códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 2 horas 6 min

O Supremo confirma a sanción de 240.000 euros a R por facturación irregular

Mér, 11/15/2017 - 21:20

A Dirección Xeral de Telecomunicacións impuxo ao operador R o 23 de marzo de 2016 catro multas por un valor conxunto de 240.000 euros como consecuencia dun expediente aberto en 2015 por vulnerar «os dereitos dos consumidores e usuarios finais do servizo», sanción que vén de confirmar o Tribunal Supremo, que non admitiu o recurso de casación presentado pola compañía actualmente integrada no grupo Euskaltel.
A resolución especificaba as infraccións de R, que vulneraba a Lei Xeral de Telecomunicacións no que respecta ao servizos de tarificación adicional (os números 905) por non desagregar nas facturas os conceptos independentes para cada un dos servizos facturados «sen reflectir separadamente a parte correspondente ao servizo telefónica dispoñible ao público, que inclúe o servizo da rede de tarificación adicional, da parte relativa á remuneración que corresponde ao prestador do servizo de comunicación».
Tamén culpan a R de non facilitar a identificación do titular do número telefónico chamado nin a identidade do operador de rede de tarificación adicional. Tamén se reprocha á compañía de telecomunicacións o cobro do servizo de tarificación adicional aínda cando o usuario non o chegou a utilizar, infracción considerada como grave, por tratarse dunha actuación xeralizada e non individual.
R procurou evitar as sancións presentando alegacións ante a Dirección Xeral de Telecomunicacións, a Audiencia Nacional e, finalmente, o Tribunal Supremo, organismos que non atenderon os seus argumentos e consideran axeitada a resolución inicial do expediente.

Categorías: Ciencia

A Deputación de Lugo e o Concello de Xermade introducen aos maiores en redes sociais, móbiles e fotografía dixital

Mér, 11/15/2017 - 16:13

A Deputación de Lugo informou hoxe do desenvolvemento de novas actividades de envellecemento activo no concello de Xermade, ou sexa, obradoiros e accións diversas para mellorar a saúde, a formación e a calidade de vida das persoas maiores do municipio. O programa foi dado a coñecer polo deputado de Deportes, Pablo Rivera Capón, e o alcalde de Xermade, Roberto García Pernas. As actividades que vai desenvolver a Deputación en colaboración co Concello son do máis variado: inclúen prácticas deportivas e de lecer (pilates) e obradoiros centrados en estimular a creatividade e a memoria dos maiores. Unha parte importante das accións estará centrada nas novas tecnoloxías da información.
A idea é botar man dos móbiles e das redes sociais para favorecer a comunicación dos participantes (entre eles e coas súas familias), botar abaixo barreiras de exclusión e manter en boa forma as súa capacidades cognitivas e de memoria.
No acto de presentación dos obradoiros, nos que tamén participou a concelleira de Educación e Cultura, Tamara Paz Balsa, lembrouse que a organización das actividades insírese no marco dos apoios da Deputación ao Concello, no último ano, para promover o deporte entre os veciños da localidade, apoios que tiveron unha contía de 8.000 euros. García Pernas, pola súa banda, explicou que o número de persoas inscritas nas actividades dadas a coñecer é de case medio centenar, repartidas nos grupos de Xermade, Momán e Piñeiro, ás que haberá que engadir os participantes do grupo de Roupar. Entre os obradoiros incluídos figuran actividades de iniciación á fotografía dixital, á informática e ás redes sociais e á utilización diaria de móbiles.

Categorías: Ciencia

A UDC e Telecon formalizan a creación da Cátedra Handytronic

Mér, 11/15/2017 - 14:00

Finalmente, tal e como avanzamos onte en Código Cero, formalizouse oficialmente na UDC a creación dunha nova cátedra destinada á formación, investigación e colaboración arredor do amplo potencial da informática no achado de novos xeitos de combater doenzas e mellorar a calidade de vida das persoas. Estamos a falar da Cátedra Handytronic, que vén da man da Universidade da Coruña e o Grupo Telecon e que hoxe recibiu un importante pulo coa formalización do convenio entre as dúas entidades que a fai posíbel. No acto participaron Julio Abalde, reitor da UDC, e Jacobo Penide, director xeral de Grupo Telecon.
Na presentación, celebrada na sede da Reitoría, participou tamén Salvador Naya, vicerreitor de Política Científica, Investigación e Transferencia, Luis Hervella, decano da Facultade de Informática, centro ao que queda adscrita a cátedra, e Javier Pereira, que será o seu director.
Segundo se fixo saber, os obxectivos da nova cátedra son “a colaboración na docencia na Facultade de Informática da UDC e, de xeito especial, no Mestrado de Bioinformática para Ciencias da Saúde; o desenvolvemento de actividades que permitan crear espazos de debate e difusión da actividade docente e investigadora, e a promoción de actuacións que estimulen o talento dos estudantes e faciliten a súa incorporación ao mundo laboral”.
Nun plano máis concreto, a UDC e Grupo Telecon realizarán de maneira conxunta actividades e proxectos nos ámbitos da investigación, a transferencia de coñecemento, a formación e a divulgación. Máis polo miúdo, está previsto colaborar en investigación, cooperar para lograr proxectos no ámbito galego, español e europeo, promover encontros e redes estatais e internacionais de expertos, cooperar en mestrados e outros estudos de posgrao, deseñar e impartir programas de formación permanente, patrocinar bolsas ou formar emprendedores de iniciativas de alicerce tecnolóxico.
O reitor inseriu esta iniciativa dentro do marco de especialización dos campus da Coruña, concretamente no Campus Innova, que é a aposta da Universidade da Coruña polo sector dixital. Segundo dixo, “Esta Cátedra supón o apoio decidido á especialización no mundo dixital, sobre todo o aplicado ás ciencias da saúde, sector que terá un amplo desenvolvemento no futuro”.
Pola súa banda, Jacobo Penide dixo que o Grupo que representa, grazas a esta colaboración, “dá un chimpo adiante na súa aposta pola intelixencia artificial e a neurociencia para o desenvolvemento de solucións que favorezan a calidade de vida de persoas con diversidade funcional, promovendo ademais o diagnóstico precoz da deterioración cognitiva”. Esta visión, dixo, materialízase comercialmente na creación da marca Handytronic, firma que comercializa un amplo catálogo de solucións de mobilidade para persoas con diversidade funcional, ao tempo que impulsa proxectos de investigación neste eido que contan xa coa participación da Facultade de Informática e máis do Mestrado de Bioinformática para Ciencias da Saúde da UDC.

