códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 2 horas 59 min

O CDTIC presenta os seus novos programas formativos a semana que vén

Mér, 02/21/2018 - 14:32

O Centro Demostrador TIC (CDTIC) da AMTEGA presenta, o día 27 de febreiro, os dous novos programas formativos que vai poñer en marcha, #MesD e #DemosXWeb, no marco da Xornada Marketing Dixital e Comercio Electrónico: Tendencias 2018-2020.
Durante a Xornada, Rubén Bastón, director da revista Marketing4ecommerce e especializado en social media e contidos dixitais en Elogia, esbozará as tendencias en Comercio Electrónico e Marketing Dixital que gañarán peso nos vindeiros anos, motivados por un escenario de constante evolución, tanto tecnolóxica como cultural. A continuación as PEME tomarán a palabra nunha mesa de debate onde compartirán a súa experiencia na venta dos seus produtos e servizos a través de internet.
Esta actividade, que poderá seguirse nas redes sociais a través do cancelo #eTendencias2020, está destinada principalmente a cargos directivos, propietarios e persoal de pequenas e medianas empresas. Para asistir cómpre inscribirse vía web ou a través da súa aplicación dispoñible para plataformas Android e iOS.

Programa #MesD

Trátase dun programa que se desenvolverá ao longo de sesións formativas concentradas cada mes nun tema amplo e cunha duración aproximada de dúas horas.
O primeiro bloque temático estará centrado no Comercio Electrónico. Desenvolverase ao logo do mes de marzo, todos os martes, na aula CeMIT de Vigo. Nestas xornadas abordaranse os seguintes aspectos: claves para o éxito, prezos e competencia, campañas e promocións, plataformas tecnolóxicas e tendas.
O segundo bloque temático, que se celebrará no mes de maio, estará dedicado ao Marketing Dixital, con sesións sobre o marketing de buscadores, marketing en redes sociais, email marketing ou analítica de resultados web.

Programa #DemosXWeb

Estoutro programa desenvolverase a través de sesións demostrativas dunha hora, que se retransmitirán exclusivamente por streaming, e que tratarán sobre unha ferramenta, aplicación ou tema concreto. O obxectivo deste formato é ter unha explicación rápida e cómoda para o receptor, que non ten que desprazarse.
Inicialmente, os temas que se van tratar nestas sesións serán: redes e internet, marketing, comercio electrónico, mobilidade, produtividade e negocios, multimedia e utilidades.

Categorías: Ciencia

O teclado Swype di adeus

Mér, 02/21/2018 - 13:47

A chegada das pantallas táctiles como interface para a introdución de texto supuxo un grande cambio para os usuarios, e conscientes de que a mecánica do tecleo físico non era eficiente, dende Nuance desenvolveron Swype, un teclado virtual alternativo que facilitaba o introdución de palabras sen levantar o dedo da pantalla grazas á súa interpretación dos movementos (cruzando tal información cun dicionario). Esta tecnoloxía causou furor, e aínda que inicialmente só estaba dispoñible para Android, ao abrirse iOS á incorporación de teclados de terceiros tamén conseguiu certo éxito no iPhone. Pero a competencia neste ámbito é moi forte, e finalmente Nuance non atopa rendible a creación de solucións deste tipo que se vendan directamente ao usuario final, e anuncian a retirada do teclado Swype da App Store de iOS.
Paralelamente, o teclado Swype + Dragon, que estreou versión 3.2 a primeiros de mes, tamén paraliza o seu desenvolvemento, confirmando o que poderiamos definir como a morte dos teclados Swype orixinais, aínda que sobra dicir que xa hai outras compañías que colleron o relevo, e podemos ver solucións semellantes de SwiftKey e incluso nos teclados oficiais de Google.
Algo que tamén parece confirmar este cambio de rumbo de Nuance é que cada vez resulta máis complicado atopar rendibilidade para solucións móbiles que se comercialicen directamente para usuarios finais, pois xa pasou o momento no que os usuarios de smartphones compran aplicacións de xeito frecuente, e tal modelo de negocio está en crise, pasándolle o relevo a esquemas free-to-play que só poden sustentarse con bases de usuarios moi elevadas.

Categorías: Ciencia

Principia un ciclo de xornadas para persoas maiores sobre o uso de dispositivos móbiles

Mér, 02/21/2018 - 11:39

A Federación Galega de Asociacións Universitarias Séniors (FEGAUS), unha das entidades aliadas dixitais do Plan de Inclusión Dixital de Galicia 2020 impulsado pola AMTEGA, vén de iniciar un ciclo de vinte charlas informativas sobre o uso de dispositivos móbiles dirixidas a persoas maiores que desenvolveranse até o 23 de marzo en horario de 10:30 a 12:00 horas. Estas charlas poden seguirse en streaming dende calquera das 18 aulas CeMIT que participan e que ofertan un total de 600 prazas.
Os contidos, explicados dunha forma amena e sinxela, están orientados para que os asistentes saquen o máximo partido do uso habitual da tecnoloxía, novas aplicacións e recursos que facilitan a vida cotiá como o orientados á planificación de viaxes, os trámites electrónicos, a fotografía e o vídeo, os pagos por internet ou as aplicacións relacionadas coa saúde e os coidados para una madurez mais activa.
É recomendable poñerse en contacto cos responsables das aulas CeMIT participantes en cada unha das charlas ou inscribirse a través da Internet, para acudir as sesións presenciais, sendo o único requisito esixible o de ser usuario da rede CeMIT.
As aulas que retransmitirán algunha ou todas estas actividade son: Ames, Arzúa, Bande, Beariz, Boiro, Campo Lameiro, Carballedo, Celanova, Cuntis, Fisterra, Leiro, Marín, Oroso, Ortigueira, Pontevedra, Ribadeo, Valga e Xunqueira de Ambía.

