), Parque de A Reigosa e Central de Transportes e Ponte Caldelas, Polígono Industrial de A Lomba (Ponteareas), Parque Empresarial de O Campiño (Pontevedra), Área de Negocios Oceanis (O Porriño), Parque Empresarial de Silleda, Parque Empresarial de Areas (Tui), Polígono Industrial O Camballón (Vila de Cruces), Parque Empresarial de O Pousadoiro (Vilagarcía), Polígono Industrial de Bamio (Vilagarcía) e Parque Empresarial de Vilanova (Área Loxística de Baión – Ría de Arousa).

Categorías: Ciencia

Bota a andar o plan de substitución de baterías degradadas dos iPhone a 29 euros

códigocero - Mar, 01/02/2018 - 12:05

A semana pasada Apple anunciou que, ante a polémica creada ao redor da súa falta de comunicación e transparencia sobre un cambio de iOS que fai que os móbiles con baterías degradadas reduzan a súa velocidade, reducirían o prezo da substitución das baterías afectadas, estando previsto este programa a partires de finais de xaneiro e até o remate de 2018, pero finalmente parece que o programa xa está operativo dende a pasada fin de semana segundo comunicaron a TechCrunch, de xeito que, os usuarios que teñan un iPhone 6/6 Plus/ 6s/6s Plus/SE cunha batería en mal estado poidan proceder á súa substitución a un prezo de 29 euros mentres que o prezo anterior era de 89 euros.
Cómpre lembrar que a degradación de baterías é algo habitual en todos os smartphones e, de feito, todos os fabricantes consideran o elemento como se dun consumible se tratase, de xeito que non ten o mesmo tratamento que o resto do terminal a efectos de garantía, pero no caso que nos ocupa non estariamos nun caso xeral porque Apple sería o primeiro fabricante do que se sabe que modificou o software dos seus terminais para mudar o seu comportamento en función do estado das baterías, algo que claramente debería ter comunicado aos consumidores para proceder en consecuencia. De feito, Apple insiste en que as modificacións de iOS que afectan ao rendemento dos seus móbiles cando teñen baterías degradadas é unha medida que consideran positiva, pese a que moitos consumidores prefiran ver como o móbil perde autonomía paulatinamente antes que padecer descensos de rendemento.

Categorías: Ciencia

O CPETIG presenta recurso contra o Parlamento polo que considera un novo caso de discriminación aos informáticos

códigocero - Mar, 01/02/2018 - 11:41
Marcos Mata, presidente do CPETIG

O Colexio de Enxeñaría Técnica en Informática (CPETIG), a través do seu presidente, Marcos Mata, presentou o pasado 28 de decembro un recurso potestativo de reposición contra o acordo da Mesa do Parlamento de Galicia que abre a todas as titulacións a convocatoria de dúas prazas da escala técnica en informática da Cámara Galega. Segundo a entidade profesional galega, este acordo infrinxe “os principios de mérito e capacidade e quebranta o de igualdade”. O CPETIG lembra que en orixe estas prazas foron convocadas esixindo a titulación en Informática, segundo as bases publicadas no DOGA do 22 de agosto de 2017. Porén, como consecuencia dun recurso presentado e estimado pola Mesa do Parlamento, a Cámara aprobou cambios nos requisitos de formación.
Estas modificacións, engade o CPETIG, deixou o acceso a estas dúas prazas libre para “calquera persoa diplomada ou graduada nunha titulación de calquera rama”, segundo as bases, publicadas no DOGA do 28 de novembro de 2017. Nas súas alegacións, o colexio recorda que a formación esixida en orixe (Diplomatura en Informática, Enxeñaría Técnica en Informática ou Grao en Enxeñaría Informática) é a requirida “expresamente para os postos convocados pola lexislación do propio Parlamento”, do mesmo xeito que así se dispón na Relación de Postos de Traballo da Administración do Parlamento de Galicia.
O CPETIG engade que o feito de abrir a convocatoria destas prazas” á xeneralidade das profesións” supón “unha discriminación ao ver usurpada a súa especialización”. Ademais, o proceso pon de manifesto un problema que non adoita darse noutras Comunidades Autónomas, onde as convocatorias de postos análogos resérvanse “única e exclusivamente a persoas tituladas en Enxeñaría Técnica en Informática, que son as únicas oficialmente capacitadas segundo a súa titulación para o exercicio das funcións propias das prazas convocadas”.
Marcos Mata e o colexio engaden que este caso pon de relevo, novamente, “a indefensión na que viven os enxeñeiros técnicos en Informática de Galicia”.
Asemade, o CPETIG entende que “estaríanse conculcando os preceptos de igualdade, mérito e capacidade para o acceso ao emprego público, derivados na normativa vixente, e a necesaria adecuación entre o contido dos procesos selectivos e as funcións e tarefas a desenvolver, recollida no Estatuto Básico do Empregado Público”.

