códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 2 horas 7 min

Chuza! lanza unha web de eventos que xunta comunidades galegas no mundo: AXaneira.gal

Lun, 11/20/2017 - 10:00

A Asociación Cultural Chuza! vén de darnos a coñecer o remate da fase beta do seu novo proxecto web, AXaneira.gal, unha páxina sobre actividades e eventos con vontade de abranguer non só aos internautas residentes na nosa terra senón tamén a todas as comunidades galegas na diáspora. Segundo informan os seus creadores, “tratase dunha web colaborativa, na que os usuarios poden engadir os seus propios eventos, incluíndo datos como data, hora e a localización exacta”. Por outra banda, poden tamén subscribirse a determinadas canles, “de maneira que reciban notificacións no correo electrónico dos eventos nos que teñan interese”.
Un dos obxectivos é que cada centro galego ou cidade teña unha categoría de seu, con vistas a facer máis doado que os usuarios atopen de contado a información requirida.
A nova web ten tamén contas nas redes sociais Facebook e Twitter, aínda que a adición de eventos realízase de maneira exclusiva a través da páxina web.
Por outra banda, Chuza! tamén comunica o seu cese de actividade como asociación, “debido sobre todo aos problemas legais derivados dos últimos trocos nas lexislación española”. Porén, a comunidade tamén fai saber que os servizos de Chuza.gal, OQue.gal e AXaneira.gal fican garantidos e a súa xestión realizarase fóra de territorio do estado español.

Categorías: Ciencia

O Campus de Ourense acolle os días vindeiros unhas xornadas a prol da igualdade nos videoxogos

Ven, 11/17/2017 - 22:54

Os días 28 e 29 de novembro vaise celebrar no Campus de Ourense unhas xornadas destinadas directamente a loitar a prol da igualdade de xénero na industria do videoxogo, un ámbito, todo hai que dicilo, onde segue a haber maioría profesional de homes e que fica aínda inzado (en forma e máis en contido) de estereotipos de xénero que cómpre superar. Estamos a falar das xornadas Videogamificación e sexualidades: identidades, xéneros e discursos interactivos. Consecuencias para a industria e a educación. A respecto dos porqués da organización deste encontro, as docentes María Isabel Doval, da Facultade de Ciencias da Educación, e Alma Rodríguez, da Escola Superior de Enxeñaría Informática, teñen claros os moitos motivos polos que cómpre visualizar o sexismo no sector: “A industria do videoxogo segue lonxe dos estándares de igualdade que debería manter”.
Segundo engaden as coordinadoras da iniciativa, “cada vez son máis as mulleres de peso na industria e as protagonistas femininas nos videoxogos e tamén son xa case a metade da porcentaxe de xogadoras habituais”. Porén, matizan, “as mulleres só conforman o 22% do sector de desenvolvemento e un 10% do cadro de competidores e competidoras profesionais en ligas”. Neste contexto, recalcan, xorde a necesidade tanto de dar a coñecer “o verdadeiro papel da muller na industria, da man de xornalistas, desenvolvedoras, estudantes, artistas e xogadoras profesionais”.
As xornadas Videogamificación e sexualidades, patrocinadas pola Unidade de Igualdade da Universidade de Vigo, abranguerá conferencias, presenciais ou non, e diferentes mesas redondas e obradoiros prácticos, contando coa participación de expertos e expertas de diferentes eidos tanto do mundo profesional como académico. As actividiades arrancarán cunha conferencia sobre a reprodución de microculturas patriarcais e masculinidades hexemónicas a través dos videoxogos, a cargo de Jorge García, sociólogo da Universidade de Santiago de Compostela, e rematará cun obradoiro no que as persoas participantes probarán diferentes videoxogos para ver como se representa neles a sexualidade e levar a cabo unha análise crítica.
As xornadas están dirixidas sobre todo (aínda que non de xeito exclusivo), ao alumnado. As persoas interesadas poden inscribirse de balde ata o 26 de novembro en videojuegosygenero@uvigo.es.


Categorías: Ciencia

Dispárase o consumo de vídeo en streaming nos fogares españois

Ven, 11/17/2017 - 21:20

Aínda que a chegada de plataformas de vídeo baixo demanda de pagamento a España era vista con moitos con certo escepticismo por mor da sona de piratas audiovisuais que teñen os países europeos mediterráneos, a práctica demostrou que cando un produto é de calidade e cun prezo asumible os consumidores están dispostos a subscribirse, e segundo datos do Panel de Fogares da CNMC do segundo trimestre de 2017 temos que Netflix tería chegado xa a 1.163.000 fogares, mentres que HBO estaría no redor dos 414.000.
O servizo de vídeo baixo demanda de Movistar+/Yomvi é o máis presente en fogares con acceso á Internet (o 12,6%) xa que está asociado a un operador, mentres que Netflix (7,3%) e HBO (2,6%) terían un índice de penetración máis interesante pola súa novidade e polo seu rápido crecemento, pois non podemos esquecer que Netflix só leva un par de anos en España e HBO só un ano.
Aínda que o smartphone continúa a ser o dispositivo preferido para consumir contidos audiovisuais a través da Internet, cómpre salientar que nos últimos dous anos medrou dun 50% o uso de televisores conectados, indicando unha tendencia que indicaría que o consumo audiovisual está cada vez máis afastado das canles tradicionais e das grellas de programación.

