códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 3 horas 1 min

O CEIP de Laredo, finalista en Wisibilízalas 2018

Lun, 02/12/2018 - 22:54

O CEIP de Laredo (Chapela, Redondela), un dos nosos principais referentes en afianzamento das tecnoloxías no día a día das/os escolares, comezou ano con forza no que a participación en certames tecnolóxicos se refire. Se recentemente falamos da súa presenza no proxecto educativo-aeroespacial Hana (no que concorre como centro piloto), hoxe puidemos saber que o seu proxecto Donas do Código foi un dos tres seleccionados, de entre 300 centros aspirantes a nivel estatal e latinoamericano, para parar á rolda final do Premio Wisibilízalas, convocado por Google e a Universitat Pompeu Fabra coa finalidade de dinamizar a ciencia e as tecnoloxías nos perfís femininos, visualizando figuras referentes nestes eidos. O proxecto galego, finalista na categoría junior con outras dúas achegas, foi realizado pola titora de sexto de EP (Educación Primaria) Paula Pérez, e (por suposto), na compaña das súas alumnas e alumnos.
Os obxectivos de Donas do Código son os seguintes: xerar reflexión no centro de Redondela sobre a menor visibilidade das mulleres en ciencia e tecnoloxía; mostrar mulleres que traballan no ámbito das novas Tecnoloxías da Información e a Comunicación (TIC), salientando referentes locais, autonómicos, estatais; potenciar as referencias femininas no ámbito da ciencia e a tecnoloxía nun contexto escolar; e sensibilizar sobre a “interdisciplinariedade” do ámbito tecnolóxico: medicamento, pedagoxía, astrofísica... escollendo figuras senlleiras en diferentes ámbitos.
Para acadar os ditos obxectivos o alumnado investigou durante o primeiro trimestre do curso 2017-2018 a nove mulleres senlleiras no ámbito do TIC en Galicia, creando unha páxina web específica (donasdocodigo.ceipdelaredo.com) na que describen carreira (biografía, resultados destacados, curiosidades...) de maneira libre (incluíndo texto, fotos, vídeos...) e achegando testemuños inéditos como entrevistas persoais.

Categorías: Ciencia

A firma galega OpSeeker mellora a saúde financeira da mocidade holandesa

Lun, 02/12/2018 - 16:47

A firma innovadora OpSeeker, con sede en Compostela e especializada en adestramento financeiro en liña, está a levar a cabo unha importante actividade de asesoramento entre os usuarios dos sistemas e servizos financeiros holandeses. A empresa, da que falamos hai pouco para salientar a súa participación na aceleradora de proxectos tecnolóxicos Startupbootcamp (sectores fintech e ciberseguridade), estableceu un acordo con Rabobank e Vivat, dúas das entidades bancarias locais máis importantes e innovadoras, para estudar xeitos de mellorar a economía da mocidade do país. Esta traballo con Rabobank e Vitat permitiralle ao equipo impulsor de OpSeeker, en última instancia, contribuír á optimización do sistema financeiro holandés. “Isto non é máis que outra proba de que en Galicia hai talento, e moito”, explican dende a firma galega.
Como dixemos, a presenza de OpSeeker en Holanda fortaleceuse o pasado mes de outubro, cando foi elixida pola aceleradora fintech máis importante de Europa, Startupbootcamp, con sede en Holanda. A firma galega, de feito, foi unha das 11 startups, de máis de 540 que se presentaron á convocatoria, seleccionadas para o programa de aceleración nos devanditos eidos de actividade.
Gonzalo Camiña Ceballos, Lucie Hefnerová e Carlos Rodríguez Raposo, 3 dos 4 fundadores da empresa, están a traballar desde Amsterdam para facer “o seu soño realidade”. Ou sexa, para fornecer ás novas xeracións dos recursos que lles permitan mellora a súa saúde financeira. Sen ir máis lonxe, esta semana, o 8 de febreiro, participarán no Demo Day da dita aceleradora, evento que os emprendedores galegos culminan o programa e presentan, perante máis de 400 profesionais do mundo financeiro europeo, o traballo desenvolvido ao longo dos últimos tres meses.
Segundo explican, a súa experiencia en Startupbootcamp foi “inmellorábel”. O programa de aceleración, de feito, permitiulles traballar diversas partes do negocio e operar, por exemplo, con profesionais da interpretación e de creación de contidos para mellorar a súa comunicación. Amais, dispuxeron do asesoramento de mentores que lles axudaron a fortalecer áreas tan importantes como o desenvolvemento de cliente e de produto, a cultura de empresa ou a parte tecnolóxica.
A respecto de toda esta bagaxe acumulada, Gonzalo Camiña, director executivo de OpSeeker, sinala que “este programa marcou un antes e un despois na nosa startup, permitíndonos, entre outras cousas, obter en tres meses o que en circunstancias normais conseguiríamos en dous anos”. Porén, tamén recoñecen que o traballo foi duro e que lles ocupou moitas horas da semana, chegando a vivir, nalgunhas xornadas, practicamente na oficina de seu. Tamén lles valeu, ademais, para que Rabobank, o segundo banco cooperativo en Holanda, líder de mercado nunha chea de segmentos, e Vivat, unha das maiores aseguradoras do país, fixáranse no labor OpSeeker e na súa proposta principal: utilizar as finanzas de comportamento a favor do usuario para así conseguir dúas cousas moi importantes, que os usuarios novos empecen a entender a importancia de investir a longo prazo e que o se lancen a investir dunha maneira axeitada.
Para quen non o saiba, as finanzas “condutuais”, ou finanzas do comportamento, son un eido que se centra na psicoloxía dos investimentos. Naceu a finais dos 70 da man de Armos Tversky e Daniel Kahneman e este ano o premio Nobel de Economía recaeu no máximo estandarte desta corrente de pensamento na actualidade, Richard Thaler, autor de libros como Nudge (un pequeno empuxón) ou Misbehaving.

Categorías: Ciencia

A Deputación de Ourense anuncia un portal para facilitar aos concellos o inventariado dos seus bens

Lun, 02/12/2018 - 13:13

Tirar proveito das novas tecnoloxías para que todo os recursos cos que contan os nosos concellos estean centralizados, documentados e visualizados nun acubillo único, favorecendo o seu mantemento, a súa visualización e o traballo diario con eles. Este é o leit motiv dunha nova iniciativa dixital da Deputación de Ourense, que, co gallo de axudar ás administracións locais nos ditos traballos, vén de pór á súa disposición un portal web de xestión e publicación dos inventarios de bens municipais. A medida foi dada a coñecer polo deputado provincial Pablo Pérez, na xornada de presentación desta acción de colaboración cos concellos, celebrada no Centro Cultural Marcos Valcárcel e á que asistiron preto de 100 representantes e técnicos do ámbito local.
Segundo fixo saber, este portal web vai combinar os datos dos concellos cos que ofrece a Enquisa de Infraestruturas e Equipamentos Locais (EIEL), un instrumento de análise dos servizos municipais que ten como obxectivo “coñecer a situación e o nivel dos servizos ofrecidos aos habitantes dos municipios, sendo a Deputación a encargada de realizar esta enquisa para os termos administrativos de menos de 50.000 habitantes”. Asemade, a entidade provincial anunciou que tamén porá técnicos a disposición dos concellos para que colaboren co persoal local no traballo de campo do inventario, cuxos datos serán expostos no portal web anunciado.
Por outra banda, Pablo Pérez engadiu que a plataforma porá en xogo “maior eficacia” e permitirá “un mellor aproveitamento da enquisa de infraestruturas locais”, así como a creación e xestión de inventarios que cubran as necesidades das administracións. O deputado lembrou que a día de hoxe a entidade provincial conta cun Xeo-portal no que se poden consultar os equipamentos existentes nos concellos da provincia de Ourense (a excepción da capital), tanto en materia de infraestruturas como no que atinxe ao abastecemento de auga, rede de estradas, recollida de lixo e iluminación pública, entre outros recursos.

