códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 3 horas 36 seg

As estreas en YouTube da colleita de 2017 impulsan a quinta edición do Chanfaina Lab

Lun, 02/19/2018 - 16:42

Co inicio de novo ano e logo da estrea das curtametraxes gravadas en setembro de 2017, comezou o arranque oficial do Chanfaina Lab 2018 en San Sadurniño, a nova edición do programa-certame de divulgación e traballo práctico (alentando a semente creativo da mocidade local) arredor dos novos xeitos de crear audiovisual e facer coñecemento. Segundo fixo saber o Goberno local, a quinta convocatoria do encontro manterá a súa filosofía e a súa estrutura, reservando unha fin de semana para a filmación das pezas das realizadoras e realizadores que participen e acompañando as xeiras de traballo de campo con charlas e obradoiros centrados no audiovisual. Ademais, tal e como comentou na estrea das curtas de 2017 a responsábel de Cultura, Sabela Cinza, outro dos obxectivos é “manter a irmandade iniciada o ano pasado co cinema rural portugués”.
Agora, trala proxección celebrada o 3 de febreiro na Casa da Cultura, as obras do ano pasado están a dar o chimpo de maneira progresiva ás pantallas de ordenadores, tabletas e teléfonos desde a canle de YouTube de Fálame de San Sadurniño, onde as curtametraxes (unha a unha, semana a semana) van atopando sitio e visibilidade de seu perante a comunidade internauta.
A primeira das pezas estreadas na Rede é A casa, do realizador portugués Carlos Viana. Segundo nos lembra o Concello de San Sadurniño, a obra entra na vivenda da familia Cinza-Íñiguez “para describir a súa casa como espazo vital a través do tempo”. Os fíos temáticos da curta, deste xeito, son as lembranzas que acubilla o fogar, os testemuños locais do devir da historia e mesmo a cultura de San Sadurniño. Carlos Eduardo Viana é un cineasta nado en Esposende (Portugal) con ampla experiencia como documentalista, programador e dinamizador cinematográfico no Norte de Portugal. Asemade ten dirixido numerosos documentais en Angola, Cabo Verde e en Portugal.
A segunda estrea virtual da presente edición do Chanfaina Lab vén asinada por Pablo Martínez, o participante máis novo do encontro audiovisual e, segundo lembra a organización do certame, un dos seus membros máis activos. Pablo, veciño de San Sadurniño, sumouse por segundo ano consecutivo á experiencia como creador e como aprendiz do obradoiros impartidos pola xornalista transmedia María Yáñez e polo dúo Esferobite, Belén Montero e Juan Lesta. En 2016 presentara O meu traxecto ao cole e en 2017 achega Enamorándose de San Sadurniño, a curta acabada de estrear na Rede, protagonizada por el mesmo e por Iago Lourido, encargado tamén da montaxe das imaxes filmadas por Joám Cortizas. Na obra saliéntase a manchea de recunchos fermosos que rodean o centro urbano do municipio.

Categorías: Ciencia

O Campus de Ourense animou ás nenas da provincia a convertérense en profesionais TIC e científicas

Lun, 02/19/2018 - 16:15

Esta semana, tendo como base o día 11 de febreiro, celebrouse a nivel internacional o Día das Mulleres e as Nenas na Ciencia, unha conmemoración sen fronteiras que, como indica o seu nome, diríxese a conmemorar o espírito científico das mulleres e as cativas e, tamén, a reparar unha inxustiza de séculos que, aínda hoxe, perpetúase a moitos niveis (a invisibilización das mulleres e as cativas creadoras). Os días pasados fixemos reconto en Código Cero das actividades preparadas pola USC e a UDC para conmemorar o acontecemento. A maiores, a Universidade de Vigo sumouse á celebración cunha manchea de accións divulgativas e reivindicativas que permitiron cousas como crear videoxogos ou facer achados científicos. Os actos discorreron coa seguinte proclama: “Hai unha lista moi larga de mulleres que dedicaron a súa vida á ciencia, todas mulleres incríbeis que axudaron e axudan ao desenvolvemento das ciencias, quizais algún día unha de nós tamén forme parte dese grupo”.
A dita proclama, extraída do segundo Concurso Escolar de Debuxo e Redacción do Día Internacional da Muller e a Nena na Ciencia organizado ao abeiro das actividades da UVigo para conmemorar esta xornada, veu da man da nena Noa Rodríguez, que foi quen se impuxo (cunha redacción de seu) no devandito certame. A Universidade por enteiro adheriuse ás súas palabras, tal e como se fixo saber o pasado venres na I Xornada de Divulgación en Ciencia, Tecnoloxía, Enxeñaría e Matemáticas.
A xornada estivo organizada pola Facultade de Ciencias, a Escola Superior de Enxeñaría Informática e a Escola de Enxeñaría Aeronáutica e do Espazo, coa colaboración da Vicerreitoría do campus, co gallo da conmemoración do Día Internacional da Muller e da Nena na Ciencia. Co lema Exxperimenta en feminino, a actividade reuniu no Edificio Politécnico a arredor de 300 escolares da provincia de Ourense co obxectivo de fomentar as vocacións científico-tecnolóxicas entre as futuras xeracións poñendo o foco en mostrar o labor das mulleres científicas e tecnólogas. Ao longo da mañá, os estudantes puideron participar nunha ducia de actividades “cun enfoque divulgativo, interactivo e ameno”. Estas accións, sinalan as organizadoras, permitiron á rapazada asistente poñerse na pel de científicas da vida (tiveron a oportunidade de albiscar microorganismos na auga) ou de desenvolvedores de ferramentas dixitais (puideron crear pequenos videoxogos).
No desenvolvemento das actividades participou persoal docente e investigador dos tres centros implicados nesta iniciativa, principalmente mulleres.
A nivel docente, na xornada participaron as profesoras Alma Gómez, Julia Carballo e Nieves Lorenzo. Segundo fixeron saber, cómpre tomar medidas ante o descenso que se está a producir de mulleres nas titulacións ligadas ás TIC e á ciencia e á enxeñaría. Citando como exemplo o caso da Escola Superior de Enxeñaría Informática da que ela é subdirectora, Alma Gómez advertiu como “se hai 20 anos as mulleres representaban arredor do 30% do alumnado de novo ingreso da nosa escola na actualidade é un 10/12%. Estase perdendo o talento da metade da poboación”. Neste contexto de preocupación, Virxilio Rodríguez, vicerreitor do Campus de Ourense, salientou como a posta en marcha de Exxperimenta en feminino “é unha iniciativa fantástica e moi necesaria, que ten ademais o valor de xurdir do propio profesorado de varios centros”.