Categorías: Ciencia

A Xunta porá en marcha unha rede dixital de vixilancia forestal

Ven, 11/17/2017 - 19:57

Tras a celebración do Consello da Xunta de hoxe, o presidente anunciou en rolda de prensa a posta en marcha dunha rede dixital de vixilancia forestal para apoiar os sistemas de prevención, detección e seguimento dos lumes de xeito que os novos focos poidan detectarse coa máxima rapidez posible, sistema que contou co experiencias piloto nos últimos anos e que basearase na instalación de cámaras de videovixilancia dun xeito proporcional á actividade incendiaria de cada lugar.
Esta rede despregarase nas infraestruturas das que dispón o operador público de telecomunicacións, Retegal. Nunha primeira fase, instalaranse cámaras en 34 centros de Retegal, que facilitarán cobertura visual de 1,4 millóns de hectáreas, que representan o 48% do territorio galego.
«A xestión da rede dixital de vixilancia forestal realizarase a través dunha plataforma tecnolóxica que permitirá a observación remota dos montes desde un centro de control que estará operativo as 24 horas do día», comentou Núñez Feijoo incidindo en que, deste xeito, os axentes e técnicos forestais poderán acceder en tempo real ás imaxes, incluso a través de dispositivos móbiles.
Cómpre subliñar, ademais, que nesta primeira fase se outorgará prioridade ao obxectivo de apoiar a extinción dos lumes. Así, cando se detecte un incendio, o sistema ofrecerá imaxes en directo sobre o xeito no que avanza e as súas condicións e permitirá xeoposicionar o punto exacto que se está a visualizar en cada momento. O obxectivo é que este convenio se asine e se licite no vindeiro mes de xaneiro, de tal xeito que o sistema sexa adxudicado nun máximo de dous meses e medio desde a licitación.

Categorías: Ciencia

A UDC loce o seu portal participativo en Madrid

Ven, 11/17/2017 - 17:01

Poden os estudantes contribuír a decidir o rumbo da universidade na que cursan unha carreira? Segundo a Universidade da Coruña, non é que poidan, que tamén, é que deben facelo. Esta é a base do Portal de Participación da UDC, presentado o pasado mes de outubro como un novo recurso dixital destinado a “facer” comunidade e a estimular nos campus o traballo conxunto (a través de propostas e debates) con estudantes, profesorado, investigadores e demais integrantes do colectivo da UDC. O portal, desenvolvido coa aplicación Consul, unha ferramenta de software libre dirixida a fomentar a participación cidadá, está a presentarse estes días no evento Cidades Democráticas que impulsa o Concello de Madrid, artífice, precisamente, de Consul. Segundo recordou alí a UDC, a universidade galega foi a primeira entidade educativa superior que puxo en marcha, en todo o eido estatal, unha canle directa e horizontal de participación na toma de decisións que implica a toda a comunidade dos campus coruñeses.
Na xuntanza madrileña (na que participan representantes de cidades, autonomías ou institucións que apostaron polo software libre Consul) está a participar a vicerreitora, Margarita Amor, quen explicou hoxe nun relatorio a experiencia da posta en marcha desta plataforma na UDC.
Previamente, o encontro inaugurouse onte coa presenza da directora de Governance Lab, Beth Noveck, quen liderou a iniciativa do goberno aberto do ex-presidente dos Estados Unidos, Barack Obama.
As intervencións continuaron esta mañá, con distintos relatores, entre eles a vicerreitora de Estudantes, Participación e Extensión Universitaria. Margarita Amor, que cualificou a posta en marcha do Portal de Participación como “un primeiro paso que garante a comunicación directa entre o equipo reitoral cos estudantes e o persoal”. Segundo explicou, a UDC decidiu implantar este espazo web de traballo cooperativo para buscar unha canle de participación directa nos órganos de goberno que expresase “a vontade da comunidade universitaria e dos estudantes en particular”.
O Portal de Participación, segundo definiu a vicerreitora, é “unha canle de comunicación na que o equipo de goberno da Universidade escoitará a toda a diversidade da comunidade universitaria para camiñar cara a unha universidade que se basea no principio de eficacia, democracia, transparencia e transversalidade”.
A vicerreitora lembrou que dende a súa posta en marcha, a novo portal recibiu preto de 1.500 visitas e subíronse tres propostas: Que os Fillos de Breogán poidan xogar no Estadio de Elviña ao fútbol gaélico, con 47 apoios; Habilitar contas de correo IMAP para os alumnos, con 19 apoios; Creación dunha banda de música da UDC, con 4 apoios.


Categorías: Ciencia

Entidades e desenvolvedores da nosa terra botan man das TIC para loitar contra a avespa velutina

Ven, 11/17/2017 - 14:13

Alén de calquera confirmación científica, que as hai, a proba de que a avespa velutina está fóra de control na súa propagación, é que xa non queda case ninguén que non as coñeza e non saiba localizalas. Con toda probabilidade, este nivel de coñecemento noso sobre unha especie non adquiriu antes tal nivel de amplitude con ningún outro animal, planta ou insecto. Isto non tería que ser negativo se non fose porque a velutina é unha das peores cousas que lle podía pasar ao noso medio, e a nós mesmos: estraga as poboacións de abellas e outros insectos a unha velocidade de vertixe, e, ademais, pode carrexar serios problemas de saúde para as persoas. Sen dúbida, é hora de botar man das novas tecnoloxías. Así o entenden entidades como a Universidade de Santiago e a Deputación da Coruña, que veñen de lanzar unha aplicación que visualiza nun mapa a distribución presente e futura da velutina.
O funcionamento da aplicación baséase nun modelo creado polo investigador Luis Rodríguez Lado, do departamento de Edafoloxía e Química Agrícola da USC. Este modelo bota man das bases de datos xeradas coa retirada de niños da especie invasora, creándose un alicerce preditivo e de comportamento que permite ao sistema informático facer prognósticos certeiros sobre o espallamento do insecto na nosa terra. O sistema foi desenvolvido ao abeiro do programa Detección precoz da distribución potencial da avespa asiática en Galicia mediante algoritmos estatísticos automatizados sobre plataformas dixitais. A aplicación tamén bota man da información climática de cada área. En total, tira proveito de medio cento de variábeis ambientais e é quen de visualizar as características de hábitat polas que se decanta a especie.

Técnicos da Deputación de Ourense e de Aerocámaras cos drons anti-avespas asiáticas

Esta innovación súmase a outras experiencias tecnolóxicas complementarias, como a da Deputación de Ourense e Aerocámaras (a base de drons autónomos localizadores de niños nas polas das árbores e con capacidade para neutralizalos) ou á presentada en Librecon 2017 da man de Nuno Troitiño, programador, apicultor 2.0 e responsábel da aplicación Appybee, unha innovación galega con claro potencial para achar e controlar pragas que afectan ás colmeas de abellas, como a da avespa velutina.