Categorías: Ciencia

A Xunta mobilizará máis de 100 millóns de euros na dixitalización e formación das PEME

códigocero - Mar, 01/02/2018 - 11:21

A Consellería de Economía, Emprego e Industria, a través do IGAPE, destinará este ano preto de 6 millóns de euros en proxectos colectivos de dixitalización para apoiar a 100 PEME galegas e na formación en tecnoloxías, procesos e metodoloxías da Industria 4.0 para achegar coñecementos a 1.000 traballadores e mandos intermedios. Estas novas convocatorias, que vén de publicarse no Diario Oficial de Galicia (DOG), favorecerán conxuntamente a mobilización de máis de 10 millóns de euros.
A Xunta, dunha banda, promove proxectos colectivos de dixitalización nas PEME destinando para iso un total de 5 millóns de euros para apoiar investimentos ao abeiro da Axenda Galicia-Industria 4.0 e contando tamén con financiamento do Fondo Europeo de Desenvolvemento Rexional (FEDER). O obxectivo é potenciar a posta en marcha de sistemas informáticos que aporten valor ás empresas: tanto proxectos colectivos de soporte a procesos sectoriais multiempresa, como proxectos individuais de intelixencia artificial e de conectividade inter e intraempresarial.
Á realización de obradoiros para a xeración de proxectos colaborativos de dixitalización, financiados ao 100% co novo programa, súmanse as axudas a investimentos dixitais que poderán cubrir ata o 30% no caso das pequenas empresas e ata o 20% para as medianas, se ben os gastos de colaboracións externos necesarios poderán contar con apoios do 50%. O prazo para a presentación das solicitudes estará aberto ata o 31 de xaneiro de 2018 no caso de obradoiros e ata o 28 de febreiro no das axudas a investimentos en dixitalización. Haberá catro convocatorias ao longo do 2018.
Terán prioridade os proxectos colectivos formados por grupos de empresas e que, de maneira opcional, poden estar coordinadas por un organismo intermedio. A Xunta reforza con esta iniciativa a súa aposta por un modelo de empresa 4.0, dixital, innovadora e exportadora. Reforza e complementa así as convocatorias de axudas para impulsar investimentos 4.0, que se activarán por terceira vez en 2018 e que xa teñen beneficiado a 70 empresas con máis de 15 millóns de euros en investimentos.
O segundo dos programas, que vén de publicarse tamén no DOG, apoiará proxectos de capacitación en xestión e organización empresarial para achegar formación no eido 4.0 a 1000 profesionais, traballadores e mandos intermedios, que se formarán en organización industrial, liderado de proxectos, protocolos de cooperación interempresarial, utilización de ferramentas de business intelligence e de vixilancia tecnolóxica, co-creación de produtos, novos modelos de negocio e eficiencia enerxética.
Estas axudas á formación 4.0 contan cun orzamento de 700.000 euros para 2018, podendo beneficiarse organismos intermedios (clústers e centros tecnolóxicos) que organicen programas formativos nos que participen persoas vinculadas profesionalmente cunha PEME galega. Búscase así a especialización en eidos como a robótica, o tratamento masivo de información (Big Data), os vehículos autónomos, a conectividade (Internet das cousas), a ciberseguridade ou a Loxística 4.0.
Neste caso, as axudas cubrirán o 70% dos gastos no caso de que o organismo intermedio beneficiario cumpra as condicións de pequena empresa; do 60% no caso de mediana empresa; e do 50% nos restantes casos. Trátase da terceira convocatoria deste programa para o que o prazo de presentación de solicitudes será de dous meses a partir do 2 de xaneiro de 2018.
Deste xeito, a Xunta avanza no desenvolvemento da Axenda Galicia-Industria 4.0, impulsando a implantación da industria conectada e incrementando o seu peso no PIB ata 2020. Do desenvolvemento do primeiro plan bienal da Axenda Galicia-Industria 4.0 beneficiáronse 4.200 empresas, e para o segundo plan (2017-2018) cóntase cunha dotación orzamentaria de 175 millóns de euros para seguir avanzando na modernización do tecido produtivo galego.