Categorías: Ciencia

Twitter mata a súa aplicación para macOS

Lun, 02/19/2018 - 14:13

A relación de Twitter con aplicacións de escritorio, tanto propias como de terceiros, nunca foi sinxela, e así, ao igual que hai un par de anos eliminou a aplicación de TweetDeck para convertela nun servizo que só está dispoñible vía web, agora anuncian que farán o mesmo con Twitter para macOS, ou sexa, que a aplicación de escritorio para os ordenadores de Apple xa non está dispoñible para a súa descarga, e dentro dun mes deixará de funcionar para os usuarios que a tivesen instalada.
Cómpre destacar que o cliente de escritorio de Twitter para Mac carecía dun grande nivel de uso (como tamén acontece coa de Windows 10), polo que foise abandonando paulatinamente, de xeito que carecía de moitas funcionalidades que si estaban presentes na súa versión web (como o soporte de mensaxes de 280 caracteres), de xeito que as opcións de Twitter estaban claras: o realizaban un grande investimento na actualización dunha aplicación irrelevante ou a eliminaban definitivamente. A decisión máis axeitada parecía clara, e finalmente foron contundentes, polo que nos vindeiros meses tampouco sorprendería que abandonasen a aplicación de Twitter para Windows 10 (que continúa a ter certo sentido, especialmente dispositivos con pantalla táctil).

Categorías: Ciencia

aulaPlaneta súmase á plataforma de libro dixital E-Dixgal

Lun, 02/19/2018 - 13:43

Esta mañá o conselleiro de Cultura, Educación e Ordenación Universitaria, Román Rodríguez; a directora da AMTEGA, Mar Pereira, e o director xeral da área de Educación do Grupo Planeta, Pablo Lara anunciaron a incorporación de aulaPlaneta como novo provedor de contidos da iniciativa do libro dixital E-Dixgal, cumprindo así cunha das medidas de mellora previstas pola Xunta para impulsar a educación dixital en Galicia.
A partir do mes de marzo, aulaPlaneta integrará na plataforma do libro dixital máis de 7.800 recursos curriculares para 5º e 6º de Primaria e máis de 12.500 recursos para 1º e 2º da ESO. Ademais das materias obrigatorias, ofrece máis de 400.000 recursos educativos de animacións, fotografías e gráficos de alta calidade, vídeos e fragmentos sonoros, estatísticas actualizadas, atlas mundial, cronoloxías, artigos de temas de actualidade, navegador visual, etc. Tamén ofrece máis de 500 horas de formación a profesores para a integración e desenvolvemento da competencia dixital docente.
A proposta curricular de aulaPlaneta enriquece os contidos con secuencias didácticas adaptables ás necesidades da aula, propostas para fomentar a indagación, a investigación e o traballo colaborativo, así como exercicios para pensar e consolidar o aprendido.
aulaPlaneta é o terceiro provedor de E-Dixgal, que se suma aos actuais, Netex e Edebé. Ademais, está en fase de licitación o centro de produción, que facilitará aos docentes novas ferramentas e mecanismos para que poidan incorporar á plataforma contidos educativos innovadores. E tamén está en proceso de licitación o contrato dun novo provedor de contidos en inglés.
O conselleiro de Cultura, Educación e Ordenación Universitaria, Román Rodríguez, sinalou que a incorporación de Planeta supón un novo impulso e o fortalecemento do E-Dixgal, que é un dos piares da Estratexia galega para a educación dixital, edudixital 2020. Segundo explicou, a través destas ferramentas estase garantindo unha docencia máis personalizada e adaptada ás circunstancias do alumnado e, por tanto, favorecendo a atención á diversidade.
Román Rodríguez fixo especial fincapé na formación do profesorado como un dos elementos clave para o éxito da educación dixital, no que a Consellería está a traballar de xeito intensivo. Non en balde, todos os centros E-Dixgal conta cun Plan de formación propio no ámbito das novas tecnoloxías, cunhas 2.000 horas de formación específica para o profesorado. Ademais, ditos plans incorporan tamén unha Escola de Nais e Pais para que as propias familias reciban información ao respecto e dispoñan de canles axeitadas para o acceso aos contidos e a resolución de dúbidas, entre outros.
Máis aló dos bos resultados obtidos e constatados a nivel educativo, o conselleiro destacou a importancia deste proxecto na democratización do uso das TIC no ensino, o que favorece a igualdade de oportunidades.
Mar Pereira sinalou que é fundamental continuar avanzando no proceso de transformación dixital da aula «se queremos proporcionar unha experiencia educativa adaptada ás necesidades duns alumnos que se desenvolven nunha contorna tecnolóxica, e que se enfrontarán ás demandas dun mercado laboral que esixe un perfís cada vez máis dixitais e non só no sector tecnolóxico».
Pola súa banda, Pablo Lara explicou que «para aulaPlaneta é un orgullo participar nun proxecto de envergadura, o compromiso e a valentía da iniciativa E-Dixgal. A AMTEGA e a Xunta de Galicia demostraron estar aliñados co Grupo Planeta na maneira de concibir a educación do século XXI, poñendo ao alumno no centro e evolucionando o rol do profesor».

Melloras en marcha

A pasada semana completouse a entrega de máis de 13.000 ultraportátiles para o alumnado, cos que se renovou o equipamento co que desenvolven a súa actividade diaria os 154 centros que empregan o libro dixital.
Con esta renovación búscase avanzar un paso máis cara a unha educación integramente dixital. Pásase do concepto de equipo na aula ao de mochila dixital, que acompaña ao alumno en toda a súa actividade educativa, tanto dentro como fose do centro, e que lle proporciona o acceso a todos os recursos educativos dixitais, cun soporte técnico ante calquera dúbida ou incidente.
A día de hoxe un total de 154 centros escolares e 11.600 alumnos de entre 5º de Primaria e 2º de ESO están incorporados ao proxecto E-Dixgal en Galicia. Dentro da Estratexia galega para a educación dixital, edudixital 2020, o obxectivo marcado no horizonte dos próximos tres anos é que o libro dixital chegue a 300 centros e beneficie a máis de 20.000 alumnos.

Servizo Premium

En 2018 activarase o Servizo de Soporte Premium para as familias, alumnado e profesores dos 154 centros educativos implicados na iniciativa, que ofrecerá tres tipos de asistencia: remota (telefónica e online); in situ, con desprazamento ao lugar do incidente, e a través de puntos físicos de atención.
Os máis de 1.000 profesores, 12.000 alumnos e as súas familias dispoñerán dunha única vía de atención para todas as cuestións relacionadas co uso do libro dixital a través de varias canles (teléfono, correo electrónico, web, app no móbil...), as 24 horas do día os sete días da semana. Desde este punto atenderanse todas as dúbidas, consultas e incidentes que poidan ter os usuarios, e resolveranse de maneira remota, se é posible, ou activando os servizos presenciais para que estas aténdanse onde se atopen os usuarios se non fose posible facelo a distancia.
O novo Servizo Premium contempla, como novidade, que o soporte se preste no domicilio da familia ou o docente para aqueles incidentes que requiran unha atención presencial.

