Ciencia

A Cátedra UDC-Everis loce na FIC o seu programa formativo

códigocero - Xov, 04/12/2018 - 19:00

A Facultade de Informática acollerá mañá ás 11:30 horas o acto de presentación do programa formativo da Cátedra UDC-Everis de Transformación Dixital no que participará o vicerreitor de Política Científica, Investigación e Transferencia, Salvador Naya, o director da división galega de Everis, Jesús Lage, e a directora da Cátedra, a profesora Adriana Dapena. A presentación desenvolverase no salón de graos da Facultade e, a continuación, impartirase a conferencia Intelixencia artificial para a Transformación Dixital das Empresas a cargo de David Pereira, socio responsábel de Intelixencia Artificial de Everis en Europa.
Esta cátedra, como lembraremos, ten como obxectivo regular unha colaboración estábel entre a Universidade da Coruña e Everis, coa finalidade de “fomentar o intercambio de experiencias nos eidos da docencia, a investigación e a cultura en xeral, procurando unha aplicación práctica do coñecemento en proveito da sociedade”.
A iniciativa conxunta entre a UDC e a compañía TIC foi dada a coñecer en xaneiro, nos seus detalles xenéricos, co gallo da formalización do acordo entre ambas entidades. Na sinatura da alianza participaran tamén o reitor da UDC (Julio Abalde) e o socio responsábel de Everis en Galicia (Jesús Lage), que fixeron un percorrido polas accións concretas da Cátedra, como a creación do Premio ao mellor Traballo de Fin de Grao Aplicado, a realización de obradoiros e conferencias e o desenvolvemento de prácticas de alumnado da Facultade de Informática na empresa Everis.
O reitor asegurou daquela que o convenio “viña a establecer unha liña máis de transferencia de coñecemento da universidade á empresa do que se espera se beneficie o tecido industrial galego”.
Para Jesús Lage, “esta alianza reafirma o compromiso de ambas as dúas entidades co desenvolvemento científico e tecnolóxico de Galicia, favorecendo unha aplicación práctica do coñecemento e impulsando a economía galega baseada nun modelo de crecemento dixital”.
O convenio, engadiron Lage e Abalde, consolida a colaboración existente entre a Universidade da Coruña e Everis que comezou no ano 2010 e que culmina coa creación da devandita Cátedra de Transformación Dixital, que ten unha duración de tres anos prorrogábeis.
Abalde e Lage avanzaron que outro dos eidos de traballo a explorar está relacionado co novo Grao Ciencia e Enxeñaría de Datos que se implantará na Facultade de Informática no curso 2019/2020.

Categorías: Ciencia

En marcha dúas novas ferramentas para achegarnos á saúde pública

códigocero - Xov, 04/12/2018 - 18:00

Imos ter dous novos servizos dixitais para que haxa menos atrancos entre nós e a saúde pública. Así o fixo saber hoxe o Goberno galego da man do seu titular, Alberto Núñez Feijóo, quen presentou en detalle os dous ditos servizos: Saúde Móbil e Contacte. O primeiro, que xa está dispoñíbel para a súa descarga para móbiles e tabletas con Android e iOS, abrangue todas as aplicacións que xa ofrecía o SERGAS. Ou sexa, os servizos E-Saúde, SIGUE, Urxencias Sanitarias de Galicia e VacGal.
Segundo fixo saber o presidente, a ferramenta operará “como xanela única para os servizos dixitais da sanidade pública galega”, achegándonos ás últimas novas relativas ao SERGAS e ás redes sociais dos organismos que dependen da consellería. Isto complementarase cunha opción para recibir novas e avisos.
Contacte, pola súa parte, será unha canle única para facer contribucións ou reclamacións ao sistema público de saúde. En palabras de Núñez Feijóo, “dáse con este servizo un importante paso para canalizar as valoracións dos cidadáns sobre a atención que reciben”. Baixo o epígrafe Ti consultas, ti reclamas, ti suxires: nós respondemos, o servizo Contacte permitirá aos usuarios trasladar preguntas, críticas ou suxestións de maneira anónima ou identificada de modo dixital, sexa con certificado, co DNI electrónico ou con Chave365. O sistema ficará accesíbel na web do SERGAS, www.sergas.gal, na plataforma E-Saúde ou na aplicación Saúde Móbil.

Categorías: Ciencia

Ribeira forma á mocidade en animación en 3D

códigocero - Xov, 04/12/2018 - 17:05

O Concello de Ribeira, a Cámara de Comercio de Santiago e a Fundación INCYDE van por en marcha en Ribeira un programa formativo dirixido a mozos e mozas interesados en adquirir novos coñecementos enfocados á animación 2D e 3D. Esta iniciativa, moi axeitada para optimizar, completar e actualizar a capacitación e os coñecementos de participantes de cara ao mercado laboral, desenvólvese baixo un epígrafe que fala por si só dos obxectivos do obradoiro: Constrúe o teu futuro: animación2D 3D e emprendemento. A actividade é de balde e está dirixida a persoas menores de 30 anos inscritas no Sistema de Garantía Xuvenil.
Desenvolverase en Ribeira entre o 23 de abril e o 1 de xuño de 2018 e comporase de sesións grupais, titorías individuais e tarefas de asesoramento e seguimento. O horario das xeiras en grupo é a seguinte: de luns e xoves, de 10:00 a 12:00 horas, agás o 17 de maio, en que a sesión do xoves pasará ao mércores. Ademais, do 21 ao 25 de maio, o horario será luns e xoves, de 10 a 14 horas. As actividades realizaranse no Viveiro de Empresas do Concello de Ribeira.
As titorías individuais levaranse a cabo no horario que acorde o alumnado co seu consultor. Serán, tamén, no Viveiro de Empresas local (horario de mañá) ou nas Aulas de Formación da rúa Cristóbal Colón (horario de tarde). As persoas interesadas e que cumpran os requisitos (menores de 30 inscritos/as en Garantía Xuvenil) poden inscribirse na web da Cámara de Comercio de Santiago.