Appybee, máis en detalle, é un software-hardware libre que pon en xogo un sistema de seguimento das colmeas con consellos de tratamento contra as pragas e para mellorar a saúde dos insectos, para o que incorpora un circuíto especializado no propio “fogar” das abellas, con sensores-placas Arduino e Raspberry (hardware libre). Ten capacidade para recoller, almacenar e procesar información sobre a colmea en caso de ameaza.

Categorías: Ciencia

Vodafone celebra o Black Friday achegando Video Pass durante seis meses e de balde

Ven, 11/17/2017 - 12:30

Para quen ande xa facendo plans para o Black Friday, do que falamos onte salientando cando se celebra (o derradeiro venres de novembro, o 24) e os porqués, dicirlle que as operadoras xa están a pechar fileiras arredor dunha celebración que, no que a nosa terra se refire, prevese que aumente en materia de seguimento nun 22% con respecto á actividade de vendas do ano pasado. Unha das operadoras que máis ruído fai é Vodafone, cuxa división española apuntouse a expandir a xornada de celebración nunha semana enteira: do 20 ao 27 de novembro. Ao longo destes días seremos testemuñas de “unhas ofertas que se saen”. Ademais, haberá iniciativas novas tanto para clientes actuais coma novos.
No paquete de ofertas e iniciativas atopamos o seguinte: por unha banda, ao longo dos devanditos días achegarase calquera paquete de Vodafone One (con fibra, móbil e fixo) a metade de prezo durante seis meses e con independencia da velocidade contratada, e pola outra, fornecerase aos clientes do servizo Vídeo Pass durante seis meses e de balde (con esta promoción os usuasrios poderán ver contidos audiovisuais no móbil “todo o tempo que queiran en sen gastar os datos da tarifa”, gozando tamén nos seus dispositivos dos contidos de HBO España). Por certo que o servizo Vídeo Pass está arestora valorado en 48 euros.
Ademais, Vodafone España regalará unha PlayStation 4 (até fin de existencias) valorada en 299 euros, ao adquirir un smartphone Sony Xperia XZ Premium, por 29 euros/mes. Así mesmo, durante este período, Vodafone tamén seleccionou diferentes terminais sobre os que aplicará un desconto sobre o seu prezo de venda para novas altas, renovacións de terminais e migracións de prepago a contrato, por exemplo o Huawei P10 Plus e o Huawei P10 (cuns descontos de 156 e 72 euros respectivamente), o terminal LG G6 (cun desconto de 96 euros e un prezo mensual de 16) ou os dispositivos intelixentes V by Vodafone: V-Pet, V-Bag, V-Auto e V-Camera, cun desconto do 50% e o primeiro mes de subscrición ao servizo gratis.
Para quen queira máis información sobre as ofertas e iniciativas da operadora estes días, non ten máis que visitar a web específica, www.vodafone.es/blackfriday.

Categorías: Ciencia

A Rede de Escolas na Nube senta os alicerces para estenderse a todo o noso rural

Ven, 11/17/2017 - 10:14

O proxecto Rede de Escolas na Nube vaise ampliar a todas as Escolas Rurais Agrupadas de Galicia. Así o deron a coñecer este mes os impulsores actuais do dito proxecto, o Centro de Supercomputación de Galicia (CESGA), a empresa Balidea e máis a Xunta (AMTEGA e a Consellería de Educación e Cultura). Como lembraremos, a Rede foi creada hai case oito anos co obxectivo de explorar (e explotar) as vantaxes da computación na nube (cloud computing) desenvolvidas na contorna das pequenas escolas rurais, na nosa terra os Centros Rurais Agrupados (CRA). O dito traballo foi posíbel na súa orixe grazas ao apoio financeiro que HP Labs emprestaba ao CESGA e en 2014 recibiu un importante pulo orzamentario para un proxecto europeo de cara a validar e mellorar os achados obtidos noutras zonas rurais e illadas de Europa. Agora, a Rede de Escolas de Nube volve recibir impulso coa posibilidade de espallarse a todo o noso rural.
A dita nova (o espallamento da iniciativa) deuse a coñecer nunha xuntanza entre a Consellería de Educación e AMTEGA, por unha banda, e os equipos directivos de todos os Centros Rurais Agrupados (CRAs) de Galicia. Na presentación da Rede de Escolas na Nube ofrecéuselles a posibilidade de incorporarse ao proxecto.
Como recordaremos, catro deles (o CRA Boqueixón - Vedra Neira Vilas, o CRA de Vilaboa Consuelo González Martínez, o CRA Amencer de Ribadavia, e o CRA Nosa Señora do Faro de Ponteceso) están a participar desde 2012 como centros piloto ao abeiro da iniciativa.
O proxecto de innovación educativa Rede de Escolas na Nube xurdiu como colaboración entre o CESGA, quen coordinou a iniciativa, a empresa galega Balidea Consulting & Programming, a Consellería de Educación e a Axencia de Modernización Tecnolóxica de Galicia da Xunta de Galicia.
Segundo se lembrou na xuntanza, a Rede de Escolas na Nube supón “un modelo de infraestrutura, servizos e metodoloxía de traballo baseado en computación cloud e software aberto ao servizo do ensino e a colaboración entre as escolas rurais distribuídas, creando unha rede na que se poidan compartir de maneira segura experiencias educativas, materiais e aprendizaxe, adaptada a contorna ás necesidades deste modelo de escola rural distribuída e multinivel”.
Asemade, fíxose fincapé nos bos precedentes abertos polo proxecto: “A Rede de Escolas na Nube é un claro exemplo dunha colaboración de éxito entre institucións públicas e privadas galegas”, unha iniciativa que, neste caso concreto, é quen de “repercutir nun beneficio directo para a sociedade, así como nunha aposta de futuro para a creación de produtos innovadores made in Galicia”.

