códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 2 horas 7 min

A versión 3.0 do CORGA xa acubilla 36,8 millóns de palabras

Ven, 11/03/2017 - 16:24

O Corpus Documental do Galego Actual (CORGA), conxunto en liña de textos (xornalísticos, divulgativos, literarios) da nosa lingua e con marcado potencial para os diferentes ámbitos da investigación humanística e científica, vén de estrear a súa versión 3.0. Hoxe mesmo foi presentada na sede do Centro Ramón Piñeiro en Santiago, desenvolvedor do corpus, nun acto que contou coa presenza do secretario xeral de Política Lingüística, Valentín García, quen fixo fincapé nas destacábeis cifras ás que vén de chegar a devandita ferramenta en liña: un acubillo para 36,8 millóns de palabras, das que 570.000 son formas diferentes. No capítulo de novidades, salientou a incorporación dunha pequena mostra representativa do rexistro oral da década dos 90 con transcricións nas que se aliña o texto coa voz e a etiquetaxe automática a través do Etiquetador/Lematizador do Galego Actual (XIADA).
Segundo engadiu o secretario xeral, “o CORGA 3.0 dá un novo paso para poñer a disposición da comunidade científica e dos falantes e da cidadanía en xeral posibilidades para o estudo e a investigación lingüística, nomeadamente para a obtención de datos referidos aos aspectos morfolóxicos, sintácticos e léxicos” e “faino, de acordo coas directrices do Plan xeral de normalización lingüística, da man das tecnoloxías da información e da comunicación e do impulso aos recursos tecnolóxicos da lingua propia de Galicia”.
Acompañárono na presentación o coordinador científico do Centro Ramón Piñeiro, Manuel González; a directora do CORGA, Marisol López; o secretario da Real Academia Española e colaborador do Centro Ramón Piñeiro, Guillermo Rojo, e os responsábeis da coordinación lingüística e informática do proxecto, os investigadores da Universidade de Santiago de Compostela (USC) Eva Domínguez e Mario Barcala, respectivamente.
O CORGA, para quen non o saiba, é un corpus documental desenvolvido no dito Centro, por medio dun convenio de colaboración coa USC, e integrado por distintos tipos de textos (xornais, semanarios, revistas, ensaios e textos de ficción) que abrangue temporalmente desde o ano 1975 até a actualidade e que está codificado no estándar XML (eXtensible Markup Language).
Segundo se fixo saber no acto desenvolvido en Santiago, a nova versión ampliada, a 3.0, está dispoñíbel enderezo corpus.cirp.es/corga e nela intégranse os dous sistemas de consulta en liña dispoñíbeis previamente, o do CORGA e o do CORGAetq, nun único sistema que “dá cabida ás diferentes aproximacións de busca e preséntase un motor de busca excepcionalmente potente que sitúa o galego na vangarda dos corpus lingüísticos”, informouse.
Como dixemos, no capítulo de novidades a nova entrega do CORGA incorpora un achegamento ao rexistro oral da década dos 90, en cuxas transcricións alíñase o texto coa voz, de maneira que á hora de facer e obter operacións de procura teremos a posibilidade de escoitar o anaco de audio que corresponde ao contexto dos resultados obtidos. De todos xeitos, a característica máis salientábel, en palabras dos responsábeis das devanditas entidades, é a etiquetaxe automática da totalidade dos documentos que conforman o CORPUS empregando o Etiquetador/Lematizador do Galego Actual (XIADA), desenvolvido conxuntamente polo CIRP e polo grupo COLE das universidades da Coruña e Vigo.

Categorías: Ciencia

UVigo App, unha aplicación para crear máis e mellor comunicación nos campus

Ven, 11/03/2017 - 14:51

A Universidade de Vigo vén de subir un novo chanzo no seu proceso de transformación dixital. E faino no ámbito das aplicacións, impulsando o espallamento da aplicación UVigo App entre o alumnado, o persoal de administración e servizos, o profesorado e a comunidade investigadora. A iniciativa, unha plataforma móbil personalizada con todo tipo de servizos e información actualizada de utilidade, vén da man de CRUE Universidades Españolas a través de Santander Universidades. O obxectivo, no que se refire aos Campus de Pontevedra, Vigo e Ourense, é “mellorar a comunicación e axilizar a xestión da comunidade universitaria”.
Segundo informan as ditas entidades, a App de UVigo inclúe acceso a información útil “para as e os integrantes da comunidade universitaria”, permitindo consultar as materias matriculadas e o expediente académico, ao tempo que incorpora a Tarxeta Universitaria Intelixente, TUI, na súa versión dixital, a través da que é posíbel renovar libros nas bibliotecas. Por outra banda, a ferramenta tamén fai posíbel a posta en marcha de grupos de comunicación e mesmo participar en retos, xogos, concursos, así como o acceso a vantaxes exclusivas da comunidade universitaria.
As persoas que desexen dispoñer da plataforma móbil personalizada no teléfono deben instalar a aplicación no dispositivo dende as tendas de aplicacións oficiais, Android e iOS. Así mesmo, para acceder á área restrinxida as e os usuarios deberán identificarse co seu número (NIF/NIE/Pasaporte) e o contrasinal de acceso á Secretaría Virtual. Ademais, hai un enderezo específico para que as e os usuarios da aplicación móbil obteñan resposta para as súas dúbidas e preguntas máis habituais (as cuestións máis específicas poderán consultalas dende a propia aplicación).