Categorías: Ciencia

Oleiros acolle un obradoiro para combater nas familias a incomunicación dixital

códigocero - Xov, 04/12/2018 - 13:24

O Concello de Oleiros quere afondar na problemática do mal uso das redes na adolescencia, un emprego inaxeitado da comunicación (por cantidade de uso e, tamén, por falta de protección á hora de acceder a determinados sitios e contactar con determinados usuarios) que está a levar (de maneira paradoxal) á incomunicación no ámbito familiar e docente. Se os días pasados o Goberno local organizou unha xornada na Fábrica para afondar nos pros e contras do espallamento das canles dixitais entre os menores, desta volta o equipo de Goberno local lanza un obradoiro (Conéctate á adolescencia 3.0) que fornece de ferramentas para salvar atrancos comunicativos coa mocidade.
Segundo informa o Concello máis en detalle, “o obxectivo é contribuír a dotar de ferramentas e recursos para mellorar as relacións nos contornos familiares; non perder a comunicación entre xeracións e seguir mantendo relacións de calidade nun mundo cada vez máis tecnolóxico no que, sorprendentemente, cada vez estamos máis comunicados pero cada vez máis illados”. Asemade, o Executivo local quere salientar a importancia que teñen as TIC e as redes sociais nas etapas máis temperás de vida, etapas nas que se forman as personalidades e os temperamentos e que teñen unha relevancia crucial para todo o que acontece nos anos vindeiros na vida das persoas. A idea, polo tanto, é axudar ás familias a preparar o terreo para que as rapazas e rapaces teñan os mellores hábitos posíbeis con respecto á Sociedade do Coñecemento. “A través de técnicas de adestramento educativo, de mindfulness e de educación emocional buscaremos reforzar e manter unhas relacións de calidade nas familias e que non se perda o contacto”.
A actividade será impartida por Virginia Pañeda e Sara Vierna, profesionais con ampla experiencia en todos os devanditos eidos de actividade así como no traballo con adolescentes.
O obradoiro desenvolverase en 8 sesións, de dúas horas de duración cada unha delas, os mércores, en horario de 19:00 a 21:00 h, no último andar da Casa da Cultura de Perillo. Serán un total de 15 prazas, que se adxudicarán por rigorosa orde de inscrición, dirixidas a pais e nais de menores con idades entre os 9 e os 17 anos de idade que figuren empadroados/as no Concello de Oleiros.
O proceso de inscrición será única e exclusivamente a través da web municipal, www.oleiros.gal, na pestana nun clic, dentro do apartado de catálogo de trámites, no taller Conéctate á adolescencia 3.0. O prazo vaise abrir o luns 7 de abril ás 10:00 h ata o venres 13 de abril ás 14:00 horas.

Categorías: Ciencia

Decepcionan as vendas do HomePod de Apple

códigocero - Xov, 04/12/2018 - 13:03

O altofalante conectado de Apple, o HomePod, está a ser un produto bastante problemático, e aínda que se presentou ao público en xuño de 2017 coa vista posta no seu lanzamento antes do Nadal, non conseguiu chegar ao mercado até o pasado mes de febreiro, sendo toda unha incógnita cando poderá mercarse en mercados como o español, o que contrasta co feito de que Bloomberg asegura que as súas vendas non están tan boas como Apple estimaba.
Cómpre lembrar que o HomePod é un produto bastante caro (349 dólares), conta con moitas menos funcións que outros altofalantes conectados e moitas das súas prestacións anunciadas o pasado xuño aínda non están dispoñibles (polo que haberá que agardar a unha actualización do seu software para que o produto cumpra co prometido). Se sumamos á ecuación que Siri ten un funcionamento pouco consistente (para os altofalantes ten moitas menos funcionalidades que no smartphone) non sorprende que, tras unhas fortes vendas iniciais que conseguiu que o HomePod ocupase o 10% do mercado dos altofalantes conectados (no que Amazon ten o 73% e Google o 14%) caeu drasticamente até un 4%, comezando a notarse a situación nas tendas, onde estarían a demandar menos unidades para evitar a súa acumulación. Iso contrasta coas previsións de Amazon e Google, que cada vez venden máis unidades dos seus altofalantes conectados, cada vez máis consolidados no mercado anglosaxón.
Perder a campaña de Nadal foi claramente un problema, pero semella que o campo de distorsión da realidade de Apple non é dabondo para facer que un produto que vai a contracorrente (o punto forte do resto de altofalantes conectados son os asistentes de voz, que é o punto feble da compañía da mazá) poida trunfar, e non sería de sorprender que non amplíen a súa distribución internacional até que o teñan máis maduro (pois aínda non soporta configuracións estéreo cun segundo altofalante nin configuración multiroom).

Categorías: Ciencia

Telefónica achega fibra óptica ás centrais ourensás de Sobrado do Bispo e Pipileira

códigocero - Xov, 04/12/2018 - 13:00
Un recanto de Sobrado do Bispo visto co Google Street View

Ao abeiro do proceso de transformación dixital de toda a súa rede en España, a operadora Telefónica vén de informar do remate da conversión a fibra óptica das centrais ourensás de Sobrado do Bispo (Barbadás) e Pipileira (concello de Piñor), na contorna de Ourense. Isto significa, en palabras da compañía, que toda a antiga rede de cobre destas dúas centrais substitúese por fibra óptica, o que implica que os máis dun milleiro de usuarios conectados ao dito equipamento reemprazado poderán gozar agora “da ampla gama de servizos ligados á tecnoloxía de última xeración de Telefónica”.
A empresa tamén lembra que a fibra permitirá a estes clientes ourensáns ir incrementando a súa banda larga nos vindeiros anos, “a medida que a progresiva dixitalización das actividades particulares e empresariais así o esixa”. Trátase, en definitiva, do cambio dunha infraestrutura, a do cobre, que leva operativa en España desde fai uns 90 anos, e que agora se substitúe pola de fibra óptica para dar resposta ás demandas do futuro.

Categorías: Ciencia

A Panadaría ofrecerá un achegamento retranqueiro aos millenials na gala de Youtubeir@s