Categorías: Ciencia

O alumnado de Belas Artes de Pontevedra somérxese na realidade virtual

Ven, 11/17/2017 - 09:57

Esta semana o alumnado de Belas Artes do Campus de Pontevedra (UVigo) tivo ocasión de participar nunha experiencia de realidade virtual, reconstrución en 3D e vídeo en 360 graos. No obradoiro, impartido polo ex-estudante da Facultade e director do estudo Máxima, Carlos Seijo, brindóuselles aos estudantes (a través do emprego dun capacete específico, o casco HTC Vive) a posibilidade de facer cousas nunca imaxinadas, como por exemplo visitar in situ o estudo do artista Francis Bacon. A experiencia, impulsada pola profesora Sol Alonso, inseriuse no programa de formación extracurricular da facultade e xuntou alumnado da materia Proxectos videográficos e estudantes de mestrado e doutoramento. Como dixemos, os participantes tiveron ocasión de empregar o casco HTC Vive, un dispositivo que, a través do uso de dúas estacións de recoñecemento que rexistran o movemento do usuario, permítenlle moverse en tempo real por un espazo en 3D.
A cita virtual tivo un precedente nunha xeira de traballo celebrada a semana pasada. Nela, Seijo procurou achegar ao alumnado unha visión introdutoria das diferentes iniciativas que se están a levar a cabo no eido da realidade aumentada, “aquela que engade a unha contorna real outra serie de contidos que non se atopan nese lugar”, así como a outra serie de experiencias “como, por exemplo proxectos, que se están a facer no mundo da arte con hologramas”, sinalou.

O egresado e responsábel do obradoiro, Carlos Seijo

Na sesión deste martes era a quenda de pór o foco no propio mundo da realidade virtual, un dos grandes eidos de traballo de Carlos Seijo como profesional, e un dos ámbitos principais de investigación e desenvolvemento de multinacionais punteiras como Google, Samsung, Facebook ou HTC. Segundo fixo saber, as ditas tecnoloxías teñen un amplo potencial ao abeiro dos equipos de creatividade formados en Belas Artes, titulados e tituladas “que incorporan na súa aprendizaxe unha serie de contidos que teñen que ver con ter pensado na arte”.

Categorías: Ciencia

Case medio milleiro de escolares xúntase en Compostela para tirar partido dos datos

Ven, 11/17/2017 - 09:57

Este venres a nosa mocidade ten unha cita cos datos en Compostela. Estamos a falar da xornada Stat Wars: o espertar dos datos, un vento participativo que busca afondar no ensino da estatística e das súas posibilidades para mellorar o mundo: combatendo andazos, predicindo desastres e axudando a evitalos ou desenvolvendo produtos modos de vida máis sustentábeis e ecolóxicos. A cita celébrase no Teatro Principal de Santiago ás 11.00 horas e será presentada por Manuel Vicente García, condutor do programa Efervescencia da Radio Galega. Participan case medio milleiro de estudantes de secundaria e bacharelato de todos os recantos da nosa terra.
Stat Wars, segundo informan os seus impulsores, busca transmitir a idea de que, amais dunha profesión de futuro, a estatística pode ser unha ferramenta imprescindíbel en distintas disciplinas (medicina, economía, medio ambiente, xornalismo, ...) para resolver os problemas aos que nos enfrontamos na actualidade. O proxecto lidérao o grupo interdisciplinar de Bioestatística da USC (GRIDECMB) que dirixe a profesora Carmen Cadarso Suárez en coordinación coa Universidade Carlos III de Madrid. O equipo deseñou unha serie de actividades co formato de pílulas estatísticas a través das que se poderán ver aplicacións directas da estatística en disciplinas actuais como os deportes, as redes sociais e a información a gran escala (Big Data).
A cita conta con financiamento da Fundación Española para a Ciencia e a Tecnoloxía (FECYT) e a colaboración da empresa Biostatech Sl, do Concello de Santiago, do programa Efervescencia da Radio Galega, do centro educativo En Clave Método Suzuki e do Espazo de Danza da USC. Ademais é unha actividade que se realiza noutros puntos da xeografía española a través dos distintos Nodos da Rede Nacional de Bioestatística (BIOSTATNET). Quen queira recadar máis datos sobre este evento, ten máis información en Facebook e Twitter .

Categorías: Ciencia

A celebración do Black Friday medrará en Galicia nun 22%

Xov, 11/16/2017 - 23:12

Achégase o Black Friday, o último venres de novembro (o 24) e isto significa, entre outras cousas, que moita xente vai tentar “solucionar” as compras de Nadal nunha única xornada (unha xornada moi acaida para descontos de todo tipo no ámbito tecnolóxico), que o mercado español segue adiante con esta celebración importada de Estados Unidos (será a sesta edición do evento no ámbito estatal) e que haberá novamente unha chuvia de cifras récord de vendas. Será Galicia unha excepción nesta tendencia? Pois segundo a plataforma experta na cuestión do Black Friday, Black-friday.sale, non o será. Segundo os seus datos, todo apunta a que a celebración medrará nun 22% en Galicia nesta edición 2017 (sendo a media estatal dun 21%).
A Coruña, ademais, repetirá como unha das cidades do ámbito estatal onde máis interese esperta o devandito evento comercial. En cuestión de comercio electrónico, Amazon foi o establecemento en liña máis buscado polos galegos durante o evento do ano pasado, abranguendo o 32% das procuras. Por temáticas, impuxéronse as novas tecnolóxicas, a telefonía e as viaxes.
A plataforma tamén informa que o ano pasado os galegos realizamos máis de 110.000 de procuras relacionadas co Black Friday.
En total, a empresa engade que polo menos tres de cada cen persoas en España realizaron durante novembro de 2016 unha procura relacionada co Black Friday. “Este evento”, engádese, “xa se converteu no máis importante en liña con máis de 1,8 millóns de procuras durante novembro do ano pasado; mentres que as rebaixas de inverno acumulan 135 000 procura en xaneiro”.
Para quen no o saiba a estas alturas, o nome de Black Friday (Venres Negro) vén dado porque os establecementos de EE UU adoitan vender unha chea de lotes e produtos un día despois da festa de Acción de Gracias, pasando a súa contabilidade do vermello ao negro.