Categorías: Ciencia

As redes xogarán un papel decisivo no proxecto para protexer e reivindicar o noso cabalo salvaxe

Mér, 02/21/2018 - 09:39

A Universidade de Vigo vén de achegar máis datos sobre a investigación Estudo e conservación do Cabalo Galego de Monte e o proxecto resultante da mesma para optimizar o noso coñecemento sobre estes animais, facilitar o seu seguimento e o seu estado de saúde e mellorar os procesos de xestión das greas de cabalos nas súas contornas, e todo isto poñendo en práctica novas tecnoloxías de información e emprego de drons. Segundo puidemos saber, o proxecto atópase na súa segunda fase, que inclúe, entre outras cousas, acordos de custodia do territorio con comunidades de montes ou administracións, a creación da primeira entidade específica de salvagarda de cabalos e, como dixemos, o uso de novos recursos como vehículos aéreos non tripulados para estudar novas metodoloxías de inventariado e os efectos desta especie na redución da biomasa forestal. Estes retos foron presentados estes días en Pontevedra, facendo fincapé no papel crucial das TIC para a súa consecución.
A iniciativa ten a súa orixe en 2015, cando o grupo de investigación AF-4 da Escola de Enxeñaría Forestal (Campus de Pontevedra), a través dun proxecto seleccionado pola Fundación Biodiversidade (dependente do Goberno central), comezou a traballar arreo no estudo e na conservación do cabalo galego de monte, unha especie de gran valor por moitos e variados motivos: para comezar, é unha raza autóctona nosa, de gran importancia medio ambiental e unha das poucas especies de cabalos salvaxes que viven aínda en liberdade.
A equipa AF-4, que traballa agora co grupo Sepcom (da Facultade de Ciencias Sociais e da Comunicación), ten entre os seus obxectivos fundamentais o de conquerir que os logros obtidos no proxecto se manteñan no tempo. Segundo salientou na presentación da iniciativa o responsábel do grupo AF-4 e investigador principal do proxecto, Enrique Valero, protexer o cabalo salvaxe é protexer o que somos e, tamén, protexer os nosos montes. De feito, indicou, é unha especie de gran importancia para reducir a biomasa forestal (toxo e outras plantas), cuxa acumulación “é un perigo para a propagación dos lumes”, así como na “conservación de biodivesidade”, xa que contribúe tanto ao mantemento de “hábitats declarados prioritarios pola Unión Europea” como a conservación de especies como o lobo.
Na presentación da investigación tamén participaron a investigadora do grupo AF-4 Xana Álvarez, o integrante do grupo Sepcom Oswaldo García e o representante da Comunidade de Montes Veciñais en Man Común de Estacas (Fornelos de Montes), Raimundo Domínguez.
Como dixemos, entre as novidades desta segunda fase dos traballos atópase o uso de drons como ferramenta coa que “acometer os labores de inventariado desta especie”, así como para avaliar “a incidencia positiva que teñen estes cabalos na acumulación de biomasa”, estudando canto e como contribúen a súa redución ao longo do ano a través da xeración de modelos volumétricos. Trátase duns traballos que, coa colaboración da empresa Xeométrica, levaranse a cabo nunha parcela piloto nos montes que xestiona a CMVCM de Estacas. Montes nos que no ano 85 vivían en torno a 300 cabalos e nos que hoxe só fican quedan 25 ou 30, segundo lembrou Raimundo González, quen salientou a importancia deste proxecto, “non só pola conservación dunha raza autóctona que é tamén o bombeiro do monte”, senón para a propia supervivencia “do monte e do rural galego”.
Segundo engadiron, a incorporación do grupo Sepcom posibilitará pór o foco noutro dos retos do proxecto: a divulgación e a sensibilización da sociedade galega respecto da importancia desta especie e o seu papel cultural, patrimonial e ecolóxico. Para logralo, Sepcom encargarase da realización de “contidos audiovisuais periódicos que vaian da man da propia investigación”, xunto cunha análise do impacto de cada unha das pezas que integren esa “campaña dixital”. A estas contribucións engadirase a difusión nas redes sociais e o uso da información volumétrica en tres dimensións que xeren os drons para poder ofrecer ao público unha serie de contidos nos que “poida elixir cando e como quere velos”, explicaron.