Categorías: Ciencia

A Fundación TIC inmortaliza a Queima das Fachas de Castelo

Lun, 02/12/2018 - 11:14

O patrón da Fundación TIC e deputado de Relacións Institucionais (Deputación de Lugo), Álvaro Santos, presentou este sábado o primeiro documental sobre A Queima das Fachas de Castelo nun acto celebrado no local social desta parroquia de Taboada e acompañado polo presidente da Asociación Cultural A Fachas, Manuel Fidalgo. Nesta cita coa veciñanza de Santa María de Castelo, Santos salientou o importante papel despregado polas xentes da localidade a prol da permanencia e promoción da dita festividade, ao tempo que puxo o foco sobre o principal obxectivo da Fundación TIC apoiando a festividade: “Queremos contribuír a manter viva unha tradición ancestral e das máis singulares de Galicia, unha iniciativa que se remonta á época castrexa e que nos fai sentir orgullosos da nosa cultura e das nosas orixes”. O documental que inmortaliza a Queima das Fachas, que será promovido nunha chea de canles tecnolóxicas (redes sociais, webs propias da Deputación), foi feito polo alumnado e os profesores da Fundación TIC.
A peza audiovisual, de 15 minutos de duración, abrangue todo o proceso de desenvolvemento da festividade: dende a recollida dos agucios, a elaboración das fachas, o traslado ao castro, a súa instalación, até a queima propiamente dita, que ten lugar todos os anos, desde hai séculos, na noite do 7 ao 8 de setembro.
Ademais, a obra conta coa participación do antropólogo Xabier Viana, e inclúe “declaracións dos veciños que conservan a tradición dos seus antepasados e de rapaces que nos fan confiar en que se manteña no futuro”, sinalou Santos, engadindo que o audiovisual “tamén é un recoñecemento ao traballo que está a desenvolver a Asociación Cultural As Fachas”.
Apoio da TIC ao tecido asociativo
A Asociación Cultural As Fachas constituíuse a finais de 1992 e ten entre os seus obxectivos “procurar que non se extinga esta tradición ancestral, a súa organización e a conservación patrimonial da parroquia”. É unha das organizacións sen ánimo de lucro que ten asinado convenio coa Fundación TIC. Esta colaboración forma parte dunhas das principais liñas de actuación da entidade da Deputación de Lugo, de apoio ao tecido asociativo da provincia e ao labor que desenvolve en diversos ámbitos.

Categorías: Ciencia

AMTEGA libera o arquetipo corporativo de seu para favorecer o desenvolvemento de aplicacións Java

Lun, 02/12/2018 - 11:13

Favorecer a reutilización do arquetipo corporativo de AMTEGA en beneficio de outras administracións, entidades ou particulares, e tamén, en beneficio do enriquecemento do propio arquetipo. Este é o gran obxectivo da liberación do modelo-esqueleto de seu que vén de impulsar a Axencia para a Modernización Tecnolóxica de Galicia, unha liberación que resume o ideario básico do software libre e que, neste caso concreto, ampliaría os recursos dos que dispón a comunidade de desenvolvedores para dar forma a aplicacións Java Spring Web. Segundo informa a axencia, o código fonte está dispoñíbel no repositorio de Software Libre da Xunta de Galicia, na Forxa de Mancomún.
O obxectivo deste novo ceibado de programas de AMTEGA é “pór a disposición de desenvolvedores, tanto particulares, empresas como outras administracións, o esqueleto común das aplicacións que se materializan na axencia, co fin de que poida servir como guía para a realización de aplicacións baseadas nesta tecnoloxía, favorecendo a reutilización e fomentando a estandarización das mesmas”. Así mesmo, permitirá “tamén que o traballo de liberación das novas solucións que se desenvolvan tomando como base este arquetipo sexa moito máis áxil e sinxelo”.
Segundo informan os desenvolvedores de AMTEGA, o código fonte dispoñibilizado acubilla, amais do modelo construtivo para dar forma a novas ferramentas, varios compoñentes transversais que se empregan dentro da axencia e aos que se lles pode dar unha manchea de novas vidas, dende en sistemas de autenticación de usuario a sistemas de configuración ou de plugins.
Para quen non o saiba, Spring é un framework ou entorno de traballo para o desenvolvemento de aplicacións web usando a linguaxe de programación Java. O arquetipo sería pois un “esqueleto base común para a realización de aplicacións”, que acubilla o alicerce preciso para construír sobre el funcionalidades máis específicas. Esta liberación enmárcase no Plan de Acción en materia de Software Libre da Xunta de Galicia e contou coa participación da Oficina de Software Libre da Amtega, quen elaborou un informe técnico que garante a viabilidade xurídica da liberación e as condicións nas que se pode realizar. O Arquetipo publícase cunha licenza libre ASLv2 (Apache Software License version 2) e tamén baixo a EUPL (European Union Public License).

Categorías: Ciencia

Vodafone agasalla aos clientes con datos e chamadas sen límite o 14 de febreiro

Lun, 02/12/2018 - 11:13

Con motivo da celebración do día de San Valentín, este 14 de febreiro, Vodafone vén de pór en marcha unha nova campaña específica ao servizo dos seus clientes e, por suposto, das demandas extra de comunicación e información propias desta data. Segundo informa a compañía, os seus usuarios poderán gozar de chamadas nacionais, así como de datos sen límite para navegar por Internet durante o 14 de febreiro.
O devandito tradúcese no seguinte: os particulares, os profesionais e as pequenas empresas de contrato terán a posibilidade de empregar todo o que queiran calquera aplicación móbil de vídeo, redes sociais, música, etc, sen consumir datos da súa tarifa, en palabras de Vodafone “coa mellor rede 4G do mercado español”. Ademais poderán realizar chamadas nacionais a móbiles e fixos sen custo, excepto a números de tarifas adicionais, números premium, etc. Para gozar desta promoción, os clientes deben acceder á páxina web específica www.vodafone.es/sanvalentin.