Mellora da conectividade

A mellora das infraestruturas de telecomunicación é outro dos aspectos clave na estratexia de innovación educativa. Neste momento, preto do 95 % dos centros públicos que empregan o libro dixital teñen conexións de, como mínimo, 100 Mbps. En total, máis de 1.074 centros públicos, un 86 % do total, dispoñen desta velocidade, que este ano chegará ao 100 % dos centros educativos públicos que imparten Primaria e Secundaria.

Plan de formación dixital

Outra das medidas é o desenvolvemento dun plan continuo de formación dixital a docentes. Entre setembro e novembro impartíronse máis de 20 cursos nos que 430 profesores recibiron formación sobre cuestións técnicas e metodolóxicas relativas á educación dixital.

Categorías: Ciencia

Imatia aposta na Coruña por un centro de operacións innovador e ampliábel

Lun, 02/19/2018 - 13:26

Dende o pasado verán, a empresa galega Imatia conta con sede seu na Coruña, un centro de actividade máis acaido (máis amplo, máis suxeito a novos procesos de creación e evolución) para as novas necesidades da compañía, un dos máximos expoñentes galego e estatal en materia de desenvolvemento web e traballos de dixitalización.
Segundo nos conta a empresa este mes de febreiro, o novo centro de operacións (emprazado no Parque Empresarial de A Grela e substituíndo as anteriores dependencias da Coruña, inauguradas en 2009) é unha resposta ao crecemento da firma nos últimos anos. Un crecemento impulsado pola actual demanda dos seus produtos e servizos de software, que motivou o medre do cadro de persoal, a día de hoxe constituído por un centenar de empregados (repartidos entre a oficina da Coruña e a de Vigo).
“A isto”, sinala Imatia, “cómpre engadir as actuais necesidades de contratación da empresa, as cales se poden consultar na nosa sección de emprego, que incrementarán o noso persoal nun futuro próximo”.
O novo espazo de traballo está situado no Parque Empresarial de Agrela, en palabras de Imatia “o principal motor económico-social da Coruña e do norte de Galicia”, onde comparte localización con outras 550 empresas que dan traballo a máis de 20.000 persoas. As oficinas actuais ocupan 750 m2, aínda que o espazo total alcanza os 1.300 m2, tendo así marxe suficiente para futuras ampliacións.

Categorías: Ciencia

AGASINT presenta os seus importantes desafíos para 2018 e mailo seu novo presidente, Luis Aceituno

Lun, 02/19/2018 - 13:04

A fronte común galega de firmas de sistemas intelixentes non tripulados, AGASINT, vén de facer balance dos importantes fitos acadados en 2017 e, tamén de presentar os seus ambiciosos obxectivos para o ano que literalmente comeza. Os datos foron achegados e compartidos na asemblea anual, a primeira da historia de AGASINT, na que tamén se renovou a presidencia da entidade, saíndo elixido Luis Aceituno Otero, coordinador de Proxectos Estratéxicos de Imatia Innovation (substituíndo a Pedro Arias, co-fundador e primeiro presidente). Como lembraremos, AGASINT é a Asociación Galega de Empresas de Sistemas Intelixentes non Tripulados, unha alianza empresarial sen ánimo de lucro que ten como fins “a promoción das aplicacións dos vehículos terrestres, acuáticos e aéreos tripulados de forma remota”.
Segundo se fixo saber na xuntanza, durante o ano 2017 leváronse a cabo diversas actividades relacionadas cos vehículos tripulados de forma remota, entre as que destacan o fomento da investigación e desenvolvemento de novas tecnoloxías. Un exemplo disto foi a implicación da asociación no impulso dos grupos operativos a nivel nacional (EPI-Agri) e, a nivel autonómico, a presenza dos seus asociados na Civil UAVs Inititative, programa da Xunta que inclúe un proceso de compra pública innovadora na que membros da AGASINT están presentes en todas as súas fases. A entidade, neste eido, participou ao longo de 2017 en diversos obradoiros e reunións como representante dos seus asociados ante as administracións, defendendo os seus intereses no sector na Comunidade Autónoma de Galicia, e en colaboración coas institucións públicas implicadas, na elaboración da normativa que regula o emprego dos sistemas tripulados de forma remota (drons). Igualmente, mantivéronse encontros con diferentes Consellerías para potenciar o despregue de campos de voo ou experimentación repartidos pola xeografía de Galicia, o que permitiu que varios dos socios xa se beneficiaron desta iniciativa.
Desde a dirección de AGASINT tamén se felicitaron pola recente aprobación da normativa que rexe o emprego dos aparellos de voo non tripulados no territorio español, que, sinalaron, “ha de contribuír a desbloquear un sector en auxe e que aínda non deu conseguido chegar ao máximo do seu potencial comercial”. Desde a asociación participouse en axustes da nova normativa e realizáronse labores de consultoría con diferentes institucións da administración pública.
Elección de novo presidente
Coa celebración da primeira asemblea do 2018, a asociación tamén procedeu á substitución do seu presidente, polo que Pedro Arias abandona o posto en favor de Luis Aceituno. Desde a asociación salientaron o importante papel despregado por Pedro Arias, co-fundador e primeiro presidente de AGASINT, como “personaxe principal dos primeiros pasos da entidade”. Os socios deixaron constancia do seu agradecemento xeral pola súa dedicación ao proxecto.
Aceituno Otero, como dixemos coordinador de Proxectos Estratéxicos de Imatia, asume o cargo con entusiasmo e co obxectivo de pór ao servizo da asociación toda a súa ampla bagaxe en desenvolvemento de sistemas aéreos non tripulados, eido onde acubilla unha experiencia de máis de corenta anos e unha gran actividade deportiva a nivel nacional e internacional, representando a España en competicións do máis alto nivel, tanto como competidor como xefe de selección. Con diferentes cargos na Federación Galega e Nacional dos Deportes Aéreos, é xuíz nacional de aeromodelismo e conta con licenza da Federación Aérea Internacional, ademais de ser o representante para España do International Jet Model Comité (IJMC) que é máximo expoñente de RPA con propulsión a turbina de queroseno. Desde 1983 foi colaborador de varias revistas estatais especializadas escribindo artigos de deseño de aerodinos e probas de materiais, sendo piloto de probas de varias marcas comerciais.
No que se refire aos desafíos de 2018, AGASINT anunciou que se van despregar esforzos extra de comunicación a prol das maiores sinerxías entre as empresas do sector, unhas firmas que, debido ás súas características intrínsecas, engloba a empresas moi diversas que aplican novidades tecnolóxicas a ámbitos moi diferentes. Segundo informou AGASINT, malia a ampla gama de aplicacións (en agricultura, enxeñaría civil, topografía, audiovisual, etc.) das devanditas tecnoloxías, estas empresas comparten os mesmos problemas relacionados coa normativa sectorial, retos de innovación, comercialización de servizos e internacionalización.