Categorías: Ciencia

Los niños que consumen pescado presentan un mayor cociente intelectual

Investigación y Ciencia - Mar, 01/02/2018 - 00:00
Según los científicos, la ingesta semanal de este alimento aumenta la capacidad cognitiva a través de la mejora de la calidad del sueño.
Categorías: Ciencia

Feliz 2018!

códigocero - Ven, 12/29/2017 - 23:50

Un ano máis chega á súa fin, e nós queremos aproveitar a ocasión para amosar a nosa satisfacción por poder ter dado conta da actualidade tecnolóxica de Galicia e o mundo aos nosos fieis lectores, recollendo os temas que consideramos que fosen de interese e axudando de paso a fornecer os contidos dispoñibles na nosa lingua na Rede.
Vivimos un ano de grandes cambios, no que o sector da telefonía móbil continúa a avanzar cara ao futuro 5G; o iPhone perdeu o seu característico botón de inicio; Nintendo demostrou que os móbiles, tabletas e ordenadores non mataron ás consolas de videoxogos; Twitter dixo adeus á súa limitación dos 140 caracteres; o mundo aprendeu polas malas os perigos do ransomware; e incluso puidemos comprobar como o público aplaudiu a chegada oficial ao noso mercado dun fabricante chinés (Xiaomi) constatando que certos sectores da electrónica de consumo son extraordinariamente dinámicos, de xeito que novos axentes poden ocupar o espazo de compañías con décadas de historia.
Moitos son os retos a superar o ano que vén, e moitos os cambios que viviremos, e dende Código Cero queremos acompañar un ano máis aos nosos lectores nesa viaxe cara adiante, que desexamos que sexa enriquecedora e satisfactoria para todos. Así pois, só nos queda desexar a todos unha feliz entrada de ano e un próspero 2018.

Categorías: Ciencia

Un novo Real Decreto busca facilitar a convivencia entre Uber e Cabify e o sector do taxi

códigocero - Ven, 12/29/2017 - 23:42

O Consello de Ministros aprobou hoxe o Real Decreto polo que se establecen normas complementarias ao Regulamento da Lei de Ordenación dos Transportes Terrestres, Real Decreto 1211/1990, en relación coa explotación das autorizacións de arrendamento de vehículos con condutor co que búscase mellorar o regulamento no sector do aluguer de vehículos con condutor (VTC) (no que actualmente se encadran plataformas como Uber ou Cabify) e asegurar así a súa convivencia ordenada co do taxi.
A través deste Real Decreto impediranse as prácticas especulativas daqueles que solicitasen licenzas de VTC con obxecto unicamente de lucrarse coa súa inmediata revenda, sen intención de operalas. Para iso, introdúcese unha disposición que impide a transmisión de autorizacións durante un límite temporal de dous anos desde o seu outorgamento orixinal.
O Real Decreto tamén incluirá a creación dun rexistro único a nivel estatal ao que deberán comunicarse os servizos de VTC con carácter previo á súa realización para reforzar as garantías na esixencia da contratación previa do servizo de aluguer de vehículos con condutor (facilitando o labor dos servizos de inspección) e poderase controlar de maneira eficaz que o número de servizos realizados fóra da comunidade autónoma na que se ten licenza non supere ao 20% dos realizados.
Trátase, en definitiva, de garantir que os vehículos con autorización VTC sexan precontratados, evitando a captación de viaxeiros circulando polas vías públicas ou mentres están estacionados nos lugares de concentración e xeración de demanda destes servizos como son os portos, os aeroportos ou as estacións ferroviarias. Tamén permitirá garantir o cumprimento do criterio de habitualidade na prestación de servizos.
Por último, este Real Decreto impón que os vehículos para adscribir a novas autorizacións VTC, aínda que estas fosen obtidas mediante sentenza, deben cumprir os requisitos vixentes neste momento, con independencia dos que estivesen vixentes no momento en que se realizou a solicitude orixinal da correspondente autorización, co fin de garantir unha calidade na prestación destes servizos.