Categorías: Ciencia

Monte Pindo presentará estes días os froitos do seu traballo Trekker con Google

Mar, 02/20/2018 - 23:50
Xil Caamaño intérnase no Monte Pindo portando a mochila Trekker

A confluencia do Monte Pindo de Carnota, por unha banda, e a Rede pola outra, segue dando novos e interesantes froitos. E máis tendo en conta que nin se trata dun monte calquera (amais de ser o emprazamento do Olimpo Celta é un enclave de singular beleza paisaxística e gran importancia medio ambiental) nin tampouco da Internet lle xurdiu un simple apoio: o apoio veu da man de Google. Segundo nos conta a Asociación Monte Pindo Parque Natural, a principal valedora da preservación e visualización desta paraxe, o proxecto Trekker Monte Pindo (posto en marcha en colaboración co dito buscador) xa xerou unha manchea de actividades interesantes que serán presentadas o sábado 24 de febreiro ás 18.00 horas na Lonxa Vella de Lira.
A colaboración con Google consistiu en parte no mapeo e rexistro virtual da práctica totalidade das rutas de sendeirismo de Carnota para poñelos á disposición de todo o mundo a través de plataformas coma Google Street View ou Google Maps.
Por certo que logo da cita Lonxa Vella de Lira, o 28 deste mes, cuarta feira, está prevista en Santiago outra actividade de Asociación Monte Pindo cos medios de comunicación e as entidades, as empresas e os profesionais do ámbito das novas tecnoloxías da información. Esta xornada levarase a cabo no salón real do Hostal dos Reis Católicos de Santiago, a partir das 11.00 horas.
Nestas xornadas a asociación contará coas explicacións e sensacións das persoas responsábeis técnicas do proxecto Trekker e do voluntariado que participou na captura das imaxes. Ademais, proxectarase “un espectacular documental de 10 minutos sobre como se fixo este proxecto”, en palabras dos responsábeis do mesmo. O audiovisual está producido por Guillermo Ascanio e por Miguel Mariño, colaborador da asociación e recentemente proclamado director da Academia Galega do Audiovisual, e coa colaboración do Concello de Carnota.
Máis datos sobre o Proxecto Trekker
A idea de mapear os camiños do Monte Pindo xurdiu a finais de 2016 da man de Santi Llecha, membro da directiva da asociación. A proposta consistiu en solicitar a participación da asociación no programa Trekker Loan de Google, que permite ás entidades facer uso dun avanzado e vangardista equipo tecnolóxico de rexistro para incorporar ás súas plataformas cartográficas Maps, Earth ou Street View camiños que os coches da marca non poden percorrer. A proposta foi aprobada e decontado a asociación púxose a traballar, co apoio (tamén) do Concello de Carnota. Logo de varios meses de negociacións, finalmente o equipamento Trekker arribou a Carnota xa non só co obxectivo inicial de mapear os camiños do Monte Pindo inicialmente previstos, senón de facer todos os do municipio que fora posíbel cubrir.
Segundo lembran dende a asociación, a iniciativa foi ben acollida pola xente dende os seus primeiros pasos, e contou co importante traballo de voluntarios e voluntarias que percorreron as corredoiras de sendeirismo de Carnota carrexando a carga da mochila Trekker, que pesa uns 20 quilos sen contar as baterías e memorias. En pouco máis dun mes remataba a fase de traballo de campo, co resultado total de 160 quilómetros percorridos distribuídos nuns 50 roteiros distintos, incluíndo as súas variantes e mesmo un itinerario costeiro pilotado polo alcalde, Moncho Noceda.
Logo disto entrou en xogo a equipa de Google Street View, quen comezou a avaliar as imaxes rexistradas, “determinando que a práctica totalidade delas reunía os requirimentos de calidade que a marca esixe antes de incorporar as imaxes aos seus sistemas”, explican dende a asociación, engadindo que os resultados do traballo resultaron ser un “éxito rotundo”.

Categorías: Ciencia

O peche de Tractis confirma o fracaso do DNIe

Mar, 02/20/2018 - 21:21

No ano 2009 o Ministerio de Industria emprendeu unha campaña de promoción do DNI electrónico para o que contaron coa empresa Tractis para distribuír 300.000 lectores de DNIe, que remitían aos interesados por só 2 euros en concepto de gastos de xestión. Estes lectores USB facilitaban o uso do DNIe nos nosos equipos informáticos, de xeito que o carné servía como certificado dixital ente as administracións públicas, pero tamén confiábase en que tal tecnoloxía puidese servir para identificar a usuarios ante moitos outros servizos en liña e, como exemplo diso, a propia Tractis publicara un engadido para WordPress que facilitan a identificación de usuarios para publicar no seu blog a través do DNIe.
Pero finalmente o uso do DNIe non conseguiu callar socialmente, de xeito que os obxectivos de Tractis como empresa non puideron acadarse, xa que estaban especializados na oferta de métodos de verificación de identidade e sinatura electrónica baseados precisamente nos sistemas de identidade emitidos por gobernos. En vista desta situación, Tractis anuncia o cesamento dos seus servizos de certificación electrónica o vindeiro 30 de abril.
O peche de portas de Tractis sería consecuencia directa do fracaso do uso do DNIe no sector privado en España, o que entenden que é consecuencia da falta de dispositivos lectores, a dificultade do seu uso, a falta de casos de éxito e incluso a competencia da FNMT (que cos seus certificados dificultaba a iniciativa privada).
Dende Tractis consideran que a administración pública está a ser moi lenta na resposta das demandas do mercado en relación ao DNIe, e como exemplos mencionan que tardouse 10 anos en estender a validez dos certificados do DNIe e 11 anos para eliminar o sistema de prezos da FNMT (só despois de que a Unión Europea forzase tal medida), o que consideran inadmisible, xa que o sector privado precisa axilidade para progresar, e non poden tardar anos, e mesmo décadas, en recibir resposta ás súas demandas.
O futuro do DNIe parece pesimista, especialmente se temos en conta que boa parte destes documentos teñen actualmente os seus certificados dixitais revogados por culpa dun fallo de seguridade, situación que leva a Tractis a pechar tras 13 anos de actividade.