códigocero - Xov, 04/12/2018 - 12:25

Onte déronse a coñecer máis detalles do impacto que está a ter a segunda edición do certame Youtubeir@s, dirixido a encher a rede social YouTube de vídeos referenciais en galego feitos sobre as máis variadas temáticas, pero co nexo común da creatividade e (tamén) a utilidade. Os datos foron achegados no edificio que será a sede da gala de entrega de galardóns do certame, o Teatro Colón. Na cita cos medios participou a Goretti Sanmartín, vicepresidenta da Deputación da Coruña, acompañada das actrices integrantes da compañía A Panadaría, Areta Bolado, Ailén Kendelman e Noelia Castro, que serán as encargadas de presentar a dita gala. Segundo lembraron, participarán na cita do 20 de abril 25 finalistas escollidos polo xurado entre as/os 230 participantes que concorreron nesta segunda edición.
As integrantes da compañía teatral informaron que ofrecerán “unha gala arredor da xeración millennial e os contidos que se crean en Internet, sempre dende o punto de vista do humor” e mesturándoo coa presenza da música e do protagonismo das participantes. A idea é “celebrar os contidos en galego” que están a agromar na rede a través de Youtubeir@s.
Sanmartín, pola súa banda, explicou que estes galardóns buscan promover e mostrar o uso do galego en Internet, nomeadamente nunha das redes máis influentes do momento, a rede Youtube. Tamén lembrou que o proxecto está organizado polos servizos de normalización lingüística dos concellos da Baña, Ames, Carballo, Ourense, Pontevedra, Ribadeo, Santiago, Teo e O Grove, polas universidades da Coruña, Santiago e Vigo e pola Deputación da Coruña.
Goretti Sanmartín destacou na súa intervención “a pegada social do Proxecto Youtubeir@s e o seu importante labor no fomento e espallamento do galego, así como o pulo e visibilidade que lle está a outorgar á nosa lingua”. Nesa mesma liña, Sanmartín puxo en valor a implicación da Deputación da Coruña neste proxecto ao tempo que salientou “a importante colaboración entre institucións, xa que están implicados na súa organización un total de nove concellos, as tres universidades e o propio organismo provincial”. Finalmente, a vicepresidenta detallou os datos de participación, tanto cualitativos coma cuantitativos, que amosan a consolidación do proxecto nesta segunda edición.
Os vídeos finalistas desta edición 2018 son:
Categoría de vídeo-facermos
Como escaquearse dunha comida familiar, de As Cousas do Choio.
Descargar vídeo de facebook online, de Xacobo de Toro Cacharrón.
Fart@ de tantas varices, de Chola & Lola.
Categoría de vídeo-opinarmos
• A expedición Balmis e a vitoria da vacinación, de Xacobo de Toro Cacharrón.
As 5 preguntas máis absurdas sobre a Comunidade Xorda, de A Familia Vázquez TV.
Recordos, de Tito FM.
Categoría de canle
• Nubes baixo ti.
• Teño unha horta en San Sadurniño.
• TradiGaita.
Categoría de creatividade
Mascarilla Detox Titorial, de BI Uke,
Os cazapantasmas video-facermos, de Moustache Media Producciones.
Review nostálxica: Discoteca El Bosque, de Edu Fernández.
Categoría de eficiencia comunicativa
Como distinguir as bandeiras LGBT+, de Carolina G.
O galego fermoso (e o que non o é tanto), de Aquel-e.
Videopinarmos || A adopción animal, de Tania Veiras.
Categoría de calidade técnica
Recordos, de Tito FM.
Tempo de decidir, de Nubes baixo ti.
Viaxar, de Aarón Vilariño Figueiras.
Categoría de calidade lingüística
Chaveiro de pompóns – Amigo Invisible, de IES A Cachada Boiro.
Descubrindo as palabras | Encaldabourada. de Anduriña TV.
Reivindicación oceánica, de Xosé Iglesias.
Categoría de proposta youtubeira
Como dar cartos ás agachadas, de As Cousas do Choio.
Fareleiro18 enzoufeime todiña!, de Susanasusue.
Galiza a Eurovisión, de Aquel-e.
Slime faciliño!, de Platicando en galego.
Vídeo denuncia de Bipelo Film.
Máis detalles desta segunda edición
Os galardóns artelláronse este ano, logo da primeira edición de 2017, en cinco categorías: video-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. A estes cinco apartados puideron concorrer todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle.
Na edición presente hai 5.500 euros en premios. Este repartiranse as ditas categorías, que incrementan o seu número con respecto ao ano pasado. O premio do público, chamado #propostayoutubeira, é unha das grandes novidades deste ano. Como temos sinalado dende Código Cero noutras ocasións, a través deste recoñecemento, os membros de Facebook poderán propoñer a través dun comentario no perfil de Youtubeir@s un vídeo do que sexan seareiros/as incluíndo o cancelo #propostayotubeira.
Segundo puidemos saber, a convocatoria 2017 saldouse cunhas importantes cifras de convocatoria, con máis de 200 vídeos presentados da man de internautas de idades comprendidas entre os 17 e os 30 anos. Todas estas pezas salientaron pola súa riqueza temática, tocando temas que oscilaron entre a crítica de cine e as cuestións de actualidade, pasando por titorías con trucos e consellos no ámbito da tecnoloxía, a mecánica ou a cociña. Ademais, lográronse altos niveis de implicación por parte de diferentes asociacións e colectivos, e de persoas de idades moi diversas.

Categorías: Ciencia

Implantes cerebrales para recuperar el tacto

Investigación y Ciencia - Xov, 04/12/2018 - 00:00
Un paciente con una lesión medular percibe sensaciones táctiles tras la estimulación de un área de su cerebro mediante corrientes eléctricas.
Categorías: Ciencia

A robótica como factor de rehabilitación física, polo miúdo nunha conferencia no CiTIUS

códigocero - Mér, 04/11/2018 - 22:57

O centro tecnolóxico CiTIUS, emprazado no Campus Sur de Santiago, vai dar acubillo este 12 de abril, a partir das 17.00 horas, a un relevante encontro coas cousas que poden facer as tecnoloxías de intelixencia artificial e aprendizaxe das máquinas para mellorar a calidade de vida das persoas con algún tipo de lesión, doenza ou característica que reduce a súa mobilidade ou lles impide ter a máxima autonomía e independencia. Estamos a falar da conferencia Robótica de rehabilitación: aplicación da enxeñaría para a rehabilitación motora, que correrá a cargo de Eduardo Rocón, investigador do Centro de Automática e Robótica do CSIC.
Na conferencia tocaranse temas como as novas tendencias dos avances da robótica cara unha meirande interacción co ser humano, o xurdimento dos wearable robots (dispositivos mecatrónicos cuxas articulacións e elos corresponden dalgunha maneira aos do ser humano e están unidos ao paciente) e os detalles legais, sanitarios e regulamentarios que o espallamento deste tipo de tecnoloxías implica.
Segundo explica o CiTIUS, o aspecto distintivo destes robots é a dupla interacción, física e cognitiva, co usuario. A función principal da interacción física é a xeración de forzas que suplementen a dos membros do home alén dos seus límites físicos, sexan estes naturais ou causados por unha doenza ou trauma. O papel da interacción cognitiva é asegurar que o usuario recibe información da interacción do robot coa súa contorna á vez que lle permite comandalo.
Na conferencia tamén se botará luz sobre a seguinte xeración destes dispositivos, un estado de cousas no que todo apunta a un esvaecemento da liña que separa o sistema robótico do ser humano.
A charla, máis en detalle, estará centrada en describir os principais avances neste ámbito e no desenvolvemento da próxima xeración dos robots carrexábeis para a rehabilitación e asistencia de persoas maiores e con diversidades funcionais, unha poboación crecente cunhas necesidades especiais dentro da sociedade europea.