Categorías: Ciencia

Galiciencia mostrará case 80 proxectos cientifico-tecnolóxicos para mellorar o mundo

Mér, 11/15/2017 - 13:06

Xa vai quedando menos para Galiciencia, a feira xuvenil de enxeños e innovación máis concorrida da nosa terra e sen dúbida unha das máis referenciais do ámbito estatal. O evento, que se celebra entre o 22 e o 24 de novembro en Ourense, vén unha vez máis da man da Tecnópole, renovando o seu obxectivo de alentar que se “fagan” ciencias e tecnoloxías, de que estas se fagan dende idades temperás e, tamén, de que todo isto (estes múltiples exemplos de ollar cara adiante) se saiba. Que nos agarda este ano? Pois unha manchea de cousas, o que confirma a proxección ascendente de Galiciencia. Para comezar: a posibilidade de ver ao detalle case 80 proxectos de 40 centros escolares de Galicia, Asturias, Catalunya, Euskadi e Andalucía. Poderemos coñecer cousas como unhas lentes para cegos impresas en 3D ou unha tecnoloxía para escorrentar xabaríns das leiras. Todos eles terán en común, amais de ser innovadores, a súa firme vontade de mellorar o mundo.
Nesta duodécima edición, 50 dos 79 proxectos presentados son de alumnado de Secundaria e Bacharelato (en concurso) e 29 de estudantes de Primaria (fóra de competición).
Segundo informa a Tecnópole, nesta convocatoria bátese novamente o récord de diversidade de centros participantes da historia do certame, con equipos procedentes de 40 colexios e institutos diferentes, cinco máis có ano anterior. En cuestión de afluencia de público, agárdase a visita dunha manchea de centros escolares e visitantes en xeral, por conta propia (a feira é de entrada libre para particulares e familias polas tardes).
No evento, que conta coa colaboración da Consellería de Economía e a Fundación Española para a Ciencia e a Tecnoloxía (FECYT), os participantes competirán por situarse entre os tres finalistas, conseguindo o galardón ao proxecto máis innovador, ao método científico e proceso investigador mellor definido ou á mellor comunicación e presentación oral. Entre estes, o que acade a maior puntuación levará o primeiro premio, dotado con 1.000 euros para financiar a súa participación na maior feira científica a nivel estatal, a Exporecerca 2018. O clasificado en segundo posto terá unha dotación de 500 euros para apoiar a súa participación na Zientzia Azoka, a feira anual de ciencia que se celebra cada ano na primavera en Bilbao. O proxecto que fique en terceiro lugar recibirá 200 euros para cubrir os gastos da súa participación no programa de actividades organizados polos Museos Científicos Coruñeses con motivo da Semana da Ciencia.
As actividades paralelas deste ano terán a astronomía como protagonista. Durante os tres días da Galiciencia, os visitantes participarán en obradoiros para iniciarse na astronomía e visitar o planetario, mentres que os maiores terán ocasión de explorar a cultura da astronomía e afondar na súa relación coa informática. Segundo explica a organización, “as galaxias, os planetas e as estrelas serán tamén os protagonistas do espectáculo científico que poderá seguirse en streaming (retransmisión en directo por Internet) dende calquera centro escolar ou dende a casa”.

Categorías: Ciencia

O Instituto Tecnolóxico de Galicia traballará en drons máis autónomos e seguros

Mér, 11/15/2017 - 12:46

O Instituto Tecnolóxico de Galicia (ITG) e Star Defence Logistics & Engineering (SDLE, con sede en Madrid) veñen de unir forzas para crear a que sería a primeira Unidade Mixta de Investigación (UMI) da nosa terra especializada en avións non tripulados, UAV polas súas siglas en inglés. A iniciativa, que se encadra na cuarta convocatoria do programa de UMI da Xunta, chámase FASTFly e orixínase, en palabras do ITG, como resposta a unha demanda concreta do mercado actual: a dispoñibilidade de UAV e drons máis seguros, cunha meirande autonomía da que achegan arestora e con capacidade para traballar en espazos civís de complexidade. Ou sexa, que se busca aparellos con maior independencia e con máis marxe de manobra para contornas onde a día de hoxe estes vehículos non están permitidos.
A UMI tamén colabora xa na definición dun novo marco regulamentario que contemple voos autónomos e a súa integración no espazo aéreo.
O proxecto, que conta cun orzamento de máis de 2 millóns de euros, ten a súa sede central nas oficinas de ITG na Coruña e conta cun plan de desenvolvemento de até 2020, para o que dispón dun equipo de traballo de doce investigadores, aos que cómpre engadir cinco novos postos de traballo.
Segundo Analía López Fidalgo, enxeñeira de ITG e responsábel da UMI, “o Instituto Tecnolóxico de Galicia é o encargado de xerar e transferir coñecemento en ámbitos como por exemplo a electrónica, a sensórica, o software e o regulamento aeronáutico, e todo co obxectivo de situar no mercado produtos acabados con todas as prestacións de comunicacións, autonomía, automatización, telemetría e sistemas de pilotos e xestión punteiros”.
Eduardo Faro, director de drons civís de SDLE, sinala que a empresa que representa encargarase “do deseño, fabricación e comercialización dos produtos”. A UMI, engade, “representa unha alianza de gran valor engadido para a nosa empresa porque axunta o talento e experiencia de ITG, o que nos vai a permitir dar un gran chimpo a nivel tecnolóxico e engadir novas funcionalidades aos nosos drons para voos a longa distancia”. A previsión de SDLE é acelerar procesos de innovación e desenvolvemento de novos produtos “con persoal moi cualificado en Galicia”.