Categorías: Ciencia

Desenvolvida dende Ourense unha pioneira aplicación de análise da calidade de software

Ven, 11/03/2017 - 13:02

O enxeñeiro informático da Universidade de Vigo Michael García vén de crear unha ferramenta pioneira na análise da calidade do software feito con Fortran, linguaxe de programación moi acaída para a computación científica e o cálculo avanzado. Trátase da ferramenta FortranAnalyser, unha innovadora aplicación que é quen de facer cousas como comprobar métricas consideradas como boas prácticas de programación. A tecnoloxía, segundo informa a Universidade de Vigo, xa ten espertado o interese de investigadores da NASA.
O desenvolvemento deste ferramenta, explica o investigador do Grupo EPhysLab do campus de Ourense, xurdiu no marco do traballo fin de mestrado en Enxeñaría Informática que realizou baixo a dirección dos profesores Juan Antonio Añel e Javier Rodeiro, e que recentemente recibiu un dos galardóns do Premio ao Mellor Proxecto Universitario con Licenza Libre convocado pola Axencia para a Modernización Tecnolóxica de Galicia (AMTEGA). Neste traballo, Michael García estudou a reproducibilidade computacional do CMIP 5, a fase cinco do proxecto internacional de intercomparación de modelos climáticos do Programa Mundial do Clima de Nacións Unidas, que abrangue desde 2008 a 2015. Segundo explica García, “para o informe de Nacións Unidas sobre cambio climático fanse unha serie de simulacións do clima con modelos, e eses modelos son os que eu estudei”.
A análise da dispoñibilidade consistiu en comprobar a facilidade de acceso ao código dos 26 modelos que conforman o CMIP 5, analizándose as licenzas asociadas a cada modelo. A cada un deles asignóuselle unha valoración, outorgando cero estrelas no caso de non dispor do código; unha estrela no caso de obter o código tras contactar coa institución; dúas estrelas se o código está dispoñíbel na páxina web da institución e a última estrela asignóuselle en base ao tipo de licenza asociada ao modelo: media estrela se é tipo BSD ou similar e unha estrela se é tipo GPL ou similar. Dos oito modelos dos que se conseguiu o código, sete obtiveron un informe de dispoñibilidade favorábel.
A análise da calidade dos modelos foi a que xerou a problemática que deu lugar á creación de FortranAnalyser. Segundo engade García, “a linguaxe de programación na que están desenvolvidos os modelos é Fortran. Ante a inexistencia dunha ferramenta que fose capaz de analizar o código estaticamente comprobando métricas consideradas como boas prácticas de programación, vímonos obrigados a desenvolver unha propia, a que chamamos FortranAnalyser”. Esta aplicación, máis en detalle, é unha ferramenta multilinguaxe de análise estática de código Fortran para plataforma Linux.

Categorías: Ciencia

A Deputación, o Concello e o ICOIIG converterán Lugo na capital galega da enerxía smart

Ven, 11/03/2017 - 11:47

Os vindeiros 8 e 9 de novembro vaise celebrar en Lugo un evento destinado a pór de relevo a importancia da innovación smart e as novas tecnoloxías para dar con formas máis sustentábeis, eficientes, eficaces, limpas e rendíbeis de xestionar e consumir enerxía. Falamos da cuarta edición do Congreso Galego de Xestión Enerxética, XENERGAL 2017, que se vai desenvolver no Pazo de San Marcos da man do Colexio de Enxeñeiros Industriais de Galicia (ICOIIG), coa colaboración da Deputación de Lugo e do Concello.
Na presentación do evento participaron o presidente do Goberno provincial, Darío Campos, o concelleiro de Desenvolvemento Sostible, Daniel Piñeiro, o decano do ICOIIG, Oriol Sarmiento e o director de XENERGAL, Fernando Blanco. O principal responsábel da Deputación salientou que se trata da “maior cita do sector en Galicia” e que contará con 36 relatorios e con cinco fíos temáticos principais: enerxías renovables, eficiencia enerxética e mantemento de edificios, iluminación, innovación e xestión transversal da enerxía.
Na presentación o Concello debullou as principais liñas do proxecto local Lugo Smart City. Segundo fixo saber Piñeiro, Lugo Smart City é unha iniciativa financiada nun 80% con fondos FEDER que se dirixe a converter a cidade da Muralla nunha cidade intelixente e sustentábel, con medidas concretas como a xestión de refugallos sólidos urbanos a través de sensores de almacenamento conectados vía GPR ou 3G nos colectores, a xestión do alumeado público nas contornas urbana e rural (con regulación de fluxo lumínico a través de dispositivos tecnolóxico-dixitais de control) ou a xestión de eficiencia enerxética nas dependencias municipais do consistorio, o Centro de Servizos Municipais, as piscinas municipais, o CEI-NODUS e o Centro Social Uxío Novoneyra.
O Congreso artéllase nun total de trece mesas específicas, e contará coa participación de empresas, investigadores universitarios e centros de investigación relacionados co sector da enerxía. O número de asistentes inscritos (profesionais de empresas, investigadores universitarios e de organismos públicos, etc) xa supera un cento e a relación de relatorios aceptados pódese consultar na web do evento.

Categorías: Ciencia

Appentra pecha unha rolda de financiamento de 400.000 euros

Xov, 11/02/2017 - 22:30

A empresa tecnolóxica galega Appentra, nacida da Universidade da Coruña en 2012, pechou unha rolda de financiamento de 400.000 euros, liderada por tres organizacións españolas de capital de risco, Caixa Capital Risc, Unirisco e Xesgalicia. Os novos fondos utilizaranse para acelerar a comercialización das ferramentas de Parallware, para escalar o equipo e mellorar aínda máis a tecnoloxía de Parallware.
Appentra proporciona ferramentas de software de alta calidade que permiten un uso extensivo das técnicas de computación de alto rendemento (HPC) en todas as áreas de enxeñería, ciencia e industria. Os clientes obxectivo de Appentra son empresas e organizacións que executan aplicacións informáticas de cómputo intensivo, con uso frecuente en mercados como o aeroespacial, o automóbil, a enxeñería civil, a biomedicina ou a química.
Ante esta operación o director executivo de Appentra aseguran que «é un privilexio ter un grupo de investidores que nos apoian e que cren na nosa visión e no noso equipo».