Categorías: Ciencia

A segunda edición de Youtubeir@s entregará 5.500 euros en premios

códigocero - Ven, 12/29/2017 - 23:13

As entidades impulsoras da segunda edición do certame Youtubeir@s, destinado a encher a Rede de contidos audiovisuais na nosa lingua (facendo especial fincapé en YouTube), non queren rematar o ano 2017 sen lembrar o seu cometido (incrementar a presenza do galego na rede social de vídeos máis grande do mercado global), os xeitos de participar no concurso e os interesantes premios que se poñen en xogo para as gañadoras e gañadores. Segundo nos recorda hoxe a Universidade de Santiago, a segunda edición xa está en marcha, acollendo vídeos de opinión ou videotitoriais sobre os máis variados temas de interese. En total, o certame entregará 5.500 euros en premios repartidos nun conxunto de categorías que incrementan o seu número con respecto ao pasado ano.
Por modalidades, a convocatoria contempla os apartados de vídeos-facermos, vídeos-opinarmos, canle, creatividade, eficiencia comunicativa, calidade técnica ou calidade lingüística.
A USC tamén recorda que outra das novidades desta segunda convocatoria é o apartado Premio do público. As persoas usuarias da rede social Facebook poderán propoñer a través dun simple comentario no perfil de Youtubeir@s un vídeo do que sexan seareiros/as incluíndo cancelo #propostayoutubeira. As pezas propostas han de axeitarse ás categorías de vídeo-facermos e vídeo –opinarmos. As bases ao completo pódense consultar no web www.youtubeiras.gal e os premios entregaranse o vindeiro 20 de abril de 2018 nun acto público na Coruña no que o xurado dará coñecer os vídeos gañadores.
A nova convocatoria promóvena os servizos de normalización lingüística das tres universidades galegas, de nove concellos (Baña, Ames, Carballo, Ourense, Pontevedra, Ribadeo, Santiago, Teo e O Grove) e a Deputación da Coruña.

Categorías: Ciencia

Comproban o mal funcionamento do sistema de control de contidos en Facebook

códigocero - Ven, 12/29/2017 - 20:17
Imaxe denunciada en Facebook que non foi eliminada polos moderadores por considerar que non é ofensiva