Categorías: Ciencia

Investigadores e alumnado da UVigo impulsan unha aplicación para mostrar a nosa historia

Mér, 11/15/2017 - 12:23

Estes días estase estase a probar dende a Universidade de Vigo unha aplicación que impulsa o coñecemento da cultura e da historia, e faino tirando proveito da tecnoloxía semántica e do reemprego de contidos dixitais. A ferramenta desenvolveuse ao abeiro do proxecto europeo CrossCult e nel participan, xunto con outros dez entidades sociais, investigadores da Facultade de Historia do Campus de Ourense e a Escola de Enxeñaría de Telecomunicación do Campus de. Entre outras cousas, CrossCult salienta por abrir novas e interesantes vías de colaboración entre investigadoras/es TIC e investigadoras/es de humanidades e ciencias sociais. O alumnado de Historia traballou os días pasados pondo a proba a primeira versión da dita aplicación. Unha das equipas colaboradoras é o Grupo de Estudos de Arqueoloxía, Antigüidade e Territorio GEAAT. A aplicación, sinala o grupo, consiste nunha ferramenta que conecta diferentes enclaves arqueolóxicos europeos de época romana ligados á auga e á saúde.
Este enclaves son o Balneario de Lugo; o Balneario de Chaves, en Portugal; Montegrotto Terme, en Italia, e o Santuario de Epidauro, en Grecia. A ferramenta, en palabras da dita equipa, busca ofrecer aos visitantes de cada un destes emprazamentos históricos información específica sobre eles pero tamén información que os vencelle con outros enclaves citados, poñendo o foco “no moito que une á cultura europea”. O obxectivo último é “acadar que a información sobre cada xacemento chegue ao maior número de xente e do xeito máis ameno posíbel”.
Con esta meta fixada e unha vez rematado o primeiro bosquexo da aplicación, este mes de novembro o alumando da Facultade de Historia do campus de Ourense está a colaborar no proxecto probando a primeira versión da dita tecnoloxía en dous xacementos próximos: o de Lugo e o de Chaves. Se hai uns días, alumnado do centro acudiu ao balneario lucense para coñecer a súa historia e probar in situ a ferramenta, este venres fará o mesmo no Balneario de Chaves, en Portugal. Segundo informa a Universidade de Vigo, as visitas permiten aos estudantes coñecer o pasado romano e termal destes enclaves e logo tirar partido da aplicación e a súa utilidade en base ao coñecemento adquirido. A ferramenta, por certo, ten feitura de xogo, con preguntas, respostas e ligazóns.
As investigadoras de GEAAT engaden, a respecto da participación dos estudantes, que as valoracións e achegas recibidas permitirán “ir mellorando a aplicación a medida que se constrúe, contribuíndo ao obxectivo de facela o máis atractiva e fácil de manexar posíbel”. O grupo tamén ten a previsión de que o público xeral avalíe a eficacia do recurso informático, antes de pechar deseño e contidos.

Categorías: Ciencia

As mulleres innovadoras, protagonistas dos quintos Premios Emprende Gaiás

Mér, 11/15/2017 - 11:40

Finalmente as mulleres foron as grandes protagonistas da quinta edición dos Premios Emprende Gaiás – Sixto Seco, entregados onte polo consellería de Cultura e Educación, Román Rodríguez, nun acto que tamén contou coa presenza da xornalista Belén Xestal (presentadora da gala), o secretario xeral de Cultura, Anxo Lorenzo; a directora-xerente da Cidade da Cultura de Galicia, Ana Isabel Vázquez Reboredo; o presidente de Afundación (patrocinadora do certame), Miguel Ángel Escotet Álvarez; e o xerente de IGAPE Nova (colaboradora), Guillermo Viña. O premio Aplicacións informáticas ou proxectos culturais en Internet foi dar a WCube, unha plataforma en liña especializada en mediar en operacións de compra-venda de arte entre particulares e artistas (noveis e expertos).
WCube vén da man de Gabriela Lusquiños Santos e diríxese a dar visibilidade aos artistas locais. Segundo se lembrou na gala, “non se trata só dunha galería senón que artista e visitantes interactúan nunha comunidade buscando desta forma un enriquecemento común”.
Pola súa banda, o galardón Deseño, creación artística e plástica foi dar a Kandoro, un recurso didáctico para docentes e familias que lles facilita contidos curriculares de educación infantil, a través dunha innovadora proposta: unha cidade de cartón onde todos os elementos están dispostos para mover o maxín das crianzas e favorecer o xogo en familia. A súa creadora é Inés Rodríguez Sacristán.
Na categoría de Xestión cultural o premio recaeu en Soundslikemarket, de Tamara Rodríguez Silva. Consiste nunha plataforma de xestión cultural que permite a posta en contacto por parte dos profesionais dos distintos ámbitos do sector musical para a produción e difusión de eventos musicais. O proxecto, en palabras do xurado, “pretende resolver o problema das barreiras de entrada na industria da música co obxecto de facilitar a creación de proxectos culturais ao poñer ao servizo de usuarios e clientes: perfís profesionais que cubran todas as áreas implicadas na xestión destes proxectos”.
A quinta edición dos premios Emprende Gaiás-Sixto Seco recibiu preto de 30 proxectos relacionados co deseño, Internet e xestión cultural. A hora de avaliar as iniciativas, o xurado tivo en conta “o carácter innovador e a creatividade da idea presentada; as posibilidades de se converter nun proxecto viábel; a adecuación da iniciativa á modalidade presenta; a integración de perfís profesionais dos participantes; e a súa capacidade dinamizadora e o impacto na súa área de influencia”.
Os proxectos gañadores recibiron un premio en metálico de 2.000 euros e incorporaranse de balde durante doce meses ao espazo de co-working do Centro de Emprendemento da Cidade da Cultura, onde recibirán apoio ao longo deste ano a través dun programa de asesoramento personalizado.