Categorías: Ciencia

O asistente de voz de Windows 10 por fin pode empregarse para o control domótico

Lun, 02/19/2018 - 13:03

O dos servizos de automatización de tarefas máis populares, IFTTT, que permite definir receitas nas que os usuarios poden programar accións en funcións dunhas condicións predefinidas, que poden ir dende programar a calefacción en función das medicións dunha estación meteorolóxica até a publicación en redes sociais de contidos sen intervención humana, vén de estrear unha novidade que agradecerán moitos usuarios de ordenadores persoais: o soporte de Cortana.
Isto quere dicir que agora poderemos empregar o asistente de voz de Windows 10 para efectuar accións de distinto tipo, sen ter que mover un dedo. As receitas dispoñibles permiten, por exemplo, que mediante a nosa voz podamos acender ou apagar unha lámpada Philips Hue, acender unha cafeteira WeMo ou dicirlle ao robot aspiradora Samsung que remate o seu traballo.
Esta funcionalidade resultará de grande utilidade, xa que Cortana está dispoñible tanto en Windows 10 como en dispositivos móbiles e incluso está a iniciar a súa implantación en altofalantes conectados, e a súa elevada dispoñibilidade facilita así o control de centos de servizos dispoñibles a través de IFTTT. Polo momento o uso de Cortana con IFTTT parece restrinxido a EE.UU.

Categorías: Ciencia

Photos Companion facilita a transferencia de fotos e vídeos do móbil ao PC

Lun, 02/19/2018 - 12:32

Aínda que transferir ficheiros entre o noso smartphone e o noso ordenador persoal debería ser algo cada vez máis doado, é habitual ter que empregar solucións pouco óptimas como empregar pasos intermedios como utilizar o correo electrónico ou servizos de almacenamento na nube, de aí que sexa moi ben recibido un proxecto de Microsoft Garage, Photos Companion, que é unha aplicación de balde para iOS e Android que comunica a aplicación Fotos de Windows 10 do ordenador coa súa compañeira móbil, sempre que estean dentro da mesma rede Wi-Fi, para realizar unha transferencia de datos das fotografías e vídeos que indiquemos a grande velocidade.
O procedemento é bastante sinxelo, que consiste en, inicialmente, activar a importación móbil coa característica Wi-Fi na aplicación de Fotos (no apartado Vista previa da súa configuración), ir logo a Importar, para seleccionar a opción de importar do móbil a través de Wi-Fi. Para establecer logo a comunicación aparecerá un código QR en pantalla, que escanearemos dende a aplicación Photos Companion, para logo elixir os ficheiros documentos que queremos transferir, que a grande velocidade aparecerán no ordenador, evitando así o uso de cables ou de almacenamentos intemedios.

Os ficheiros enviados a través de Photos Companion recíbense a través da aplicación Fotos de Windows 10
Categorías: Ciencia

Ábrese a solicitude de invitacións para o XV Coruña Bloggers

Lun, 02/19/2018 - 11:52

O vindeiro día 28 celebrarse na Fundación Barrié da Coruña a edición número 15 do evento solidario Coruña Bloggers no que entusiastas da Internet, as redes sociais e outras tecnoloxías próximas xúntanse para asistir a un par de relatorios e achegar un mínimo de 1 quilogramo de alimentos non perecedoiros para a Cociña Económica (o que podería considerase como o prezo para acudir a este evento de balde).
O primeiro relator da xornada será Antonio Cambronero, un dos referentes dos mundo dos blogs en fala hispana, tanto pola súa longa experiencia como pola súa vertente formativa e divulgadora, que estará presente a través de streaming para repasar as adaptacións técnicas necesarias para cumprir co regulamento xeral de protección de datos nun blog de WordPress.org nos formularios de contacto, formularios de comentarios e formularios de subscrición. Tamén repasará detalles técnicos para integrar MailChimp e WordPress.org como exemplo dun servizo de e-mail marketing afectado polo acordo de Privacy Shield para transferencias internacionais de datos entre a Unión Europea e EE.UU.
O segundo relator do encontro será Álvaro Fontenla, da empresa de hospedaxe web Raiola Networks, quen impartirá unha charla sobre servizos de aloxamento de páxinas web.
Tras a parte formal do evento, os asistentes acudirán a un local de hostalaría próximo, La Taberna de Rita, para a habitual sesión de networking.
Os interesados en acudir ao 15º Coruña Bloggers poden xa solicitar a súa invitación a través de Eventbrite.

Categorías: Ciencia

O CIP 2018 recibiu finalmente 250 webseries para participar na competición oficial

Lun, 02/19/2018 - 11:30

A organización (Interplay Producións e o Concello de Carballo) da nova edición do Carballo Interplay de contidos dixitais e webseries quere que esta convocatoria 2018 pase á historia como a máis concorrida e a que máis actividades acubille. Sen ir máis lonxe, onte pechouse o prazo para a recepción de contribucións para competir na sección oficial, recibíndose finalmente 250 achegas procedes de todos os continentes. Porén, malia este peche do prazo oficial para o envío de candidaturas, aínda fica unha porta aberta.
Segundo informa a organización, as creadoras e creadores que quedasen coas ganas de participar, porque aínda non teñen unha serie producida pero que si vontade de creala, poden darlle forma ao seu proxecto e presentalo antes do 18 de marzo ao premio ao proxectos de webserie en galego (sen límite de temas e cunha dotación económica de 1.500 euros).
Amais destes datos, Interplay Producións e o Concello de Carballo tamén informaron hoxe de que esta edición do certame será, ante todo, unha celebración da figura da muller creadora. Nas súas palabras, o CIP 2018 (que se celebra os días 4, 5, 6 e 7 de abril), será unha homenaxe ás mulleres pioneiras da tecnoloxía e do audiovisual, reivindicando o traballo da actriz e inventora Hedy Lamarr (precursora da tecnoloxía móbil, GPS e Wi-Fi), da matemática e escritora británica Ada Lovelace, da primeira persoa que dirixiu unha película de ficción e pioneira dos efectos especiais Alice Guy, da matemática Joan Clarke, da inventora do e-book Ángela Ruiz Robles, da pioneira da música electrónica Delia Derbyshire, da científica computacional, matemática e enxeñeira de sistemas Margaret Hamilton, da precursora da Internet Radia Perlman, da enxeñeira e programadora Mary Allen Wilkes e da pioneira no deseño de interfaces de usuario, Susan Kare.