Categorías: Ciencia

As lonxas galegas avanzan na súa dixitalización ao abeiro do Programa Primare

Lun, 02/12/2018 - 10:30

A Xunta inicia a dixitalización das lonxas en 10 das 35 rulas previstas no marco do Programa Primare. A conselleira do Mar, Rosa Quintana, e a directora da AMTEGA, Mar Pereira, mantiveron unha xuntanza de traballos co patróns maiores e responsables das confrarías que participan na primeira fase da iniciativa: Arcade, Cangas, Ferrol, Fisterra, Illa de Arousa, Moaña, Portonovo, Redondela, Vigo e Vilaboa.
Serán as primeiras lonxas que terán á súa disposición unha plataforma tecnolóxica única, que integrará os sistemas de xestión, comercialización e emisión de notas de venda, modernizando a xestión duns procesos fundamentais na xestión e comercialización que se desenvolve nas lonxas galegas.
As lonxas terán acceso nesa plataforma a unha nova solución de comercialización que lles permitirá obter información de xeito automático da identificación, clasificación e pesada das capturas descargadas na lonxa para a súa poxa nas distintas modalidades e emitir os documentos relacionados coa comercialización dos produtos; así como introducir e validar a información de xeito directo desde outros sistemas de información. A iniciativa inclúe a renovación dos equipos tecnolóxicos asociados que sexa necesario: pantallas de poxa, servidores, smartphones, equipamento que facilite a comunicación con básculas e etiquetadores, etc.
Disporán tamén dun novo sistema de xestión da actividade propia da lonxa e da confraría (comercialización, subministracións, presentación de servizos,...), que lles facilitará a tramitación da contabilidade, da facturación, do pago impostos coas distintas administracións e a xestión social da entidade (censo, información de interese, etc.).

Poxas en liña

Ademais, o novo sistema de comercialización posibilitará as poxas a través da Internet, que poderán realizarse directamente desde unha nova aplicación instalada no smartphone. Poderase tamén poxar en diferentes rulas ao mesmo tempo por parte de compradores presenciais e non presenciais, o que cambiará de maneira substancial os procedementos das lonxas tradicionais, permitindo obter maior valor engadido para os vendedores.
En paralelo, as actuacións que se porán en marcha teñen previsto a mellora ao longo do 2018 tanto da conectividade ás redes de comunicacións, ampliando as capacidades e mellorando a fiabilidade actual, como das infraestruturas e equipamentos tecnolóxico das rulas.

Modernización de centros neurálxicos

Co proceso de dixitalización mellorarase a xestión das lonxas en todo o que ten que ver coa a trazabilidade e a seguridade alimentaria e contribuirase a aumentar a eficiencia, a seguridade e a mellora das condicións de traballo. Estes son aspectos fundamentais, tendo en conta que as lonxas son na actualidade os centros neurálxicos para a comercialización en orixe dos produtos pesqueiros, acadando no ano 2016 os 500 millóns de euros de facturación pola venda de peixe e marisco.
Para levar a cabo estas actuacións a Consellería do Mar investirá máis de 3,8 millóns de euros distribuídos nas anualidades 2017, 2018 e 2019. Esta cantidade será cofinanciada nun 75% polo Fondo Europeo Marítimo e da Pesca (FEMP).

Categorías: Ciencia

O Concello de Lalín pescuda a presenza de adicións relacionadas coa Internet entre a mocidade local

Ven, 02/09/2018 - 23:10

O Concello de Lalín vén de presentar as conclusións dun completo estudo sobre hábitos de dependencia entre a mocidade local, facendo fincapé na sobre-presenza de Internet e dos aparellos ligados a Internet. Os datos obtidos, relevantes dende calquera punto de vista (e de gran interese non só para Lalín, senón para todo conxunto dos concellos da nosa terra), foron dados a coñecer onte polo concelleiro de Benestar Social, Nicolás González Casares, quen sinalou que o informe puxo o foco en rastrexar a presenza de condutas aditivas, en relación ás novas tecnoloxías e tamén a substancias estupefacientes.
Realizouse no marco o programa municipal de prevención das adiccións que se desenvolveu o ano pasado e que terá continuidade no actual en colaboración co Concello de Silleda. Entre as principais conclusións que achega, figura a constatación dunha importante porcentaxe de adolescentes consumindo Internet máis de catro horas ao día (o 25%). Ademais, o 42,3% considera que o uso da Rede algunha vez restou rendemento no ámbito académico e un 37% sufriu sensación de ansiedade cando tentou conectarse e non foi capaz.
Este estudo, do que xa foron presentados os resultados relativos ao consumo de drogas, busca, segundo Casares, “ser un espello da realidade lalinense no referente aos trastornos aditivos e servir como base para que as persoas que se encarguen de traballar sobre a prevención teñan un marco de referencia”.
O informe sobre Internet baséase nas enquisas que cubriron anonimamente alumnos e alumnas de 3º e 4º de ESO dos IES Laxeiro, Aller Ulloa e Sagrado Corazón, cun rango de idade comprendido entre os 13 e os 16 anos. Destes, o 52,6% foron mulleres e o 47,4% homes. Como dato introdutorio, segundo a análise do informe, o 58% recoñece as adicións como condutas repetitivas daniñas, pero só o 14,9% recoñece que presenta algunha na actualidade. Pola contra, o 60,5% asegura que alguén do seu círculo de familiares e de amigos padece algunha adicción.
Segundo fixo saber o edil, entre as condutas aditivas máis frecuentes na adolescencia figuran os comportamentos fóra de control relacionados coas novas tecnoloxías, a Internet, aos xogos e ás compras. Casares sinalou que o uso de Internet “pode ser problemático cando o número de horas de conexión afecta ao correcto desenvolvemento da vida cotiá, causando, por exemplo, estados de somnolencia, alteracións no estado de ánimo, redución das horas adicadas ao estudo, etc”.
Segundo se desprende do estudo, o 42,3% dos enquisados emprega Internet unha media de entre 2 e 4 horas diarias, mais o 25,1% afirma realizar un consumo medio da Rede maior de 4 horas ao día. O 90% úsano principalmente para o servizos de mensaxes instantáneas e redes sociais, afirmando o 100% que dispón dun dispositivo móbil de última xeración propio. A día de hoxe, o informe sinala que a rede social máis empregada polos adolescentes lalinenses é o Instagram.
Na investigación tamén se afirma que o 77% dos participantes realiza un uso de Internet persoal e o 20,9% recoñece ficar sempre conectado máis tempo do que tiña planificado. En relación aos usos, o 85% nunca deixou de facer plans cos amigos e familiares para usar Internet, pero o 36,7% refire enfadarse cando alguén o interrompe mentres usa o móbil ou outro dispositivo. Así mesmo, o 42,3% considera que o uso de internet algunha vez restou rendemento de xeito negativo no ámbito académico e un 37% sufriu sensación de ansiedade ou preocupación cando tentou conectarse e non foi quen.
No informe tamén que se fai saber que o 40% dos participantes fan un uso de xogos por Internet. O edil, se ben recoñeceu que o xogo en si “é unha actividade normal e positiva na vida de calquera adolescente, que lle permite un desenvolvemento físico, psicolóxico e social”, pode converterse nun problema cando se converte en recorrente e hai diñeiro en liña de por medio. “As condutas de risco ante o xogo”, sinalou, “xorden en primeiro lugar pola dependencia que esta actividade pode crear”, e neste senso o 37% dos participantes refiren molestarse se os interrompen mentres están xogando. Ademais, do 40% que participa en xogos online soamente un 9% dos estudantes enquisados refire ter realizado apostas nalgunha ocasión.
Compras
O 19% dos participantes utiliza o comercio electrónico no seu uso habitual de Internet. O 46,9% dos participantes sentiu algunha vez a necesidade de mercar algo que non precisase e un 7% sempre sinte a necesidade de ir de compras aínda que non precise nada.
Como conclusión, e aínda que os casos de risco son puntuais, o estudo sinala que “se debe prestar especial atención a este tipo de adicións de conduta, especialmente ás redes sociais e aos comportamentos abusivos relacionadas co uso de Internet”.
Nicolás González Casares fixo fincapé en que o estudo aporta datos reais da sociedade lalinense e que servirá como a base sobre a que pivotará o programa de prevención de condutas aditivas, que se iniciou o ano pasado con estudios e diversos obradoiros incluídos no programa Mocidade Activa e que terán continuidade este ano en colaboración co Concello de Silleda.

