Ciencia

Instagram permitirá destacar historias para que non se perdan tras 24 horas

códigocero - Mar, 12/05/2017 - 22:00

As historias de Instagram están a ter cada vez máis importancia, polo que en moitos casos é unha mágoa que estes contidos efémeros deixen de estar dispoñibles ao cabo de 24 horas, de aí que agora presenten un par de ferramentas dentro de Instagram para facilitar o uso deste formato para expresarnos máis: as historias destacas e o arquivo de historias.
As historias destacadas serán unha nova sección dentro do noso perfil de Instagram, que aparecerán xusto baixo a nosa biografía a xeito dunha serie de círculos con historias que poderemos elixir de entre todas as que estean no noso arquivo privado, facendo así que calquera poida acceder ás mesmas pese a ter pasado 24 horas dende a súa publicación orixinal. É unha funcionalidade moi práctica que pode axudar a que outras persoas poidan facerse unha idea dos tipos de contidos que publica alguén, sen ter que seguilo durante varios días para iso. Tamén resulta de utilidade para que grandes momentos do pasado poidan manterse máis tempo visibles.
O arquivo de historias, pola súa banda, vén a ser o equivalente ao arquivo de publicacións de Instagram, só que desta volta os contidos son privados e só pode velos o autor, de xeito que de querer recuperar unha historia hai que compartila a través das antes mencionadas historias destacadas. Non estamos ante unha función pensada só para complementar a anterior, senón que tamén persegue que os usuarios poidan revisar os seus momentos favoritos do pasado. As historias gárdanse de xeito automático neste arquivo, agás que o usuario decida desactivar tal opción dende a configuración da súa conta.

Vídeo no que presentan as novas ferramentas de Instagram

Categorías: Ciencia

A Deputación de Lugo bota man das redes para impulsar as compras no comercio local este Nadal

códigocero - Mar, 12/05/2017 - 18:00

A Deputación, o Concello e a Federación de Comercio de Lugo presentaron hoxe a campaña Merca e Gaña polo Nadal, destinada a fomentar que a cidadanía opte polos establecementos locais, de proximidade, para as súas compras deste remate de ano e comezos do vindeiro. Na presentación da iniciativa, na que tamén participou ABANCA, fíxose fincapé nas diferentes facianas comunicativas da campaña de sensibilización, que se vai materializar a través de distintos soportes promocionais, sendo a páxina web www.nadalmercaegana.com un dos principais referentes. A iniciativa está a ser promovida pola Deputación a través de todos os colectivos que integran a Federación de Comercio de Lugo, e coa que colabora o Concello na capital. O obxectivo? Promover as compras nos máis de 5.500 establecementos de toda a provincia. Haberá premios de até 10.000 euros para reinvestir nos comercios.
Merca e Gaña polo Nadal desenvolverase dende o 6 de decembro ao 6 de xaneiro. Durante estas datas, ademais de incentivar as compras no comercio local con contidos de promoción nas rúas dos 67 concellos ou en redes sociais co cancelo #nadalmercaegaña; as persoas que merquen en calquera dos establecementos da provincia poderán participar no sorteo de 20 cartóns agasallo de 300 euros e 20 tarxetas máis de 200 euros. Para isto, débese fotografar o tícket da compra e rexistralo en www.nadalmercaegana.com, ou solicitar o seu rexistro ao comerciante. O sorteo ante notario será o 12 de xaneiro. Para máis información, na presentación da campaña recomendouse facer seguimento da mesma a través de www.nadalmercaegana.com e nas redes sociais.
O deputado Álvaro Santos Ramos, presente na cita de hoxe, salientou que “as compras polo Nadal supoñen entre o 25% e o 30% do total das vendas anuais do comercio, sendo unhas datas prioritarias para este sector”. Con esta campaña, engadiu, “queremos contribuír ao impulso dos máis de 5.500 establecementos dos 67 Concellos, que dan emprego a 12.500 lucenses e que representan o 13% do PIB da provincia”. E apuntou: “Queremos concienciar á cidadanía da importancia de mercar no comercio de proximidade e trasladar que mercando nos establecementos da nosa provincia gañamos todos”.
Pola súa banda, a concelleira Ana Prieto Nieto explicou que o Goberno local tamén colabora co desenvolvemento desta campaña na capital, onde participarán os 700 establecementos existentes, que dan emprego a 1.750 persoas.
A maiores, o presidente da Federación Galega de Comercio, José Seijas López, subliñou que “o obxectivo fundamental desta campaña é encher de Nadal a provincia de Lugo e crear ese ambiente festivo e alegre propio destas datas fomentando as compras”. E engadiu: “Con esta iniciativa apostamos por incentivar o uso das novas tecnoloxías, tanto por parte dos consumidores como dos comerciantes, pois temos claro que a dixitalización do comercio é o presente, un paso obrigado”