Categorías: Ciencia

Os creadores dos Minions poderían levar a Super Mario aos cines

Mér, 11/15/2017 - 11:30

Parece que a industria cinematográfica aprendeu do fracaso do filme Super Mario Bros. de 1993, no que Bob Hoskins e John Leguizamo interpretaban a Mario e a Luigi, mentres que Dennis Hopper ocupaba o rol do Rei Koopa, o que a priori podería parecer un reparto de peso, pero que non era quen de soster o despropósito dunha adaptación dun videoxogo estilo cartoon a unha película de acción real, en boa medida polo absurdo da historia (o que nos videoxogos de Nintendo é meramente superficial), e o erro da produción de Hollywood Pictures (que ingresou menos da metade do que custou) corrixiríase cun novo proxecto: un filme animado de Illumination Entertainment.
Ao parecer Nintendo estaría a pechar a un acordo cos creadores de Gru Mi Villano Favorito e os Minions para facer unha película de Super Mario, insistindo a compañía xaponesa na súa intervención no proceso creativo (entendemos que para evitar a desfeita da produción de 1993) de xeito que é probable que finalmente a película poida realizar contando co propio Shigeru Miyamoto como produtor.
Dende Nintendo aseguran non ter nada que anunciar sobre este asunto, polo que enténdese que aínda non se chegou a un acordo final, pero aproveitar a franquía de Mario para filmes de animación en pantalla grande podería ser todo un acerto que beneficiase enormemente a Nintendo, xa que tamén achegaría as súas creacións a un maior público, fornecendo o seu principal valor: as súas propiedades intelectuais.

Categorías: Ciencia

Telecon e a UDC unen forzas a prol da bioinformática

Mar, 11/14/2017 - 22:30
O reitor da Universidade da Coruña, Julio Abalde

A compañía galega Telecon, centrada no desenvolvemento de tecnoloxías intelixentes de aplicación en múltiples ámbitos (como por exemplo o sistema de xestión enerxética intelixente Ecohub, do que temos falado en Código Cero) está a traballar coa Universidade da Coruña para impulsar de maneira conxunta a investigación e a formación en bioinformática para ciencias da saúde. Con este fin, Telecon e a UDC crearán a Cátedra Handytronic.
Segundo informa a Universidade da Coruña, a nova cátedra estará ligada a un ámbito, o da bioinformática, que é un sector do que se espera que sexa unha das “grandes innovacións tecnolóxicas deste século”. A UDC tamén lembra que Bill Gates e Paul Allen, os co-fundadores de Microsoft, están a día de hoxe desenvolvendo proxectos de aplicación tecnolóxica á área das ciencias da saúde.
O acordo entre a Universidade e Telecon será formalizado este 15 de novembro coa sinatura dun convenio entre o reitor da UDC, Julio Abalde, e o director xeral de Telecon, Jacobo Penide. No acto de firma do convenio estarán ademais o vicerreitor de Política Científica, Investigación e Transferencia, Salvador Naya, o decano da Facultade de Informática, Luis Hervella, e o que será o director da Cátedra, o coordinador do Mestrado de Bioinformática para Ciencias da Saúde, Javier Pereira.

Categorías: Ciencia

Lance Weiler traerá á Coruña o seu experimento narrativo Frankenstein AI

Mar, 11/14/2017 - 21:58

O Laboratorio Audiovisual de Innovación e Creación dentro do programa Coruña Dixital vai rematar ao grande a súa tempada de outono, xa que o 30 de novembro na Aula Náutica da Universidade da Coruña celebrarán un encontro co estadounidense Lance Weiler que baixo o título de Frankenstein e a Intelixencia Artificial achegará un experimento de narrativa colaborativa.
Weiler é unha figura internacional no eido da narrativa transmedia, que amosará o seu último proxecto en directo, o que supón unha grande oportunidade para participar nun relato colectivo no que se exploran os temas do clásico literario de Mary Shelley.
O proxecto de Frankenstein AI ten como obxectivo a creación de historias utilizando a literatura, a historia e código nun esforzo para unha mellor comprensións dos desafíos que enfrontamos no século XXI. Os participantes de todo o mundo poden utilizar a intelixencia artificial, o machine learning, a robótica, a bioenxeñaría e a Internet das Cousas para crear un monstro feito por moitos. Esta iniciativa do Digital Storytelling Lab da Columbia University School of the Arts está a desenvolverse ao longo de numerosas localizacións e en distintas fases nas que o coñecemento xerado compártese baixo licenzas abertas dun xeito semellante ao proxecto anterior do laboratorio, Sherlock Holmes & the Internet of Things, que durante uns dous anos e medio conseguiu contar con máis de 2.500 colaboradores de 60 países. Mentres o proxecto de Sherlock estaba orientado ao hardware, desta volta a tecnoloxía (a intelixencia artificial) é ubicua e adaptativa, o que supón un enfoque moi diferente, no que os participantes interactúan dende o primeiro momento.