Categorías: Ciencia

YouTube promete máis medidas contra os vídeos tóxicos

Ven, 02/09/2018 - 19:30
Logan Paul está a converterse no exemplo das medidas de YouTube contra os vídeos que prexudican á comunidade de creadores por provocar a fuxida de anunciantes

O escándalo provocado por Logan Paul ao filmar un vídeo no célebre bosque dos suicidios no Xapón resístese a pasar ao esquecemento e, aínda que parecía que YouTube rematara este capítulo simplemente expulsando ao autor do programa Google Preferred, finalmente decidiron suspender temporalmente a publicidade nas súas canles atendendo ao seu patrón de comportamento recente, que consideran que prexudica tanto a anunciantes como á comunidade de creadores. Tras a polémica ao redor do suicidio, Paul mantivérase afastado de YouTube de xeito preventivo, pero co seu retorno volveu ás andadas, con moitos comportamentos que boa parte da audiencia consideraba ofensivo, de aí que YouTube tivese que adoptar unha medida exemplarizante.
Dende YouTube chegaron a publicar unha entrada no seu blog para creadores asegurando que o comportamento dalgúns youtubeiros prexudica a toda a comunidade, xa que os contidos pouco axeitados poden ofender ao público, afastar a anunciantes e, en definitiva, prexudicar a todo o ecosistema de YouTube, ou sexa, que o mal comportamento en liña ten consecuencias no mundo real, polo que prometen que tomarán medidas para que o comportamento duns poucos non afecten ao 99,9% restante que utilizan as canles en liña correctamente.
As novas pautas de comportamento de YouTube no que respecta á publicidade inclúen un sistema de infraccións que poderían chegar ao peche dunha canle.
A partires de agora advirten que cando vexan que unha canle sube vídeos que poden ser nocivos para a comunidade de creadores, os espectadores e os anunciantes tomarán varias medidas: eliminar a canle de Google Preferred e outros programas semellantes; suspender a posibilidade de monetizar unha canle mediante publicidade; e tamén facer que os seus vídeos non aparezan recomendados en YouTube (reducindo a súa visibilidade).
Dende YouTube admiten que no pasado as súas respostas ante as polémicas foron lentas e non sempre efectivas, polo que agora comprométense a operar mellor e manter unha comunicación máis clara.

Categorías: Ciencia

VLC estrea retransmisión de contidos a Chromecast

Ven, 02/09/2018 - 19:30

O célebre reprodutor multimedia VLC estrea versión 3.0.0, alcumada Vetinari, na que podería considerase como a meirande actualización desta aplicación que podemos lembrar, ao concentrar numerosas novidades, das que serían as máis relevantes o uso da descodificación por hardware de xeito predeterminado para poder conseguir reproducir vídeos 4K e 8K, soporte de contidos de 10 bits e HDR, soporte de vídeos en 360 graos con audio 3D, reprodución de menús Java de discos Blu-ray, soporte de unidades de rede e, como funcionalidade máis salientable de todas: poder transmitir a Chromecast incluso dende formatos non soportados nativamente (como películas en DVD).
No caso da aplicación de Android hai algunhas características específicas, como o soporte de Chromecast dende o teléfono, a posibilidade de descodificar por hardware o formato HEVC, soportar ordes por voz con Android Auto, contar con picture-in-picture, detectar ficheiros de listaxes de reprodución e estar dispoñible incluso en Android TV, Chromebooks e Samsung DeX.

Categorías: Ciencia

As nosas universidades conmemoran con xuntanzas virtuais e charlas de divulgación o Día das Mulleres e Nenas na Ciencia

Ven, 02/09/2018 - 17:23

O 11 de febreiro conmemórase un festexo mundial de especial significado, o Día Internacional das Mulleres e as Nenas na Ciencia, unha celebración relevante por dous grandes motivos: en parte porque implica defender o coñecemento igualitario e a equidade nas oportunidades, en parte porque leva implícito a arela de conseguir mellor ciencia, mellor tecnoloxía e, polo tanto, un mundo mellor para todas e todos (o coñecemento e a investigación precisan das mulleres para acadar as pólas máis altas da excelencia e a solidariedade). Entre as entidades galegas que están a pechar fileiras arredor deste evento están a Universidade de Santiago, que prepara (entre outras cousas) unha Editatona, e máis a Universidade da Coruña, que ten un amplo programa de relatorios de divulgación e e de reivindicación da muller desenvolvedora de ciencia e tecnoloxías.
A primeira das accións programadas pola USC busca recuperar as científicas pioneiras que se formaron nas aulas e laboratorios das facultades de ciencias experimentais dos campus composteláns e recoñece o seu empeño “por seguir a súa vocación científica”. Deste xeito, no marco dun acordo co Concello compostelán, durante este mes e o seguinte os institutos de educación secundaria da cidade acollerán a exposición Mulleres no laboratorio: as primeiras científicas da USC elaborada pola investigadora da USC Xoana Pintos Barral.
Tamén conmemorando o día marcado polas Nacións Unidas, o ciclo Reactiva a túa Química, que organiza regularmente a Facultade de Química, adica a esta temática a súa sesión do vindeiro mércores 14. Será a doutora en Historia das Ciencias e das Técnicas pola USC Xoana Pintos, autora do traballo As mulleres nos estudos experimentais na Universidade de Santiago: 1910-1960, a encargada de pronunciar a conferencia, que leva por título Non só Marie Curie. Será ás 13.00 horas na Aula Magna do centro.
Ademais, a Oficina de Igualdade de Xénero e a Biblioteca Universitaria da USC teñen previsto para o 20 de febreiro a Editatona Investigadoras na USC: as pioneiras. Esta actividade, coa que colaboran Galipedia e a Asociación de Mulleres Investigadoras e Tecnólogas de Galicia (AMIT-Gal), consiste nunha reunión virtual para editar e mellorar colectivamente os contidos dunha Wikipedia sobre un tema ou unha serie de artigos relacionados con el, neste caso as mulleres na ciencia, biografías de científicas e as súas achegas. A editatona celebrarase o 20 de febreiro de 2018 de 9 a 14 horas na Biblioteca Concepción Arenal.
Universidade da Coruña
Pola que respecta ás contribucións da Universidade da Coruña comezarán mañá, sábado, os actos de celebración do Día Internacional das Mulleres e as Nenas na Ciencia. Así, a Oficina para a Igualdade de Xénero e a Unidade de Divulgación Científica e Cultural organizan dous ciclos de microcharlas, un en Ferrol e outro na Coruña, coa finalidade de visualizar a vida e as achegas de mulleres destacadas na ciencia e na tecnoloxía, incluídas as achegas a prol do progreso das ferramentas dixitais e da información.
O 10 de febreiro, na Libraría Lea de Ferrol, de 12.00 a 13 horas, falarán Ana Tarrío Tobar e María José Souto Salorio (María Wonenburguer, matemática galega e universal ), Sara Fernández Basanta e Carla Freijomil Vázquez (co relatorio Florence Nightingale, a dama da lámpada) e María Carreiro Otero (coa conferencia Milagros Rey Hombre, unha arquitecta pioneira). O 12 de febreiro, a Domus da Coruña acollerá, a partir das 19.00 horas, a primeira edición das Xornadas de Neurocientíficas, organizada polo grupo de investigación Neurocom, e as facultades de Ciencias da Saúde e Fisioterapia da UDC. Participan Mónica Folgueira (Avances e retos da neuroanatomía no século XXI), Rosa Señarís (O teu cerebro, o teu metabolismo) e María del Mar Castellanos (Muller, cerebro, ciencia e o meu gran de area). Culminará a xornada cunha esa redonda, As mulleres na ciencia, moderada por Fernanda Tabarés e coa participación de Carme Adán.
O 16 de febreiro, no espazo Normal, de 19.00 a 21.00 horas, falarán Ana M. González Tizón (Nettie Stevens, seguindo o seu propio camiño), Érika García Cardesín (Mary Anning, as pegadas da vida), Laura Pita García (Bárbara Mcclintock e os xenes saltaricos), Carolina Núñez Puente (Charlotte Perkins Gilman, unha escritora feminista na época vitoriana) e Nieves Rodríguez Brisaboa (Informática, sociedade e mulleres).