Categorías: Ciencia

Balidea celebrou en familia os seus 15 anos de andaina

códigocero - Mar, 12/05/2017 - 16:54

A firma compostelá Balidea, un dos nosos máximos referentes TIC (por produtos, por innovación, por presenza en mercados), festexou o pasado venres os seus 15 anos de traxectoria no sector tecnolóxico-dixital galego. O encontro, celebrado no Pazo do Faramello (Rois), xuntou a práctica totalidade dos/as 180 profesionais que conforman a empresa, procedentes da sede compostelá e das sedes de Bilbao, A Coruña, Ourense e Vigo. O director xeral de Balidea, Lorenzo Rodríguez, lembrou o camiño percorrido pola compañía: “Nestes 15 anos conseguimos grandes logros dos que temos que estar orgullosos. Non sempre foi doado, pero creo que podemos mirar con orgullo todo o traballo feito”.
Asemade, Lorenzo Rodríguez salientou as importantes contribucións da súa equipa humana: “Balidea é unha empresa creada coa finalidade de prover solucións de calidade e para iso tiñamos claro que precisabamos dos mellores profesionais”. Na celebración rendéuselles homenaxe aos 15 empregados e empregadas máis veteranos/as coa entrega dun detalle conmemorativo.
Fitos, achados e plans de futuro
Balidea comezou o seu percorrido en xuño de 2002 como software factory coa finalidade de incorporar as tecnoloxías da información ao ámbito da administración pública, no que se especializou. Hoxe é unha empresa de servizos TI que ofrece software e, ademais, consultoría e desenvolvemento, I+D+i, soporte e infraestruturas de telecomunicacións. A empresa de Santiago, como temos sinalado en múltiples ocasións dende Código Cero, non só ten presenza en Galicia, senón tamén en Euskadi, en Cataluña, en Dinamarca e no Reino Unido.
Segundo sinala a propia compañía con motivo da celebración dos seus tres lustros de andaina, a súa aposta cara ao futuro artéllase en tres eixes: a potenciación da innovación, para crear produto; a continuación da internacionalización, iniciada en Europa en 2013; e a ampliación do seu enfoque ao sector privado, no que xa incrementou a súa presenza, de xeito que actualmente constitúe o 30 % da súa facturación.
Nestes anos, Balidea levou a cabo proxectos con diversos clientes, en varios sectores (con especial fincapé na saúde) e en distintas comunidades autónomas, como Galicia, Asturias, Cantabria, Aragón, Madrid, Andalucía e Baleares.
No eido internacional, a empresa destaca os proxectos efectuados para a Axencia Danesa de Enerxía, a European Fisheries Control Agency (EFCA) da Comisión Europea ou as Nacións Unidas (ONU); Balidea é dunha das escasas compañías españolas provedora de servizos TIC para esta organización.

Lorenzo Rodríguez, director xeral de Balidea

Froito dos proxectos de Balidea, desenvólvense aplicacións e plataformas coma PREBENCAR, para a prevención de problemas cardiovasculares; UnderstAID, para a prestación de asistencia a persoas que coidan de pacientes con demencia senil; a Rede de Escolas na Nube, para compartir experiencias e materiais entre centros; Energystyrelsen, para efectuar o cálculo do investimento, o custo e o aforro enerxético dos sistemas de calefacción eficientes; ou SIGUE, para facilitar a localización en interiores de pacientes en espazos hospitalarios.
A incorporación máis recente a esta carteira de produtos é ADESTRapp, unha tecnoloxía para a análise en tempo real de vídeo deportivo en competición e adestramento que se está a utilizar por parte de equipos de máximo nivel, coma o Atlético de Madrid, o Celta de Vigo, o RC Deportivo, o PSG, o Málaga ou o Obradoiro, e en ligas da Arxentina, México, Dinamarca, Dubái ou China.

Categorías: Ciencia

Files Go axúdanos a liberar espazo no móbil

códigocero - Mar, 12/05/2017 - 14:33

Unha das novidades de Android Oreo (Go edition) é a nova aplicación Files Go, que busca paliar os problemas de moitos smartphones con pouca capacidade de almacenamento interna (hai dispositivos con só 4 GB de espazo) o que fai que a acumulación de imaxes, vídeos, aplicacións e documentos sexa complicado de administrar, e para o que a nova ferramenta axudará facendo doada a liberación de espazo, permitindo tamén localizar rapidamente os arquivos e compartilos con outras persoas.
Files Go achega suxestións personalizadas sobre os arquivos que podemos borrar do móbil (aplicacións que non usamos, arquivos grandes ou duplicados, vídeos ou memes de baixa resolución...), fai doado localizar os ficheiros sen ter que navegar polos distintos cartafoles (explorando así entre imaxes, vídeos, aplicacións... mediante filtros), permite crear copias de seguridade dos arquivos na nube e compartir arquivos sen conexión (podendo enviar de xeito cifrado arquivos a un amigo que estea preto sen ter que consumir datos móbiles).
Aínda que estamos ante unha ferramenta desenvolvida coa vista posta en Android Oreo (Go edition), Files Go funciona con dispositivos a partires de Android 5.0 (Lollipop) polo que a meirande parte dos usuarios actuais de smartphones poderán tirar proveito desta aplicación para liberar espazo no seu dispositivo e compartir arquivos dun xeito rápido e doado.

Categorías: Ciencia

Android Oreo (Go edition) funcionará en smartphones con poucos recursos

códigocero - Mar, 12/05/2017 - 13:42

En maio Google anunciou que Android Oreo ía contar cunha edición reducida, Android Go, destinada a dispositivos con poucos recursos, unha especie de versión Lite do sistema operativo que por fin é unha realidade, e Android Oreo (Go edition) chega mañá mesmo como unha parte de Android 8.1.
Esta edición lixeira de Android está destinada a dispositivos con entre 512 MB e 1 GB de memoria e céntrase en tres elementos chave: o sistema operativo (con melloras de desempeño e almacenamento), Google Apps (unha selección de aplicacións de Google lixeiras e relevantes) e Google Play Store (unha versión da tenda de aplicacións que destaca as versións das aplicacións óptimas para os dispositivos máis limitados).
Con Android Oreo (Go edition) as aplicacións funcionan e cargan de media un 15% máis rápido, e tamén teñen máis capacidade de almacenamento dispoñible, xa que o sistema operativo e as súas aplicacións preinstaladas buscan ocupar o mínimo posible (o 50% aproximadamente) coa mente posta en dispositivos de entrada con pouca memoria interna. O sistema tamén ten activado de serie un aforrador de datos que confían en que de media poida supor o uso de 600 MB menos de datos móbiles por usuario ao ano en Google Chrome, á vez que tamén permite administrar o uso de datos que fan as aplicacións.
Pese a estarmos ante un Android reducido, non se escatimaron esforzos en seguridade, e o novo sistema conta con todas as medidas de seguridade dunha versión de Android normal, incluíndo Google Play Protect, que comproba a seguridade das aplicacións instaladas, para que o dispositivo, os datos e as aplicacións estean seguras en todo momento.
As aplicacións de Google preinstaladas en Android Oreo (Go edition) tamén están optimizadas para consumir poucos recursos, de xeito que reducen o consumo de datos e ocupan menos espazo de disco. Estas aplicacións serían Google Go, Google Assistant Go, YouTube Go, Google Maps Go, Gmail Go, Gboar, Google Play, Chrome e a nova Files Go.