Categorías: Ciencia

O dicionario en liña da RAG superou en 2017 os 15 millóns de visitas

Xov, 11/02/2017 - 22:26

Sen dúbida un dos instrumentos tecnolóxicos galegos de meirande éxito na actualidade é o dicionario en liña da Real Academia Galega (RAG), unha ferramenta que é, en si mesma, a proba do interese que suscita a nosa lingua na Internet, tanto para galegofalantes como para os que non o son, tanto para os investigadores, como para estudantes, como para cidadáns de a pé que queren resolver calquera dúbida relacionada cunha palabra galega. Hai probas palpábeis deste éxito? Pois segundo os últimos recontos feitos pola RAG, no que vai de ano xa se superaron os 15 millóns de visitas ao dito dicionario, o que certifica o interese crecente pola ferramenta, xa que en 2017 a cifra foi de 14,4 millóns.
Polo que respecta á cifra de consultas diarias, estaría nas 55.000. E no que atinxe ás aplicacións móbiles, estaríamos a falar de 1,6 millóns de visualizacións nas ferramentas para as versións Android e iOS. A previsión é que se remate o ano chegando ás 19 millóns de buscas.
Como lembraremos, a RAG (en colaboración coa Fundación Barrié) estreou en 2012 a versión dixital do seu dicionario, achegando no seu punto de partida máis de 56.000 termos en libre consulta. Dende aquela, a achega de novidades e servizos innovadores foi constante e non fixo máis que fortalecer a experiencia dos usuarios e o interese dos mesmos pola lingua galega. A estrea do dicionario tamén foi salientábel pola integración no seu seo do Dicionario de pronuncia da lingua galega desenvolvido polo Instituto da Lingua Galega en colaboración coa CRTVG, o que fortaleceu o lanzamento con cumprida información sobre a pronuncia das palabras, as súas propiedades gramaticais, os sinónimos, os antónimos, o rexistro e outros datos de utilidade para o uso correcto da lingua.

Categorías: Ciencia

As novas audiencias nas contornas dixitais, a debate este 3 de novembro na UDC

Xov, 11/02/2017 - 15:48

O salón de actos da Facultade de Ciencias da Comunicación servirá de acubillo, este 3 de novembro, ás Xornadas sobre novas audiencias na contorna dixital, a partir das 9:15 horas, un encontro profesional para mostrar ante o alumnado os cambios que están a producir as novas tecnoloxías entre os consumidores de contidos e cultura. Logo do acto de inauguración, á devandita hora, comezará un relatorio de Eduardo Madinaveitia, experto en investigación de medios, coa conferencia Investigación de audiencia: de onde vimos. Ás 10:15, Fernando Santiago, director Técnico da Asociación para a Investigación de Medios de Comunicación, falará sobre Internet: encrucillada na medición de audiencias.
Máis tarde, a xefa do Servizo de Innovación no Contorno Dixital da CRTVG, Esther Medina, intervirá ás 11:45 co relatorio 1+1 ≠ 2. Finalmente, o guionista Javier Olivares falará en detalle sobre Os retos do guionista actual ante as novas audiencias.
A xornada, organizada pola Facultade, concluirá cun coloquio, ás 13:15h., moderado polas profesoras Ana González Neira e Natalia Quintas Froufe. A asistencia ás conferencias está aberta a todo o público interesado.

Categorías: Ciencia

O CCG analizará os cambios xerados pola sociedade móbil nos nosos hábitos culturais

Xov, 11/02/2017 - 13:28

O compromiso do Consello da Cultura coa análise do que están a dar de si as novas tecnoloxías como elementos transformadores dos nosos xeitos de comunicarnos e procurar información (entre outras moitas transformacións do día a día de cada quen) non só se vai deixar notar amplamente en 2018, tal e como avanzamos hoxe en Código Cero, senón tamén nesta recta final de 2017. Se hai uns días falamos das reflexións feitas sobre o ciberacoso dende a sede do CCG, hoxe é a quenda de avanzar as liñas xerais da xornada Sociedade móbil e cultura: novos e vellos desafíos, prevista para o 9 novembro, novamente na sede do Consello da Cultura, e contando na comisión organizadora con Manuel Gago, Xosé López García e Alba Silva. A cita, como se indica no seu nome, será unha oportunidade para ver até onde chegamos en materia de comunicación móbil e albiscar o que nos reserva o futuro neste ámbito. Segundo avanza o CCG, todo indica a que este modelo comunicativo e cultural (tendo en conta o espectacular medre no tráfico de mensaxes nos dispositivos móbiles) “veu para quedar”.
O CCG tamén lembra que os datos recentes achegan evidencias claras sobre a importancia destes dispositivos no ámbito da comunicación e da cultura: no ano 2016, o tráfico de Google alcanzou a marca do 50 por cento para dispositivos móbiles por primeira vez, fronte a un 42 por cento nos dispositivos de escritorio. E no ano 2017 esta cifra medrou ata o 60 por cento, mentres o de Facebook pasou do 78 por cento ao 87 por cento.
Neste contexto, o obxectivo desta xornada é “analizar como a sociedade móbil está a mudar usos e consumos de produtos culturais”. Trátase, engade o CCG, “de dispoñer de visións do novo marco, nas vésperas da cuarta revolución industrial, e da situación da cultura galega nese escenario en construción”.
Programa da xornada
- 9:15 horas - Inauguración
- 9:30 horas - Contornas de información ubicua. Catálogo de desafíos pendentes
Juan Miguel Aguado. Universidad de Murcia. Director xeral de RTRM
- 10:30 horas - Produción e consumo de información en móbiles. Unha visión do panorama europeo
Oscar Westlund. Götegorgs Universitet
- 11:30 horas - Descanso
- 12:00 horas - Periodismo móbil e cultura móbil
Koldobika Meso Ayerdi. Euskal Herriko Unibertsitateak
- 13:00 horas - O móbil como oportunidade para producir contidos e intervir
João Canavilhas. Universidade da Beira Interior
- 16:30 horas - A comunicación política na sociedade móbil: oportunidades e retos nunha contorna híbrida
Andreu Casero-Ripollés. Universitat Jaume I
- 17:30 horas - Oportunidades da comunicación móbil para os actores culturais: o prosumo como actividade creativa
Eva Campos. Universidad de Valladolid
- 18:30 horas - A conquista de novos territorios comunicativos para a cultura galega
Manuel Gago. Consello da Cultura Galega, Universidade de Santiago de Compostela
- 19:30 horas - Clausura - Trazos e identidades dunha cultural con identidade e migrante
Ramón Villares. Presidente do Consello da Cultura Galega