Categorías: Ciencia

Google Pay quere facilitar os pagamentos en todas as plataformas de Google

Mar, 02/20/2018 - 19:44

O pasado verán chegou a España Android Pay, unha plataforma de pagamentos móbiles propiciada por Google que estes días está a reformularse, de xeito que a partires de agora responderá ao nome de Google Pay, facilitando así dende unha única aplicación a consulta das compras recentes, os billetes e os métodos de pagamento, aínda que a intención de Google é ir moito máis aló, de xeito que se integre en todos os produtos da compañía, facilitando así a realización de compras dende o navegador web Chrome, dende o Asistente de Google ou dende outras plataformas de Google.
Google Pay tamén serve para pagar en tendas físicas, para o que é preciso contar cun smartphone con NFC e, na liña de Samsung Pay, tamén permite conseguir recompensas co seu uso e facilita o almacenamento de tarxetas de fidelización para poder levar todos os plásticos nun único lugar. En cidades como Londres, Kiev ou Portland tamén é posible empregar Google Pay para o transporte público, de xeito que xa non hai que lembrar levar enriba o bono de transporte.
Para manter esta nova política de marca, a aplicación Google Wallet pasará a chamarse Google Pay Send.

Categorías: Ciencia

A Mesa e AGAL apostan polos medios dixitais para recuperar os nomes tradicionais dos días da semana

Mar, 02/20/2018 - 19:30

A Mesa quere reivindicar os nosos nomes tradicionais dos días da semana (domingo, segunda feira por luns, terza por martes, cuarta por mércores, quinta por xoves, sexta por venres, sábado e volta a comezar), uns nomes tradicionais galego-portugueses que en Código Cero levamos un tempo reivindicando tamén e que agora, coa integración das redes en múltiples niveis da nosa vida diaria, podemos impulsar aínda máis de maneira efectiva. E com máis razón tendo en conta que nos insiren máis plenamente na comunidade lusófona (máis de 230 millóns de persoas no mundo) con todo o potencial cultural, social e económico que isto implica. Baixo esta premisa, A Mesa xuntou forzas coa Associaçom Galega da Língua (AGAL) e xa puxo en marcha unha web específica. Ademais, lanzou unha campaña com contidos audiovisuais e un bánner para ser distribuído nos medios de comunicación e outras plataformas dixitais.
Segundo nos conta A Mesa pola Normalización Lingüística, a campaña integral irá especialmente dirixida ás crianzas, por un lado, e a medios informativos dixitais, polo outro.
Para o primeiro dos ámbitos, o da nenez, conta co apoio audiovisual da banda de música infantil Mamá Cabra, que compuxo a canción Na segunda feira co obxectivo de facilitar ás crianzas a aprendizaxe dos días da semana (entre outros tesouros de que andan á procura).
No que atinxe aos medios dixitais, distribuirase (a partir do día 20) nestas canles e noutras plataformas un bánner específico para informar do día do mes e da semana en que vivimos e accedemos a esas canles e plataformas. Premendo nel, seremos encamiñados á devandita páxina web da Mesa que dá cobertura á campaña. Nela podemos ver información lingüística e histórica sobre os días da semana na mesma normativa ortográfica que normalmente usa o sitio web en que o bánner sexa inserido. A información contida nesta páxina web contará cunha unidade didáctica para ser explorada no ensino primario.
Os medios que así o fagan, aparecerán como colaboradores da campaña.
Segundo explica A Mesa, os nomes tradicionais dos días da semana estaban plenamente estendidos até ben entrado o século XX, para logo ir caendo no esquecemento por mor da introdución das formas que todas e todos coñecementos. A idea da iniciativa é reivindicar as designacións históricas tirando partido do feito de aínda estaren estas vivas en boa parte da nosa xeografía, aínda que só entre as persoas máis vellas.
Segundo A Mesa e a AGAL, “para as persoas preocupadas polo galego é fundamental que saiban que temos forza para recuperar as nosas palabras aínda que sexa no límite da desmemoria. No caso concreto dos días da semana, a súa revitalización sería moi motivadora, porque afecta unha serie de palabras usadas diariamente por calquera persoa”.

Categorías: Ciencia

O Concello de Oleiros dixitaliza o rexistro

Mar, 02/20/2018 - 16:29

O Concello de Oleiros vén de dar un importante paso en materia de Administración Electrónica, ou sexa, en materia dos recursos que permiten a máxima accesibilidade da información público-local, a dispoñibilidade, a transparencia, os trámites seguros a distancia e a participación cidadá. Hoxe mesmo, o Goberno local procedeu a pór en marcha a tecnoloxía que permitirá dixitalizar o rexistro municipal, tanto de entrada como de saída. Desde hoxe, os documentos que presenten os cidadáns ante a Administración local quedarán dixitalizados, podendo conservar os orixinais os veciños e veciñas.
Segundo informa o Executivo local, o de hoxe é un paso máis do Concello de Oleiros na posta en marcha da Administración Electrónica, “que xa se atopa moi avanzada cunha sede electrónica propia na que se poden facer numerosos trámites”. O Concello tamén lembra que nos vindeiros meses seguirase avanzando para mellorar e ampliar o servizo telemático que se lle presta aos veciños e veciñas do municipio con, entre outras cousas, o rexistro electrónico desde dispositivos móbiles e ordenadores.