Categorías: Ciencia

A Deputación de Pontevedra rematou o proceso de implantación da eAdministración en 54 concellos

códigocero - Mar, 12/05/2017 - 13:36

A Deputación de Pontevedra vén de tomarlle o pulso ao seu proxecto para estender a Administración Electrónica nos concellos da provincia, unha iniciativa da que falamos hai un ano en Código Cero con motivo da súa presentación. Agora, o exame e os principais resultados do mesmo foron dados a coñecer pola presidenta da entidade, Carmela Silva, quen salientou o remate do proceso de implantación en 54 concellos, que coinciden precisamente co número de administracións locais que solicitaran adherirse ao programa. Arestora, indicou, a Deputación está mergullada na integración e posta en marcha deste servizo nas entidades locais menores. Segundo engadiu, a orixe desta iniciativa está na necesidade de contribuír a que os concellos desen total cumprimento á Lei 39/2015 de procedemento administrativo común das administracións públicas.
Como resultado destes traballos, as 54 administracións locais da provincia xa poden prestar servizos a través da plataforma electrónica, facilitando os trámites a moitas cidadás e cidadáns. Durante este proceso de implantación, tal e como informou a presidenta provincial, a institución achegou formación a preto de 2.200 empregadas e empregados públicos e a preto de 725 cargos públicos.
Respecto dos traballos que se van desenvolver nas entidades menores, Silva fixo saber que en Chenlo, O Porriño, xa se implantou o servizo e en breve se iniciará en Bembrive (Vigo) e Camposancos (A Guarda). Nas cinco entidades locais menores restantes da provincia de Pontevedra (Arcos da Condesa, en Caldas de Reis; Morgadáns, en Gondomar; Pazos de Reis, en Tui e Queimadelos e Vilasobroso en Mondariz) iniciarase o proceso de Administración Electrónica en función da demanda.
En total, a Deputación de Pontevedra está a investir neste proxecto 800.000 euros, un orzamento e uns obxectivos que, segundo explicou Silva, convértena en pioneira a nivel galego, “ao ser a primeira e única administración en habilitar un proxecto e recursos para axudar aos concellos e entidades menores a facer fronte á Lei 39/2015 e abordar con éxito a súa transformación dixital”.

Categorías: Ciencia

SmartPEME organiza 18 obradoiros TIC este mes de decembro

códigocero - Mar, 12/05/2017 - 13:36

A Deputación de Pontevedra deu a coñecer estes días o seu programa de actividades formativas TIC para o mes de decembro, un total de 18 de obradoiros. Estas sesións, como vén sendo costume, desenvólvense ao abeiro da rede SmartPEME, constituída polas sedes operativas de Pontevedra, Vigo, Porriño, Ponteareas, Cambados e Lalín. Dende estes centros operativos, as/os profesionais da Deputación (en colaboración cos Concellos e as asociacións) despregan un importante labor de capacitación dixital ao servizo de autónomos, PEME e traballadores. Nove dos devanditos obradoiros do mes de decembro levaranse a cabo nas áreas de Vigo, Pontevedra, Cambados e Lalín.
As quendas para decembro na oficina de Vigo comezaron este pasado luns co curso Bota as túas propias fotografías para o comercio electrónico. Dez días despois celebrarase a segunda quenda, o xoves 14 de decembro, co curso Google Analytics: Interpretación dos datos e toma de decisións. Por último, o martes 19 de decembro, as persoas interesadas poderán asistir ao obradoiro de Ferramentas TIC básicas e sinxelas para a xestión do teu negocio. A oficina SmartPEME de Vigo, na Sede da Deputación da cidade, atópase na rúa Oporto, núm. 3. Os tres obradoiros comezarán ás 19 horas.
Polo que atinxe á oficina de Ponteareas, acollerá o mércores 13 de decembro o obradoiro Coñece as claves para a dixitalización documental. O martes 19 de decembro, organizarase o curso Como utilizar Instagram para promover a túa empresa. E para rematar o ano, o xoves 21, desenvolverase o obradoiro Como facturar electrónicamente para as empresas e administracións públicas. A oficina SmartPEME de Ponteareas, no Centro de Desenvolvemento Local, atópase en Lomba do Cruceiro, núm. 5. Todos os cursos tamén comezarán ás 19 horas.
Polo que respecta á oficina do Porriño, dará acubillo (novamente en horario de 19 horas) aos seguintes obradoiros: o martes 12 de decembro, Imos chamar á porta da túa clientela: Posicionamento SEO; Google Analytics: Interpretación dos datos e toma de decisións o luns 18 de decembro e para rematar o mércores 20, o obradoiro Crea o teu propio logotipo con Canva. A oficina SmartPEME do Porriño, no Multicentro do Concello, atópase na rúa Ribeira, s/n.
Tres cursos para Pontevedra
As quendas na sede da Deputación de Pontevedra comezaron este luns ás 19 horas co curso Como facer unha exitosa campaña de publicidade no Google. A segunda cita terá lugar o mércores 13 de decembro, tamén ás 19 horas, cando impartirase o curso Woocommerce II–A solución que procurabas para vender por Internet. Por último, o luns 18 de decembro, a mesma hora, Pontevedra acollerá o curso Edición de fotografía para plataformas e-commerce. A oficina SmartPEME de Pontevedra, no Edificio Administrativo da Deputación, atópase na Gran Vía de Montero Ríos, s/n.
Tres obradoiros en Lalín
Os obradoiros programados no Viveiro de Empresas do Polígono Lalín 2000 no mes de decembro, todos eles en horario de 19 horas, terán como primeiro evento Como utilizar Instagram para promover a túa empresa, previsto para o luns 11 de decembro. O xoves 14 organizarase o obradoiro Crea o teu propio logotipo con Canva. Por último, o martes 19 de decembro terá lugar o curso Elixe a túa plataforma de comercio electrónico. A oficina SmartPEME de Lalín, no Viveiro de Empresas situado no Polígono Lalín 2000, atópase na parcela E deste espazo.
Outras tantas sesións en Cambados
A actividade de decembro do Centro ExpoSalnés de Cambados ao abeiro de SmartPEME arrancou xa este luns 4 de decembro co obradoiro Ferramentas de google para a promoción de negocios locais e seguirá o mércores 13 de decembro co curso Guía de boas prácticas para redes sociais. Por último, o mércores 20 de decembro, celebrarase o curso Sácalle partido á túa conta de Gmail. A oficina SmartPEME de Cambados, no Centro ExpoSalnés, atópase no paseo da Calzada, s/n. Todas as actividades deste mes comezarán ás 19 horas.
O Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.