Categorías: Ciencia

AMTEGA e ABANCA implantarán o pago por móbil no transporte metropolitano

Lun, 02/19/2018 - 09:43

No camiño de impulsar a dixitalización do sistema público de transporte, a Axencia para a Modernización Tecnolóxica de Galicia (AMTEGA) vén de asinar un acordo con ABANCA para desenvolver unha solución que posibilite o pago dende o móbil aos viaxeiros do transporte metropolitano. O proxecto insírese nas actividades do Plan de Modernización Tecnolóxica da Mobilidade en Galicia, e-Mobility, no que participa tamén a Consellería de Infraestruturas e Vivenda. Segundo lembran, ilustrando a importancia de dixitalizar o sistema público de transporte, este dá servizo a uns 20 millóns de viaxeiros anuais con máis de 1.000 autobuses, 1.321 liñas e 14.140 paradas.
O acordo foi asinado pola directora de AMTEGA, Mar Pereira, o director xeral de Mobilidade, Ignacio Maestro e o director de IT, Información, Procesos e Operacións de ABANCA, José Manuel Valiño. O proxecto común abrangue compromiso da entidade financeira para fornecer á Xunta dunha solución que permita integrar a tarxeta de transporte metropolitano nos teléfonos móbiles. O seguinte paso será a pilotaxe da solución nunha das empresas que presta servizos de transporte publico metropolitano e, logo, a implantación progresiva no resto da flota que presta transporte metropolitano. Esta solución incorporarase á aplicación que está a desenvolver a Xunta para que os usuarios poidan seguir en tempo real as rutas dos autobuses e recibir a notificación das recargas dispoñíbeis.
Plan eMobility
O Plan eMobility ten como obxectivos xerais “a dixitalización integral de todos os procesos de xestión e tramitación por parte dos operadores e o desenvolvemento de novos servizos para os usuarios”. Entre as liñas de traballo previstas buscarse “acadar o seguimento en tempo real das rutas de transporte público para deseñalas e planificalas dun xeito máis eficiente e adaptadas ás necesidades dos viaxeiros”. AMTEGA lembra tamén que as actuacións do Plan posibilitarán igualmente “novos servizos para os usuarios como o transporte a demanda, rutas personalizadas ou o pago desde o móbil”. Ademais, os viaxeiros disporán dun portal do transporte, un punto centralizado onde atopar toda a información das rutas dispoñíbeis e no que xestionar as súas solicitudes de servizo.
O Plan foi aprobado en xaneiro polo Goberno galego, cun investimento previsto de máis de 6,6 millóns de euros ata o 2020.

Categorías: Ciencia

Novo número da nosa edición impresa

Ven, 02/16/2018 - 23:30

Como todos os meses, chega outro número de Código Cero na súa edición impresa, que se pode achegar de balde nunha completa rede de puntos de distribución, podéndose descargar tamén en formato PDF ou ler en dispositivos móbiles a través da aplicación de quiosco dixital Magzter.
Nesta nova entrega celebramos os 25 anos da chegada da Internet a Galicia con distintos testemuños deste fito histórico. Tamén abordamos temas como os seguintes:
- As mozas, protagonistas da nova edición do certame Lingua de Namorar
- O CITIC participa na creación de dúas cátedras de innovación na UDC
- Ofrecemos un novo menú de inverno de innovación galega, indicado para collermos folgos
- A asociación Ineo renova directiva
- Completada a entrega de 13.000 novos equipos para o alumnado dos 154 centros E-Dixgal
- O Clúster TIC Galicia e a Laconnetwork entregan os seus primeiros premios
- Milladoiro e As Pontes apostan formatemente pola cultura maker
- A nova edición do centro de crowdworking do Gaiás dá unha viraxe cara o ámbito 4.0

Categorías: Ciencia

O domingo lanzaranse os primeiros satélites da rede Starlink

Ven, 02/16/2018 - 22:00

A vindeira fin de semana dende a Base da Forza Aérea en Vandenberg (California) a compañía de Elon Musk, SpaceX, vai lanzar o satélite español Paz, destinado a cubrir necesidades de seguridade e defensa, así como outras de carácter civil podendo tomar máis dun cento de imaxes diarias cubrindo máis de 300.000 quilómetros cadrados ao día e preparado para dar 15 voltas diarias ao planeta.
Pero este lanzamento está a ser especialmente rechamante porque SpaceX vai aproveitalo para por en órbita un par de satélites (Microsat-2a e Microsat-2b) de proba para o futuro servizo Starlink, que no futuro quere achegar accesos á Internet de alta velocidade a través dun par de constelacións de satélites de banda larga (formada inicialmente por 4.425 satélites, co obxectivo posto en preto de 12.000).
Non está previsto que Starlink opere até a década que vén e, de feito, polo momento non ten as autorizacións pertinentes para facelo, polo que non deixa de ser un experimento que confían en que na súa fase comercial poida contribuír, entre outras cousas, a financiar a futura colonización de Marte.

Categorías: Ciencia

Torus Software beneficiarase dun préstamo ao abeiro do programa de Instrumentos Financeiros Innovadores