Categorías: Ciencia

Mar habilitará nos peiraos nove novos caixeiros TICpesc

códigocero - Mér, 04/11/2018 - 21:10

A Consellería do Mar ten o obxectivo de afianzar os peiraos galegos na Administración Electrónica. Con este motivo, está a instalar nos portos uns dispositivos tecnolóxicos, os caixeiros TICpesc, cos que posibilitar o pleno acceso dos traballadores do mar ás ferramentas de comunicación e interacción dixital coas administracións (que facilitan o quefacer dos usuarios ao ceibalos de ter que desprazarase ás oficinas da Xunta para faceren as súas xestións). A día de hoxe xa están instalados 58 destes dispositivos. Porén, segundo avanzou hoxe no pleno do Parlamento a conselleira do Mar, Rosa Quintana, instalaranse nove caixeiros máis nos peiraos galegos.
A titular de Mar explicou que “esta ampliación do número de caixeiros telemáticos realízase dada a súa boa acollida” e dadas as vantaxes importantes que están a poñer en xogo, por exemplo evitando (até o de agora) case 280.000 desprazamentos dos profesionais do mar ás confrarías e ás dependencias da Administración.
Ademais, Rosa Quintana tamén avanzou que “está previsto mellorar e actualizar o software de 30 dos caixeiros xa instalados, coa finalidade de mellorar a súa operatividade”. Ademais, engadiu, “prevese instalar en determinados terminais un sistema de pesaxe para aportar funcionalidade e axilidade, permitindo que se poidan pesar os produtos da pesca e do marisqueo no mesmo momento no que se realiza o desembarque das capturas”.
A conselleira aproveitou para resaltar a importancia que ten a trazabilidade dos produtos do mar. De aí, explicou, que se considerase a necesidade de ampliar a rede de terminais para que os profesionais poidan estar atendidos as 24 horas do día dos 365 días do ano sen depender dos horarios das oficinas das confrarías, das lonxas ou doutras entidades.
Rosa Quintana fixo un balance “sumamente positivo” da evolución en materia de rastrexabilidade e comercialización dende a activación dos caixeiros TICpesc e da aplicación web pescadegalicia.gal, a través da que se pode acceder a rexistros administrativos como os dos buques, os dos permisos de explotación do marisqueo a pé ou o das descargas e primeiras vendas de produtos do mar frescos, entre outros. Deste xeito, informou que en 2017 emitíronse máis de catro millóns de notas de venda e que os documentos expedidos polo sector medraron nun 42% na última década, até acadar a cifra dos 314.000.

Categorías: Ciencia

Zuckerberg recoñece o dereito dos usuarios a controlar o que se fai cos seus datos

códigocero - Mér, 04/11/2018 - 20:30

Durante os últimos dous días a atención mediática de boa parte do mundo estivo posta nas declaracións de Mark Zuckerberg ante unha comisión do Senado dos EE.UU. como consecuencia ao escándalo de Cambridge Analytica, comparecencias que moitas voces consideraron unha oportunidade perdida para acoutar as actividades de Facebook, e que finalmente quedaron nunha serie de respostas por parte do máximo responsable da compañía que non engadiron practicamente nada fronte ao comunicado oficial publicado inicialmente por Facebook.
Resultou bastante curioso ver como boa parte dos senadores que participaron no interrogatorio a Zuckerberg descoñecían o funcionamento de Facebook e basicamente da Internet en xeral, de xeito que as súas intervencións e respostas posteriores foron unha completa perda de tempo de cara ao proceso, mentres que deixaba en evidencia cara á opinión pública os motivos polo que os lexisladores non están a actuar en relación á protección dos datos dos cidadáns na Internet: simplemente son totalmente alleos ao contexto actual.
Zuckerberg incluso tivo que responder a lendas urbanas, como a de que Facebook espiaba as conversas telefónicas dos seus usuarios, e cando recibiu preguntas máis incisivas, como ao abordarse problemáticas na súa plataforma como o tratamento dos discursos de odio, Zuckerberg asegurou confiar en que co tempo a intelixencia artificial será dabondo para mitigar a situación.
Pero cando si conseguiron pór contra as cordas a Zuckerberg foi cando puxeron de manifesto o poder monopolístico de Facebook, sendo incapaz o fundador da empresa de citar a un competidor directo da mesma, tentando esquivar as acusacións de monopolio asegurando que realmente teñen moitos competidores, aínda que con servizos diferentes. Resulta innegable que no mercado occidental se queremos abandonar Facebook actualmente non existe unha alternativa, e curiosamente as outras plataformas populares de comunicación social (Instagram e WhatsApp) son tamén propiedade de Facebook, polo que teñen un poder no mercado das redes sociais ante o que é moi probable que os lexisladores teñan que tomar medidas no futuro.
Nas declaracións de Zuckerberg realizadas hoxe si puideron percibirse certas dificultades para poder saír ben parado ante as preguntas sobre os perfís sombra, ou sexa, a recompilación de datos de persoas que non son realmente usuarios de Facebook, ante o que Zuckerberg tivo que recorrer a xustificacións a nivel de seguridade, e incluso afirmou certa ignorancia sobre o tema (algo bastante difícil de crer). De feito, foron moitas as preguntas incómodas ou complexas para as que Zuckerberg respondeu directamente dicindo que non tiña resposta.
Pero se algo bo puido saír de toda esta posta en escena é que Mark Zuckerberg recoñeceu que a entrada en vigor o vindeiro 25 de maio da GDPR (Regulamento Xeral de Protección de Datos para a Unión Europea) vai beneficiar a usuarios de Facebook en case todo o mundo, xa que estenderán boa parte das proteccións dos usuarios esixidas no territorio europeo ao resto do planeta, cando menos en espírito, dando a entender que o regulamento europeo podería converterse en todo un estándar para a protección de datos persoais, xa que os usuarios de todo o mundo deberían ter a opción de controlar os seus datos.