Categorías: Ciencia

Will Smith convértese en youtubeiro

Mar, 02/20/2018 - 13:50

Que figuras anónimas consigan sona internacional a través de YouTube é algo que cada vez sorprende menos, pero que a estas alturas unha celebridade consolidada estree canle en YouTube pode resultar máis rechamante, sendo moi rechamante o caso de Will Smith, músico e actor que conta agora cunha canle de YouTube de seu que está a piques de chegar aos 700.000 subscritores, facendo que xurdan incógnitas como a súa motivación para facer tal, se o público seguirao con maior intensidade que a youtubeiros puros ou se un actor de 49 anos será capaz de captar a atención das novas xeracións ou se simplemente terá unha nova vía para chegar aos seus seareiros de sempre.

Smith amosando o ridículos que son algúns accesorios para cámaras que mercan os novos youtubeiros de xeito impulsivo

Polo momento os vídeos de Smith son pouco serios, e non parecen ter grandes pretensións, amosando experimentos curiosos, contando anécdotas, facendo parvadas e, en definitiva, tratando de capturar a esencia dos vídeos que teñen éxito actualmente en YouTube e, de feito, incluso pode notarse certa inspiración no formato dos vídeos de Casey Neistat (quen acumula 8,9 millóns de subscritores en YouTube e un dos seus vídeos incluso superou os 49 millóns de reproducións).
Dá a impresión de que a intención de Will Smith é ofrecer un vídeo cada semana, como un xeito de congregar á súa audiencia, aproveitando así tamén para dar unha maior proxección ás súas actividades, o que pode supor un pulo á promoción dos seus filmes, e abrir tamén novas oportunidades, ao presentar unha nova face pública da súa persoa.

Último vídeo da canle de Will Smith

Categorías: Ciencia

A Aula CeMIT de Ponteareas achega novos cursos de balde co nexo común de incidir na inclusión dixital

Mar, 02/20/2018 - 13:18

A Aula CeMIT do Concello de Ponteareas vén de retomar a súa actividade, logo do cambio de ano, con novos cursos de balde sobre diferentes aspectos da informática e todos co nexo común de impulsar a alfabetización dixital da cidadanía. Segundo informa a Concellería de Novas Tecnoloxías que dirixe Benito Márquez, da que depende o centro, a aula seguirá ofrecendo os seus servizos até decembro deste ano 2018 gracias ao convenio de colaboración entre o Concello de Ponteareas, a Xunta de Galicia, a FEGAMP e a Axencia para a Modernización Tecnolóxica (AMTEGA). Estes obradoiros están dirixidos a tódolos tramos de idade co obxectivo de “formar, actualizar os currículos do alumnado e, sobre todo, achegar a informática e as novas tecnoloxías a toda a cidadanía”, explican dende a Concellería.
Haberá cursos (todos de balde) sobre o manexo de Excel, edición informática ou sobre ofimática en xeral. Ao longo do ano tamén haberá obradoiros específicos, como por exemplo manexo de Facturaplus que serán anunciados na páxina web do Concello. O horario destas actividades será de 16:00 horas a 21:00 horas e están abertas a toda veciñanza de Ponteareas.
“O obxectivo desta aula é promover a inclusión no uso das novas tecnoloxías, ofrecendo os coñecementos necesarios para que as persoas poidan desenvolverse cun ordenador, e prestando especial atención aos colectivos máis afectados pola brecha dixital”, explica Benito Márquez, engadindo que “tamén buscamos fomentar a formación dixital entre os profesionais e achegar ás PEME as vantaxes da Sociedade da Información”. O edil tamén aproveitou a ocasión para animar a tódolos veciños a que se anoten nos diversos cursos e “aproveiten esta oportunidade”.


Categorías: Ciencia

Vodafone e Huawei converten en realidade as chamadas 5G co novo estándar NSA

Mar, 02/20/2018 - 13:14

Vodafone vén de dar un relevante chimpo en materia de comunicacións avanzadas, as que se dirixen a converter a tecnoloxía 5G (tecnoloxía chamada a achegar velocidades de descarga mínimas de 20 Gbps) en algo cotián e cen por cen integrado nos nosos hábitos cotiáns. Para reforzar este chouto ao futuro e darlle carta de viabilidade, Vodafone e Huawei completaron de maneira conxunta a primeira chamada 5G no mundo, realizada desde Castelldefels (Barcelona) a Madrid.
E fixérono botando man das especificacións do novo estándar comercial NSA (polas súas siglas en inglés Non Stand Alone) aprobado por 3GPP o pasado mes de decembro e a banda de espectro de 3,7 Ghz. Segundo explica a operadora Vodafone, estas especificacións incorporaranse ao futuro despregue comercial da nova tecnoloxía 5G. Son, polo tanto, o seu código regulamentario.
Vodafone tamén explicou que este novo estándar complementa o emprego, nunha primeira fase, da infraestrutura da rede 4G para o control e xestión do tráfico, “polo que será necesario que tanto os terminais como as estacións base poidan establecer unha conectividade dual ás redes 4G e 5G ao mesmo tempo”. Na demostración levada a cabo con Huawei completouse unha conexión dual de 4G a 5G nunha contorna de proba real, acadándose velocidades de descarga que multiplican por 8 as velocidades estándar de 4G. Nunha segunda proba, realizouse unha videochamada utilizando unha conexión de datos 5G.
Ademais, con vistas a facer realidade unha conexión de principio a fin empregouse espectro na frecuencia de 3,7 Ghz e despregouse unha rede de proba completa, incluíndo equipos de Huawei de Radio Access Network (RAN) así como o core da rede.
António Coimbra, director executivo de Vodafone España, explicou que “a consecución desta primeira conexión de 5G en España reflicte o liderado de Vodafone e de España en tecnoloxías móbiles”. E engadiu: “O despregue de redes móbiles é un factor de gran relevancia para a competitividade e a transformación dixital do país”.
Pola súa banda, Yang Chaobin, presidente da liña de produtos 5G de Huawei declarou que “Huawei está absolutamente comprometida co desenvolvemento completo da tecnoloxía de rede 5G. O test realizado hoxe mostra a madurez do desenvolvemento de 5G sobre o estándar aprobado por 3GPP”.
Ademais, Santiago Tenorio, director de Arquitectura e Estratexia de Rede do Grupo Vodafone, salientou o alcance e o especial significado das probas realizadas: “Este é un fito de gran relevancia no camiño cara a 5G, que hai que agradecer aos enxeñeiros de Huawei e Vodafone que traballaron sen descanso para implementar as novas especificacións nun tempo récord. O éxito da proba realizada hoxe permitiranos avanzar con novas probas en toda Europa ao longo de 2018”.