Categorías: Ciencia

Até 200 escolares participarán en Ferrol na First LEGO Galicia

Ven, 02/09/2018 - 16:25

O sábado 17 de febreiro celébrase no Auditorio de Ferrol a nova edición (a cuarta xa) da competición First LEGO League Galicia. A xuntanza, na que se agarda xuntar máis de 200 escolares de Galicia e Asturias, vén da man do Campus de Ferrol e, máis polo miúdo, do profesor da UDC José Antonio Becerra, coordinador das actividades. Segundo avanza a organización, o evento ten dúas modalidades: o desafío, para nenos e nenas de 10 a 16 anos; e a modalidade junior, para nenos e nenas de 6 a 9 anos. No caso desta categoría, o obxectivo é “espertar nos máis pequenos a curiosidade pola ciencia e a tecnoloxía”. A súa participación consiste na construción dunha maqueta con pezas LEGO e un póster ilustrativo do seu traballo”.
No desafío, a finalidade é “descubrir a diversión e a emoción pola ciencia e a tecnoloxía” coa proposta dun reto relacionado cun problema do mundo real. Nesta edición, o obxectivo a superar ten que ver co ciclo humano da auga. Así, a rapazada deberá presentar un proxecto científico, e participar nun xogo de robot nun taboleiro relacionado con este “desafío hídrico”. O xurado valorará tamén a integración de valores educativos nos dous casos. Os gañadores da FLL Galicia representarán á Comunidade Autónoma na gran final FLL España que terá lugar en Logroño no mes de marzo, onde, á súa vez, os dez mellores equipos participarán nos torneos internacionais.

Categorías: Ciencia

Colle pulo a promoción das vilas termais pontevedresas con códigos QR e presenza nos móbiles

Ven, 02/09/2018 - 12:28

A presidenta da Deputación de Pontevedra, Carmela Silva, xunto ao deputado de Turismo, Santos Héctor Rodríguez, presentaron onte o seu proxecto de sinalización tecnolóxica para as vilas termais provinciais. A cita cos medios de comunicación celebrouse na compaña, precisamente, dos alcaldes das localidades termais de Ponte Caldelas (Andrés Díaz), Catoira (Alberto García), Cuntis (Manuel Campos), Caldas de Reis (Juan Manuel Rey), O Grove (José Cacabelos), e Mondariz-Balneario (José Antonio Lorenzo). Como lembraremos, esta iniciativa inclúe (entre outras cousas) o fornecemento de paneis con códigos QR para promover os recursos turísticos destas vilas, ás que cómpre engadir tamén Vila de Cruces.
Carmela Silva, na súa intervención, salientou a potencialidade da provincia de Pontevedra, “que conta co maior número de prazas de aloxamento termal de España e balnearios de referencia internacional en diferentes tratamentos”. Ademais, sinalou que estas localidades contan con “centos de historias que xunto ás augas termais, as mellores do mundo e tan importantes nunha sociedade como a actual que cada vez máis aposta pola saúde, teñen unha enorme capacidade de atracción”.
Impulsar esta capacidade de atracción e estas altas potencialidades é, precisamente, o obxectivo do programa presentando onte da man da titular do Goberno da Deputación, que explicou, ao fío desta cobertura tecnolóxica, que “xa que vivimos no século XXI e neste século hai ferramentas tecnolóxicas que permiten dar unha información de vangarda e situarnos como unha referencia tecnolóxica no entorno da promoción turística, cómpre que lles tiremos o máximo proveito”. E isto, apuntou, “é o que queremos conseguir con estes sete paneis informativos con códigos QR que instalaremos nas vilas termais da provincia”.
Segundo se fixo saber aos medios na cita cos alcaldes, os paneis informativos contan cunha imaxe antiga da vila e un mapa co resto dos concellos termais. A través do móbil, as persoas visitantes poderán acceder a unha información en galego, castelán e inglés, máis ampla cá que se atopa no panel, ben accedendo a través da web, ben escaneando o código QR ou coa tecnoloxía NFC, moi empregada por persoas con diversidade funcional. A información que achegan os códigos permiten ver máis fotografías, facer navegacións e recibir datos relativos a localidades situadas preto de cada unha das vilas termais.
Nun plano concreto de reivindicación histórica e patrimonial, Silva enxalzou as burgas romanas de Caldas de Reis e Cuntis, o emprego das augas de Brea (Vila de Cruces) polos monxes de Carboeiro para tratamentos reumatolóxicos, as augas termais que en Catoira se empregaban desde o século XVII, o nome relacionado coas augas termais de Caldas de Reis e Ponte Caldelas así como os edificios rexios de Mondariz-Balneario e da Toxa, nos “que se aloxaron persoeiros históricos desde a segunda metade do século XIX”.