Categorías: Ciencia

Firefox Quantum: a meirande actualización do navegador web de Mozilla

Mar, 11/14/2017 - 21:30

A competición entre os navegadores web ten un claro gañador nos últimos anos, con Google Chrome dominando claramente, pese ás grandes melloras dos seus competidores, como o Mozilla Firefox, que vén de estrear a súa versión 57, que xa podemos descargar en galego para Windows, macOS e Linux, e que para tentar volver a atraer usuarios preséntase como un Firefox totalmente renovado, que iría o dobre de rápido que o Firefox de hai 6 meses, e para deixar claro que o ven como un produto novo, pasan a chamarlle Firefox Quantum.
A versión 57 de Firefox sería a meirande actualización do navegador web de Mozilla dende o lanzamento de Firefox 1.0 en 2004, o que resulta visible especialmente de xeito visual, cunha nova interface de usuario (Photon UI) que busca tirar proveito do seu novo motor, que aproveita o hardware moderno de xeito que verase o mellor posible en función das posibilidades do noso equipo.
Firefox Quantum incorpora un novo motor CSS, Stylo, que aproveita os procesadores de varios núcleos dos equipos actuais para reducir o seu consumo. Tamén mellora o tratamento das lapelas, de xeito que unhas teñen prioridade fronte a outras, para facer un mellor uso dos recursos do sistema.
A nova aparencia de Firefox non chega só á versión de escritorio do navegador web, senón que tamén está dispoñible nas súas versións para iOS e Android.

Vídeo de presentación de Firefox Quantum

Categorías: Ciencia

Samsung, Huawei e Amazon, as peor situadas na guía verde de electrónicos

Mar, 11/14/2017 - 17:13

Hai xente que acubilla en casa electrodomésticos dos anos sesenta e setenta que aínda están operativos, e mentres tanto os nosos contedores urbanos e os nosos puntos limpos ínzanse cada semana de televisores de pantalla plana sen posibilidade de amaño, móbiles desactualizados logo de (só) dous anos de vida, ou portátiles que xa non son quen de achegar os altos rendementos que lles esiximos. Boa parte da culpa témola nós, pero tamén, por suposto, as multinacionais do sector. Algunhas delas, como Samsung, Huawei e Amazon teñen, de feito, a dubidosa honra de aparecer ao final da nova guía verde de electrónicos que vén de elaborar Greenpeace. Que significa isto? Pois que en materia de prioridades para estas compañías, a produción, a indución a toda costa do consumo, está moi por diante do fomento da cadea de reaproveitamento. Na outra face da moeda, na positiva, están Apple, Fairphone, Dell e HP.
Samsung, Huawei e Amazon, sinálase na listaxe, non están soas. Hai milleiros delas, no sector tecnolóxico, apuntadas en exclusiva á fórmula de extraer, fabricar e refugar, un tipo de actividade “pouco innovador, que empeora o cambio climático, que alimenta o consumo de recursos naturais e que provoca grandes cantidades de refugallos electrónicos”, sinala Greenpeace, engadindo o feito de que boa parte deses refugallos endexamais seremos quen de velos: irán directamente ao terceiro mundo onde, paradoxos da vida, non haberá posibilidade algunha de darlles unha segunda ou terceira vida en condicións.
Para a organización ecoloxista, “é hora de que o sector tecnolóxico tire partido dos seus coñecementos para reinventar a forma en que os produtos electrónicos se producen e utilizan na nosa sociedade fabricando uns aparellos duradeiros, reparábeis, fabricados con enerxía renovábel e con posibilidades de reciclaxe”.
A campaña de Greenpeace pretende xuntar usuarios, técnicos e deseñadores para demandar que os aparellos electrónicos se deseñen doutra maneira. De aí o lanzamento de A guía verde de electrónicos, na que se recollen cales son as empresas TI máis ecolóxicas, quen lidera o camiño cara a unha economía circular e máis sustentábel. Na listaxe amósanse 17 das principais empresas de produtos electrónicos do mundo segundo o traballo realizado en tres áreas críticas: enerxía, recursos naturais e sustancias químicas. Á cabeza están Apple, Fairphone, Dell e HP. Na cola Samsung, Huawei e Amazon.

Categorías: Ciencia

O Concello de Vigo e Telefónica formarán persoas desempregadas en programación Java

Mar, 11/14/2017 - 13:50

O Concello de Vigo vén de anunciar que vai formar, en estreita colaboración coa operadora de telecomunicacións Telefónica, a dúas ducias de persoas sen emprego en programación Java. A actividade formativa foi presentada polo alcalde, Abel Caballero, quen lembrou a importancia desta temática (a creación de ferramentas informáticas baseada na dita linguaxe de programación, a máis estendida e popular de cantas linguaxes se empregan hoxe en día) e as posibilidades que se abren co obradoiro Emprego dixital, que xorde tralo convenio asinado polo Goberno local coa Fundación Telefónica.
Segundo fixo saber, trátase dun itinerario de traballo dirixido á formación na linguaxe de programación Java de 25 persoas desempregadas, viguesas/es de entre 18 e 35 anos, que contarán coa participación de expertos e referentes no sector. Recibirán clases teórico-prácticas validadas polas empresas colaboradoras.
A formación en Java, unha das linguaxes de programación con máis demanda no sector tecnolóxico, comeza o 24 de novembro e prolongarase durante cinco meses con clases impartidas nas instalacións do Auditorio Mar de Vigo en horario de mañá. A inscrición realízase na web da Fundación Telefónica.