Categorías: Ciencia

Remata o prazo para enviarmos as nosas propostas youtubeiras

Mar, 02/20/2018 - 12:53

Hoxe remata o prazo para presentar contribucións a unha das grandes novidades da edición 2018 do certame Youtubeir@s. Estamos a falar do apartado Premio do público, unha categoría na que poden participar as persoas usuarias de Facebook, e poderán facelo propoñendo (cun comentario no perfil de Youtubeir@s) un vídeo do que sexan seareiros/as incluíndo o cancelo #propostayoutubeira. As pezas propostas han de axeitarse ás categorías de vídeo-facermos e vídeo-opinarmos. Con todas as contribucións recibidas crearase un álbum na páxina de Facebook do certame para que todo o mundo poida votar polos seus vídeos favoritos, a través de “gústame”. Esta votación realizarase do 25 de febreiro ao 15 de marzo.
Os cinco vídeos que reciban máis “gústame” nese prazo pasarán ao xurado dos premios. Deles escollerase, seguindo os criterios das bases xerais, o Premio do Público #PropostaYoutubeira, valorado en 500 €.
O certame Youtubeir@s, que vai pola súa segunda edición, ten o obxectivo é ateigar a Rede de vídeos na nosa lingua, fomentando a creatividade con temas propios e xerando referentes en galego. O proxecto vén da man dos servizos de normalización lingüística de nove concellos (Baña, Ames, Carballo, Ourense, Pontevedra, Ribadeo, Santiago, Teo e O Grove), das nosas tres universidades e da Deputación da Coruña. Tamén se recordou que outra das finalidades é fomentar a creatividade con temas propios ao tempo que se xeran referentes en galego.
Na edición presente haberá 5.500 euros en premios. A convocatoria 2017 saldouse cunhas importantes cifras de convocatoria, con máis de 200 vídeos presentados da man de internautas de idades comprendidas entre os 17 e os 30 anos. Nos galardóns poderán participar “todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle”. As pezas deberán estar publicadas con data posterior ao 28 de abril de 2017 sen restricións de privacidade e cos cancelos #youtubeiras #youtubeiros na descrición.
Os devanditos 5.500 euros repartiranse nun conxunto de categorías que incrementan o seu número con respecto ao ano pasado. Así, o certame dividirase nos seguintes apartados: vídeo-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. Este último galardón, chamado #propostayoutubeira, é unha das grandes novidades deste ano. Como dixemos antes, a través deste premio, os membros de Facebook poderán propoñer a través dun comentario no perfil de Youtubeir@s un vídeo do que sexan seareiros/as incluíndo o cancelo #propostayotubeira.
As bases ao completo pódense consultar na web youtubeiras.gal e os premios entregaranse o vindeiro 20 de abril de 2018 nun acto público na Coruña no cal o xurado dará a coñecer os vídeos gañadores.

Categorías: Ciencia

En maio estará operativa a primeira fase da rede dixital de vixilancia forestal

Mar, 02/20/2018 - 12:42
Instalacións de RETEGAL en San Marcos, Santiago

O operador público galego RETEGAL vén de publicar a licitación para adquisición e instalación das cámaras que integrarán a rede de vixilancia dos espazos forestais. Segundo informa a Axencia para a Modernización Tecnolóxica de Galicia (AMTEGA, da que depende o operador), a previsión é de que en maio este operativa unha primeira fase do sistema, que posibilitará facer seguimento de practicamente a metade (o 48%) do territorio, incluíndo terreos das 73 parroquias de Alta Actividade Incendiaria (PAAI) definidas así no Plan de Prevención e Defensa Contra os Incendios Forestais de Galicia (PLADIGA) da Consellería do Medio Rural. O sistema achegará monitoraxe de todas estas contornas as 24 horas do día.
Por outra banda, AMTEGA tamén informa que as infraestruturas precisas para a posta en marcha da rede serán infraestruturas sustentábeis. De feito, a nova rede despregarase tirando proveito do equipamento de RETEGAL. Nesta primeira fase instalaranse cámaras en 34 centros de telecomunicacións do operador público, que facilitarán cobertura visual de 1,4 millóns de hectáreas, segundo informa a axencia preto da metade do territorio galego
Os obxectivos principais da rede nesta primeira fase son “a vixilancia remota e servir de apoio na extinción de incendios”. A rede terá capacidade para detectar lumes e para fornecer aos técnicos de datos visuais en directo sobre o avance do incendio e das súas condicións, subministrando a posición exacta da contorna visualizada en cada intre. A intención, con todos estes servizos, é facilitar o máximo a toma de decisións arredor dun lume forestal e dos xeitos de controlalo e de exintiguilo.
A rede xestionarase a través dunha plataforma tecnolóxica que facilitará a vixilancia remota dos montes desde un centro de control as 24 horas do día e permitirá aos axentes e técnicos forestais o acceso en tempo real ás imaxes, incluso a través de dispositivos móbiles. A posta en marcha e o mantemento da conta cun investimento de 2.026.000 euros ata 2022.
Nunha segunda fase, e en base ás necesidades detectadas polos equipos forestais, definirase a ampliación da cobertura da rede. Por outra banda, está previsto abrir unha consulta pública ao mercado para analizar a posibilidade de incorporar tecnoloxías innovadoras que melloren a eficacia do dispositivo ou permitan avanzar na detección temperá de lumes.