Categorías: Ciencia

O enxeñeiro Alejandro Cardesín mostrou no Campus de Ourense os pequenos e grandes detalles da exploración planetaria

Ven, 02/09/2018 - 09:54

A nosa comunidade investigadora hai tempo que comezou a facer algo máis que ollar as estrelas: asumiu o reto aeroespacial e, en pouco, tempo, converteuse en referente no desenvolvemento de novos servizos e enxeños que permitisen coñecer mellor o que está por enriba (moi por enriba) das nosas cabezas. Na vangarda deste desafío están os investigadores xurdidos da UVigo, que, tanto dende aquí como de diferentes recantos do mundo, achegan importantes contribucións a esta liña colectiva de traballo. Por exemplo Alejandro Cardesín, enxeñeiro da ESA (Axencia Espacial Europea) e titulado en Telecomunicación pola UVigo, que estivo este 8 de febreiro no Campus de Ourense para ofrecer unha conferencia no marco do ciclo Foro Aero, impulsada pola Escola de Enxeñaría Aeronáutica e do Espazo. O título do seu relatorio foi en boa medida un resumo da súa traxectoria investigadora: De Galicia a Marte e máis alá: explorando o sistema solar coa European Space Agency (ESA).
Durante a súa intervención Alejandro Cardesín, doutor en Ciencias e Tecnoloxía Aeroespacial pola Universidade de Padua, en Italia, fixo partícipe ao alumnado asistente da súa traxectoria de arredor de 13 anos na European Space Agency e da súa paixón por traballar nos proxectos de exploración planetaria. Esa traxectoria, lembrou, iniciouse cando por unha serie de casualidades foi realizar o seu proxecto fin de carreira á ESA en Holanda e alí comezou a desenvolver o seu traballo no eido aeroespacial. En 2008 incorporouse á ESA en Madrid e desde entón participou e participa en diferentes misións de exploración planetaria. Entre elas están Rosetta, unha sonda enviada a un cometa; Venus Express, a primeira misión da ESA ao planeta Venus, e as misións a Marte Mars Express, a primeira misión interplanetaria europea, e a vindeira misión ExoMars, que buscará vida nese planeta. “Parece ciencia ficción pero non o é e os estudantes que hoxe están nesta escola pode formar parte no futuro dese soño”, destacou o enxeñeiro.
Segundo fixo saber sobre a natureza do seu traballo, “primeiro empecei como enxeñeiro puro, de Telecomunicación e Informática, pero logo movinme cara unha beira máis científico tralo doutoramento. Agora estou no medio, en operacións científicas, que é a interface entre os enxeñeiros e os científicos. Falar estes dous idiomas e traballar con ambas partes o que che permite é ter unha visión global de toda a misión, algo moi interesante”, explicou, engadindo que “do meu traballo tamén destaco como me permite traballar na coordinación de proxectos internacionais, que implican a expertos de todo tipo de áreas sen os cales non poderíamos facer realidade estes proxectos”.
Máis conferencias
As conferencias do Foro Aero continuarán ao longo do cuadrimestre, cunha periodicidade aproximada dunha conferencia por mes. Tendo en conta que o vindeiro curso académico xa se impartirá o terceiro curso do Grao en Enxeñaría Aeroespacial e que nel o alumnado xa terá que escoller entre a especialización en Aeronaves ou en Equipos e Materiais Aeroespaciais, entre as conferencias que se levarán a cabo haberá dúas centradas en cada unha destas mencións co obxectivo de orientar aos estudantes na súa escolla.
O Foro Aero, explicou na conferencia Arno Formella, director da Escola de Enxeñaría Aeronáutica e do Espazo, naceu o pasado curso co obxectivo de ofrecer ao alumnado do centro a oportunidade “de escoitar a profesionais de diversos sectores afondar na actividade aeroespacial, subministrándolles diferentes perspectivas profesionais”.

Categorías: Ciencia

UNICEF Galicia advirte do incremento do ciberacoso e o sexting na nosa terra

Xov, 02/08/2018 - 23:38

A Facultade de Educación de Santiago acubillou este 8 de febreiro unha xornada de UNICEF Galicia sobre novas tecnoloxías, sobre fenda dixital na mocidade e sobre os riscos derivados de converter as novas tecnoloxías en armas e instrumentos dos acosadores. O encontro, que serviu para presentar informe da dita ONG Os nenos e nenas da fenda dixital en España 2018, puxo o foco na necesidade de mobilizarnos (familias, colexios, pais, nais, institucións, organizacións internautas de pé) contra as prácticas de intimidación e violencia derivadas dun mal uso das novas ferramentas da comunicación. Prácticas como o sexting, o grooming ou o ciberacoso, hábitos que, segundo UNICEF Galicia, están cada vez máis estendidas entre os nosos adolescentes, con especial risco para os nenos das comunidades xitana, inmigrante e LGTBI.
Segundo se fixo saber no acto de hoxe, en España, “o 95% dos nenos entre 10 e 15 anos usa Internet, pero aínda hai 300.000 nenos e adolescentes que non empregou un computador e 140.000 que non tivo un só contacto na Rede”. As consecuencias disto son, evidentemente, unha situación discriminatoria con respecto a aquelas crianzas que, por razóns xeográficas ou económicas ou sociais, non teñen oportunidade de convivir na Sociedade do Coñecemento. En palabras de Cristina Junquera, responsábel de Incidencia Política e Estudos de UNICEF en España, “nun mundo onde todo é dixital, estar fóra do TIC é unha forma máis de exclusión”. Na súa opinión, un déficit nas capacidades, habilidades e competencias dixitais sobre o uso destas tecnoloxías “é un motivo de desigualdade e pode levar á exclusión no futuro”.
No informe tamén se indica que entre as comunidades que máis atrancos ten para tirar proveito das novas ferramentas áchase a comunidade xitana. Así, malia ser frecuente que os nenos deste colectivo teñan móbiles, “a maioría non sempre dispón de tarifa de datos para conectarse”, sinálase no estudo, reflectindo que dun estudo da Fundación Secretariado Xitano extráese que o 22% dos mozos xitanos non teñen Internet en casa por motivos económicos.
A respecto de todo o devandito, Natalia Gómez Fidalgo, técnica de Intervención Social da Fundación Secretariado Xitano, explicou na xornada celebrada este 8 de febreiro que “a pobreza é sen dúbida unha das barreiras para acceder a Internet, e outro atranco sería o uso que se fai das TIC. Ou sexa, o mal emprego que se fai destas ferramentas.
O encontro tamén contou coa presenza da presidenta do Consello de Participación Infantil de Castrelo de Miño, Edita Pousada, que trasladou as recomendacións dun grupo de crianzas galegas para facer un bo uso do TIC e, asemade, puxo o foco no caldo de cultivo para a violencia que se crea arredor do anonimato e a viralidade inherentes ás redes sociais. Segundo fixo saber, “os riscos en liña son o elemento máis subliñado e alarmante cando se aborda a relación entre nenos e redes sociais en Internet. A maioría de nós sentiuse violentado por actitudes en redes sociais de carácter agresivo tanto cara á nosa persoa como cara a terceiros. Todos coñecemos a algunha persoa, persoal ou virtualmente, que sufrise eses ataques”.
Outro dos especialistas presentes na xornada foi Antonio Rial Boubeta, doutor en Psicoloxía Social da USC, Universidade de Santiago de Compostela, quen lembrou unha cifra certamente preocupante: arestora, aproximadamente 1 de cada 5 adolescentes galegos presenta un uso problemático da Internet. Entre os hábitos que meirande inquietude xeran está sen dúbida o sexting, unha práctica relativamente frecuente na nosa terra, ou o feito de que ao redor de 20.000 menores galegos combinasen con persoas que coñeceron por Internet, “o cal constitúe un caldo de cultivo especialmente perigoso para a nova forma de pederastia coñecida como grooming”, explicou.
Pola cita de Compostela tamén pasou Fernando Gil, xefe do Departamento de Sociedade da Información da axencia AMTEGA, quen sinalou que é dos obxectivos da axencia “dotar á cidadanía das competencias e recursos para participar activamente no desenvolvemento da Sociedade da Información”. Con este fin, dixo, “puxemos libros dixitais a disposición de máis de 12.000 mozas e mozos que estudan en Galicia no presente curso, abordando a aprendizaxe cos mesmos elementos cos que desenvolven a súa vida fóra das aulas”.