Categorías: Ciencia

ABANCA fortalecerá o proceso de medre da tecnolóxica galega TokApp

Xov, 11/02/2017 - 12:48

Entre as nosas empresas TIC de meirande potencial de medre atópase TokApp, responsábel da ferramenta global do mesmo nome para facilitar e mellorar a comunicación empresarial, e tamén de TokApp School, aplicación destinada a evitar calquera tipo de incidencia comunicativa no ámbito escolar. Así o entende (así entende este potencial de TokApp) a entidade financeira ABANCA, que vén de integrarse neste proxecto empresarial co obxectivo de “acelerar a súa estratexia de negocio e de crecemento”. O apoio materialízase a través do programa de aceleración ABANCA Innova, creado para impulsar o desenvolvemento das novas tecnoloxías en Galicia.
En virtude disto, o banco galego fornece de financiamento a TokApp a través dun préstamo participativo convertíbel, de acordo á modalidade de investimento de ABANCA Invest. Segundo informa a entidade, esta operación de financiamento faise efectiva tras varios meses de traballo conxunto entre ambas as partes no ámbito da innovación, un labor “que permitiu identificar potenciais sinerxías para dar servizo e ofrecer solucións aos clientes e usuarios de TokApp”. ABANCA seguirá acompañando o empresarial durante a súa etapa de crecemento e valorará novas vías de apoio a medio prazo.
Como lembraremos, TokApp é unha start-up galega creada en 2013 que desenvolveu unha plataforma de mensaxería instantánea (tamén chamada TokApp) para que as empresas, institucións e asociacións teñan unha comunicación directa con todos os seus integrantes. A aplicación, que conta actualmente con máis de 500.000 usuarios, permite o envío de mensaxes ilimitadas (sen tope de caracteres nin de arquivos), coas funcionalidades de confirmación de lectura, rápida posta en marcha (o servizo ponse en funcionamento en cuestión de minutos), acceso desde calquera dispositivo con acceso a Internet, e seguridade (máxima privacidade dos datos).
Unha das solucións de TokApp máis espalladas é TokApp School, unha aplicación que posibilita a comunicación de profesores e centros educativos con pais e alumnos mediante mensaxería instantánea ilimitada, o que posibilita aforros de tempo e diñeiro ao prescindir das cartas e circulares.
Amais de todo isto, TokApp decidiu lanzarse recentemente á conquista de Latinoamérica, onde xa é unha aplicación plenamente afianzada en seis países do continente americano (México, Uruguai, Arxentina, Colombia, Costa Rica e Nicaragua).
Segundo fixo saber hai uns meses Javier Romero, o conselleiro delegado de TokApp, as previsións da compañía para 2018 incrementan os datos de 2017, ano no que foi quen de triplicar a súa facturación anual respecto de 2015. Para 2018, TokApp prevé chegar ao millón de usuarios e ter presenza activa en 20 países.

Categorías: Ciencia

O Asistente de Google por fin fala español

Xov, 11/02/2017 - 12:46

O anuncio de que o Pixel 2 XL ía venderse en España a partires do pasado 26 de novembro recibiuse con moita ilusión non só porque supuña que os smartphones da familia Pixel estarían por fin dispoñibles oficialmente no noso territorio, senón tamén polo feito de que iso suporía que un dos seus grandes atractivos, o Asistente de Google, ampliaría o número de linguas nas que está dispoñible, o que vén de confirmarse, de xeito que opera en español para todos os dispositivos con Android 6.0 ou superior, iniciando a súa distribución precisamente co Pixel 2 XL.
O Asistente de Google permítenos conversar co buscador mediante linguaxe natural, de xeito que podemos preguntarlle polo estado do tráfico, por restaurantes nas proximidades, polo cambio de moeda, pola previsión meteorolóxica ou para comprobar a axenda, así como para realizar chamadas telefónicas ou simplemente botar unhas risas preguntándolle curiosidades para descubrir que ten programadas respostas divertidas.
Polo momento o Asistente de Google está dispoñible en español a través da aplicación Allo, pero nos móbiles que optasen á súa integración (como o mencionado Pixel 2 XL) será posible invocar ao Asistente con premer durante un anaco o botón de inicio ou dicindo «OK Google», co que iniciaremos unha conversación.

O Asistente de Google en español está dispoñible a través de Allo
Categorías: Ciencia

Certifican dende o Campus de Pontevedra que os vellos partidos políticos desaproveitan as redes sociais

Xov, 11/02/2017 - 12:23

Esta semana (30 e 31 de outubro) celebrouse no Campus de Pontevedra (UVigo) a segunda edición das Xornadas Científicas de Comunicación Organizacional, nas que participaron preto de 20 especialistas de diferentes universidades estatais, aos que se sumaron outros 30 inscritos e 55 comunicacións. O evento, que veu da man da Asociación Española de Investigación e o grupo de investigación CP2, constituíse coma un foro de debate sobre novos medios e tecnoloxías da comunicación e sobre como estas ferramentas poden mudar as relacións das organizacións cos seus destinatarios (usuarios, clientes e colaboradores reais ou potenciais). Entre os temas concretos nos que se fixo fincapé situáronse as redes sociais. Segundo se fixo saber, a actitude xeral das organizacións políticas fronte a estes servizos está a ser máis ben conservadora, de risco controlado. Pola contra, non se adoitan explorar vieiros que poidan xerar máis beneficios.
Estes fenómenos arredor das redes sociais foron avaliados ao detalle polo profesor Andreu Casero, da Universidade Jaume I de Castellón, quen achegou un estudo sobre o uso de Twitter nas eleccións xerais de xuño de 2016. Segundo fixo saber, a existencia dun “escenario moito máis aberto”, no que xa non só as/os profesionais da comunicación teñan “capacidade de construír e difundir mensaxes” constitúe unha das claves dese novo escenario no ámbito da comunicación política. Un escenario que implica, dixo, “novas oportunidades laborais” e a posibilidade de que tanto organizacións políticas como colectivos sociais poidan desenvolver “unha estratexia comunicativa en redes sociais que poida xerar algún tipo de influencia”. O abano de utilidades neste eido é tan amplo como poidamos imaxinar, engadiu, e o abano inclúe cousas como artellar comunidades virtuais ou chegar máis directamente á cidadanía. “Outra cousa”, explicou, “é que os actores políticos aproveiten esas oportunidades ao 100%”.
Segundo fixo saber Casero, só os movementos cidadás e organizacións políticas emerxentes, como Podemos ou Cidadáns, “aproveitaron máis as redes sociais para buscar fórmulas innovadoras de comunicación”. Pola contra, nos principais partidos prima “unha xestión conservadora” das redes, “polo medo a perder o control da mensaxe”, dirixida a “evitar riscos”. Entre os principais perigos atópase o feito de que unha mensaxe remate converténdose nun meme, situación que ao seu xuízo, “acabaría por bloquear novas fórmulas” que poderían resultar “unha vía moi interesante para captar a novos públicos pouco interesados na política”.