Ven, 02/16/2018 - 21:30

O director do IGAPE, Juan Cividanes, adiantou hoxe no Parlamento galego que os primeiros préstamos aprobados pola Xunta ao abeiro do novo programa de Instrumentos Financeiros Innovadores (IFI) mobilizarán 1,75 millóns de euros en investimentos no ámbito da Industria 4.0.
O primeiro dos proxectos aprobados nesta nova liña financeira correspondeu a Hidrofersa, compañía con sede en Viveiro (Lugo), especializada no deseño, fabricación e comercialización de maquinaria naval, industrial ou mineira, que incorporará novos equipamentos para mellorar a súa competitividade.
Outro dos proxectos aprobados corresponde a Torus Software Solutions, startup promovida desde a Universidade da Coruña e recoñecida a nivel internacional polo seu potencial innovador, que disporá de financiamento para desenvolver tecnoloxía big data, estreitamente vinculada á Industria 4.0.
Pola súa banda, a empresa Cristalería Pontevedresa, con sede en Ponte Caldelas (Pontevedra), contará con financiamento do novo programa de IFI para incorporar ás súas instalacións nova maquinaria para a impresión dixital en vidro, co obxectivo de seguir mellorando en competitividade e internacionalización.
O director do IGAPE lembrou que o novo programa de Instrumentos Financeiros Innovadores conta cunha dotación inicial de 33 millóns de euros (cofinanciada ao 80% polo FEDER) que lle permitirá apoiar este ano arredor de 100 proxectos de investimento nos eidos da Industria 4.0, o emprendemento e a innovación. O programa contribuirá así ao desenvolvemento da Axenda Industria 4.0 e ao fortalecemento do tecido empresarial galego, en especial das PEME. Engadiu que se apoiarán preferentemente investimentos de base tecnolóxica, proxectos innovadores e actuacións relacionadas coa chamada fábrica intelixente.
Os préstamos, comprendidos entre 50.000 e un millón de euros, contarán con prazos de amortización entre 7 e 12 anos, e inclúen unha axuda para rebaixar os custos financeiros. O obxectivo do novo programa é conseguir que os autónomos e as PEME poidan desenvolver en Galicia os seus proxectos de investimento apostando pola innovación para mellorar a súa competitividade e para crecer cara a novos mercados.

Categorías: Ciencia

O pagamento móbil dos estacionamentos en zona azul en Compostela e A Coruña soportará comisións

Ven, 02/16/2018 - 21:10
Mensaxe que os usuarios de e-park recibiron esta mañá

A aplicación móbil e-park permite usar o teléfono para pagar nos parquímetros da ORA sen ter que empregar moedas e coa grande vantaxe de non ter que volver ao automóbil para renovar o tique, que está presente en Galicia nas cidades de Santiago de Compostela e A Coruña, sorprenden aos seus clientes esta mañá remitíndolles unha comunicación na que advertía que da posta en funcionamento dun novo moedeiro electrónico asociado ao seu servizo chamado Kernel Pay, que comezará a empregarse o 26 de febreiro e «a partires desa data, Kernel Pay cargará na túa conta uns gastos de xestión, por cada recarga que realices, que poderán acadar o 10% do importe ingresado», o que os usuarios do aparcamento urbano en superficie ben como un auténtico abuso.
Dende e-park aseguran que «estes cambios son o mellor camiño para garantir a calidade do servizo», pero os usuarios non entende que tal cantidade teña que soportala o usuario final en vez do beneficiario dos pagamentos ou, cando menos, que a comisión sexa bastante máis reducida (como cando se paga cunha tarxeta bancaria).
Pero non estamos ante un caso illado, senón que esta medida responde a un acordo ao que chegaron Telpark, e-park e Parking.com, empresas que controlan case a totalidade do sector en España, que acordaron aplicar a polémica comisión por recarga.
A comisión por transferir saldo á aplicación de e-park está a verse por parte dos usuarios como unha suba indirecta do servizo da ORA, o que vén dun xeito moi crítico, xa que esta recarga irá a parar a unha empresa privada, de aí que nas plataformas sociais das empresas que cobrarán as mencionadas comisións están a xurdir moitos comentarios críticos.

Categorías: Ciencia

A cuarta First LEGO League Galicia xunta este sábado en Ferrol 26 equipos de novos argalleiros

Ven, 02/16/2018 - 18:16

Este sábado 17 de febreiro celébrase no Auditorio de Ferrol a cuarta entrega da competición First LEGO League Galicia. A xuntanza, na que se agarda xuntar máis de 200 escolares (26 equipos) de Galicia e Asturias, vén da man do Campus de Ferrol e, máis polo miúdo, do profesor da UDC José Antonio Becerra, que é coordinador das actividades. O evento será inaugurado pola vicerreitora do Campus de Ferrol e Responsabilidade Social, Araceli Torres. As demostracións dos xogos de robot comezarán ás 10:40 horas. Ao longo da mañá desenvolveranse as distintas probas do evento que concluirá ás 13:45 horas, coa clausura e entrega de premios, nun acto presidido polo reitor, Julio Abalde.
Segundo avanzou os días pasados a organización, o evento ten dúas modalidades: o desafío, para nenos e nenas de 10 a 16 anos; e a modalidade junior, para nenos e nenas de 6 a 9 anos. No caso desta categoría, o obxectivo é “espertar nos máis pequenos a curiosidade pola ciencia e a tecnoloxía”. A súa participación consiste na construción dunha maqueta con pezas LEGO e un póster ilustrativo do seu traballo”.
No desafío, a finalidade é “descubrir a diversión e a emoción pola ciencia e a tecnoloxía” coa proposta dun reto relacionado cun problema do mundo real. Nesta edición, o obxectivo a superar ten que ver co ciclo humano da auga. Así, a rapazada deberá presentar un proxecto científico, e participar nun xogo de robot nun taboleiro relacionado con este “desafío hídrico”. O xurado valorará tamén a integración de valores educativos nos dous casos. Os gañadores da FLL Galicia representarán á Comunidade Autónoma na gran final FLL España que terá lugar en Logroño no mes de marzo, onde, á súa vez, os dez mellores equipos participarán nos torneos internacionais.
A competición First LEGO League Galicia está coordinada polo profesor José Antonio Becerra Permuy, e conta coa colaboración de Santander Universidades, Viaqua, Concello de Ferrol e Deputación Provincial da Coruña. Ademais, patrocinan a FLL Galicia a empresa Gabadi SL, o Colexio Profesional de Enxeñaría en Informática de Galicia (CPEIG), Colexio de Enxeñeiros Industriais, GADIS, R, Error Ferrol!, PuntoGal, Neodyn, TodoOcio e Lidl.
Segundo informa a Universidade da Coruña, a First LEGO League é un programa internacional que desafía a mozos e mozas, de entre 10 e 16 anos, a resolver problemas do mundo real como poden ser a reciclaxe, a educación ou as enerxías renovábeis. Mediante a súa resolución, os mozos e mozas desfrutan coa ciencia e a tecnoloxía. Ao mesmo tempo, aprenden valiosas habilidades para o seu futuro profesional e persoal como son o traballo en equipo, a resolución de problemas e a comunicación.
A continuación damos conta dos equipos que participan na proba deste sábado:
1 INFINITY, Colexio de Fomento Montespiño (A Coruña)
2 AquaTech, Colexio de Fomento Peñarredonda (A Coruña)
3 Men in Blue, Colexio de Fomento Peñarredonda (A Coruña)
4 Crystal Lake, Colexio Internacional de Eirís (A Coruña)
5 Waterbot, IES de Fene (Fene)
6 RECIBÓTICA, CEIP Recimil (Ferrol)
7 Aquours, IES Concepción Arenal (Ferrol)
8 Robolvello, IES Ferrol Vello (Ferrol)
9 C3Clube, ES Ricardo Carballo Calero (Ferrol)
10 CASANOVASQUAD, IES Sofía Casanova (Ferrol)
11 Goteiras, IES San Rosendo (Mondoñedo, Lugo)
12 OS CONSTRUCTORE, IES Virxe do Mar (Noia, A Coruña)
13 WATER BOYS, Colexio Guillelme Brown (Pereiro de Aguiar, Ourense)
14 SANSABOTICS 3.0, CPI San Sadurniño (San Sadurniño, A Coruña)
15 PrixRoboters, Colexio ISP Laude Palacio de Granda (Siero, Asturias)
16 FrouxiMakers, CPI de Atios (Valdoviño, A Coruña)
Modalidade Junior
1 Aqua Bots, Colexio Internacional de Eirís (A Coruña)
2 Los MEGA-LEGO, Ferrol
3 Los Robots, Ferrol
4 LegoLago, Todo Ocio Education SL (Ferrol)
5 AquaMarín, CEP Sequelo (Marín, Pontevedra)
6 Waterthunder, Colexio Guillelme Brown (Pereiro de Aguiar, Ourense)
7 WaterSpider, Colexio Guillelme Brown (Pereiro de Aguiar, Ourense)
8 Water-Superfish, Colexio Guillelme Brown (Pereiro de Aguiar, Ourense)
9 Lego-Waterman, Colexio Guillelme Brown (Pereiro de Aguiar, Ourense)
10 FrouxiMakers Junior, CPI de Atios (Valdoviño, A Coruña)