Categorías: Ciencia

Twitter consegue beneficios trimestrais por primeira vez na historia

Xov, 02/08/2018 - 23:00
Táboa cos ingresos trimestrais de Twitter dos últimos anos

Os resultados financeiros de Twitter do último trimestre veñen de acadar un importante fito grazas ao recorte de gastos: por primeira vez na historia a compañía rexistra beneficios. Concretamente ao ingresar 732 millóns de dólares (só un 2% máis que o ano pasado) conseguiron beneficios de 91 millóns de dólares, cando no mesmo período do ano anterior perdera 167,1 millóns de dólares.
Cómpre destacar que os resultados son positivos no ámbito económico, pero no que se refire ao número de usuarios a compañía leva bastante tempo estancada, pero a axuste nos gastos (despedindo persoal e pechando áreas de negocio como Vine) conseguiu que os seus resultados operativos fosen positivos, facendo así que a empresa poida resultar atractiva para futuros compradores.
Twitter ten actualmente 330 millóns de usuarios activos ao mes, mentres que en usuarios activos ao día medrou un 12% interanual, aínda que as melloras de Twitter son bastante máis complicadas de detallar, xa que están no ámbito do compromiso dos usuarios, que cos últimos cambios da plataforma realizan cada vez máis accións e consumen máis tempo en Twitter e, en consecuencia, xeran máis oportunidades de negocio para a compañía, principalmente no que a publicidade se refire.

Categorías: Ciencia

Fíltrase o código fonte dunha parte crucial de iOS

Xov, 02/08/2018 - 22:30

O código fonte de iBoot, un dos elementos críticos do sistema operativo móbil de Apple, publicouse de xeito anónimo en GitHub, e aínda que Apple solicitou a súa eliminación, iso supuxo a confirmación da súa autenticidade, o que podería supor un serio problema para a seguridade de iOS, xa que a análise do código facilitará a localización de vulnerabilidades, aínda que cómpre detallar que non falamos dunha versión actual, senón da correspondente a iOS 9, ou sexa, que é unha versión vella do sistema operativo, polo que o impacto da filtración do código podería ser menor da que algúns esperan.
Confíase en que a publicación de iBoot facilite a realización do jailbreak de iOS, pero dende Apple xa apuntaron que a seguridade dos seus produtos non depende da ocultación do seu código, senón que teñen numerosas capas de protección tanto de software coma de hardware, de aí que sempre insten aos usuarios a empregar a última versión do software, conseguindo así o maior nivel de seguridade posible.

Categorías: Ciencia

Educación e Telefónica levarán aos centros de ensino o programa Creando Código

Xov, 02/08/2018 - 19:13

O conselleiro de Cultura, Educación e Ordenación Universitaria, Román Rodríguez; e Carolina Jeux, CEO de Telefónica Educación Digital; asinaron hoxe un convenio de colaboración para a posta en marcha nos centros educativos galegos do programa Creando Código, co que se procura afondar nas competencias dixitais STEM (Ciencias, Tecnoloxía, Enxeñaría e Matemática) do alumnado de Infantil, Primaria e ESO, nun acto que contou coa presenza da directora de Telefónica en Galicia, Marta Menéndez.
A iniciativa leva consigo un programa de formación do profesorado, homologado polo departamento educativo da Xunta de Galicia, así como o acceso a ScolarTIC, un espazo social de aprendizaxe en aberto e gratuíto para a comunidade educativa iberoamericana impulsado por Telefónica Educación Digital.
O profesorado que desexe participar poderá inscribirse no portal educativo da Xunta de Galicia, que lle dará acceso a ScolarTIC.

Propostas didácticas

A iniciativa susténtase sobre a aprendizaxe baseada en proxectos e busca fomentar as competencias STEM de forma transversal en todo o currículo escolar a través dunha exposición na que o alumnado se enfronta a un reto que require localizar, procesar información e pensamento computacional, crear algún tipo de produto tecnolóxico e presentar os resultados que dan resposta ao devandito desafío. Para iso, proporciónase as docentes un repositorio de proxectos e propostas didácticas curriculares listas para ser implementadas na aula, incluíndo as metas de comprensión e as preguntas condutoras, mención aos contidos curriculares que desenvolve, contidos en tecnoloxía, robótica ou programación, etc. Ademais, para facilitar a aplicación na aula, defínense as sesións de aprendizaxe necesarias coas pautas e actividades ou dinámicas que se deben realizar.
Creando Código presentará para a etapa de Infantil 18 propostas didácticas estruturadas en sesións que potencian o pensamento abstracto e computacional nas idades máis temperás, a través do xogo e traballando o coñecemento do medio, de si mesmo, as linguaxes e a autonomía persoal. Para Primaria deseñáronse 72 proxectos trimestrais que se desenvolven sobre os 6 cursos nas materias de Lingua Castelá e Literatura, Matemáticas, Ciencias da Natureza, Ciencias Sociais e Educación Artística. Pola súa banda, en ESO haberá 18 proxectos trimestrais e transversais para desenvolver nos tres primeiros cursos da etapa, que inciden sobre as materias de Bioloxía e Xeoloxía, Xeografía e Historia, Matemáticas, Música e Física e Química.

Formación para o docente

Para a súa implantación, Creando Código dispón dunha formación asociada aos proxectos que se compón de itinerarios formativos, cada un deles formado por cinco cursos de Programación, Robótica e Tecnoloxía que supoñen arredor de entre 90 e 110 horas de formación.
Ademais, os docentes poderán ampliar as súas competencias a través dos tutoriais e obradoiros que ofrece o espazo ScolarTIC, dirixido a que profesores, educadores e proxenitores podan formarse e informarse sobre as últimas tendencias educativas internacionais e que conta xa con máis de 400.000 usuarios. Neste espazo pódense atopar cursos en formato MOOC como Programando con Scratch, Iniciación á Robótica, etc.
Esta colaboración con Telefónica Educación Digital enmárcase na Estratexia galega para a educación dixital 2020, Edudixital, que ten como obxectivos principais que todo o alumnado de ensino obrigatorio teña formación en robótica e programación no curso 2020/21 e romper coa fenda de xénero nos estudos STEM.

Categorías: Ciencia

Apróbase o anteproxecto de Lei de Administración dixital de Galicia

Xov, 02/08/2018 - 18:52

O presidente da Xunta, na súa comparecencia semanal tras o Consello de Goberno, informou da aprobación do Anteproxecto de lei de Administración dixital de Galicia, co fin de acadar o papelame cero nas relacións entre a Administración e os cidadáns. Trátase dunha nova lei que vén completar o Plan da Administración e Goberno dixital 2020 que a Xunta puxo en marcha en 2015.
A aprobación deste anteproxecto supón a adaptación da Administración galega ás obrigas establecidas na normativa estatal, pero tamén mellorar estas exixencias e consolidalas con rango de lei.
Esta nova norma rexerase por tres principios básicos: que cada cidadán non teña que achegar os mesmos datos máis dunha vez, que a Administración empregue proactivamente a información da que dispón para adiantarse ás necesidades do cidadán e a automatización dos procesos para mellorar a eficiencia da xestión.