Categorías: Ciencia

As HoloLens de Microsoft chegan oficialmente a España

Xov, 11/02/2017 - 12:16

A tecnoloxía de realidade mixta proposta por Microsoft coas súas HoloLens son unha porta a un mundo de oportunidades que non estaba aberta para todos, resultando bastante complicado o seu acceso dende Europa, onde había poucos partners para axudar ao desenvolvemento de aplicacións para esta prometedora plataforma, peor a situación está a mudar, e Microsoft anunciou en Londres no marco do evento Futured Decoded a ampliación da dispoñibilidade de HoloLens a 29 novos países de Europa: Austria, Bélxica, Bulgaria, Croacia, Chipre, República Checa, Dinamarca, Eslovaquia, Eslovenia, España, Estonia, Finlandia, Grecia, Hungría, Islandia, Italia, Letonia, Liechtenstein, Lituania, Luxemburgo, Malta, Noruega, Países Baixos, Polonia, Portugal, Romanía, Suecia, Suíza e Turquía.
Esta tecnoloxía afástase bastante do que estamos a ver actualmente coa realidade virtual, ou sexa, que non persegue o lecer, senón usos industriais ou moi especializados, como axudar en quirófanos ou aplicarse en fábricas, onde os cascos de realidade mixta poden axudar na realización de tarefas cruciais dun xeito máis rápido, seguro e eficiente, xa que o sistema presenta información de utilidade sobre os obxectos reais, sen interromper a visión normal e funcionando en mans libres.
Para o seu uso industrial resulta importante o feito de que as HoloLens veñen de superar as probas básicas de impacto para lentes protectoras, á vez que tamén conta con certificación IP50 contra o po e contará a primeiros do ano que vén cun casco protector no que poidan integrarse as HoloLens, favorecendo así o seu uso industrial efectivo.
En calquera caso, o acceso ás HoloLens de Microsoft non resulta económica, custando a versión para desenvolvedores 3.000 dólares, e a versión comercial 5.000 dólares.

Vídeo no que podemos ver a aplicación industrial das HoloLens

Categorías: Ciencia

O Consello da Cultura impulsará en 2018 novos proxectos dixitais e interactivos

Xov, 11/02/2017 - 11:58
Ramón Villares, presidente do Consello da Cultura Galega

O Consello da Cultura Galega (CCG) segue adiante no seu vieiro para ser, amais dun referente na nosa cultura, un referente na nosa vida tecnolóxica. Así nolo vén de certificar o propio presidente da entidade, Ramón Villares, que presentou este 31 de outubro o orzamento do CCG para 2018 (en total 2.547.225 euros, un 2,9% maior có do ano pasado) e o roteiro de actividades para o devandito exercicio, entre as que se inclúen a recuperación da figura de María Victoria Moreno (homenaxeada este ano no Día das Letras Galegas), un labor de reivindicación que terá múltiples facianas dixitais. Amais, organizarase unha exposición que condensa o discurso Alba de Gloria que Castelao pronunciou en Bos Aires hai 70 anos, unha xornada galego-portuguesa sobre lumes forestais ou o congreso Diáspora e nacionalismo galego (co que se pecha o ciclo sobre as Irmandades da Fala). A maiores, abrollarán novos proxectos dixitais e interactivos, como por exemplo unha “máquina do tempo”.
Máis polo miúdo, a máquina do tempo será unha aplicación móbil de balde, dispoñíbel para as principais plataformas móbiles e dirixida a “pór en valor o patrimonio móbel de Galicia dun xeito innovador”. Por outra banda, impulsarase o Mapa Sonoro de Galicia, que en palabras do CCG consiste “nunha ferramenta que xeolocaliza coleccións sonoras de carácter etnográfico, musical, antropolóxico e mesmo de son ambiental”. O obxectivo é “reflectir e explorar a diversidade cultural, lingüística e antropolóxica de Galicia a través do son”. O Mapa Sonoro de Galicia parte de 1.000 rexistros do Consello da Cultura Galega e coleccións privadas.
O que vimos de deixar atrás
Villares tamén fixo un repaso da actividade da institución ao longo deste ano 2017. No que vai de ano desenvolvéronse 71 accións, entre presentacións, conferencias e actos institucionais. Amais, o CCG acolleu a celebración de 14 actividades doutras entidades, o que responde á súa arela de “de ser un foro aberto para a cultura galega”. En termos xerais, houbo conferencias de temas de actualidade como as fronteiras, novos horizontes para a cultura galega ou a situación actual dos montes comunais ou o ciberacoso. Ademais, desenvolverasen actividades que permitiron achegar a cultura galega a outros territorios como Bretaña. Exhibiuse unha ollada inédita da transición en Galicia no obxectivo de Anna Turbau e contribuíuse á proxección exterior da cultura galega en Estados Unidos, Alemaña e Portugal.