Categorías: Ciencia

O Plan de Banda Larga facilitará conexións a Internet de até 350 Mbps a polígonos de Lugo

Ven, 02/16/2018 - 15:13

O Plan de Banda Larga da Xunta facilitará este ano o acceso a Internet con velocidades de até 350 Mbps a outros 9 polígonos lugueses, acadando así un total de 14 superficies empresariais da provincia con redes ultrarrápidas segundo anunciaron esta mañá a directora da AMTEGA, Mar Pereira, o director xeral de R, Alfredo Ramos, e o delegado da Xunta en Lugo, José Manuel Balseiro.
As actuacións do Plan comezaron en agosto 2016 e ao remate de 2017 había 5 polígonos da provincia con este servizo de banda larga ultrarrápida. Unha vez completado o Plan o 85% das superficies empresariais ocupadas da provincia terán acceso a redes de máis de 100 Mbps.
Ademais, como complemento a esta actuación, a AMTEGA abriu en 2017 unha convocatoria de axudas para dotar de redes ultrarrápidas a empresas e autónomos das zonas máis illadas do rural. Destináronse un total de preto de 400.000 euros á subvencionar solucións específicas a máis de 30 empresas que agora dispoñen de velocidades de acceso a internet de entre 50 Mbps e 350 Mbps.
As empresas dos polígonos beneficiados desta actuación do Plan poden contratar servizos de Internet a través de fibra óptica cunhas velocidades de ata 350 Mbps de baixada e 35 de subida, e cunha garantía de caudal do 80% sen límite de descargas.

Prazos e orzamento

O Plan xa completou o despregamento 51 polígonos da Comunidade e este ano chegará aos 30 restantes. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso a redes de máis de 100 Mbps.
A AMTEGA subvenciona estes despregamentos cunha axuda de 3,4 millóns de euros, que xerarán un investimento total de 5,2 millóns de euros. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).

Axudas para núcleos de poboación do rural

Tras as dúas primeiras actuacións orientadas a mellorar a conectividade no tecido empresarial, a AMTEGA puxo en marcha o pasado 15 de xaneiro a terceira actuación para facilitar o acceso a redes ultrarrápidas en zonas do rural que non contan con esta cobertura nin previsión de dispoñer destas redes.
Onte, xoves 15 de febreiro, pechábase o prazo de presentación de solicitudes para acceder a esta liña de axudas cun importe total de 14,2 millóns de euros, dirixida a operadores de telecomunicacións para facilitar o acceso a internet de cando menos 100 Mbps en núcleos de menos de 150 habitantes.
Os operadores poderán actuar en calquera das 26.386 entidades de poboación de menos de 150 habitantes e noutros 80 núcleos de entre 150 e 300 habitantes.
As redes coas que se dote ás entidades de poboación deberán proporcionar servizos de cando menos 100 Mbps de baixada e 20 de subida, non establecer limitacións de descargas e permitir a realización de comunicacións de voz e vídeo en tempo real.
A Administración autonómica concederá unha subvención máxima do 90% do custo total de cada proxecto. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Con esta medida a Administración autonómica actuará nos núcleos máis pequenos con fondos FEADER, mentres que o Estado focalizará os seus esforzos en cubrir as entidades de maior tamaño coas convocatorias xa en marcha e as que licite nos vindeiros anos no marco do Programa Nacional de Extensión da Banda Larga de Nova Xeración (PEBA).