Categorías: Ciencia

Desdelugo.es acada o millón de visitas

Mar, 02/20/2018 - 12:16

A páxina www.desdelugo.es, adicada a informar en formato blog (e cunhas boas doses de espírito crítico) dos acontecementos presentes e pasados máis relevantes da historia da cidade, vén de chegar á cifra do millón de visitas. Así nolo conta o responsábel do caderno en liña, Luis Latorre Real, que recoñece que coa devandita cifra superáronse finalmente todas as expectativas de seguimento postas na web, sobre todo se temos en conta que se trata dunha bitácora que, nas súas palabras, “fala de temas propios dunha pequena capital de provincias”.
O blog, que foi posto en marcha como un “lugar onde falar de Lugo”, comezou en orixe tendo pouco seguimento, mil visitas ao mes ou dúas mil como moito. O gran despegue, segundo conta Luis Latorre, foi hai catro ou cinco anos, en boa medida grazas á difusión en Internet levada a cabo polos amigos e seareiros. A día de hoxe hai entradas de 250 lectores e outras de varios miles, segundo o tema. A máis visitada foi do 7 de agosto de 2017, e recollíase a apertura “da primeira praia canina de verdade” da provincia de Lugo. A segunda ía sobre as estrelas Michelín e “a súa inexistencia en Lugo”.

Categorías: Ciencia

Bloquean o acceso a 23 dominios de descargas dentro da operación Cascada

Mar, 02/20/2018 - 11:10

A Garda Civil, no marco da operación Cascada, iniciou unha campaña de bloqueo de páxinas web de descargas de contidos protexidos por dereitos de autor e a súa difusión a través de ligazóns en redes P2P, que nunha primeira fase bloqueou un total de 23 dominios web que facilitaban o acceso a material audiovisual protexido, como películas, series de televisión, música e videoxogos, moitos de recente creación e incluso con obras aínda sen estrear en España.
As páxinas web bloqueadas ofrecían versións de grande calidade de películas aínda dispoñibles nos cines españois antes da súa publicación en formato físico ou dixital, e contaban con índices de visitas moi elevados, sendo algunhas bastante coñecidas, como Divxtotal.com, Estrenosdtl.com ou Gamestorrents.com.
Os dominios mencionados foron credos inicialmente por unha persoa de orixe española, que vendeu os mesmos a unha empresa con sede en Arxentina, que é a actual propietaria e administradora dos mesmos. Os espazos web utilizan distintos métodos para evitar o peche e o bloqueo das mesmas, ocultando a localización real dos seus servidores e os datos de rexistro dos dominios contratados, chegando incluso a mudar frecuentemente os servidores de país.
A Garda Civil detectou casos de dominios previamente bloqueados xudicialmente, que se reactivaban en cuestión de horas con nomes de dominio practicamente idénticos ou incluso cambiando só a extensión dos mesmos, de xeito que aínda que se realizasen bloqueos sucesivos, eran capaces de volver levantar as páxinas web en pouco tempo, de aí que tivesen que implementar unha serie de medidas que perseguen o boqueo total das mesmas dun xeito eficaz e definitivo.

Categorías: Ciencia

O 3 de marzo celébrase nas Pontes unha nova sesión dos Amigus Labs

Mar, 02/20/2018 - 09:45

O vindeiro 3 de marzo, no Lar de Endesa en As Pontes, terá lugar unha nova xornada de traballo dos Amigus Labs, os espazos cooperativos de arte, creación dixital e formación organizados pola asociación Amigus. A nova xornada, o encontro Maker 18.2, os participantes entrarán en contacto cos prototipos cos que se veñen traballando nos obradoiros previos, prototipos con base en Arduino e Raspberry PI. A xeito de exemplo, avanzarase no camiño iniciado no laboratorio de febreiro cun robot velocista, levando a cabo a montaxe de máquinas “corredoras” de competición, pequenos vehículos intelixentes de carreiras, controlados por un microcontrolador ATmega328 con micromotores, Bluetooth e equipado con sensores, cámaras e demais elementos de recoñecemento.
Outro equipo de traballo porá a punto a fresadora CNC, cos últimos retoques na estrutura para poñela a pleno rendemento.
Ao abeiro do recanto Amigus Labs Kids comezarase un novo proxecto que será madurado ao longo dos vindeiras catro sesións; a creación de reloxos dixitais. Nesta primeira sesión analizarase o produto, aprenderase a modelar en 3D e a imprimir as pezas resultantes nas impresoras 3D.
Segundo informa Amigus, é recomendábel carrexar á sesión un portátil ou PC para traballar cada un no seu propio equipo. A idade mínima para participar tanto no obradoiro como na Amigus Labs é de 8 anos en adiante, a inscrición é de balde.
Tódalas actividades realizaranse en horario de 11:00 a 20:00 horas, facendo unha parada para xantar, de 14:00 a 16:00, no propio Lar, cun prezo de 15€/persoa (opcional).
Para asistir ao laboratorio tamén podemos acudir equipados co noso computador e todo o necesario para poder conectalo a un só enchufe. Podemos inscribirnos no obradoiro (antes do 1 de marzo) a través do seguinte correo: amigus@amiguslabs.org. Organizan:
Asociación Informática Amigus, Amigus Labs e Merca Nas Pontes