Categorías: Ciencia

Ismael Nafría mostra na Coruña a transformación dixital de The New York Times

Xov, 11/02/2017 - 11:43

Ismael Nafría, referente profesional multimedia e profesor especializado en Medios Dixitais (amais de autor de La reinvención de The New York Times), estará esta semana (os días 2 e 3) na Coruña participando arreo no Máster en Produción Xornalística e Audiovisual (MPXA) que organizan (no seo da UDC) a Fundación Santiago Rey Fernández-Latorre e a Fundación Amancio Ortega. Nafría concorrerá no master para impartir unha clase maxistral sobre medios de comunicación. Nestas dúas xornadas, os estudantes coñecerán polo miúdo o proceso de innovación que experimentou o devandito xornal norteamericano (a “dama gris do xornalismo”) durante os últimos anos para afianzarse de cheo na era dixital: nos computadores dos lectores e, tamén, nos seus smartphones e tabletas.
Asemade, o alumnado do master terá oportunidade de coñecer en detalle “os profundos cambios que sufriron os modelos de negocio da industria da comunicación, especialmente desde a aparición de Internet, e como os usuarios cambiaron os seus hábitos de consumo de información”.
Ismael Nafría foi xornalista en residencia durante o curso 2016-17 do Centro Knight para o Xornalismo nas Américas da Universidade de Texas en Austin e embaixador para España da organización internacional sen ánimo de lucro SembraMedia, dedicada a impulsar o traballo de emprendedores en medios dixitais nos mercados de fala hispana. Foi director de contidos dixitais e de innovación dixital do Grupo Godó (2008 - 2016) e subdirector de contidos de Prisacom (2005 - 2008).

Categorías: Ciencia

A Xbox One estrea aplicación de Amazon Prime Video

Mar, 10/31/2017 - 22:00

O servizo Amazon Prime Video está a piques de cumprir un ano de vida en España, pero esta plataforma de vídeo baixo demanda para subscritores de Amazon Prime chegou cunha carencia moi importante: case era imposible de acceder á mesma fóra do ordenador e de dispositivos móbiles, en boa medida por culpa da política de Amazon de oporse a dispositivos como o Chromecast de Google (xa que compiten cos mesmos con hardware propio nalgúns países). Pero o problema foi solucionándose paulatinamente, e tras o lanzamento de aplicacións en bastantes Smart TV, chegou a quenda das consolas de videoxogos, que tamén son un xeito moi efectivo de levar os contidos audiovisuais ao televisor do salón.
En setembro Amazon Prime Video estreou aplicación oficial para PlayStation 4, e agora acontece o propio para Xbox One, de xeito que a consola de Microsoft pode empregarse para reproducir series de televisión, películas e outros contidos desta plataforma audiovisual que cada día ten máis material en español.
Este lanzamento non se limitou ao mercado español, senón que a aplicación de Amazon Prime Video chegou hoxe tamén a Canadá, México, Francia, Italia e India, como anticipo a unha dispoñibilidade global da aplicación o vindeiro 7 de novembro.
Esta aplicación é especialmente atractiva para usuarios dunha Xbox One S ou Xbox One X, xa que conta con contidos en ultra alta definición, facilitando así que quen teña un televisor compatible poida gozar de contidos cun grande nivel de detalle. Espérase que en breve (antes de rematar o ano) a aplicación de Amazon Prime Video tamén chegue a Apple TV, especialmente agora que existe unha versión 4K do dispositivo.

Categorías: Ciencia

Cineuropa 2017: máis pelis e máis presenza nas redes

Mar, 10/31/2017 - 16:38
Presentación do festival celebrada onte en Raxoi, con Goretti Sanmartín, José Luis Losa, Branca Novoneyra e Martiño Nogueira

A nova edición do festival Cineuropa de Santiago vén con importantes novidades cualitativas e cuantitativas: máis premios, máis sedes, máis xornadas, máis presenza nas redes. Así nolo fixeron saber onte o director do evento, José Luis Losa, e os responsábeis do Concello de Santiago e a Deputación da Coruña. A nivel TIC, informaron que amais de pór en xogo (novamente) a posibilidade de mercarmos entradas por Internet, con total comodidade (evitando ter que engrosar longas ringleiras na billeteira), estase a lanzar un chamamento para que as/os seareiras/os compartan nas redes sociais as súas impresións, lembranzas e imaxes sobre esta edición do festival e as anteriores, botando mando do cancelo #Cineuropa31. Con esta actividade quérese contribuír, tamén, a celebrar o cumprimento dos 30 anos do certame.
De feito e seguindo con esta vertente dixital, será posíbel seguir o día a día de Cineuropa a través dos seus perfís en redes sociais: Twitter, Facebook e Instagram. De xeito complementario, a partir do día 1 de novembro, a web cineuropa.gal porá a disposición do público a programación detallada desta edición, ao que cómpre engadir unha canle de seu en Telegram, dende a cal as persoas subscritas poderán recibir información sobre axenda do día e os cambios de última hora que se produzan no programa.
Xa nun plano máis “analóxico”, outro dos grandes pratos fortes do certame ten que ver premio que o certame adica a distinguir a traxectoria artística das actrices e actores da nosa contorna (e de alén dela), que este ano irá dar a mans do actor arxentino Leonardo Sbaraglia, protagonista de case medio cento de longametraxes, entre as que se contan algunhas tan salientábeis como a recente Relatos salvaxes ou a máis antiga Intacto. A cerimonia de entrega do Premio Cineuropa a Leonardo Sbaraglia terá lugar o martes 14 de novembro, ás 20:00 horas, no Teatro Principal.
Sinalar que alén da entrega dito galardón a Sbaraglia, o festival distinguirá o legado do actor arxentino coa proxección de dous dos seus traballos máis recentes. No te olvides de mí, ópera prima de Fernanda Ramondo que Sbaraglia protagonizou en 2016, será exhibida ese mesmo día ás 16:30 horas, nunha sesión que contará coa presenza do actor. Logo da entrega do premio, á noite, o teatro acollerá tamén o pase de El otro hermano, de Adrián Caetano.
Por suposto, Cineuropa 2017 (31ª edición) non rematará na dita distinción. Segundo soubemos este luns 30 de outubro, proxectarase a cifra nada desprezábel de 264 filmes, a través de 17 seccións. Estes detalles confirman o que se agardaba en determinados círculos de seareiros: que Cineuropa vai a máis este ano, que medran non só as películas a presentar, senón tamén os premiados, as xornadas complementarias de debate e divulgación e os espazos de exhibición.
A inauguración oficial virá da man dun dos directores franceses máis destacados do noso tempo, Robert Guédiguian, autor dun inesquecíbel feixe de filmes sobre vidas anónimas na Marsella interracial e multicultural do cambio de século, quen abrirá Cineuropa con La Villa, o 7 de novembro, ás 20:00 horas, no Teatro Principal.
Respecto ás “responsabilidades” desta nova edición, virá novamente da man do crítico especializado José Luis Losa (director do certame), contando coa implicación directa do Concello de Santiago e da Deputación da Coruña, que colabora por vez primeira de xeito directo con Cineuropa, segundo fixo saber na rolda de prensa deste 30 de outubro a vicepresidenta da entidade provincial, Goretti Sanmartín.
No que atinxe ás sedes das proxeccións, a rede de pantallas está constituída polo Teatro Principal, o Salón Teatro, o Centro Galego de Arte Contemporánea (CGAC), a sede da Afundación, o Auditorio de Galicia e o cinema Numax. A estes espazos incorpóranse por vez primeira os Multicines Compostela, o que confirma o incremento de sedes de Cineuropa. As entradas e abonos estarán á venda a partir da tarde do venres, día 3, tanto nos despachos de billetes como por Internet.
Apoios e colaboracións
Cineuropa é un festival organizado polo Concello de Santiago coa colaboración do Consorcio de Santiago, a Deputación da Coruña, o CGAC, Afundación e o ICAA. Conta tamén co apoio do Instituto Camões, os Multicines Compostela, a Asociación de Actores e Actrices de Galicia, o Hostal dos Reis Católicos, Autos Rayma, María Castaña, Café de Altamira, o Curro da Parra, Moha, Icelandic Film Centre, Terratreme, Stilmoving e Meikincine Entertainment.