Categorías: Ciencia

ABANCA permite aos non clientes abrir unha conta a través de videoconferencia

Mar, 11/14/2017 - 13:36

Esta mañá o director de Innovación de ABANCA, Eduardo Aldao, e o xerente de ABANCA Dixital, Javier Díaz, presentaron no Centro ABANCA Innova da Coruña un novo servizo deseñado pola entidade financeira para facerse cliente dende o móbil a través de videoconferencia, evitando así que sexa preciso desprazarse até unha oficina física para realizar tal trámite.
O novo servizo de ABANCA chega a través da aplicación móbil da entidade, e permite que en menos de dez minutos un usuario que non sexa cliente poderá contratar unha Conta Clara, produto dixital que permite ter unha conta corrente e unha conta a prazo conectadas entre si para aforrar de xeito automático. Non ten comisións e as tarxetas de débito, de crédito e as transferencias son de balde sempre que se opera en canles dixitais.

Dende a aplicación móbil é preciso dixitalizar o noso DNI

O interesado en darse de alta a través deste innovador xeito terá que descargar a aplicación de ABANCA no seu smartphone, identificarse como non cliente, capturar o seu DNI mediante a cámara do teléfono, introducir os seus datos persoais e económicos (en cumprimento da normativa vixente), recibir logo unha videochamada na que realizaranse unha serie de comprobacións (como contrastar que a persoa que realiza a solicitude é a que figura no DNI achegado) e, finalmente, responder a un correo electrónico de verificación e asinar os documentos que remite a entidade bancaria.

Eduardo Aldao destacou que optaron por desenvolver unha solución móbil nativa para coidar a experiencia de usuario ao máximo

O director de Innovación de ABANCA, Eduardo Aldao, destacou que esta ferramenta desenvolveuse como aplicación nativa para unha mellor experiencia de usuario, precisando uns 6 meses para a creación desta funcionalidade que tira proveito de tecnoloxías de última xeración, como intelixencia artificial para detectar se as fotografías do DNI que se transmiten a través da aplicación teñen calidade suficiente ou foron manipuladas, procurando sempre pensar no usuario e cinguíndose as obrigas que establece os regulamentos bancarios.

Francisco Martínez, xerente de mobilidade, facendo unha demostración do sistema de videoconferencia que vén de estrear ABANCA
Categorías: Ciencia

A xira dos 50 anos do COIT chega á nosa terra cunha viaxe no tempo aberta a todos os públicos

Mar, 11/14/2017 - 13:30

No verán-outono de 1967 comezaba oficialmente a súa andaina o Colexio Oficial de Enxeñeiros de Telecomunicacións (COIT), unha das entidades profesionais que máis ten traballado polas melloras comunicativas no territorio estatal. Para celebrar este medio século e as moitas actividades realizadas ao longo dese tempo, a entidade ten programada para esta recta final de 2017 unha manchea de accións de gran interese para todas as xeracións. Entre as actividades previstas salienta unha experiencia de realidade virtual inmersiva aberta ao público que permite interactuar en diferentes momentos históricos. Esta iniciativa percorre diferentes puntos da xeografía española mostrando a historia das telecomunicacións e “o rol fundamental dos enxeñeiros de Telecomunicación na transformación da sociedade”. Grazas ao Colexio Oficial de Enxeñeiros de Telecomunicación de Galicia (COETG), esta experiencia aberta a todos os públicos percorrerá as cidades de A Coruña, Pontevedra e Vigo.
Entre os días 15 e 19 de novembro poderase experimentar no museo interactivo Domus de A Coruña, coincidindo coa conmemoración da Semana das Ciencias. Os días 21 e 23 de novembro trasladarase ao Museo de Pontevedra e finalizará o percorrido na Escola de Enxeñería de Telecomunicación da Universidade de Vigo, na que o equipo de realidade virtual estará ó servizo dos usuarios os día 27, 28 e 29 do mesmo mes de novembro. A entrada aos museos terá carácter gratuíto.
Segundo informa o COIT e reflicte o COETG, a traveso desta visualización en realidade virtual a entidade estatal quere dar a coñecer a profesión do enxeñeiro de Telecomunicación á sociedade. Búscase tamén poñer en valor o labor da institución no seu medio século de vida, e subliñar a importancia das telecomunicacións na Sociedade.
A historia das telecomunicacións como nunca a viras antes!
Grazas á realidade virtual o usuario convértese en protagonista activo da historia, permitíndolle trasladarse ata 1912 á sala de telégrafos do Titanic no momento do afundimento, e poder dar o aviso de emerxencia SOS máis famoso da historia a través do código Morse salvando a vida a máis de 700 persoas, ou vivir en primeira persoa a invasión alieníxena de Orson Welles en 1938 grazas á radio. Ademais, o usuario poderá rememorar a primeira conexión telefónica da historia en 1878 e pasar unha chamada, ou ser testemuña do momento en que Armstrong en 1969 pisou a lúa, aquel histórico paso para o home e que se retransmitiu en directo ante máis de 500 millóns de telespectadores.