Categorías: Ciencia

As empresas do Mobile World Congress interésanse pola plataforma Signen da galega Tecalis

Lun, 02/19/2018 - 22:41

Entre as empresas galegas que van ter presenza na edición 2018 do salón Mobile World Congress de Barcelona atópase (como fixemos saber os días pasados dende Código Cero) a firma Tecalis Innovación, con sede de seu no Milladoiro (Ames). Tecalis, segundo nos vén de informar, presentará na dita feira a plataforma Signen, unha tecnoloxía de seu que permite asinar acordos entre dúas ou máis persoas a través de diferentes xeitos, algúns deles tan innovadores como os formatos de audio ou de vídeo.
Signen, o primeiro produto propio da empresa galega, ten importantes potencialidades para unha manchea de sectores. A súa presenza no salón Mobile World Congress, que se celebra a partir do 26 de febreiro, está a xerar interese. “Mesmo dende unha moi coñecida multinacional tecnolóxica estadounidense que cotiza en NASDAQ”, informa Tecalis.
A plataforma Signen, amais de polo devandito, tamén salienta por ser doada de empregar, botando man da mesma filosofía accesíbel que WeTransfer, por poñer un exemplo ilustrativo. A metodoloxía que mostra é ben sinxela: modelo open cun email do emisor, email do/os receptor/es, documento que se adxunta, elixir método de sinatura-aceptación e validación final da firma.
A tecnoloxía de Tecalis, ademais, pode empregarse para contratos privados entre persoas (compravenda, aluguer de inmóbeis, acordos de carácter privado, etc) e pode usarse entre empresas (acordos mercantís, en sinaturas de contratos e en todo tipo de documentos), e tamén inclúe unha API aberta que permite integrar Signen cos programas de xestión da nosa compañía.
Lembrar tamén que a plataforma está elaborada con tecnoloxía Blockchain, que garante a máxima seguridade, e é de balde. Pode usarse en versión web ou en versión aplicación móbil para dispositivos con iOS ou con Android.

Categorías: Ciencia

Os móbiles con Windows Phone 7.5/8.0 deixarán de recibir notificacións

Lun, 02/19/2018 - 20:16

Poucos serán aínda os que teñan un smartphone con Windows Phone 7.5 ou Windows Phone 8.0, especialmente porque estes smartphones a partires de agora pasarán a ser produtos cunha funcionalidade extraordinariamente limitada, xa que a partires de mañá Microsoft cesará o seu servizo de notificacións push. De feito, non só deixarán de recibir notificacións, senón que tampouco recibirán actualizacións para as baldosas activas e tamén perderán o servizo de localización de teléfonos perdidos.
Dende Microsoft lembran que as notificacións si se manteñen en teléfonos con Windows Phone 8.1 e Windows 10, que aínda gozan de soporte completo, aínda que o número de aplicacións dispoñibles para os mesmos é extraordinariamente limitado.

Categorías: Ciencia

Eroski Móvil traspasa o seu negocio a Vodafone

Lun, 02/19/2018 - 20:04

Cada vez están máis lonxe os tempos nos que o mercado estaba asolagado por Operadores Móbiles Virtuais, e moitas das compañías que entraron en tal sector están a retroceder ante as dificultades para manter rendible tal actividade, e ao igual que o ano pasado dixo adeus Carrefour Móvil, agora é Eroski Móvil a compañía que se despide, traspasando o seu negocio a Vodafone.
Dende Eroski Móvil aseguran ter decidido deixar de dar servizo de telefonía móbil ante a imposibilidade de ofrecer aos clientes servizos converxentes de fibra, móbil e televisión, considerando que traspasar o negocio ao Grupo Vodafone era o máis axeitado, xa que así os usuarios manterán a mesma rede de telefonía da que veñen a gozar nos últimos anos, de xeito que manterán a mesma cobertura.
No caso dos clientes de liñas de contrato de Eroski Móvil non será preciso ningún tipo de actuación, pasando o servizo do operador actual a Lowi, mantendo incluso a mesma tarxeta SIM. No caso das liñas de prepagamento o cambio de operador non pode realizarse deste xeito, polo que os usuarios deberán contactar con Vodafone para solicitar a portabilidade da súa liña actual. O saldo actual nas liñas de Eroski Móvil poderá gastarse até o 31 de marzo e, no caso de realizar a portabilidade sen gastar o saldo completamente, poderase solicitar a súa recuperación nos hipermercados Eroski.

Categorías: Ciencia

Páxinas