códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 1 hora 17 min

Chega Xeoclip, a canle en galego para formar aos nosos vindeiros xeólogos

Ven, 09/01/2017 - 10:43

Fan falta iniciativas de divulgación científica en galego a través das redes, inspirándonos en parte no éxito do proxecto Unicoos impulsado por David Calle? A resposta é un “si” sen fisuras, e máis se temos en conta a importancia que lles dan aos servizos de comunicación dixital as novas xeracións. Servizos como por exemplo YouTube. Por isto e por outras razóns, dámoslle a benvida a Xeoclip, unha nova (e innovadora) canle educativa dende a que se están a lanzar vídeos explicativos sobre xeoloxía e ciencia. A proposta vén da man dos profesores Xacobo de Toro e Adela Otero.
Segundo puidemos saber a través do xornal Que pasa na Costa, o xermolo do proxecto está nunha licenza de estudos da Consellería de Educación e, antes diso, na constatación do poder de influencia das redes e dos contidos dixitais entre a nenez e a mocidade. Non só poder comunicativo, senón tamén divulgativo. A actividade audiovisual do profesor de Toro (IES Urbano Lugrís, de Malpica) estase a publicar baixo licenza de atribución Creative Commons (reutilización permitida) e xa deu como resultado (a día de hoxe) 14 vídeos, aos que se suman as pezas previas de Xacobo de Toro ao abeiro do Plan Proxecta Meteoescolas. En Xeoclip están a tocar múltiples facetas e aspectos relacionados co estudo da xeoloxía, como por exemplo a estrutura interna da Terra, os recursos para estudar a actividade sísmica, a teoría da deriva continental o o estudo das placas tectónicas.

Categorías: Ciencia

O catálogo dixital da Biblioteca de Lugo recibiu máis de 8.900 visitas

Xov, 08/31/2017 - 23:28

A Biblioteca Municipal de Lugo vén de facer balance da súa actividade en 2017. Entre os datos de meirande relevancia figuran os 10.000 préstamos realizados entre xaneiro e xuño ou as 186 novas altas de usuarios. Segundo engadiron os responsábeis da Biblioteca, o centro conta cun fondo de 38.350 exemplares, dos que 31.956 son libros, 14.151 infantís e xuvenís e 17.805 de adultos; 4.535 documentos audiovisuais; 1.361 documentos sonoros e 501 documentos electrónicos. Hoxe, o número de persoas usuarias inscritas no servizo de préstamo son 12.132, das cales 10.768 son adultos e 1.364 nenos e nenas. Polo que atinxe ao catálogo dixital, que permite realizar consultas e reservas de fondos a través de Internet, recibiu máis de 8.900 visitas, o 46% delas de 12:00 a 18:00 horas.
Segundo lembra o Concello de Lugo, ao devandito catálogo dixital pódese acceder dende http://biblioteca.lugo.gal e a través da web municipal. O acceso xeral ao catálogo, para o que non é preciso estar rexistrado, permite a visualización dos resultados de cada busca cos datos bibliográficos do documento e ofrece ligazóns sobre os seus autores e materias. A maiores do devandito, os usuarios con cartón de lector dispoñen de servizos como a recepción de mensaxes relativas a reservas, devolucións e informacións de interese; a visualización do histórico dos préstamos realizados; ou a renovación dos préstamos, sempre que non estean atrasados ou non posúan reservas.