Categorías: Ciencia

En marcha un portal galego para a inclusión de crianzas con necesidades educativas especiais, Pictoeduca.com

códigocero - Mar, 12/05/2017 - 13:05

A Fundación Barrié e Pictoaplicaciones (iniciativa do Grupo Promedia, con sede en Milladoiro) están a impulsar un novo portal educativo que se dirixe a fortalecer a inclusión social das crianzas con necesidades educativas especiais pola vía da inclusión tecnolóxica (as novas tecnoloxías como porta de acceso a unha vida mellor). Estamos a falar do portal Pictoeduca.com, unha proposta web gratuíta e inclusiva que, entre outras cousas, permite crear e consultar leccións adaptadas para os nenos coas devanditas demandas específicas.
O proxecto, posíbel grazas ao mecenado da Fundación Barrié, ten tamén o obxectivo de crear unha comunidade infantil de escolares, aberta á participación activa de nais, pais e educadores, que teñen ao seu dispor unha ferramenta de administración para pendurar diferentes achegas, a leccións de todo tipo de materias (matemáticas, ciencias, música), vídeos, pictogramas ou imaxes, entre outros contidos dixitais.
En palabras dos seus creadores, Pictoeduca é un “completo portal que xunta unha gran variedade de material didáctico en diferentes formatos e cuxa formulación metodolóxica suporá un apoio importante dentro das Tecnoloxías de Apoio á Diversidade”. O sitio web, ademais, foi concibido desde unha formulación con carácter integrador, sen etiquetaxes e “asumindo a heteroxeneidade das persoas, universal, onde se compartan e intercambien coñecementos e se promova a inserción social”.
O propósito último, polo tanto, “é unha mellora na calidade de vida do alumnado con necesidades específicas de apoio educativo proporcionando formación directa de e para profesionais e usuarios, reunindo os recursos necesarios para iso”.
Nun plano máis concreto, o portal e os seus diferentes recursos permiten facer cousas como dar forma a leccións empregando vídeos, imaxes e textos, e traducir todo a pictogramas cando as necesidades educativas dos nenos aos que nos diriximos así o require. Asemade, poderemos escoitar os textos que acheguemos e, para tirar partido das ferramentas que queiramos usar, teremos ao noso dispor vídeo-titoriais onde se nos explica como facelo.
Pictoeduca foi desenvolvido para PC e para móbiles con sistemas iOS e Android.

Categorías: Ciencia

O Clúster Turismo de Galicia redobra esforzos para impulsar a dixitalización das firmas do sector