Categorías: Ciencia

A web móbil de Instagram permite crear historias e gardar publicacións

Xov, 11/16/2017 - 22:00

Dende Instagram deixan sempre claro que son unha plataforma pensada por e para smartphones, pero iso non significa que teñen abandonada á web, que non só é unha canle para a distribución de contidos, senón que tamén a ven como unha opción para que os usuarios poidan publicar material sen precisar da súa aplicación instalada, e por iso están a incorporar novidades na web de instagram.com cando accedemos a lea dende o noso teléfono, como son a creación de historias e o gardado de publicacións que sexan do noso agrado.
A partires de agora a versión web móbil de Instagram funcionará dun xeito máis semellante á aplicación móbil, de xeito que cando prememos na icona da cámara fotográfica poderemos disparar unha instantánea ou elixir unha fotografía gardada no móbil para engadirlle texto na cor que queiramos e poder compartila como historia.
Adicionalmente, cando esteamos a ver unha publicación que queiramos gardar para ver logo, tamén podemos premer dende a web móbil na icona do marcador que figura debaixo de cada publicación para gardalo (aínda que neste caso só poderemos facer un gardado básico e non por categorías como na aplicación nativa).

Categorías: Ciencia

O Consello da Cultura Galega convídanos a viaxar ao noso pasado da man da realidade aumentada e virtual

Xov, 11/16/2017 - 20:27

Unha parte importante das enquisas feitas ao longo da historia pescudando as nosas arelas e soños ten coincido no papel preponderante das máquinas do tempo, como obxectos ampla e longamente devecidos. O problema é que as viaxes a outras épocas, por moito poder que tivese a nosa imaxinación, viñan sendo, como tales, un chisco complicadas. Faltaba a tecnoloxía. Porén, segundo informou hoxe o Consello da Cultura Galega, unha parte importante desa tecnoloxía que faltaba xa está aquí. E, botando man da que xa está dispoñíbel (a realidade aumentada, as tecnoloxías virtuais, os dispositivos móbiles, as redes avanzadas), o CCG desenvolveu unha aplicación concreta. Trátase da Máquina do Tempo, dispoñíbel para iOS e Android, unha ferramenta móbil, de balde, que en palabras dos seus responsábeis pon en valor o patrimonio móbel de Galicia dun xeito innovador. A través dela poderemos ver en todos os seus detalles obxectos relevantes do noso pasado e o contexto no que “viviron”. Quere isto dicir que as cousas que se gardan nos nosos museos veñen agora cara a nós e se volven máis accesíbeis e máis informativas? Definitivamente si.
A presentación de A Máquina do Tempo, que coincide coas celebracións da Semana do Patrimonio, celebrouse hoxe e contou coas intervencións do presidente do CCG, Ramón Villares, e de Manuel Gago, responsábel da aplicación, quen debullou as súas orixes e as súas posibilidades e avanzou algúns dos seus roteiros futuros. Segundo sinalaron, o feito que a ferramenta se dese a coñecer durante a Semana do Patrimonio anuncia boa parte das súas razóns de ser: pór en xogo un recurso para explotar a importancia do patrimonio e para que este acurte distancias coa poboación. Ademais, salientaron o carácter pioneiro en Galicia da iniciativa presentada e máis as orixes da mesma: a exposición Galicia100, impulsada hai un ano polo CCG e, como recordaremos, constituída por un centenar de obxectos clarificadores do noso pasado: as pezas do relato histórico do país. A experiencia, sinalou Gago, serviu para moitas cousas, pero en relación coa aplicación presentada hoxe, alentou un interese por pescudar o poder de determinados obxectos para narrar. Porén, como solucionar a cuestión da inmobilidade de determinados obxectos, da imposibilidade de incorporalos a unha exposición e dos límites de visión impostos polo seu reducido tamaño? Os computadores, os dispositivos móbiles e a realidade aumentada deron a resposta axeitada á devandita pregunta. Ao devandito uniuse outro ingrediente: a realidade virtual.
Segundo explicou Gago, a aplicación ten a seguinte base: a posibilidade de ver os elementos da nosa historia nos dispositivos móbiles e a través de tecnoloxías de realidade aumentada que permiten esculcar nos obxectos e velos con todo detalle. Isto compleméntase con outra posibilidade: a de ver as pezas no seu contexto orixinal en escenarios virtuais reconstruídos en 3D. “Esta contextualización, a inclusión do mundo de cada obxecto”, engadiu Gago, “foi sen dúbida a parte máis desafiante da iniciativa, onde reside de verdade o compoñente de máquina do tempo”. Tirar partido desta vertente, que nos obriga a empregar unhas lentes específicas (nas que se insire o noso smartphone), resolve boa parte dos límites imposto pola nosa imaxinación: “Unha cousa é imaxinar un sitio”, sinalou Gago, “e outra ver a totalidade dos detalles dese lugar”.
Na presentación tamén se fixo fincapé noutras das grandes potencialidades de A Máquina do Tempo: complementar e ampliar o coñecemento histórico que temos de algo (a través da busca do detalle e da busca dunha totalidade xuntando as súas diferentes partes integrantes) e mobilizar as comunidades dos centos educativos para, por unha banda, animalas a participar na inclusión de novos obxectos e escenarios, e, pola outra, darlle unha viraxe radical ao ensino da nosa Historia. Asemade, Villares e Gago salientaron a importancia de conseguir que as novas xeracións entren no mundo da virtualidade e das tecnoloxías dixitais máis avanzadas da man de contidos en galego e relacionados coa súa terra e o seu pasado: un xeito óptimo, sinalaron, de afianzárense no ámbito tecnolóxico.
Segundo fixeron saber, neste intre a aplicación acubilla seis obxectos e cinco escenas, en parte elixidos a partir da experiencia xerada por Galicia100. A ferramenta, dixeron, foi froito dun ano de traballo intensivo de desenvolvemento e contextualización, contándose co respaldo de múltiples investigadores da nosa historia. En datas vindeiras, engadiranse obxectos e escenas novas en traballo conxunto cos nosos centros educativos e cos bens patrimoniais que lles son máis próximos.
Cinco períodos históricos
A aplicación ofrece a posibilidade de explorar cinco obxectos de cinco períodos históricos distintos, custodiados en diferentes centros de memoria de Galicia. O vaso campaniforme de Vilavella (Universidade de Santiago de Compostela) lévanos á Prehistoria; o bronce votivo (Museo de Pontevedra) introdúcenos no mundo da relixiosidade da Idade do Ferro; o báculo e o anel do bispo Gonzalo (San Martiño de Mondoñedo) permítenos recrear unha coñecida lenda medieval que relata como este bispo destruíu unha armada pirata; a Virxe Abrideira de Allariz (Museo de Santa Clara de Allariz) trasládanos ao mundo das Cantigas de Santa María e o cartafol de documentos lévanos á Galicia da Ilustración, onde seguimos Vicente Álvarez de Neira polos sotos do Arquivo do Reino de Galicia na procura dun curioso documento.
Un complexo traballo de produción
O desenvolvemento de A Máquina do Tempo levou máis dun ano e involucrou un equipo de máis de vinte persoas de diferentes ámbitos, desde especialistas en diferentes períodos históricos ata programadores, deseñadores, dixitalizadores de patrimonio ou dobradores.
Segundo lembraron Gago e Villares, a recreación de todas as épocas seguiu “un coidadoso proceso de documentación e de recreación”.