Categorías: Ciencia

As expertas debateron en Ourense sobre como as TIC poden afectar ao dereito á intimidade dos traballadores

códigocero - Mér, 04/11/2018 - 17:30

Hoxe pola mañá celebráronse na Facultade de Dereito do Campus de Ourense uns encontros que puxeron de relevo a importancia de protexer o noso dereito á privacidade e a información persoal das traballadoras e traballadores dunha empresa, por moito que vivamos nunha sociedade dixital onde todo tende a estar conectado e compartindo datos a tempo continuo. As Xornadas Dereito á Intimidade e Protección de Datos no Ámbito Laboral viñeron da man da dita facultade, o Consello Galego de Relacións Laborais e o Colexio Oficial de Graduados Sociais da Coruña e Ourense. Xuntaron unha manchea de profesionais dos eidos da xudicatura, a universidade e a inspección de traballo, e máis representantes das organizacións sindicais e empresariais máis sobranceiras en Galicia co obxectivo de analizar o estado actual da protección da información persoal dos equipos de traballo e os inminentes cambios normativos.
O encontro foi inaugurado polas responsábeis das devanditas entidades, Marta Fernández, Verónica Martínez e Susana Soneira, respectivamente. Segundo sinalaron, a decisión de abordar esta cuestión débese á importancia que recobrou nos últimos anos, polo espallamento dos medios dixitais, a cuestión do tratamento, límites e ámbito da intimidade na relación laboral.
Segundo se lembrou nas xornadas, o artigo 4.2.e) do Estatuto dos Traballadores e Traballadoras dispón que na relación de traballo, os traballadores e traballadoras teñen dereito ao respecto da súa intimidade e á consideración debida á súa dignidade. Ademais, o artigo 20.3 desta norma establece que o empresario ou empresaria poderá adoptar as medidas que estime máis oportunas de vixilancia e control para verificar o cumprimento polo traballador ou traballadora das súas obrigas e deberes laborais, gardando na súa adopción e aplicación a consideración debida á súa dignidade.
Yolanda Maneiro, profesora da Universidade de Santiago de Compostela encargada de arrancar a quenda de intervencións, salientou que o impacto das novas tecnoloxías “pon en xaque” dereitos fundamentais do traballador e traballadora como son a intimidade e a protección de datos. “O límite do control do empresariado estarían”, apuntou recorrendo ao sinalado polo Tribunal de Dereitos Humanos da UE, “no principio de proporcionalidade, no requisito de necesidade e na idoneidade da medida de control, entre outros aspectos”.
Durante a xornada tamén se afondou no Regulamento (UE) 2016/679, do 27 de abril de 2016, Regulamento Xeral de Protección de Datos, que entra en vigor o vindeiro 25 de maio e que segundo se destacou na xornada “vai cambiar o panorama da protección de datos para as empresas, que deberán ser máis dilixentes no axeitado” tratamento de datos persoais. Segundo se fixo saber, “no ámbito da relación laboral vai desenvolver efectos importantes, posto que introduce novidades en relación co reforzo do consentimento, un máis esixente deber de información, a obriga de notificar os fallos de seguridade ou un encarecemento das sancións polo incumprimento, que van depender do volume de facturación da empresa”, detallaron desde a organización da xornada.

Categorías: Ciencia

A Internet das Cousas e a revolución que carrexa, ao detalle nun obradoiro da Cámara de Santiago

códigocero - Mér, 04/11/2018 - 15:35

A Cámara de Comercio de Santiago quere familiarizarnos ao máximo coa Internet das Cousas, un ámbito cheo de posibilidades profesionais e de desenvolvemento (agora que comezamos a vivir a cuarta revolución industrial, a dos obxectos conectados e intelixentes), facendo fincapé en divulgar a importancia do eido IoT (Internet of Things) entre as e os menores de trinta anos (fomentando a súa empregabilidade futura). Estamos a falar do programa Constrúe o teu Futuro. Internet das Cousas (IOT) e Emprendemento, que comeza o 16 de abril e que vén da man da entidade cameral, en colaboración (co-financiando) do Concello de Santiago e a Fundación INCYDE a través do Fondo Social Europeo.
A formación está destinada a mozos e mozas menores de 30 anos, en desemprego pero con arela de pór en marcha a súa propia iniciativa de mercado ou ben de atopar traballo nunha empresa do sector. Tamén se dirixe a persoas interesadas en ampliar e consolidar os seus coñecementos no campo da creatividade dixital.
O programa ten por obxecto ensinar “os distintos modelos de negocio baseados e realizados baixo este paradigma, con especial atención aos sectores máis puxantes e considerar as novas solucións que comercializaron as startups no ámbito nacional e internacional”. Segundo apunta a Cámara acerca da importancia de adestrarnos no eido IoT, hoxe en día son innumerábeis os ámbitos de actividade onde comezan a ter vital importancia as tecnoloxías das cousas conectadas: saúde, docencia, industria, agro, turismo, deporte ou lecer.
O obradoiro debullará as tecnoloxías vencelladas á Internet das Cousas e que tipo de requisitos son básicos para construír un modelo de negocio analizando e realizando un estudo de mercado, dará a coñecer as ferramentas necesarias e distinguirá casos de éxitos das empresas que xa triunfaron no ámbito IoT. Desenvolveranse conceptos de información masiva (Big Data), uso de aplicacións móbiles e conceptos de ciberseguirdade e benchmarking.
O programa, no que poderán participar un máximo de 25 persoas, celebrarase ata o 25 de maio no viveiro de empresas da Cámara de Comercio de Santiago (Polígono de Costa Vella. Rúa República Checa nº 40. Santiago), luns e xoves en horario de 10:00 a 12:00 horas. Tamén inclúe titorías individuais entre o alumno e o consultor, sempre dentro do horario de apertura do viveiro de empresas (de 8:00 a 22:00 horas). As persoas interesadas en participar poden poñerse en contacto coa Cámara de Comercio de Santiago (981596800; vivero@camaracompostela.com) ou consultar o programa completo e inscribirse na web www.camaracompostela.com.