As novidades que introduce a lei

Como novidades, esta Lei da Administración dixital inclúe: a definición, por vez primeira, dun marco galego de competencias dixitais, que toma como referencia o marco común da Comisión Europea nesta materia e a través do cal se poderán avaliar e certificar os coñecementos dixitais dos cidadáns; a creación dun Plan de capacitación dixital do empregado público, que lles permitirá ás persoas que traballan na Administración acadar o certificado galego de competencias dixitais; a configuración dixital de procedementos administrativos e servizos para que teñan un funcionamento plenamente electrónico; a creación dun mapa de interoperabilidade das administracións públicas galegas, que será un inventario de datos e documentos que estean en poder das administracións e o desenvolvemento do posto de traballo dixital do empregado público.
Para a posta en servizo destas melloras, a nova lei recolle tamén a necesidade de creación dun Plan de continuidade dos servizos dixitais, que garantirá o acceso a estes con seguridade, calidade e de xeito continuo; o fomento da innovación dixital para impulsar novas formas de prestar servizos e a creación dunha comisión de coordinación interadministrativa para a promoción da prestación conxunta de servizos.
Para a análise da información sobre a implantación deste sistema e a introdución de melloras, o presidente da Xunta informou de que a lei prevé un sistema de indicadores da Administración dixital, que estará apoiado neste labor de seguimento polo Observatorio da Sociedade da Información e Modernización Tecnolóxica de Galicia (OSIMGA), cuxo papel se potenciará.

Categorías: Ciencia

AMTEGA e R rematarán 2018 con 11 polígonos de Ourense tirando proveito de redes ultrarrápidas

Xov, 02/08/2018 - 17:21
A rúa principal do polígono de Allariz vista con Google Street View

A Axencia para a Modernización Tecnolóxica de Galicia (AMTEGA) e operador R proseguen os seus traballos para dotar con Internet de altas capacidades os polígonos industriais da nosa terra que até o de agora non contaban con infraestruturas tecnolóxicas axeitadas para os novos tempos e para os novos requirimentos do mercado. A axencia que dirixe Mar Pereira avanzou este 8 de febreiro os traballos a realizar na provincia de Ourense ao abeiro do Plan de Banda Larga de Galicia, do que a firma R é adxudicataria. Segundo fixo saber, o plan subirá ao carro da Internet con velocidades de até 350 Mbps a outros catro polígonos industriais, que se engaden aos sete nos que xa se traballou previamente, dando como resultado (ao remate de 2018) un total de 11 complexos empresariais ourensáns con redes ultrarrápidas. Estes e outros datos foron achegados pola directora de AMTEGA, Mar Pereira, o director xeral de R, Alfredo Ramos, e a delegada da Xunta en Ourense, María Sol Díaz.
Segundo lembraron, as actuacións do plan comezaron en agosto de 2016 e ao remate de 2017 había 7 polígonos da provincia con este servizo de banda larga ultrarrápida. Ademais, recordaron que “unha vez completados os traballos programados, o 85% das superficies empresariais ocupadas da provincia terán acceso a redes de máis de 100Mbps”. Pereira tamén fixo saber que estes despregues estanse a complementar cunha liña de axudas, aberta o ano pasado, para equipar con redes ultrarrápidas as empresas e autónomos das contornas máis afastadas do rural. Ao fío desta liña, engadiu, destináronse un total de 400.000 euros á subvencionar solucións específicas a 30 empresas que agora dispoñen de velocidades de acceso a Internet de entre 50Mbps e 350Mbps.
Volvendo aos traballos despregados nos polígonos ao abeiro do plan, permitiralles dispor de Rede a través de fibra óptica cunhas velocidades de até 350 Mbps de baixada e 35 de suba, e cunha garantía de caudal do 80% sen límite de descargas. No acto de hoxe, AMTEGA e R fixeron fincapé en todo aquilo no que se traducen as devanditas capacidades: un abano de posibilidades competitivas e produtivas que van alén dun simple abastecemento de infraestrutura. En palabras de R, as ditas capacidades achandan o camiño para que as empresas “acometan a súa transformación dixital”. Ou sexa, para que boten man de servizos e solucións na nube como por exemplo a videoconferencia, o acceso á Internet das Cousas (IoT) ou os procedementos do que se coñece como Industria 4.0, vencellados a conceptos e metodoloxías como a eficiencia enerxética, o control de intrusións nas edificacións, os servidores virtuais e a analítica de datos (Big Data), entre outros eidos. “Todas estas cousas e outras moitas máis”, explica a compañía de raizame galega, “son posíbeis grazas ás vantaxes das redes FTTH (Fiber To The Home) que levan a fibra óptica ata a propia empresa nestes polígonos xa conectados ás redes ultrarrápidas de R”.
No acto deste 8 de febreiro, amais de todo o devandito, púxose o foco nas cifras a nivel autonómico, salientando que o plan xa completou o despregue 51 polígonos da nosa Comunidade e este ano chegará aos 30 restantes. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso a redes de máis de 100 Mpbs.
Lembrar que AMTEGA subvenciona estes traballos cunha axuda de 3,4 millóns de euros, que xerarán un investimento total de 5,2 millóns de euros. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Axudas para núcleos de poboación do rural
Tralas dúas primeiras actuacións orientadas a mellorar a conectividade no tecido empresarial, a axencia que dirixe Mar Pereira vén de pór en marcha a terceira actuación para facilitar o acceso a redes ultrarrápidas en zonas do rural que non contan con esta cobertura nin previsión de dispoñer destas redes.
O pasado día 15 xaneiro publicouse no DOG unha axudas, cun importe de 14,2 millóns de euros, dirixida a operadores de telecomunicacións para facilitar o acceso a Internet de cando menos 100Mbps en núcleos de menos de 150 habitantes.
Os operadores poderán actuar en calquera das 26.386 entidades de poboación de menos de 150 habitantes e noutros 80 núcleos de entre 150 e 300 habitantes. Poderán presentar varios proxectos cunha subvención mínima de 20.000€ para cada un deles ata esgotar a dotación orzamentaria prevista. O prazo de presentación é dun mes a contar dende o día seguinte á publicación no DOG.
Segundo se estipula nas bases, as redes coas que se dote ás entidades de poboación deberán proporcionar servizos de cando menos 100 Mbps de baixada e 20 de suba, non establecer limitacións de descargas e permitir a realización de comunicacións de voz e vídeo en tempo real.
A Administración autonómica concederá unha subvención máxima do 90% do custo total de cada proxecto. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Listado de Polígonos de Ourense cubertos e previstos en 2018
· Allariz, Parque Empresarial de Chorente · Allariz, Parque Empresarial de Chorente (Polígono Industrial) · O Barco, Parque Empresarial do Barco · Celanova, Parque Empresarial de Celanova · Ribadavia, Parque Empresarial de Ribadavia, · Verín, Parque Empresarial de Verín – Pazos · Pontedeva, Zona de Promoción Industrial de Trado · Vilamarín, Parque Empresarial de Vilamarín · Vilar de Santos, Parque Empresarial de Santa Marta · Xinzo de Limia, Parque Empresarial de Xinzo

Categorías: Ciencia

Páxinas