Categorías: Ciencia

BBVA achega aos clientes a tecnoloxía de recoñecemento de iris de Samsung

Xov, 11/16/2017 - 19:19
Raúl Navarrete, director de Canal Móvil de BBVA España, e David Alonso, director da Área de Empresas de Samsung, na presentación do novo servizo

Samsung e BBVA presentaron este 16 de novembro un servizo de recoñecemento biométrico por iris destinado a facilitar e axilizar os procesos dos usuarios da banca ao mesmo tempo que se incrementa a seguridade (a biometría é o concepto que abrangue os avances en seguridade e protección baseados no recoñecemento das características físicas e intransferíbeis das persoas, como por exemplo a pegada dixital ou os iris dos ollos, precisamente). O servizo será unha realidade para todos aqueles clientes da entidade financeira que teñan descargada a aplicación de banca móbil de BBVA e un smartphone Samsung compatíbel. Segundo informou a banca, con este lanzamento convértese no que sería “o primeiro banco estatal que ofrece a avanzada tecnoloxía de escáner de iris de Samsung, Samsung Pass”.
Esta tecnoloxía ten a capacidade de verificar a identidade do usuario e darlle acceso a servizos que requiran seguridade integral e as máis altas esixencias de autenticación. Neste caso concreto, dáselle acceso ás súas contas.
Máis polo miúdo, a solución de xestión de identidades Samsung Pass, baseada na tecnoloxía FIDO (Fast Identity Online), ceiba ao usuario de ter que escribir identificadores e contrasinais para iniciar sesión. Segundo informou a multinacional tecnolóxica, Samsung Pass salienta tamén polo alto nivel de seguridade que pon en xogo, unha seguridade que se basea na propia característica do ires humano: o contrasinal máis inequívoco.
“Trátase dunha das formas máis sinxelas e seguras de manter o smartphone bloqueado e protexido fronte a un uso non desexado”, explicaron os responsábeis da compañía na presentación deste 16 de novembro, engadindo algúns detalles técnicos, como por exemplo os referentes á metodoloxía empregada polo dispositivo para acubillar credencias biométricas (empregando a plataforma de seguridade Samsung Knox, que garda esa información na TrustZone do dispositivo, unha área segura baseada no hardware do terminal), unha metodoloxía que imposibilita o roubo dos ditos datos a través do terminal.
Para incorporar este sistema de acceso á app móbil de BBVA, a entidade bancaria e Samsung acometeron un ambicioso proxecto de colaboración tecnolóxica, unha colaboración que deixa as portas abertas para, a medio prazo, comezar outro tipo de operativas de maneira conxunta, como a contratación de produtos.

Categorías: Ciencia

ABANCA adapta a súa aplicación móbil ao iPhone X

Xov, 11/16/2017 - 14:13

A aplicación móbil de ABANCA para iPhone vén de recibir unha actualización para aproveitar todo o potencial do iPhone X e de iOS 11. Algunhas das principais melloras nesta versión da banca móbil son exclusivas para os propietarios do novo iPhone X, que poderán acceder á aplicación dun xeito máis cómoda grazas a Face ID, o novo sistema de seguridade biométrica que substitúe á pegada dactilar.
A identificación facial permite un acceso máis áxil, pero tamén máis seguro e fiable respecto a sistemas anteriores segundo Apple. A aplicación, desenvolvida integramente en Galicia, tamén redeseñouse para o iPhone X e ofrece total integración coa curiosa pantalla deste smartphone, maior que outros modelos e cunha identificable franxa na parte superior.
Ademais destas melloras, as novidades tamén chegan a calquera usuario da aplicación para iPhone. A partires desta versión, o asistente Siri poderá informar do saldo das contas do cliente en ABANCA utilizando exclusivamente a voz. Antes de amosar esa información, o usuario deberá validar a petición coa pegada ou coa identificación facial. Esta funcionalidade súmase ao envío de diñeiro desde o móbil ao caixeiro a través da voz, que a entidade financeira xa implantou de maneira pioneira no sector en xuño.
A nova versión da banca móbil para dispositivos Apple conta cun novo sistema de indexado da información que permite un uso máis áxil. A aplicación de banca móbil de ABANCA indexa agora aquelas operacións que temos gardadas en favoritos ou que utilizamos de maneira recorrente e permite acceder dun xeito máis directo, tras unha procura a través de Spotlight.
Os usuarios que actualicen a aplicación de ABANCA tamén accederán a un novo sistema de preguntas frecuentes que conta cun procesamento máis natural da linguaxe, desenvolvido da man de Inbenta. Esta nova versión tamén permite contratar un maior número de produtos, como tarxetas, dunha maneira sinxela e intuitiva.