Categorías: Ciencia

Política Lingüística certifica a súa aposta pola teleformación

Ven, 02/16/2018 - 15:00

A teleformación en materia de ensino de galego está aquí para ficar. Vímolo os días pasados co anuncio da ampliación dos cursos dixitais para obter o Celga (estreándose o nivel Celga 4 nesta vertente en liña), e hoxe confirmou esta liña tecnolóxica de aprendizaxe o propio secretario xeral de Política Lingüística, Valentín García, na presentación do Plan de formación en lingua galega do seu departamento para o presente ano. Segundo fixo saber, este plan chegará a máis de 7.000 persoas e incluirá a devandita formación Celga, ensino en linguaxes administrativa e xurídica e formación no exterior.
Valentín García, acompañado de María Lourdes Batán, subdirectora xeral de Política Lingüística, salientou que o plan abrangue 70 cursos preparatorios das probas Celga, organizados, ben directamente pola secretaría, ben coas escolas oficiais de idiomas da Dirección Xeral de Educación, Formación Profesional e Innovación Educativa. A eles hai que sumar os que se organizan ao longo do ano en colaboración con concellos da Rede de Dinamización Lingüística. En total, haberá máis de 2.000 prazas a disposición da cidadanía, que poderá optar pola modalidade presencial, ou, no caso da preparación para os niveis Celga 1 e Celga 4, pola teleformación. Segundo recalcou o secretario xeral, a aposta polo ensino nas redes é unha das novidades de 2018, “pois por primeira vez é posíbel facer en liña cursos encamiñados a preparar este último nivel”. A intención de Política Lingüística, dixo, “é seguir ampliando a oferta a distancia nos vindeiros anos”.
A formación en lingua galega para adultos contempla tamén máis de 50 cursos de linguaxes administrativa e xurídica (29 deles en liña) que se celebrarán en colaboración coa EGAP, coas escolas oficiais de idiomas e, nalgúns casos, con outras institucións, como a Deputación da Coruña, os concellos ou o Colexio de Avogados de Santiago. Con eles, a secretaría xeral de Política Lingüística aspira a chegar a máis 1.300 traballadores e traballadoras das administracións públicas.
No ámbito universitario, os convenios entre a Consellería de Cultura e Educación e as tres institucións de educación superior de Galicia permitirán organizar este ano un total de 25 cursos dirixidos a alumnado (galego ou estranxeiro) ou persoal docente e investigador, “o que incrementa en 750 prazas a oferta incluída no Plan de formación para 2018”, confirmou o secretario xeral.
A dita oferta complétase coa formación en lingua galega ofrecida fóra da nosa xeografía. Esta inclúe o Programa de promoción da lingua galega no Bierzo e Sanabria, froito da colaboración entre as consellerías de educación das comunidades galega e castelá-leonesa. Tras a recente incorporación do CRA Cubillos del Sil, este programa chega a 19 centros educativos e máis de 1100 estudantes de infantil, primaria, secundaria e escola oficial de idiomas. “A eles”, sinalaron, “hai que sumar un número crecente de alumnos e alumnas de galego no IE Cañada Blanch de Londres, con 87 matriculados en 2018, ou os colexios Castelao de Caracas (con case 400 estudantes de galego) e Santiago Apóstol de Bos Aires (500 alumnos e alumnas)”.
O ensino do galego no exterior está presente tamén nas universidades a través de 35 centros de estudos galegos que lle imparten docencia desta lingua a máis de 900 estudantes de Europa e América. O Plan de formación para 2018 prevé a creación doutros 4 máis en universidades de Bos Aires, A Habana, Cracovia e Edimburgo.

Categorías: Ciencia

O servizo de eAdministración da Deputación de Pontevedra permitiu nos concellos a tramitación de 200.000 expedientes

Ven, 02/16/2018 - 12:50

Onte a Deputación de Pontevedra fixo un repaso polos servizos tecnolóxicos ao servizo cos concellos que está a poñer en marcha co inicio do novo ano. As iniciativas, entre as que se atopa o proxecto de Administración Electrónica (que propiciou xa a tramitación dixital de 200.000 expedientes a nivel local), foron debulladas pola presidenta da entidade provincial, Carmela Silva, xunto ao deputado de Innovación e Promoción Económica, Javier Dios. Na cita participaron alcaldesas e alcaldes e persoal técnico das administracións locais de Pontevedra. Entre as/os presentes atópase a rexedora de Moaña e os alcaldes de Barro, A Cañiza, Cuntis, A Guarda, A Illa de Arousa, A Lama, Mondariz, As Neves, Poio, Pontecesures, Portas e Soutomaior; así como representantes do Goberno e persoal técnico de todos os concellos da provincia.
Carmela Silva comezou a súa intervención recordando que coa aprobación da Lei 39/2015 “os concellos están obrigados a unha serie de cuestións relacionadas coas novas tecnoloxías”. Neste senso, fixo saber que “se están a aprobar leis, como a 39/2015, que non incorporan recursos para a súa aplicación e, porén, son de obrigado cumprimento”, Esta situación, engadiu, está a provocar que os concellos teñan que retraer recursos doutros servizos para cumprir coa lexislación e evitar sancións por incumprimento, “algo que estamos a denunciar e así o fixemos xa na reunión que tivo lugar o pasado martes da Comisión de Deputacións da FEMP”.
Para loitar contra a devandita situación, a entidade provincial puxo en marcha iniciativas como o devandito proxecto provincial de Administración Electrónica, un dos servizos debullados na cita de onte cos alcaldes. Segundo fixeron saber Silva e Dios, trátase dun recurso de balde para as institucións locais, ao que se adheriron 54 concellos e 2 entidades menores. “A través deste proxecto”, indicou Carmela Silva, “xa formamos a 2.218 persoas que traballan na administración local e a 732 que ocupan cargos públicos; tamén se tramitaron preto de 200.000 expedientes de xeito electrónico, con medias mensuais de 12.000 novos expedientes electrónicos, 250.000 documentos asinados de xeito electrónico e 35.000 anotacións en rexistro”.
Xunto ao proxecto da eAdministración, a presidenta presentou tamén o Servizo de Padrón Municipal de Habitantes que arrancou este 15 de febreiro, precisamente, un servizo que “pretende solucionar os problemas existentes nos concellos na actualidade que veñen desde a heteroxeneidade das solucións implantadas para xestionar o padrón, até solucións desfasadas con mantementos incorrectos e que non se atopan integradas coa administración electrónica”, explicou Silva, engadindo que o investimento nesta iniciativa é de 500.000 euros, constituíndose unha ferramenta de balde para os concellos, que implantará a empresa Aytos, e que permitirá, dixo, “migrar os datos das aplicacións actuais de cada concello así como integralo na plataforma de eAdministración, facilitando a xestión de expedientes e a realización de trámites municipais, evitando colas e desprazamentos”.
O Servizo de Padrón, que se ofertará a través dunha nube privada, inclúe tamén formación en cada concello e mantemento correctivo e evolutivo, co obxectivo de “garantir a corrección de incidencias e a actualización e inclusión de novas funcionalidades”.
A presidenta da Deputación de Pontevedra tamén deu a coñecer o Servizo de impresión de dixitalización para entidades locais que “permite regular as condicións e os prezos destes servizos para as entidades da provincia”. Esta solución será implantada por Canon. Nestes intres hai xa unha preto dunha vintena de administracións locais que solicitaron a súa adhesión ao proxecto.


Categorías: Ciencia

Twitch estrea salas de chat

Ven, 02/16/2018 - 12:33

A plataforma de retransmisións de vídeo a través da Internet Twitch, referente mundial no sector dos videoxogos, vén de estrear un novo xeito de conectar coa comunidade de usuarios a través de Salas, espazos de conversa personalizados, que figuran na parte dereita cas páxinas das canles de Twitch, e que agora están dispoñibles tanto na web como en dispositivos móbiles.
Estas Salas poderían describirse como sub-chats, ou sexa, un apartado no que poder conversar fóra co chat principal, para tratar temas específicos, podendo elixirse quen pode entrar nestas conversas (moderadores, subscritores ou calquera usuario). As conversas nestas Salas tamén contarán con mencións, de xeito que un usuario recibirá unha notificación cando o mencionen, facilitando así que colla o fío da conversa.

Vídeo de presentación das Salas de Twitch

Categorías: Ciencia

Páxinas