Dende ProPublica decidiron pór a proba o sistema de control de contidos de Facebook, para coñecer a fondo se a compañía de Mark Zuckerberg está a tomar en serio a súa loita contra os discursos de odio e outros contidos ofensivos que non deberían estar nunca ao alcance do público, constatando o que todos temiamos: o sistema de verificación é un completo desastre.
Como exemplo, denunciaron unha imaxe na que pode verse un cadáver xunto ao texto «o único bo musulmán é o puto musulmán morto» para recibir como contestación que non atoparan nada na imaxe que fose contra as normas de Facebook. O mesmo acontece con comentarios como «morte aos musulmáns!!» denunciados por numerosos usuarios, apoloxías da violación, comentarios racistas, bromas sexistas... demostrando que o equipo de 7.500 revisores de contido que actualmente ten Facebook non fan ben o seu traballo.
Non só constataron que nunha investigación realizada na que analizaron máis de 900 reclamacións a Facebook que a resposta era inconsistente (de xeito que os revisores actúan de xeito diferente ante contidos semellantes), senón que quixeron ser máis concretos, e colleron unha mostra de 49 elementos denunciados por usuarios e que son claramente ofensivos, para que dende Facebook recoñeceran o seu erro en 22 casos, en 19 considerasen que estaban dentro das normas da súa comunidade (como, por exemplo, no caso de insultos racistas nos que non se incite á violencia) e, en 6 casos, admitir que os contidos incumprían as normas pero os revisores non os eliminaron por estar mal denunciados ou por seren eliminados polos creadores. Nos 2 casos restantes recoñecen non ter información dabondo para responder.
Justin Osofsky, vicepresidente de Facebook, pediu desculpas polos erros cometidos e asegura que durante 2018 terán até 20.000 persoas encargándose destas tarefas, polo que confían en poder cumprir mellor as súas normas.
O peor destes sistemas de moderación é que non só fallan moito á hora de entender os discursos de odio, senón que tamén actúan no sentido contrario ao que deberían, censurando contidos indebidos, como borrar unha publicación contra unha marcha nazi precisamente por amosar a un neo-nazi na imaxe que a ilustra, co conseguinte bloqueo do usuario durante varios días, para logo pedir desculpas ante as medidas mal aplicadas, dando a impresión de que os revisores de contidos traballan a contra reloxo, sen chegar a entender os textos que están a censurar.
Sobra dicir que as normas de Facebook son pouco claras e non existen unhas pautas publicas para saber concretamente os contidos que aceptan ou rexeitan.

Categorías: Ciencia

Redegal incrementa de maneira notábel as descargas das apps do Museo Thyssen-Bornemisza

códigocero - Ven, 12/29/2017 - 19:00

Entre os casos de éxito recente da firma galega Redegal, centrada en servizos innovadores de desenvolvemento web e mercadotecnia en liña, atópase a optimización da maquinaria de promoción, divulgación e comunicación do prestixioso Museo Thyssen Bornemisza na Rede. Máis polo miúdo, grazas ao labor da empresa de Ourense, este gran acubillo de arte, considerado o segundo mellor museo de España, foi quen de aumentar de maneira significativa as descargas das súas aplicacións.
A orixe destes traballos hai que rastrexala nunha necesidade ben concreta do devandito espazo artístico privado: aumentar a súa presenza nos dispositivos tecnolóxicos, facendo fincapé nos aparellos (tabletas, smartphones) das novas xeracións. Redegal, ao abeiro desta demanda, desenvolveu unha estratexia performance centrada en diferentes canles de actuación.
As necesidades concretas do museo eran as seguintes: incrementar o volume de descargas de apps en dispositivos iOS e Android, aumentar o tráfico cualificado cara a web do museo e incrementar a visibilidade da marca.
A estratexia desenvolvida, máis en detalle, pasou por visualizar o Museo nas TIC, impulsar o número de descargas e de marxe de interacción das cinco aplicacións principais do museo, botar man de estratexias de branding en medios do sector e a través de Google Adwords e, tamén, activar campañas de descargas e interacción en Google Adwords, iADS e Facebook Ads.
O resultado de todo este traballo foi un incremento do 41% no tráfico web da información do museo, unha suba do 31% en materia de descargas para iOS e un medre do 72% no ámbito das descargas para sistemas con Android.

Categorías: Ciencia

O sistema de xestión integrada das bibliotecas municipais implántase en Oroso, Ames, Teo e Brión