Categorías: Ciencia

Elogia fai medrar a comunidade dixital arredor de Turismo de Galicia e o Camiño Xacobeo

Xov, 11/16/2017 - 11:16

A axencia dixital Elogia, que conta con sede de seu en Vigo e un amplo equipo de profesionais galegos na súa equipa, é a gañadora do concurso para a xestión da comunicación dixital de Turismo de Galicia, órgano dependente da Xunta de Galicia e, como lembraremos, responsábel da actividade autonómica relacionada co sector turístico, incluíndo unha manchea de campañas multiformato para dar a coñecer no mundo os atractivos da nosa terra. Precisamente, o obxectivo do concurso co que vén de facerse Elogia é “dar a coñecer en Internet e nas redes sociais a campaña de promoción dos recursos naturais, culturais e gastronómicos de Galicia”, co fin de manter “a sensibilización da poboación galega, nacional e internacional”, así como aos sectores implicados sobre os valores do turismo en Galicia”. Segundo nos contan dende Elogia, a axencia está a encargarse xa da estratexia global de comunicación nas redes sociais de Turismo de Galicia e Camiño Xacobeo (Facebook, Twitter, Instagram e Youtube) así como do blog da entidade.
Entre as accións principais destacan a xestión diaria das redes sociais, a creación dunha liña editorial propia con brandeado de imaxes e vídeo, o envío de boletíns informativos mensuais e a cobertura dos principais fitos do calendario que atinxan o turismo, entre outras actividades.
Facendo un algo de reconto, Elogia informa que en só tres meses dende a posta en marcha desta liña de traballo, xa se lograron máis de 3.200 novos seareiros en Facebook e máis de 1.700 seguidores en Instagram de Turismo de Galicia, así como máis de 750 fans no Facebook do Camiño Xacobeo e un aumento do 50% de seguidores en Instagram. Ademais, o aumento do engagement (fidelidade) respecto ao primeiro mes desde o inicio da estratexia é do 45%. Elogia, seguindo este fío, tamén salienta a través da creación do vídeo para o Camiño Xacobeo abranguéronse xa máis de 100.000 persoas, máis de 30.000 reproducións, máis de 3.000 reaccións e máis de 5.700 clics.
Ao respecto de todas estas cifras (e das que están por chegar), Xosé Manuel Merelles, xefe da área de Comunicación de Turismo de Galicia declara que “a área de Comunicación de Turismo de Galicia está satisfeita cos resultados do traballo de Elogia nas redes sociais da axencia ao longo do verán e o que vai de outono”. Tamén salienta o incremento da conversa nas nosas redes e o uso homoxéneo de todas as contas.

Categorías: Ciencia

Televés acolleu o arranque da fase piloto de Activage Galicia, proxecto TIC a prol do envellecemento activo

Xov, 11/16/2017 - 10:49

As instalacións da Corporación Televés, en Compostela, acolleron onte a posta en marcha da primeira proba piloto dun ambicioso proxecto europeo de I+D+i destinado a crear solucións concretas a prol da saúde na terceira idade e o envellecemento activo. Estamos a falar do proxecto Activage, no que participan Televés, Cruz Vermella, a Fundación Vodafone España, a Universitat Politècnica de Valencia e mailo Servizo Galego de Saúde (SERGAS), contándose coa colaboración da Axencia para Modernización Tecnolóxica de Galicia (AMTEGA) e a Fundación Tecsos. O arranque da fase de pilotaxe celebrada onte realizouse empregando unha contorna simuladora que, segundo nos conta Televés, representa unha vivenda tipo. Neste fogar medio leváronse a cabo probas para validar a axeitada integración do equipamento de seu, recursos como sensores, actuadores ou rexistros, en relación aos sistemas de información e xestión do SERGAS e a Cruz Vermella.
Estes traballos terán continuidade futura, alén da simulación, cando se desenvolvan pilotos con usuarios reais nas súas vivendas habituais. O obxectivo é abranguer 700 fogares en Galicia no prazo de dous anos. Para isto, as entidades participantes en Activage están a traballar xa na selección dos usuarios e na definición de modelos formativos.
E cal é o obxectivo concreto de todo isto? Segundo informa en detalle Televés, “trátase de avanzar cara a solucións de coidados a distancia, o que se coñece como telecoidado no fogar, e na detección temperá dos riscos ligados ao envellecemento e a deterioración cognitiva, a través da análise das rutinas de conduta e o seguimento de pacientes crónicos”. Os resultados que se obteñan servirán tamén para construír unha rede social dixital con vídeo-comunicación entre persoas maiores. Esta comunidade dixital será tamén unha panca contra “o illamento e a soidade” na que viven inmersos moitos dos nosos maiores, sendo esta unha tendencia crecemento polo envellecemento da poboación.
“A visión de Activage”, engaden as entidades participantes e colaboradoras, “é ser un referente global para demostrar que ecosistemas estandarizados, seguros e interoperábeis, facilitan novos modelos de negocio e solucións efectivas para promover o envellecemento activo e saudábel”.
En termos máis xenéricos, Activage é unha iniciativa de I+D+i baseada nas tecnoloxías da información que ten por obxecto desenvolver solucións baseadas en Internet das Cousas para facer fronte ao aumento da esperanza de vida, promovendo o envellecemento activo e saudábel. Está apoiada polo Programa Marco de Investigación e Innovación da Unión Europea Horizonte 2020, e conta cun orzamento de 25,3 millóns de euros e un prazo de execución de 42 meses.
Nela traballan medio cento de entidades de toda Europa, de xeito conxunto e coordinado, sendo a súa meta, como dixemos, “construír un ecosistema interoperábel e aberto para o despregue de solucións tecnolóxicas que incrementarán a seguridade das persoas maiores e favorecerán o mantemento da súa independencia e a súa participación social”. Ademais, o ecosistema será un elemento de loita contra as consecuencias negativas das doenzas crónicas e a deterioración cognitiva.
Para alcanzar as metas propostas, puxéronse en marcha nove centros de desenvolvemento (deployment sites) en Grecia, Emilia Romagna (Italia), Isère (Francia), Woquaz (Alemaña), Leeds (Gran Bretaña), Finlandia, Comunidade Valenciana, Madrid e Galicia. En cada unha destas contornas realizaranse probas piloto innovadoras e de gran escala nas que, en conxunto, participarán uns 7.200 usuarios e máis de 43.000 dispositivos de Internet das Cousas.