códigocero - Mar, 12/05/2017 - 09:38

O Clúster Turismo de Galicia está a facer un esforzo especial para incrementar a presenza das novas tecnoloxías entre as súas empresas integrantes, con vistas a que estas poidan, a curto e medio prazo, tirar o máximo proveito das principais vantaxes que aquelas poñen en xogo (meirande presenza no mundo, ampliación de mercado, mellora de servizos e de xestión, optimización de actividade grazas á comunicación xerada cos clientes reais e potenciais, máis eficiencia e competitividade etc). Este importante traballo materialízase a través de varias frontes. Por exemplo mediante accións de debate e divulgación e encontros empresariais .
Nesta liña insírese os Encontros Clúster Turismo de Galicia, cuxa máis recente edición desenvolveuse no mes de maio
, incluíndo relatorios e mesas redondas para, entre outras cousas, abordar os retos e oportunidades que se lle presenta ao sector turístico galego co horizonte 2020 (cuestións coma o impacto turístico e as oportunidades que xeran os eventos deportivos e culturais, o desenvolvemento do turismo enogastronómico e termal ou os avances tecnolóxicos que ofrecen novas oportunidades de xestión e modernización para os establecementos turísticos). Nun plano máis concreto, na última edición dos Encontros participaron -dando a coñecer as ditas oportunidades e vantaxes- as empresas Amadeus, Nextel, Globaldit ou mesmo a plataforma AirBnB.
Outra das actividades TIC do Clúster celebradas recentemente foi o Encontro Profesional de Innovación e Novas Tecnoloxías, que se celebrou en Sanxenxo (Real Club Náutico) coa colaboración da Deputación de Pontevedra, e contando coa presenza dun centenar de empresas turísticas, provedores dixitais e profesionais do sector interesados en coñecer os cambios que se están a producir neste ámbito produtivo a nivel global. Na xornada, que incluíu relatorios e mesas redondas, mostrouse o potencial de cuestións como o traballo cooperativo para mellorar os servizos que se ofertan aos turistas ou a información a gran escala (Big Data) e a Internet das Cousas (extraendo do inxente coñecemento xerado cada día datos de valor para mellorar a eficacia, o rendemento e a capacidade de resposta das nosas empresas). Participaron empresas como R (comunicación e conectividade), Bismart (información a gran escala), Made in Mobil (Internet das Cousas), Knowdle (software de intelixencia colectiva), PastView (realidade virtual), Brandmaniac (mercadotecnia a través da figura dos influencers), Nani Arenas (consultoría turística) ou More Turismo Internacional. Asemade, na xornada amosáronse as vantaxes de proxectos e programas como SmartPEME da Deputación de Pontevedra, iniciativa para capacitar dixitalmente aos autónomos, PEME e traballadores da provincia (a través de actividades nas sedes de Pontevedra, Vigo, Porriño, Ponteareas, Cambados e Lalín). Asemade, nas sesións participou o presidente do Clúster Turismo de Galicia, Francisco González, quen sinalou que a transformación dixital é unha realidade á que cómpre adaptarse, “unha realidade que se acelerou nos últimos anos e que supón un reto para o sector turístico galego pero tamén nos abre infinitas posibilidades para competir nun mercado global”. González, durante a apertura da xornada, salientou que o novo turista “aprecia máis a calidade de conexión do Wi-Fi ca un bo almorzo, e iso témolo que ter en conta”.
Plan de Formación
O Clúster de Turismo de Galicia (CTG) desenvolveu esta tempada de outono, co apoio de IFFE Business School (no marco do convenio de colaboración subscrito coa Axencia de Turismo de Galicia) a terceira edición do seu Plan de Formación. O programa compúxose dun total de 34 accións desenvolvidas en 14 localidades galegas das catro provincias, co obxectivo de ofrecer “unha formación de alto valor engadido e de carácter gratuíto”, especialmente dirixida a mellorar as capacidades e habilidades de directivos, emprendedores e profesionais do sector turístico galego. A terceira edición do plan formativo, en palabras do secretario do Clúster Turismo de Galicia, Cesáreo Pardal, constituíu “unha forte aposta do Clúster Turismo de Galicia pola formación e a profesionalización no noso sector, ao que queremos dotar de ferramentas que o fagan máis forte e competitivo”. As accións beneficiarion a case medio milleiro de profesionais do sector.

Categorías: Ciencia

Cómo la radiación ultravioleta afecta al cerebro

Investigación y Ciencia - Mar, 12/05/2017 - 00:00
La exposición crónica a través de la piel disminuye la generación de nuevas neuronas y la plasticidad neuronal en el hipocampo. También provoca cambios de conducta.
Categorías: Ciencia

Cómo la radiación ultravioleta afecta al cerebro

Investigación y Ciencia - Mar, 12/05/2017 - 00:00
La exposición crónica a través de la piel disminuye la generación de nuevas neuronas y la plasticidad neuronal en el hipocampo. También provoca cambios de conducta.
Categorías: Ciencia

Nuevo cálculo de los ritmos de las supererupciones: no nos es favorable

Investigación y Ciencia - Mar, 12/05/2017 - 00:00
Cada 17.000 años podría haber una de estas gigantescas erupciones volcánicas capaces de amenazar a una civilización; es una frecuencia mayor de la que se creía que tenían.
Categorías: Ciencia

Henrique Neira presentou Historia da Informática no Culturgal

códigocero - Lun, 12/04/2017 - 23:14
O xornalista Henrique Neira na presentación do libro /Imaxe de Esteban Vázquez

Este sábado o xornalista Henrique Neira ofreceu unha charla na feira Culturgal de Pontevedra arredor do libro Historia da Informática. Unha cronoloxía, do que temos falado en Código Cero salientando que se trata dunha exhaustiva e pormenorizada cronoloxía arredor da historia da computación en Galicia, unha historia que, lonxe do que poidamos pensar nun primeiro intre, remóntase a épocas tan remotas coma a do megalítico, no que xa hai probas de coñecementos matemáticos complexos, o xermolo da actual informática. O estudo, de máis de duascentas páxinas, foi escrito polo propio Neira baixo a coordinación de Javier García Tobío e Fernando Suárez, vogal e presidente do Colexio Profesional de Enxeñaría en Informática (CPEIG), respectivamente.
O libro, alén do acto celebrado en Culturgal esta fin de semana, foi presentado por vez primeira en xullo do ano pasado, da man do colexio, nun acto no que estiveron convocados autoridades académicas e políticas, colaboradores, colexiadas e colexiados, amais de representantes do sector TIC, baixo a presidencia do titular do Executivo galego, Alberto Núñez Feijóo. A presentación tivo lugar na Cidade da Cultura de Galicia, en Santiago de Compostela.
A obra non só recolle os primeiros pasos da informática moderna en Galicia, senón que tamén dá conta de momentos moi representativos da nosa andaina dixital, como o proxecto Telegal que a partires do ano 1979 buscaba implantar a Informática nas escolas, a posta en marcha do CESGA (e os seus distintos fitos evolutivos), a celebración de feiras tecnolóxicas na nosa comunidade, a modernización das redes de telecomunicación no noso territorio, a creación do dominio .gal, a participación da Universidade de Vigo na construción de varios picosatélites ou incluso a demostración do funcionamento nun coche autónomo de PSA-Citroën. Tamén recolle algunhas importantes contribucións profesionais da nosa terra, como por exemplo a carreira despregada pola compostelá Ana María Prieto López, que, tras facer un curso de COBOL, converteuse na primeira muller programadora da empresa Bull General Electric (en Madrid) e a primeira galega en programar computadores.