Categorías: Ciencia

O sector audiovisual coruñés mergullouse nos segredos do crowdfunding

Mar, 10/31/2017 - 13:23

O Laboratorio Audiovisual de Innovación e Creación da Coruña (LAIC) celebrou os días pasados no Centro Cívico da Cidade Vella unha xornada divulgativa directamente encamiñada a mostrar as vantaxes e os segredos da técnica do crowdfunding (micromecenado na Rede a través do apoio da comunidade) para pór en marcha un proxecto audiovisual ou de contidos dixitais. O obradoiro Supercine: taller de cine LAIC veu da man do cineasta Miguel Ángel Rolland e contou coa presenza, entre os asistentes, de realizadores audiovisuais, profesionais do guión e da interpretación, creadoras freelance e mesmo algunha persoa procedente de colectivos sociais con proxecto de facer un documental.
O obradoiro, organizado polo Concello a través de Coruña Dixital, artellouse en dúas metades. Na primeira xeira de traballo introduciuse o grupo na filosofía crowd e nos distintos motivos que nos poden levar a usar esta metodoloxía de produción para un proxecto audiovisual. Tamén se fixo saber que o devandito apoio non consiste só en cartos: “A crowd é o noso futuro público, a xente interesada non só en ver o filme se non en ser embaixadora del e contribuír da maneira que poida e que se lle solicite en cada momento”, sinalou o relator.
A sesión da tarde foi máis práctica e nela Miguel Ángel Rolland deu as claves para deseñar e executar unha campaña de crowdfunding para un filme, un proceso, sinalou, “que ten que comezar como mínimo seis meses ou mesmo un ano antes do lanzamento oficial da campaña, coa construción da comunidade”. Segundo fixo saber, o proceso debe levar parella a aplicación dunha firme filosofía social: “Debemos ser o máis sociais en Internet que poidamos”. O roteiro, engadiu, “consiste en irmos construíndo o proxecto coa axuda das xa célebres tres efes (“Friends, Family & Fools”) até os grupos de interese que poden estar relacionados co tema da nosa película”. Segundo dixo, isto require unha investigación exhaustiva nas redes, “facendo a nosa base de datos de xente potencialmente disposta a colaborar, e iniciando os contactos con ela, cociñando as relacións a lume lento para que respondan cando se lles pida axuda”. A partir de aí, explicou, “cómpre usar todos os mecanismos de comunicación ao noso alcance, online e offline, montar un equipo de traballo, elixir plataforma de crowdfunding e planificar a precampaña e a campaña para chegar á nosa meta e poder cantar vitoria”.
Rolland debullou as devanditas metodoloxías en base a un caso de éxito concreto: o do seu documental Santa Fiesta, que contou na súa orixe co apoio de comunidades animalistas a nivel internacional, e acompañouse dunha campaña de crowdfunding na plataforma IndieGoGo.