Categorías: Ciencia

Ourense quece motores para revolucionar a cultura e a creatividade tecnolóxica

códigocero - Mér, 04/11/2018 - 13:31

O vindeiro mes de maio, do 2 ao 5, Ourense volverá ser o epicentro das novidades do audiovisual e da cultura na cuarta edición da Ourense ICC Week, o Marco das Industrias Culturais e Creativas que organiza a Deputación. Indo ao encontro en cuestión, contará cunha gran variedade de actividades: música, videoxogos, humor e historia mesturando a innovación dos temas a tratar, coa tradición de senlleiros lugares da provincia de Ourense (mosteiros de Rocas e San Clodio, a Casa Museo Otero Pedrayo ou o Campus de Ourense) que acollerán ditas actividades. A presentación da programación da Semana das Industrias Culturais e Creativas en Ourense, celebrábase onte no Centro Cultural Marcos Valcárcel e nela participaban o presidente da Deputación de Ourense, Manuel Baltar; e os coordinadores da Ourense ICC Week, Juan Rivas e Manuel Araujo.
Emporiso, a inauguración da Semana das Industrias Culturais e Creativas, na que se falará dos Mundos deseñados, será o mércores, 2 de maio, ás 18 horas, no Centro Cultural Marcos Valcárcel. A presentación e apertura da xornada correrá a cargo do presidente da Deputación de Ourense. A continuación, a fotógrafa e deseñadora, Bárbara Ouka Leele; o axitador cultural, Paco Clavel; e o documentalista e comisario cultural, Juan Sánchez, falarán da Arte nas portadas, e despois, será a quenda para a ilustradora, deseñadora gráfica e Motion Grapher, María Grande e o deseñador gráfico, Javier Mariscal, quen exporán a cuestión da Cultura do deseño. Ese mesmo día, a partir das 21 horas, será a quenda para o apartado musical da xornada, co grupo Morgan, no Teatro Principal da Deputación de Ourense.
O xoves 3 de maio, ás 9.30 horas, a programación retomarase no mosteiro de San Pedro de Rocas (Esgos), onde terá lugar unha mesa redonda sobre o Patrimonio rupestre europeo. Investigación, xestión e difusión. A xornada será presentada polo presidente da Deputación de Ourense e coordinada polo profesor de arqueoloxía da Universidade Autónoma de Madrid, Jorge López Quiroga, e pola arquitecta e profesora da Universidade de Florencia, Carmela Crrescenzi. Ás 10 horas, Carmela Crrescenzi falará do itinerario polo patrimonio rupestre mediterráneo; ás 10.30 horas, o director do Museo do Territorio de Palagianello (Italia), Domenico Caragnano ofrecerá un relatorio sobre a pintura nas igrexas rupestres de Puglia e Basilicata. Ás 11.30 horas será a quenda para o profesor de Historia do Dereito da Universidade de Bari, Antonio G. Mastrangelo, quen falará da propiedade na área rupestre de Gravine (Taranto); e ás 12 horas, Jorge López Quiroga exporá o tema da aplicación das novas tecnoloxías en San Pedro de Rocas. Pola súa banda, o doutor en física e profesor na Universidade do Pireo (Grecia), Theodoros Ganetsos, exporá un relatorio sobre as análises físico-químicas non destrutivas das pinturas e frescos, a partir das 12.30 horas, e media hora despois, o espeleólogo, escritor e profesor, Alexey Zhalov, falará das vivendas medievais escavadas na rocha en Bulgaria, para rematar a actividade cun debate.
Pola tarde, ás 17 horas, a programación trasladarase ata o Centro Cultural Marcos Valcárcel para falar da supervivencia na xungla dixital. Participarán o músico e compositor, Nacho García Vega e o músico e compositor, Luis Mendo. Neste mesmo centro, a partir das 19.00 horas será a quenda para o humor e a cultura, na que se darán cita o humorista, Rober Bodegas; o humorista, Alberto Casado; a humorista, blogueira e ilustradora, Raquel Córcoles; e o humorista e xornalista, Juan Ramón Monet, para falar do sentido da creatividade. A mesa será moderada polo xornalista Manuel de Lorenzo.
O venres, 4 de maio, as actividades trasladaranse ao mosteiro de San Clodio (Leiro), onde a partir das 10.30 horas, falarase da creatividade e do sector TIC, baixo o título Unha viaxe cara a sociedade do coñecemento. Abrirá a xornada a directora de Imaxin Software, Luz Castro, quen falará da gamificación e software galego. Ás 11.30 horas, será a enxeñeira e deseñadora gráfica, Cynthia Gálvez, quen fará un relatorio sobre AV. VR. MR.: Alén da tecnoloxía, e rematará, ás 12.30 horas, a avogada e policy manager, Sara Rodríguez, para falar da economía colaborativa.
Os máis pequenos terán unha cita coa cultura contemporánea ás 16.30 horas, pois levarase a cabo o ICC Kids no Centro Cultural Marcos Valcárcel. Primeiro coa actividade Xogas ou traballas?, a cargo dos youtubeiros @Chincheto77 e @Tonacho que explicarán como fixeron da súa paixón a súa profesión; e a partir das 17 horas, estará a E-Cuarela, unha instalación de pintura dixital ao aire libre para que os nenos poidan pintar con auga este panel. Ás 18 horas, as actividades trasladaranse ao Liceo de Ourense onde será protagonista o sector audiovisual. Alí o presidente da AGAG (Asociación Galega de Guionistas), Nico Campos, e a directora e guionista de cine, Gracia Querejeta, falarán Do papel á pantalla: a traxectoria dunha muller creativa. E, nese mesmo centro, ás 19.30 horas, será a quenda para Autores e Creadores, coa entrega do galardón Premio MUSA SGAE a cargo do presidente da SGAE, José M. Fernández Sastrón, ao autor e compositor de Los Suaves, Yosi Domínguez. A xornada rematará, ás 21 horas, no Teatro Principal, co concerto de Mikel Erentxun.
O sábado, 5 de maio, ás 11 horas as actividades comezarán na Casa Museo Otero Pedrayo (Amoeiro), cunha xornada adicada á xestión cultural co tema Xestión de públicos: non quero que veñan, quero que volvan; a cargo da subdirectora artística do Museo Nacional Centro de Arte Reina Sofía, Carlota Álvarez Bassó. O acto será presentado pola xornalista, Marta Gómez. Ás 12 horas, será a entrega dos Premios Rodolfo Prada Chamochín, un galardón instaurado pola Deputación de Ourense en colaboración coa Asociación Galega de Profesionais da Xestión Cultural, co obxectivo de recoñecer o labor que realizan os xestores culturais en Galicia.
Ás 10.30 horas, nos Xardíns Padre Feijóo estará novamente o panel da E-Cuarela, no marco da ICC Kids, e completará a programación o obradoiro Emojinarium que será ás 12.00 horas no Centro Cultural Marcos Valcárcel a cargo de María Grande no que analizarán os emojis, a linguaxe universal das expresións e crearán os seus propios personaxes. E, ás 12.00 horas, nese mesmo lugar, dará comezo a ICC Show Vermú, na que actuarán Rufus T. Firefly, Esposa, Bifannah e Silvia Superstar DJ. O humor volverá a ser protagonista, nesta ocasión no Teatro Principal, a partir das 20.00 horas, co espectáculo de Pantomima Full.
ICC Gamers
De maneira paralela a estas actividades, os días 3, 4, 5 e 6 de maio, o Campus de Ourense, acollerá a ICC Gamers que inclúe dúas actividades: a ICC Technium R Encounter e a ICC eSports. ICC Gamers, escaparate das últimas tendencias en videoxogos e deportes en liña, contará coa colaboración da Deputación de Ourense, a Universidade de Vigo, R Euskaltel, a Federación Galega de Automobilismo e Mahou.
Indo ao miolo desta vertente de lecer dixital, a xuntanza ICC Technium R Encounter botará a andar o día 3 de maio ás 18 horas e rematará o 6 de maio á mesma hora, no Pavillón Universitario de Ourense. A edición 2018 da quedada informática terá catro grandes torneos: League Of Legends, Counter Strike Global Offensive, Hearthstone e Super Smash Bros Brawl. Haberá 4.000 euros en premios en torneos ou en outras actividades lúdicas dentro da party.
A xeito de curiosidade lembrar que na pasada edición, o moañés Aarón González Santomé, acadou un novo récord Guinness do xogo Final Fantasy 10, logo de permanecer 40 horas consecutivas competindo.
Volvendo ao apartado de xogos, este completarase coa devandita actividade ICC eSports, que tamén se celebrará no Pavillón Universitario de Ourense, o 5 de maio ás 10 horas até o 6 de maio ás 15 horas. Dentro desta celebración os torneos que se disputarán serán: FIFA 18, Clash Royale, e GT Sports. A entrada aos mesmos pode adquirirse estes días en Ticketea (podéndose acceder a ela a través da web www.technium.es). Neles poderán participar xente de fóra da ICC Technium R Encounter, así como as persoas da propia party.