Categorías: Ciencia

Un grave fallo de seguridade afectaba ás centraliñas na nube de Telefónica

códigocero - Lun, 12/04/2017 - 21:44
A vulnerabilidade facilitaba o acceso e manipulación da rede de telefonía de grandes empresas españolas

Denuncian que o sistema de centraliñas virtuais de Telefónica, Centrex IP, servizo publicitado como fiable e seguro para grandes clientes, tería un grave fallo de seguridade dende, cando menos 2013, facilitando a clientes do servizo acceder aos doutras empresas dun xeito doado e así podendo tombar as súas liñas telefónicas, acceder ás mensaxes de voz, suplantar identidades ou manipular e desviar chamadas, estando entre os afectados Dragados, o Atlético de Madrid, o FROB, o Grupo IFA e moitas outras entidades.
O enxeñeiro informático que deu a voz de alarma constatou que o sistema que viña de instalar na súa empresa tiña moitos problemas, decatándose de que o contrasinal que se entregaba ás empresas era predicible, xa que estaba composto por un número fixo inicial, os tres primeiros díxitos do código postal no que está a empresa e 3 números correlativos. Amais, con só mudar os tres últimos díxitos do contrasinal era posible coarse na rede de telefonía doutra compañía.
Tras detectar o grave fallo contactou con Telefónica o 9 de novembro, e ao non recibir resposta transmitiu o problema ao INCIBE e á unidade de delitos telemáticos da Garda Civil, e non foi até que o asunto saíu nun medio de comunicación cando a operadora decidiu solucionar o problema, o que aconteceu o pasado 29 de novembro.
Estamos ante un fallo de seguridade moi grave que non debería ter pasado nunca, xa que o contrasinal predeterminado debería ser dun único uso, forzando ao usuario a mudalo. Tamén resultará imposible coñecer se nos últimos anos houbo xente que fixo un mal uso da información obtida aproveitando a vulnerabilidade que, entre outras cousas, facilitaba a listaxe interna de números telefónicos de directivos de bastantes centos de empresas españolas.

Categorías: Ciencia

Facebook prepara un Messenger infantil

códigocero - Lun, 12/04/2017 - 20:00

Facebook iniciou hoxe o lanzamento en EE.UU. da versión preliminar de Messenger Kids, unha nova aplicación móbil orientada a facer que os pequenos poidan intercambiar mensaxes de texto e vídeo coa familia e os amigos dun xeito seguro, cun nivel de control para que os proxenitores poidan estar tranquilos, xa que terán control do uso da nova aplicación que fagan os seus fillos en tabletas e smartphones.
Polo momento esta versión preliminar de Messenger Kids só está dispoñible para iPad, iPod Touch e iPhone, e desenvolveuse con axuda de usuarios e expertos para conseguir un equilibrio entre as funcionalidades da aplicación e o control que poden establecer os titores sobre a mesma.
Coa nova ferramenta os pequenos poden establecer conversas individuais ou en grupo mediante chats de vídeo cos contactos que aprobaran previamente os pais, evitando así a ameaza de falar con descoñecidos, e para facer que a relación sexa máis divertida, será posible empregar máscaras, emoticonas e efectos de son durante as videoconferencias.
Aínda que o vídeo é a funcionalidade principal de Messenger Kids, tamén é posible enviar fotografías, vídeos ou texto aos contactos autorizados, que recibirán os contidos a través da súa aplicación de Messenger ordinaria.
Nos vindeiros meses a aplicación tamén chegará a Android, destacando o feito de que os cativos que a usen non precisan darse de alta en Facebook.