Categorías: Ciencia

As aplicacións de Accegal acumulan máis de 80.000 descargas

Mar, 11/14/2017 - 12:40
O investigador Jonathan Juncal

A nosa diversidade é tan ampla e tan “diversa” que tamén se aplica ao noso xeito de comunicarnos: cada persoa ten o seu xeito. A clave está en abranguer a todas e todos e non deixar a ninguén fóra. Este é un dos grandes obxectivos do proxecto galego Accegal, que, partindo da base dos atrancos que supoñen os modelos de comunicación xenérica, cen por cen textuais, aposta pola comunicación visual, pictográfica, aplicada ao ámbito das TIC. Máis polo miúdo, ao ámbito dos smartphones e as tabletas. Estes, a xuízo dos responsábeis de Accegal, brindan ás persoas con diversidades comunicativas unha “nova posibilidade para interactuar coa súa contorna, para expresarse e para evitar a súa exclusión social”. Dito doutro xeito: Accegal busca accesibilidade e inclusión poñendo o foco nuns elementos que se teñen criticado en repetidas ocasións por excluidores: os móbiles. O proxecto arrancou en 2011 e as súas aplicacións, nove, xa acumulan máis de 80.000 descargas.
Accegal vén da man do Grupo de Tecnoloxías da Información (GTI) da Escola de Enxeñaría de Telecomunicación e do Centro de Educación Especial Manuel López Navalón en Santiago de Compostela. Durante estes seis anos, educadores e enxeñeiros deseñaron e puxeron a disposición da sociedade nove aplicacións que se basean “na comunicación alternativa e aumentativa”. Entre todas elas, como dixemos, acumulan máis de 80.000 descargas a nivel internacional. Estes e outros datos veñen de ser achegados por un dos enxeñeiros de Accegal, Jonathan Juncal, quen avaliou o impacto e a efectividade das nove ferramentas ao abeiro da súa tese de doutoramento. Nela o investigador demostra a utilidade destes recursos e avalía o seu correcto funcionamento. Trátase das ferramentas VirtualTEC (a primeira da serie, fornecida en 2011), PictoDroid Lite, PictoDroid, PictoDroid Head Lite, PictoDroid Med e PictoTalk, que empregan comunicación mediante pictogramas e MessageTTS, MyKeyboDroid e SubTitleMe, que ofrecen comunicación mediante caracteres convencionais.
A finalidade de todas estas aplicacións, sinala Juncal, é “dar soporte a persoas con diferentes tipos de discapacidade que afectan gravemente á súa capacidade comunicativa, aproveitando o potencial da tecnoloxía móbil para crear solucións sinxelas, dependentes do sistema operativo Android”. Segundo engade, trátase “dun paso adiante respecto aos comunicadores tradicionais, máis estáticos e caros, xa que os smartphones e as tabletas permiten o emprego dos comunicadores en calquera lugar, de forma rápida e sinxela”.

Categorías: Ciencia

Entregados os premios Smart Commerce 2017

Mar, 11/14/2017 - 11:59

Onte entregáronse en Santiago uns galardóns que salientan a importancia de dixitalizar e innovar os nosos negocios e que visualizan ao máximo o traballo ben feito neste sentido. Estamos a falar da edición 2017 dos premios Smart Commerce, convocados pola Consellería de Economía co obxectivo de recoñecer aqueles comercios da nosa terra que “aposten por situar ao cliente no cento da súa estratexia”, e facéndoo botando man de ingredientes como a mercadotecnia dixital, o comercio en liña, o posicionamento en buscadores ou o uso das redes sociais. Na cita participou o conselleiro Francisco Conde, quen lembrou que Internet “é unha realidade presente que permite mercar en calquera intre ou lugar do mundo” e desta realidade, engadiu, “os nosos comerciantes son cada vez máis plenamente conscientes”. Volvendo aos galardóns, artelláronse en tres categorías. A primeira, o premio Smart Commerce, incluíu unha contía de 3.000 euros para o premiado a nivel de Galicia e 1.500 para o escollido en cada provincia.
Ao abeiro desta primeira modalidade distínguense os comercios galegos que desenvolven iniciativas innovadoras que supoñen “unha clara diferenciación e mellora no mantemento de clientes”, que impulsan “accións de promoción especiais” e que salientan polo uso das canles on line e off line de comunicación e venda.
Nesta segunda edición dos galardóns, obtivo o premio Smart Commerce Galicia e Smart Commerce Pontevedra a tenda de moda infantil Las Merceditas de Iria, especializada en moda infantil e que conta tamén con tenda dixital.
A librería coruñesa Moito Conto, que incorpora elementos TIC dentro dun espazo tradicional de venda ao público e cunha importante presenza nas redes sociais, fíxose co Smart Commerce da provincia A Coruña. En Ourense resultou galardoado o establecemento de moda Clothes&Co, que conta con establecemento dixital e presenza en redes sociais.
Polo que se refire á segunda categoría, o premio eCommerce, diríxese a a recoñecer, cunha contía de 1.000 euros, o comercio galego cuxa actividade sexa a venda de produtos a través de Internet. Nesta edición, recaeu en Filament2 Print, con sede en Nigrán, tenda adicada a comercializar materiais para a impresión 3D.
Ademais, a través do premio Social Commerce, cunha dotación de 1.000 euros, saliéntase e visualízase o negocio que “amose o mellor aproveitamento das redes sociais para chegar aos seus clientes”. Este ano obtivo este recoñecemento Blue Popelina, de Betanzos, unha tenda on line que ofrece prendas de vestir e accesorios multimarca, facendo das redes sociais o seu escaparate.