Categorías: Ciencia

Vitae fórmanos nas posibilidades do noso cerebro para o ámbito profesional

códigocero - Mér, 04/11/2018 - 12:22

Partindo da base de que nós os profesionais e o coñecemento que xeramos somos o principal activo dunha empresa, case é de obriga que haxa metodoloxías e técnicas para adestrar as nosas capacidades. Delas depende, de feito, o éxito dunha iniciativa innovadora no seo dunha firma. Nisto ten moito que dicir o noso cerebro, que é un dos eidos de investigación máis importantes deste século e de boa parte do anterior. O seu funcionamento aplicado á ciencia ten capacidade para curar doenzas, mellorar os procesos educativos e, por suposto, optimizar empresas. Vitae Consultores quere botarnos luz sobre todo isto e por iso vai organizar o 11 e o 12 de maio, no Hotel Attica 21 da Coruña, o curso Neurociencia: Bases Neurocientíficas da Motivación e a Emoción aplicada á empresa.
O obradoiro, de oito horas, está deseñado para “que entendamos en que consiste a motivación e a moción, como funcionan e como se manifestan no noso día a día. O enfoque da actividade formativa, engade Vitae, pretende que aprendamos de maneira sintética e rigorosa como traballa o noso cerebro ante os estímulos, o que nos permitirá elaborar un pensamento crítico e unha opinión propia sobre estes temas dende unha perspectiva biolóxica.
Segundo lembra a consultora, o alicerce do curso está nas moitas posibilidades que ofrecen a motivación e emoción para unha/un profesional dun ámbito innovador e creativo. Estas posibilidades tenden sempre cara ao positivo e o rendíbel e buscan, en circunstancias saudábeis e confortábeis, o benestar persoal e a autorrealización, con todo o de frutífero que teñen estes estados de ánimo para as empresas. Nos últimos anos, a neurociencia e psicoloxía desenvolveron teorías que procuran comprender as claves dun dos grandes misterios da ciencia: como funciona o noso cerebro. “Estes avances”, explica Vitae, “permitiron elaborar modelos que achegan un valor moi significativo e innovador ás diferentes áreas que compoñen o noso sistema de organización socioeconómico”.
En base ao devandito, neste novo curso da consultora galega mostrarásenos un marco actualizado das ditas cuestións, axudándonos a comprender como funciona o noso entendemento ante situacións como a emoción ou o estres, ou como se axusta a nosa motivación ao contexto cotián (e elaborar logo estratexias para decidirmos os pasos a seguir ou entender os nosos propósitos actuais).
A persoa encargada de impartir o obradoiro é Iván Ballesteros, biólogo e doutor en Farmacoloxía e Terapéutica Humana pola Universidade Complutense de Madrid. Ballesteros é investigador no Centro Nacional de Investigacións Cardiovasculares (CNIC, Madrid), profesor de Neurociencia no Curso Experto Universitario en Intelixencia Emocional da Universidade da Rioxa, e no Máster en Adestramento de Imaxe (Domingo Delgado, Madrid). É co-autor do libro Hazte experto en Inteligencia Emocional.