Categorías: Ciencia

Aerocámaras e a Deputación de Ourense comezan a combater a velutina con drons

Mar, 10/31/2017 - 12:59

Pódese combater a vespa asiática con novas tecnoloxías? Pódese e, tendo en conta a máis que preocupante proliferación da velutina no noso medio natural, débese. A axuda, en contra do que se podería pensar, non vén de tecnoloxías a pé de terra, senón de innovación con capacidade para emular unha das principais características das velutinas: a facultade de voar. Esta é, de feito, a proposta da empresa galega Aerocámaras, con sede na Tecnópole de Ourense e especializada en formación e desenvolvemento de drons: atacar pola vía aérea os insectos invasores, que inzan os nosos montes facendo minguar a poboación de abe. Máis polo miúdo, trátase de localizar os niños de velutina nas polas das árbores e combatelos na cerna do problema. Como facelo? Pois inxectando nas colmeas, coa axuda do vehículo aéreo, unha substancia con capacidade para neutralizar o hábitat da vespa raíña e do resto da colmea, provocándolles a morte e impedindo o seu desenvolvemento. No desenvolvemento destas probas colabora a Deputación de Ourense.
A primeira xeira de traballo levouse a cabo onte en Celanova. A través da proba, conseguiuse neutralizar un niño en apenas dez minutos, que foi, lembra Aerocámaras, “o tempo que tardou o dron en despegar, aproximarse ao cumio da árbore e inxectar a substancia no interior do niño”. Esta actividade levouse a cabo coa colaboración da Mancomunidade Terra de Celanova, cuxo presidente, José Antonio Pérez, e o xerente de Aerocámaras, Jaime Pereira, acompañaron ao presidente da Deputación de Ourense durante a demostración desta técnica. O presidente da entidade provincial, Manuel Baltar, felicitou a Aerocámaras e agradeceu a colaboración da Mancomunidade Terra de Celanova “porque este é un éxito medioambiental de todos”.
Pola súa banda, Javier Pereira explicou que a Aerocámaras leva traballando dous anos neste proxecto, cuxa innovación consiste na montaxe dun dron específico para combater a vespa velutina. Este vehículo, para levar a cabo o seu obxectivo, carrexa unha pértega estabilizada que posibilita a aproximación á árbore para poder inxectar un líquido no niño. “A vantaxe deste método de acometida aérea”, sinalou Aerocámaras, “é unha mellor accesibilidade, xa que en moitos casos a altura da colmea ou a súa inaccesibilidade, no medio do bosque, dificultan a aproximación”.

Categorías: Ciencia

Samsung Electronics rexistra os mellores resultados da súa historia

Mar, 10/31/2017 - 12:28

A renuncia de Oh-Hyun Kwon, vicepresidente de Samsung Electronics, no marco dunha «crise sen precedentes» contrasta cos resultados financeiros da empresa para o terceiro trimestre do ano, que parece que non poderían ser mellores, xa que a empresa surcoreana rexistrou uns ingresos de 62,05 billóns de wons (50.000 millóns de euros), o que supón uns beneficios trimestrais de 14,53 billóns de wons (10.000 millóns de euros), de xeito que conseguiría os maior beneficios na historia da compañía.
Os bos resultados de Samsung corresponden principalmente á súa división de semicondutores, xa que a compañía subministra compoñentes para fabricantes de smartphones e servidores de todo o mundo, sendo incluso un dos meirandes provedores de pantallas de smarpthones. Temos así que o negocio de chips de memorias NAND e DRAM foi moi importante, así como o de pantallas (tanto OLED como LCD), que conseguirían consolidar aposición de Samsung Electronics a nivel mundial.
O negocio móbil tamén experimentou un incremento non só grazas ao lanzamento do Galaxy Note8, senón tamén pola boa acollida que está a ter a familia Galaxy J, xa que parece que as gamas media-baixa están a ter cada vez maiores vendas.
No que a televisores se refire, os novos dispositivos con pantalla QLED, situados nunha gama premium, conseguiron mellorar trimestralmente os ingresos desta división, que en termos interanuais caeu lixeiramente dado o incremento dos custos dos paneis LCD e da cada vez máis reducida demanda de televisores.
As previsións de Samsung para os vindeiros meses continúan a ser optimistas, confiando en continuar o seu pulo alcista no negocio dos compoñentes (especialmente memorias NAND e paneis flexibles OLED), mentres que no sector dos smartphones confórmanse con consolidar posición e no ámbito da electrónica de consumo seguirán a apostar por produtos premium.

Novos directivos

Samsung aproveitou a ocasión para anunciar aos seus novos directores xerais que dirixirán a compañía nesta fase de crecemento. Deste xeito temos os presidentes Kinam Kim, Hyunsuk Kim e Dongjin Koh pasarán a encabezar as divisións de Solucións para Dispositivos, Electrónica de Consumo e Comunicacións Móbiles e TIC respectivamente.

Categorías: Ciencia

A galega Domesting lanza un software pioneiro para dixitalizar e automatizar todas as tarefas dun hotel

Mar, 10/31/2017 - 11:42

A firma innovadora Domesting, con sede na Coruña, vén de comunicarnos que ten entre mans un interesante proxecto de software dirixido a facer máis doadas, eficaces e eficientes as tarefas diarias a desenvolver nun hotel. A iniciativa, en fase de desenvolvemento, chámase Hospitality e materializaríase nun software que é quen de centralizar as comunicacións internas dun negocio hoteleiro. Trátase, en palabras de Domesting, “dunha solución que vencella os distintos departamentos dun hotel para a súa coordinación”. Hospitality ten ademais o valor engadido de ser unha ferramenta pioneira nun sector que non se dá desprendido de certos lastres analóxicos: as tecnoloxías teñen chegado a casas de hóspedes de toda envergadura e características, pero case con toda seguridade que ningunha con semellante vontade de dixitalización coma Hospitality.
Por se isto fose pouco, os responsábeis do seu desenvolvemento salientan outro factor relevante: o compoñente ecolóxico. Segundo fan saber, Hospitality ten a capacidade de desbotar o papel das rutinas de traballo dun negocio hoteleiro, ao que cómpre engadir a optimización dos recursos do hotel, o aforro do tempo e de esforzos e a coordinación establecida entre os tres departamentos vitais da actividade diaria dunha empresa do sector: recepción, limpeza e mantemento.
“Hospitality”, destacan dende Domesting, “permite dixitalizar a devandita organización e que, en cuestión de segundos, o traballo de cada departamento reciba no seu dispositivo móbil os labores asignados diariamente”. Isto é posíbel grazas ao factor actualización de datos en tempo real, que tamén habilita á recepción para comprobar o progreso de cada traballo de limpeza nunha habitación ou de amaño de calquera avaría interna. Chegado este punto, os impulsores da ferramenta non queren deixar pasar a oportunidade de subliñar o beneficio máis significativo do software: a mellora na comunicación interna entre todos os axentes implicados na xestión, “facilitando unha relación directa e constante entre os mesmos”.

Categorías: Ciencia

Páxinas