Categorías: Ciencia

A Cátedra Deloitte da UVigo premia o traballo ben feito en ciberseguridade

códigocero - Lun, 12/04/2017 - 16:34

A Cátedra Deloitte de Ciberseguridade da Universidade de Vigo, creada hai un ano para achegar formación e análise arredor dos principais riscos da comunicación dixital e as ameazas que nos chegan a través destas canles, deu a coñecer a semana pasada os nomes dos alumnos recoñecidos ao abeiro da primeira convocatoria dos seus premios. Os responsábeis da cátedra entregaron un total de sete galardóns. A entrega de distincións, con contías que oscilaron entre os 500 e os 1.000 euros, tivo lugar na sala de xuntas da Escola de Enxeñaría de Telecomunicación. No acto, os directores da cátedra (Íñigo Cuiñas, director da dita escola do Campus de Vigo, e Rubén Frieiro, socio de Deloitte encargado da área de Ciberseguridade) aproveitaron para felicitar ao alumnado distinguido e para facer balance deste primeiro ano de vida desta iniciativa.
Na sesión tamén se fixo un chamamento a a prol de iniciativas que fomenten e incentiven o papel da muller nas carreiras científico-técnicas, “pois de non conseguilo estamos a perder, cando menos, o 50% de todo o potencial de talento TIC, incluídos os temas de ciberseguridade”, sinalaron Cuiñas e Frieiro.
O Premio ao Mellor Traballo Fin de Mestrado foi dar a mans de Pablo Domínguez, quen sinalou que a súa investigación céntrase na Internet das Cousas e consistiu no desenvolvemento e na validación dun protocolo de cifrado de mensaxes en dispositivos con poucos recursos, empregando diferentes procesos de simulación. Domínguez recolleu o premio acompañado do seu titor, o profesor Manuel Fernández Veiga.
O Premio ao Mellor Traballo Fin de Grao foi para Pedro Tubío por un estudo e desenvolvemento dunha metodoloxía de análise de riscos empregando algoritmos de predición abertos similares a Cortana. “Trátase de intentar detectar cando hai unha ameaza e facelo antes de que aconteza”, explicou o alumno, que recolleu o premio acompañado pola profesora Cristina López Bravo.
Polo que atinxe ao Premio ao Mellor Proxecto con Impacto Social, recaeu en Alberto José Novoa por un traballo no que se desenvolven ferramentas para medir a temperatura no perímetro de zonas afectadas por incendios forestais e unha avaliación da súa utilidade para a prevención de posíbeis reproducións.
A maiores destes premios recoñecéronse tamén as mellores propostas de traballo, “coa idea de que se propoñan máis ideas para este ano”, tal e como recalcou Íñigo Cuiñas. Os premiados neste caso foron os alumnos Vlad Dragos Darau e Samuel Rodríguez, estudante da Escola de Enxeñaría Informática, que non puido asistir por atoparse fóra do país, recollendo o seu premio o director da escola Francisco Javier Rodríguez. Os premios de creación e deseño da web recaeron ambos no estudante José Manuel Mariñas Bascoy.
Con respecto ao balance da cátedra para 2017, Íñigo Cuiñas salientou a realización de múltiples conferencias e obradoiros que correron a cargo de profesionais “de recoñecido prestixio”; a realización dun curso complementario sobre ciberseguridade ao que asistiron 28 persoas e a adquisición de equipamento para a realización dun obradoiro sobre ciberseguridade en procesos automatizados que se realizará en 2018. A todo isto, engadiu a relevancia dos traballos de preparación do Máster en Ciberseguridade que comezará a impartirse o curso que vén en colaboración coa Facultade de Informática da Universidade de Coruña.

Categorías: Ciencia

ABANCA lanza web para impulsar a reforestación en zonas afectadas polo lume

códigocero - Lun, 12/04/2017 - 16:00

ABANCA quere contribuír á recuperación dos montes arrasados polos lumes durante o pasado mes de outubro. Por este motivo vén de pór en marcha unha campaña de reforestación que terá dúas vertentes de desenvolvemento complementarias: por unha banda nas oficinas da entidade na nosa xeografía e, pola outra, a través da web www.unhanovaarbore.com. Mediante esta iniciativa vanse recadar fondos e axudar á reforestación do monte galego afectado pola catástrofe ambiental deste outono. A previsión, co impulso desta campaña, é plantar 4.608 árbores, unha por cada empregado. A medida é de facto unha campaña de Nadal, pero con vertente claramente solidaria e de responsabilidade medioambiental.
Segundo informou a entidade galega, a partir deste 7 de decembro, a cidadanía poderá sumarse a esta iniciativa e colaborar con 10 euros, a cambio ABANCA entregará un agasallo solidario, Unha árbore nova. O regalo contén un tronco de cartón reciclado co que se pretende simbolizar que este ano a árbore de Nadal está onde ten que estar: nas forestas galegas. Co diñeiro recadado, a entidade financeira, a través do seu programa de voluntariado corporativo, realizará tarefas de reforestación nas zonas afectadas polos incendios en colaboración co Grupo Naturalista Hábitat.
A iniciativa foi dada a coñecer hoxe polo director de Marketing, Intelixencia e Dixital de ABANCA, Jorge Mahía. Segundo fixo saber, a iniciativa estará presente en todas as sucursais do banco en Galicia e o presente solidario tamén se poderá conseguir a través da web www.unhanovaarbore.com e recibilo en casa. Unha árbore nova irá acompañado dun folleto explicativo coas distintas accións que se irán pondo en marcha para reforestar o monte queimado. Ademais, todas as persoas que axuden cunha árbore e queiran saber que se fará con ela, poden deixar o seu correo electrónico e iránselles contando todas as iniciativas que de maneira progresiva acompañarán este plan.
As tarefas de replantación das árbores iniciaranse a partir de marzo de 2018. Os empregados da entidade que forman parte do programa de voluntariado corporativo de ABANCA serán os encargados de plantar, en colaboración co Grupo Naturalista Hábitat, as árbores que se adquiran.

Categorías: Ciencia

Estrella Galicia vende a súa cervexa de Nadal a través de Amazon

códigocero - Lun, 12/04/2017 - 14:00
A edición limitada de Nadal de Estrella Galicia chegou onte a Amazon.es

O pasado mes de abril sorprendía a fichaxe de Juan José Delgado de Amazon para Estrella Galicia, compañía na que pasaría a ocupar o cargo de Global Chief Digital Officer, un posto de nova creación para adaptar a empresa cervexeira ao novo cliente dixital. O que resultaba difícil de anticipar é que este directivo que traballaba para Amazon en Londres fose a emprender figuradamente o camiño de volta, xa que onte sorprenderon empregando Amazon como canle de venda para a edición limitada de Nadal de Estrella Galicia.
Deste xeito é posible adquirir en liña paquetes de 6 botellas de 75 centílitros de cervexa a un prezo de 21,60 euros, destacando esta edición pola estética das botellas, que lembra ás de cava, conseguindo así un toque orixinal. Incluso as botellas levan unhas etiquetas nas que empregaron tintas holográficas para crear un efecto de luminiscencia nas lámpadas representadas.
Non estamos ante o único produto de Estrella Galicia dispoñible en Amazon, xa que a tenda en liña conta con varias cervexas no seu catálogo, ofrecidas nuns casos a través de vendedores independentes e, outras ocasións, a través da propia Estrella Galicia. Tamén están dispoñibles algúns lotes de Estrella Galicia dentro do servizo Amazon Pantry, que facilita a compra de produtos do día a día grazas ao seu envío en caixas con cabida de até 20 quilos de peso ou 110 litros de volume cun gastos de envío fixos de 3,99 euros.