Categorías: Ciencia

As nosas comunity managers locen talento no Día das Redes Galegas

códigocero - Mér, 04/11/2018 - 09:01

O vindeiro 25 de abril vaise celebrar o Día das Letras Galegas, co epicentro no Campus de Pontevedra. Trátase dunha xornada con dous obxectivos definidos: por unha banda reivindicar a figurar dos responsábeis de comunidades virtuais ao abeiro do rápido espallamento das redes sociais nas nosas vidas e, pola outra, mostrar o importante potencial do alumnado (futuras/os profesionais) da Facultade de Ciencias Sociais e da Comunicación. Na organización do evento atópase o profesor Xavier Martínez Rolán, en colaboración coa dita Facultade, a Vicerreitoría do Campus, a Área de Normalización Lingüística da Universidade (ANL) e a Secretaría Xeral de Política Lingüística da Xunta de Galicia. A xornada contará un ano máis cun panel de conferenciantes moi destacábel: as/os tituladas/os de Ciencias Sociais e Comunicación.
Entre as relatoras figuran (entre outras) Lucía Gómez, directora de mercadotecnia de contidos e medios sociais de Elogia, a referencial axencia de márketing con sede en Vigo; Cristina García, responsábel de comunicación dixital en Esmerarte Industrias Creativas, firma centrada en promoción cultural ao abeiro das novas ferramentas e en facer comunidade arredor do fenómeno creativo; ou Jorge Medal, redactor e guionista de formatos televisivos,
Xunto ás devanditas relatoras, o Día das Redes Galegas contará tamén coa presenza activa de Cristina Rodríguez, técnica de normalización lingüística da ANL, que abordará neste evento a experiencia de Youtubeir@s, proxecto promovido polos servizos de normalización lingüística das tres universidades galegas, nove concellos e a Deputación da Coruña e dirixido a dar visibilidade ao uso do galego a través dun concurso nesta rede social.
Segundo engade Martínez Rolán, o Día das Redes Galegas é un evento aberto a todo o público interesado que manterá, ademais, o formato de edicións anteriores, de tal xeito que trala súa inauguración (prevista para ás 10.00 horas) cada conferenciante falará da súa experiencia en proxectos para, por último, completar a xornada cun coloquio, moderado polo profesor Alberto Dafonte. “Non podemos falar de redes sociais sen ter en conta a bidireccionalidade da comunicación”, sinala nese senso Martínez Rolán, dun evento no que tamén se promoverá o debate a través da rede social Twitter, co hastag #redes galegas, e que será retransmitido por UVigo TV.

Categorías: Ciencia

Barcos de invernadero

Investigación y Ciencia - Mér, 04/11/2018 - 00:00
Más de 170 Gobiernos se aproximan a un acuerdo para recortar las emisiones de gases de invernadero de la industria naval y colmar así un hueco en los acuerdos de París de 2015.
Categorías: Ciencia

El cerebro del abuelo se parece al del nieto

Investigación y Ciencia - Mér, 04/11/2018 - 00:00
En el cerebro de las personas de más de 70 años nacen tantas nuevas neuronas como en el cerebro de un adolescente.
Categorías: Ciencia

As Termas e o Concello de Lugo presentan a segunda edición do concurso de innovación Wonderful

códigocero - Mar, 04/10/2018 - 23:38

As Termas Centro Comercial e o Concello de Lugo presentaron na mañá deste 10 de abril a segunda edición do seu certame conxunto de innovación, o concurso Wonderful. Segundo fixeron saber, a nova convocatoria do certame vai dirixida a apoiar unha vez máis a posta en marcha (da man de empresas ou persoas de Lugo) de iniciativas que marquen un antes e un despois (no económico, no produtivo pero tamén no social) na contorna da que xorden, a lucense. Ou sexa, que do que se trata é de recoñecer o esforzo dos lucenses a prol de dar forma a cadansúa visión de futuro empresarial. A iniciativa foi dada a coñecer pola concelleira de Economía, Emprego e Desenvolvemento Económico de Lugo, Ana Prieto, e o xerente do Centro Comercial As Termas, Esteban Patiño.
As propostas candidatas poden participar en catro categorías diferentes. A primeira é a de Solucións Innovadoras para tendas e centros comerciais; a segunda, Solucións Innovadoras que melloren a calidade de vida do cidadán con respecto á súa cidade (Smart Cities); a terceira é a de Negocios ou tendas innovadoras, e a cuarta, Ideas Innovadoras.
Segundo informaron, as tres primeiras están concibidas para empresas ou startups que traballan con innovación nos ámbitos das Cidades Intelixentes, as vendas ao por maior (retail) ou do comercio. A última diríxese sobre todo a emprendedores e universitarios con ideas de negocio innovadoras en calquera ámbito e coa posibilidade de plasmar os seus proxectos ou mesmo participar mediante os seus traballos de fin de grao.
Os gañadores conseguirán un conxunto de premios orientados a axudarlles nas fases iniciais, grazas aos patrocinadores e impulsores de Wonderful: Bstartup de Banco Sabadell, BizSpark de Microsoft, El Economista, IBM, a Universidade Francisco de Vitoria ou Indra. Os premios terán unha contía de 5.000 euros en metálico que entregará Lar España (propietaria, precisamente, do Centro Comercial As Termas), unha entrevista nun medio de comunicación do eido estatal, o acceso a financiamento bancario e investimento privado, axudas de software e novas tecnoloxías, consultoría estratéxica, formación e asesoramento personalizado. Ademais, os gañadores das categorías de innovación en retail participarán no Wonderful Summit 2018, presentando os seus proxectos no segundo Encontro Nacional de Innovación en Centros Comerciais e Retail que se celebrará en xullo de 2018.
Na cita de hoxe tamén se lembrou que Wonderful desenvólvese en Lugo grazas ao impulso de As Termas que, xunto co Concello de Lugo e outras entidades locais, colaboran no fomento da innovación na provincia. “Este tipo de iniciativas son clave para axudar ao desenvolvemento económico e social da nosa cidade e o das empresas ou emprendedores que están a innovar, xa que toda axuda é importante nos difíciles momentos iniciais”, sinalou Esteban Patiño.
Desde este 10 de abril e até o 31 de maio os emprendedores ou empresas poderán participar, presentando os seus proxectos de negocio a través do portal www.proyectowonderful.es.

Categorías: Ciencia

As historias de Instagram estrean modo retrato

códigocero - Mar, 04/10/2018 - 22:30

Coa chegada das cámaras duais aos móbiles púxose de moda a función de enfoque selectivo ou desenfoque de fondo, que en todos os casos é un efecto realizado en base a software, de xeito que non é preciso contar con dobre cámara para aplicalo, e como proba diso temos que Instagram está a estrear na súa cámara a función de Focus, un novo modo de disparo que funciona tanto coa cámara traseira como coa frontal e que permite enfocar a unha persoa á vez que desenfoca suavemente o fondo. Este efecto pode empregarse tanto para disparar fotografías como para gravar vídeo, e cando o usuario remata pode tamén engadir filtros, adhesivos ou texto como en calquera outra historia.
A función de Focus está presente ca nos iPhone SE, 6S, 6S Plus, 7, 7 Plus, 8, 8 Plus e X, así como nun número limitado de dispositivos con Android. Para poder gozar da funcionalidade temos que ter a versión 39.0 ou superior da aplicación de iOS para iOS ou Android.
Outra novidade que estrea Instagram é que agora en iOS será posible facer uso de adhesivos nos que mencionar a outros usuarios, facilitando así o conectar con amigos a través das historias.

Categorías: Ciencia

Páxinas

Subscribirse a IGACIENCIA agregador - Ciencia