códigocero - Ven, 12/29/2017 - 18:21

O catálogo único da Rede de Bibliotecas de Galicia esténdese. Segundo veñen de informar a Consellería de Cultura e Educación e a axencia AMTEGA, implantouse finalmente o sistema de xestión integrada nas bibliotecas públicas municipais de Oroso; de Bertamiráns e Milladoiro (Ames); dos Tilos e Grilo (Teo); e de Brión. Isto que significa? Pois, entre outras cousas, máis comodidade para os usuarios á hora de facer as súas buscas. Por exemplo, poderán facer xestións (coa vantaxe de ter un carné único) como acceder aos servizos de todas as bibliotecas dende o seu centro de lectura e consulta máis próximo. Para o persoal que traballa nestes espazos, ponse en xogo máis homoxeneidade e eficiencia no día a día da súa biblioteca e en relación coas demais.
Segundo informa a Axencia para a Modernización Tecnolóxica de Galicia (AMTEGA), en total son preto de 90 as bibliotecas municipais públicas que xa dispoñen do novo sistema integrado de xestión, un software de código aberto que “abre as portas da integración” de todos os centros nunha contorna unificada, “tanto para o traballo dos técnicos das bibliotecas como para a consulta dos catálogos das bibliotecas de Galicia para calquera usuario ou usuaria”.
O novo sistema, como dixemos, pon en xogo un catálogo único dispoñíbel en catalogo-rbgalicia.xunta.gal. Con esta tecnoloxía, a maiores do devandito, podemos facer cousas en liña como solicitar o carné da Rede, facer reservas e renovacións, trocar de contrasinal e acceder co mesmo usuario e contrasinal a este sistema e á plataforma GaliciaLe, o sistema pioneiro de préstamo de libro electrónico.

Categorías: Ciencia

A páxina web de Movistar incluíu código malicioso para o minado de criptomoedas

códigocero - Ven, 12/29/2017 - 18:00

Non parece que Movistar vaia lembrar 2017 con moita ledicia, pois resultou un ano moi negativo no capítulo da seguridade informática, xa que foron vítimas dun ransomware no mes de maio que os levou a ter que deixar de usar ordenadores durante toda unha xornada na que estiveron corrixindo a súa seguridade interna, e hai poucas semanas desvelouse que durante anos o sistema de centraliñas virtuais Centrex IP tiña un grave fallo de seguridade que facía moi doado que un cliente puidese acceder ao control do servizo do resto, afectando a grandes empresas como Dragados, ou o Grupo IFA. Non conformes con todos iso, onte nos seus foros advertiron dun fallo de seguridade na páxina web de Movistar, na que apareceu un código malicioso (CoinHive) que empregaba os ordenadores dos visitantes para minar criptomoedas, que semella que foi ignorado pola compañía (pese a que o software de seguridade informática como o de NOD32, Kaspersky ou Avast alertaban con só visitar tal páxina web) até que o asunto chegou a ForoCoches, precipitando o eliminado do código malicioso a media mañá.
Desta volta sorprende tanto o feito de que a unha grande compañía de telecomunicacións se lle puidese coar un código malicioso na súa páxina web principal como o feito de que tardasen tanto tempo en solucionar o problema. Tamén resulta moi difícil de crer a explicación do sucedido que deron a algún medio, pois aseguran que probaran a instalar o código malicioso para probar medidas de seguridade contra o mesmo e que, accidentalmente, o código pasou de probas a produción.
En calquera caso, a confianza en Movistar queda claramente danada, pola reiteración de incidentes de seguridade informática nun período de tempo tan reducido.

Categorías: Ciencia

Fene impulsará na Rede a súa tradición mariñeira

códigocero - Ven, 12/29/2017 - 11:54

Fene acolleu os días pasados a presentación dun proxecto para pór en valor o mar e máis a estreita relación co mar da veciñanza do concello, directamente (as/os profesionais da pesca e o marisqueo) e indirectamente (todos os demais sectores produtivos e ámbitos sociais). O proxecto Fene, mar vivo foi posto en marcha, en palabras da Confraría e do Concello, para amosar ao mundo “a nosa grande actividade de lecer, gastronomía e cultura, moita dela ligada ao noso mar”. A iniciativa, segundo se fixo na súa presentación, na que participou a empresa TIC Abertal (encargada da dar forma á ampla vertente dixital do proxecto), abranguerá a creación dunha aula itinerante (na que os mariñeiros locais explicarán aos escolares cales os principais produtos do mar e con que artes se collen) e unha serie de eventos (sete) a desenvolver ao longo de todo ano.
Tamén haberá xeiras de asesoramento, accións formativas (individualizadas e colectivas) e un escaparate web onde se reflectirá toda a actividade municipal ao abeiro da proposta.
Fene, mar vivo vén da man do Concello e da Confraría de Pescadores de Barallobre, contando coa colaboración do Galp Golfo Ártabro. O proxecto está financiado polo Fondo Europeo Marítimo e de Pesca e a Xunta de Galicia, e alongarase até outubro do 2018 dando acubillo, amais de todo o devandito, á creación de produtos turísticos e ao impulso conxunto de actividades que divulguen e protexan o patrimonio pesqueiro do concello e o seu litoral. Tamén se dará forma a un microdestino con accións de dinamización con entidades da hostalaría ou comercio.