Categorías: Ciencia

Lowi regala 6 meses de HBO aos seus clientes

códigocero - Lun, 12/04/2017 - 12:59

O operador de baixo custo de Vodafone, Lowi, pese a non ter servizo de televisión, xa que limítase a liñas móbiles e conexións á Internet por fibra óptica, vén de iniciar unha atractiva promoción a través da que tanto os seus clientes actuais como os novos poderán gozar de 6 meses de HBO sen custo adicional, agasallo co que celebran os seus 3 anos de vida e que incluso pode interesar aos que queiran simplemente subscribirse a HBO, xa que o servizo de vídeo baixo demanda comercialízase a 7,99 euros/mes, mentres que a tarifa máis económica de Lowi é de 6 euros/mes.
Para gozar da promoción é preciso ser cliente de Lowi antes do 31 de xaneiro, podendo así acceder á sección de promocións da aplicación móbil da compañía ou da área privada da súa páxina web para conseguir un código que pode canxearse na web de HBO no momento de rexistrarse.
Esta promoción resulta especialmente atractiva nestas datas, xa que así os usuarios de Lowi poderán gozar do catálogo de contidos de HBO durante o Nadal. Cómpre lembrar que, aparte das series reclamo como Game of Thrones ou WestWorld, HBO tamén ten unha boa selección de contidos para público infantil.

Na sección de promocións da aplicación móbil de Lowi pode conseguirse o código promocional para gozar dos 6 meses de balde de HBO
Categorías: Ciencia

Unha app de AtlantTIC para mellorar a expresión de persoas con autismo, premiada por Indra e Universia

códigocero - Lun, 12/04/2017 - 12:47

As tecnoloxías tamén están para romper barreiras, comunicativas e tamén sociais. Así o entenden os responsábeis do proxecto galego TalkAACtive, impulsado polo Grupo de Tecnoloxías da Información da Universidade de Vigo (Centro AtlantTIC, Campus de Vigo) e dirixido a fornecer ás persoas autistas dunha aplicación móbil que lles permita, no ámbito laboral, practicar e autoavaliar a súa fala e escritura mediante pictogramas, e todo isto grazas a un sistema de xeración de linguaxe natural. Segundo puidemos saber, a iniciativa foi seleccionada (xunto a outros dos proxectos das universidades de Salamanca e Málaga) na segunda convocatoria de axudas a proxectos de investigación aplicada ao desenvolvemento de tecnoloxías accesíbeis, lanzada pola empresa Indra e a Fundación Universia.
O Grupo de Tecnoloxías da Información, que grazas á súa inclusión na dita convocatoria recibirá 24.000 euros para o desenvolvemento do proxecto, está formado por Enrique Costa, Milagros Fernández, Silvia García e Jonathan Juncal e o director do mesmo, Javier González Castaño. Para o impulso da ferramenta móbil, o equipo de AtlantTIC contará coa colaboración das asociacións Teavi e Autismo Ourense, con cuxos usuarias e usuarias probará a aplicación. “Primeiro falaremos coas asociacións para ver a que ámbito laboral orientan ás persoas con autismo e así ver cales son as necesidades de comunicación nese ámbito. Logo, crearíase a aplicación móbil para esas persoas, adaptándoas a ese ámbito e axudándolle a practicar a comunicación, para que cando se incorporen ao traballo saiban as frases usuais”, explican Milagros Fernández e Enrique Costa.
O xurado da II convocatoria de axudas a proxectos de investigación aplicada ao desenvolvemento de Tecnoloxías Accesíbeis, lanzada por Indra e a Fundación Universia, destacou dos tres proxectos seleccionados “a súa innovación e a excelencia tecnolóxica da solución formulada, así como a viabilidade para converterse nun produto ou servizo real que aínda non existe no mercado”. A súa utilidade práctica nunha contorna real de inclusión laboral, o alcance do seu impacto e a súa gratuidade ou baixo custo para as e os usuarios finais, foron outras cuestións valoradas polos integrantes do xurado, que destacou a elevada calidade dos máis de 70 proxectos que concorreron á convocatoria.
Por certo que a elección de TalkAACtive na dita convocatoria non é o primeiro recoñecemento que recibe o traballo do Grupo de Tecnoloxías da Información no ámbito da comunicación de pictogramas e xeración del linguaxe natural. “Dentro do proxecto Accegal, que eu dirixo, temos publicadas varias aplicacións de comunicacións con pictogramas e unha das liñas de traballo do grupo é a xeración de linguaxe natural. A idea de unir estas dúas liñas foi previa a este certame e de feito o premio da Fundación Vodafone que recibiu Silvia García, cun dos galardóns Connecting for Good á Innovación en Telecomunicación, seguía esta liña”, lembra Costa.
O proxecto, titulado Librería para a xeración de linguaxe natural en castelán, ten o obxectivo de facilitar a comunicación de persoas con trastornos na fala a través da xeración de linguaxe natural a partir de seleccións de palabras. A proposta que presentou e que conformaba o seu traballo fin de máster é unha adaptación ao castelán da librería SimpleNLG para a xeración automática de linguaxe natural a partir de seleccións de palabras.

Categorías: Ciencia

Páxinas

Subscribirse a IGACIENCIA agregador - Ciencia