Categorías: Ciencia

Twitter elimina o selo de verificación de contas polémicas

Xov, 11/16/2017 - 10:00

Dende Twitter están a ter unha seria crise de comunicación polo seu comportamento errático, e tras ampliar a lonxitude dos nomes de perfil até os 50 caracteres (modificación que non demandaba ninguén abertamente) como unha cortina de fume sobre a verificación da conta de Jason Kessler, organizador das polémicas protestas de Charlottesville nos EE.UU. e unha das cabezas visibles da extrema dereita estadounidense, agora aseguran que «borraremos a verificación de contas cuxo comportamento non cumpran as novas normas», ou sexa, que tomaron a absurda decisión de retirar o selo de verificación a Kessler e a outros prominentes membros da extrema dereita, no que supón unha clarísima contradición xa que tras a polémica dende Twitter aseguraban que o selo simplemente significaba a verificación da identidade e non podía interpretarse como un apoio por parte de Twitter ou un indicador de importancia (que é xusto como se está a entender agora mesmo).
Se ben a meirande parte dos usuarios de Twitter consideran que hai que tomar medias contra as mensaxes de odio (algo no que teñen fracasado estrepitosamente e incluso modificaron as súas normas para permitir que as figuras públicas poidan incluso lanzar ameazas de morte), a arbitrariedade coa que Twitter está a verificar usuarios tamén resulta moi molesta. Nos últimos meses houbo incluso varias compañías interesadas na adquisición de Twitter que botáronse atrás non polo estancamento do seu volume de usuarios, senón polas dificultades de ter que solucionar agora os problemas de xestión da comunidade que atópanse enquistados despois de tantos anos de inacción.

Categorías: Ciencia

O 85% da mocidade galega usa aplicacións de mensaxes instantáneas

Mér, 11/15/2017 - 22:48

Asus vén de realizar unha investigación sobre o uso que as novas xeracións lle dan ás novas tecnoloxías móbiles no ámbito estatal. O estudo Asus, mocidade e tecnoloxía, realizado para determinar e mostrar o papel que xogan os dispositivos nas relacións entre a xente nova, ten unha vertente galega cunha serie de datos de interese. Por exemplo: que o 85 % dos mozos da nosa terra emprega aplicacións de mensaxes instantáneas. Porén, na investigación tamén se reflicte que na nosa Comunidade non nos excedemos en tempo diante das ditas ferramentas: só o 15% da xuventude galega emprega este tipo de apps móbiles polo menos tres horas ao día, contrastando co 25% dos madrileños e o 23% dos andaluces.
A nivel estatal, o 56%% dos enquisados confesa tirar proveito dos dispositivos tecnolóxicos para falar cos seus amigos polo menos unha vez ao día, aínda que esta porcentaxe varía segundo o rango de idade. Así, o 64% das persoas que se atopan no treito comprendido entre os 18 e os 25 anos recoñece estar en contacto constante cos seus amigos, mentres que a taxa cae ao 50% entre os 26 e os 35 anos.
O estudo desvela que entre as aplicacións de mensaxes instantáneas, Whatsapp é a ferramenta de comunicación favorita para os mozos cun 85%, seguido polas redes sociais cun 9% e as chamadas telefónicas cun 6%. En canto ás redes sociais, un 53% dos mozos utilízaas para manterse ao día do que fan as súas amizades.
No estudo tamén se di que só un 7% dos enquisados recoñece empregar as ditas ferramentas para ligar ou coñecer xente nova. Neste senso, percíbense diferenzas significativas entre Comunidades. De feito, a mocidade galega é a que máis utiliza as aplicacións para tal fin (9%), seguida polos madrileños e os andaluces (ambos cun 8%). En cambio, só un 6% dos mozos cataláns enquisados afirma utilizar aplicacións tecnolóxicas para ligar.
No informe tamén se reflicte que o 73% dos mozos españois comunícase principalmente a través de ferramentas de mensaxes instantáneas coa súa parella, revelando un 51% facelo de forma continua. Por Comunidades, os valencianos acadan un 82%, seguidos polos cataláns cun 76%. Os que menos se comunican coas súas parellas a través das aplicacións son os galegos (67%) e os aragoneses (63%).

Categorías: Ciencia

O Tribunal Supremo podería aprobar milleiros de licenzas VTC en poucas semanas

Mér, 11/15/2017 - 22:00

Tras moitos meses de mobilizacións e demandas do sector profesional do taxi contra os modelos de transporte público emerxentes como Uber e Cabify temos que a Xustiza comeza a darlles malas novas, e parece que a situación vai ir a peor, xa que o Tribunal Supremo vén de emitir as dúas primeiras sentenzas outorgando novas licencias de aluguer de vehículos de turismo con condutor (VTC), concesión paralizan en espera do fallo do Tribunal, de xeito que apróbase a concesión de 80 novos permisos na Comunidade de Madrid, sentando xurisprudencia, e facendo que de aquí a xaneiro se aproben máis de 300 licencias. Actualmente hai unhas 6 mil licenzas VTC pendentes en Madrid e Barcelona, e confíase en que a meirande parte vaian conseguir a súa aprobación.
Esta situación é consecuencia dos cambios normativos dos últimos anos, xa que tras a chegada de Uber e Cabify xurdiron presións do sector do taxi que levaron ao Goberno a modificar a Lei de Ordenamento dos Transportes Terrestres (en xullo de 2013), fixando unha limitación dunha licenza VTC por cada 30 taxis, que non entrou en vigor até novembro de 2015, pero durante o longo tempo de tramitación numerosas empresas e particulares solicitaron licenzas VTC, que en moitos casos foron denegadas por comunidades autónomas e os seus respectivos tribunais, e ante o que agora o Supremo concede as licenzas VTC solicitadas.
Polo momento son só dúas sentenzas do Supremo as que conceden novas VTC, pero nas vindeiras semanas chegarán moitas máis que estaban pendentes, e que na meirande parte dos casos seguirán a doutrina establecida, o que suporá que en poucos meses se aproben unhas 3.500 licencias VTC en Madrid, 3.000 en Barcelona e outras máis no resto do Estado até chegar a un total de preto de 10.000, o que suporá un duro golpe para o sector do taxi, que xa prepara mobilizacións ante a previsible cascada de adxudicacións.
Cómpre lembrar que dende os organismos comunitarios de Competencia defenden a existencia de plataformas como Uber e Cabify, e instan aos gobernos a fomentar as novas formas de economía (xa hai informes instando á liberalización das licenzas VTC), polo que o sector do taxi vai telo moi complicado a longo prazo, xa que parece inevitable a revolución da mobilidade urbana.

Categorías: Ciencia

Páxinas