Categorías: Ciencia

A Deputación da Coruña reproducirá en 3D as escalinatas de Mariñán

Xov, 08/31/2017 - 22:55

Sen dúbida unha das grandes xoias arquitectónicas galegas é o Pazo de Mariñán, situado no concello de Bergondo e declarado Conxunto Histórico-Artístico dende 1972. Este fito do barroco galego é ademais un dos edificios oficiais da Deputación da Coruña, cuxo actual equipo de Goberno quere mostrar pór en valor os seus principais e máis senlleiros elementos. Como por exemplo as escalinatas do edificio, datadas no século XVIII e, en palabras da entidade provincial, “unha das pezas de maior singularidade e calidade artística do conxunto de Mariñán, e que distinguen ao edificio doutros pazos da nosa terra”. Para reivindicalas (e lucilas) a Deputación anunciou o compromiso de empregar as máis avanzadas técnicas de dixitalización. Con este fin, sacou a licitación a contratación dun servizo de escaneado láser para realizar unha reprodución en tres dimensións (3D) das escadas.
A tecnoloxía que se aplique, informa a entidade provincial, posibilitará a creación de imaxes dixitais de gran calidade “mediante unha nube de puntos, que posibilitarán visualizar cada compoñente da escalinata desde tódolos ángulos e posicións”. Ademais, a Deputación engadiu que as imaxes tridimensionais resultantes, alén de preservar documentación gráfica do estado actual da escalinata, servirán para “vindeiros labores de restauración, limpeza e arranxos puntuais”.
Como dixemos, as escadas principais de Mariñán data do século XVIII e están construídas por enteiro en granito. Inclúen unha manchea de gravados, esculturas e elementos ornamentais de gran valor artístico e histórico, incluíndose 14 bustos labrados en pedra, todos eles diferentes entre si, que se sitúan sobre as pilastras que delimitan cada treito das balaustradas. Segundo lembra a entidade provincial, “a función ou o significado concreto dos bustos de Mariñán considérase unha das cuestións máis enigmáticas do conxunto; algunhas estruturas parecen representar monxes, indios americanos, aztecas e persoas con vestimentas de diferentes épocas, pero non se sabe a ciencia certa a que personaxes representan”. Estes detalles e outros moitos elementos singulares, unido á necesidade de amosalos, reivindicalos e preservalos, están na orixe do proxecto que vén de impulsar a Deputación. “A calidade das esculturas”, explica a entidade, “fan aínda máis necesaria a documentación exacta das características de cada busto, facilitando así o seu estudo e que non se perdan os trazos únicos das pezas”.

Categorías: Ciencia

Red.es e a BNE xa dixitalizaron dous millóns de páxinas en 2017

Xov, 08/31/2017 - 22:54

Red.es e a Biblioteca Nacional de España (BNE) veñen de anunciar novos avances en materia de dixitalización e divulgación de coleccións. Segundo informou a entidade público-empresarial, ao longo deste ano en curso un total de 3,3 millóns de páxinas de monografías modernas e antigas, manuscritos, incunábeis e obras gráficas dos fondos da Biblioteca Nacional de España (BNE) poranse a disposición dos usuarios a través da Biblioteca Dixital Hispánica. Esta actuación, que conta cun orzamento de 826.430 euros, enmárcase nun convenio de colaboración para o período 2015-2018, que no seu día rubricaron Red.es e a BNE. Dos 3,3 millóns de páxinas que se van abordar este ano, case 2 millóns xa están dispoñíbeis.
O acordo xeral no que se insiren os traballos anunciados hoxe está dotado de cinco millóns de euros, abranguendo a posta en marcha de novos sistemas de información para a xestión, captura, depósito, indexación, acceso e difusión de contidos, así como un sistema de preservación a longo prazo para as publicacións web capturadas por medios automáticos, para as publicacións transferidas á BNE por outros medios (e-books, revistas electrónicas, etcétera), e para o fondo dixitalizado da Biblioteca.
Os 3,3 millóns de páxinas previstas para ao seu tratamento e divulgación ao longo deste 2017 divídense en 1,5 millóns de páxinas de monografías modernas, 800.000 de monografías antigas, 1 millón de páxinas de manuscritos, incunábeis e post incunábeis, e outras 25.000 de material gráfico e orixinal de belas artes e cartografía. O acordo proseguirá en 2018 cun volume análogo de documentos.
Segundo informa Red.es, da colección de monografías modernas xa é posíbel consultar (en dominio público) obras de autores como Apeles Mestres, Miguel de Unamuno, Ramón Mª del Valle-Inclán, Pedro Muñoz Seca, Federico García Lorca ou Ramiro de Maeztu.