Categorías: Ciencia

Vitae Consultores axúdanos a acadar a máxima claridade nos nosos programas

Mar, 11/14/2017 - 10:04

Programar non é só desenvolver ferramentas informáticas, é apostar pola pola clareza e polo sinxelo á hora de escoller os elementos que conforman o miolo desas ferramentas. En certa maneira, é unha tarefa moi semellante á que pode levar a cabo un educador ou un xornalista: unha loita constante para arredar do camiño aquilo que se poida interpretar de diferentes maneiras. Afianzarnos nas técnicas máis avanzadas que nos axuden a apartar o ambiguo da noso labor de programación é un dos grandes obxectivos do curso Clean Code: crear e refacer aplicacións limpas (PDF), que organiza Vitae na Coruña no mes de decembro, os días 11 e 12 no Hotel Attica 21.
Con este obradoiro, a consultora quere tamén facernos lembrar a seguinte mensaxe: “Escribir programas para ser lidos, entendidos e mellorados é unha arte difícil e unha obriga ineludíbel”. Asemade, representa unha ciencia que se pode aprender e practicar. Polo tanto, é só que sexa importante que un programador pense nos seus lectores, explican dende Vitae, “é que é fundamental, sobre todo porque en moitas ocasións imos ser nós mesmos eses lectores”.
O curso, polo tanto, familiarizaranos coas técnicas de código limpo e no rendemento que lles podes tirar á hora de escribir programas sinxelos de entender, que achegan valor e que teñen capacidade de evolucionar.
Os obxectivos desta actividade formativa son os seguintes: desenvolver aplicacións doadas de manter, reducir a cantidade de erros e facilitar a súa detección e distinguir as boas e as malas prácticas de programación.
O curso está dirixido principalmente a programadores con experiencia nalgunha linguaxe. Terá unha duración de dez horas e desenvolverase baixo un enfoque eminentemente práctico.
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores. Entre as empresas e organismos que ten asesorado ou formado atópanse Tecnocom, ABANCA, Softek, GADISA, Inditex, Optare, Altia, Gradiant ou SIVSA.

Categorías: Ciencia

Amazon prepara unha serie de televisión do Señor dos Aneis

Lun, 11/13/2017 - 20:54
A nova serie sería unha especie de precuela de A Irmandade do Anel

Os servizos de vídeo baixo demanda están a ter cada vez unha maior porción da torta do audiovisual, aproveitando grandes franquías como reclamo, e ao igual que a HBO tirou da obra de George. R. Martin para acadar o éxito, agora chega Amazon e anuncia que vén de facerse con dereitos mundiais para televisión de O Señor dos Aneis, historia de fantasía recollida en novelas de J.R.R. Tolkien que foron adaptadas ao cine por Peter Jackson, e que terán un novo achegamento durante varias tempadas, para o que Amazon Studios colaborará con Tolkien Estate and Trust, HarperCollins e New Line Cinema (Warner Bros. Entertainment).
A serie de televisión que terá en exclusiva Amazon Prime Video estará ambientada na Terra Media, pero explorará acontecementos anteriores aos acontecidos en A Irmandade do Anel e non desbotan a realización doutras series derivadas adicionais.
Lembremos que a plataforma de vídeo baixo demanda está dispoñible para subscritores de Amazon Prime (antes coñecido como Amazon Premium) sen custo adicional, podendo consumirse en televisores conectados, consolas de videoxogos, tabletas, smartphones e tamén a través do Fire TV Stick Basic Edition, dispositivo que chegou ao mercado español a semana pasada.

Categorías: Ciencia

O Grupo Euskaltel quere ampliar mercado e chegar a 7,6 millóns de usuarios

Lun, 11/13/2017 - 19:55
O conselleiro delegado do Grupo Euskaltel, Francisco Arteche

O Grupo Euskaltel, formado polas operadoras Euskaltel (Euskadi), R (Galicia) e Telecable (Asturias), vén de compartir hoxe as súas previsións de medre e espallamento para a beira norte da Península. Segundo fixo saber en persoa o conselleiro delegado do Grupo, Francisco Arteche, o obxectivo ao cabo do proceso de expansión (proceso impulsado coa compra recente de R e Telecable) é chegar a un mercado de 7,6 millóns de persoas ao longo dos vindeiros cinco anos. Os datos foron achegados por Arteche durante a xornada de Investor Day, desenvolvida pola empresa en Bilbao ante investidores e analistas. Amais do devandito, entre o máis salientábel do informe figura a intención do Grupo de afianzarse en Navarra, León, Cantabria e A Rioxa. Ou sexa, nas contornas lindeiras cos mercados naturais das tres operadoras.
Arteche tamén explicou que a estratexia de medre do Grupo desenvolverase “baixo dous enfoques estratéxicos”. Por unha banda, o espallamento da súa cobertura de rede nas zonas que aínda non dispoñen de acceso ao seu servizo nos mercados naturais nos que xa desenvolve a súa actividade (é dicir, Euskadi, Galicia e Asturias, que ten previsto engadir á cobertura da súa rede de fibra 80.000 novos fogares e 6.200 novas empresas deste tres territorios), un proceso que será posíbel grazas ao acordo acadado con Orange, que permitirá ao Grupo tirar proveito das redes FTTH despregadas por Orange nestas zonas. Por outra banda, a estratexia abrangue o afianzamento nos territorios lindeiros citados, unha liña de traballo que comezará o seu desenvolvemento en 2018 coa actividade de Euskaltel en Navarra (comezando por Iruña-Pamplona e logo por Ansoain).

Categorías: Ciencia

Páxinas