Categorías: Ciencia

As mozas de familias disgregadas son as que máis sofren o ciberacoso

códigocero - Ven, 12/29/2017 - 11:13

O ciberacoso é unha realidade que está aquí e contra a que temos que facer fronte común. Porén, para acadar a máxima efectividade é preciso esculcar polo miúdo na realidade do problema e dar con todas as causas do mesmo, mesmo coas máis (en aparencia) insignificantes. Isto é o que vén de facer, precisamente, un grupo de investigadoras/es da Universidade de Vigo: tentar coñecer quen acosa, quen adoita recibir o acoso e como se xera e materializa e en que ferramentas. Segundo fan saber, a vítima máis común destas prácticas é unha moza de entre 13 e 15 anos procedente de familias disgregadas.
Na outra beira sitúanse os nenos de 12 anos de familias sen disgregar. Ademais, no estudo sinálase que un 15,3 por cento dos adolescentes galegos practicou algunha vez ciberacoso e, tamén, que para levar a cabo estas prácticas, quen as infrinxe prefire o teléfono móbil.
Estes e outros datos figuran no estudo Cyberbullying escolar: incidencia del teléfono móvil e internet en adolescentes, desenvolvido polos investigadores José Domínguez Alonso, Elia Vázquez Varela e Sandra Núñez Lois en Relive, Revista Electrónica de Investigación e Avaliación Educativa.
Segundo se fai saber na dita publicación, a mostra final estivo formada por un total de 749 alumnos de Educación Secundaria Obrigatoria, con idades comprendidas entre os 12 e os 15 anos. Como dixemos, o traballo pon de manifesto a “lixeira prevalencia” dos actos de acoso a través do teléfono móbil (18.6%) sobre Internet (12%) dos adolescentes. Así mesmo, a investigación reflicte que entre as formas de comportamento que implican agresións, tanto a través do teléfono móbil como de nternet, despuntan a denigración e a violación da intimidade.

Categorías: Ciencia

Kodi chega a Xbox One

códigocero - Ven, 12/29/2017 - 11:11

A aplicación Kodi, que facilita a organización e reprodución de contidos multimedia (e que fíxose especialmente popular polos engadidos que permiten o acceso a contidos audiovisuais de orixes irregulares) leva máis dun ano presente na tenda de Windows 10 como unha aplicación que funciona en ordenadores, móbiles e HoloLens que vén de incorporar unha nova plataforma: Xbox One.
Deste xeito, o Kodi para Windows 10 funciona tamén na consola de Microsoft, facendo así máis accesibles os contidos audiovisuais aos televisores do fogar, de xeito que para gozar de Kodi no salón xa non haberá que empregar dispositivos con Android ou conectar un ordenador ao televisor, xa que pode aproveitarse que a consola de videoxogos xa é un trebello conectado habitualmente a pantallas grandes.
A nova versión de Kodi aínda está nunha etapa un chisco inmatura, pero resulta operativa, de xeito que tanto podemos aproveitar a ferramenta para acceder ás nosas fotografías, a nosa música e os nosos vídeos dun xeito ordenador, como para gozar dos engadidos que abren o acceso a moitos contidos en liña, entre os que non faltan fluxos de vídeo piratas, manténdose a aplicación neutral ao uso que se faga da mesma (de aí que estea dispoñible para a consola de Microsoft).

Categorías: Ciencia

Páxinas

Subscribirse a IGACIENCIA lector de novas