Categorías: Ciencia

Convocadas cinco licitacións públicas para desenvolver tecnoloxías baseadas en UAV

Xov, 08/31/2017 - 10:59

A Axencia Galega de Innovación (GAIN) está a informar ao detalle das novas oportunidades de compra pública innovadora a nivel europeo que se nos abren en materia de UAV, drones e tecnoloxías análogas e complementarias. Segundo lembra GAIN, o Diario Oficial da Unión Europea (DOUE) publicou hoxe as cinco primeiras licitacións para a compra de solucións tecnolóxicas innovadoras baseadas no uso de Vehículos Aéreos non Tripulados (UAV polas súas siglas en inglés) para mellorar a prestación de determinados servizos públicos. O importe total das contratacións ascende a 7.250.000 euros. Poderán presentarse entidades ou consorcios ata o vindeiro 27 de setembro. Os pregos están dispoñíbeis xa nas webs de GAIN e da Civil UAVs Initiative.
Ademais, a axencia lembra que se vai celebrar unha xornada a mediados de setembro para explicar os pregos e facilitar a colaboración entre as entidades interesadas en participar. Estas contratacións enmárcanse no contexto do Polo Tecnolóxico e Industrial de avións non tripulados de Rozas e están financiadas con cargo a un convenio de colaboración co Ministerio de Economía, Industria e Competitividade, co-financiado a través do Fondo Europeo de Desenvolvemento Rexional (FEDER). “O seu contido”, informa GAIN, “é resultado dun proceso de consultas ao mercado que durou máis dun ano e no que interviñeron máis de 200 entidades (entre empresas, centros tecnolóxicos, centros de investigación e as consellerías da Xunta de Galicia)”.
En concreto, as solucións que se licitan son: un xestor de conxunto de datos xeorreferenciados obtidos por UAV; a adquisición, mantemento e automatización de bases topográficas e cartográficas mediante medios aéreos non tripulados; o seguimento das dinámicas de ocupación do solo e axuda á planificación territorial mediante o uso de vehículos aéreos non tripulados; o reforzo da seguridade marítima da frota pesqueira galega e das actividades de seguimento da súa actividade mediante o uso de vehículos aéreos e mariños non tripulados e a automatización de mostraxes oceanográficas mediante vehículos non tripulados.

Categorías: Ciencia

Volven en setembro os obradoiros de SmartPEME con 32 actividades novas

Xov, 08/31/2017 - 10:18

A Deputación de Pontevedra, logo de presentar os resultados acadados pola súa rede SmartPEME ao longo deste último ano (uns resultados moi salientábeis tanto en número de accións de asesoramento como de participantes), retoma a actividade da mesma este mes de setembro. E faino con 32 novos obradoiros TIC a desenvolver durante catro semanas e na media de ducia de centros de operacións cos que conta SmartPEME: Pontevedra, Vigo, Porriño, Ponteareas, Cambados e Lalín. Polo que atinxe a Pontevedra, serán cinco actividades, todas elas no Edificio Administrativo da Deputación e en horario de 19.00 horas. A primeira desenvolverase o martes 5 de setembro e celebrarase baixo o seguinte epígrafe: Seguridade informática: conceptos básicos.
O xoves 7 impartirase A túa información sempre á man: almacenamento na nube. O seguinte mércores, día 13, A túa páxina web en menos de 90 minutos, ao que lle seguirá o venres 22 Imos chamar á porta da túa clientela: posicionamento SEO. Por último, o xoves 28 de setembro, desenvolverase o obradoiro Aprende a xestionar o teu negocio con follas de cálculo.
Polo que respecta a Vigo, incluirá as seguintes actividades: o mércores 5, A túa información sempre á man: almacenamento na nube, seguido de Como utilizar Instagram para promover a túa empresa o seguinte martes día 12. A seguinte semana, desenvolveranse Seguridade da información: protexe o teu smartphone o mércores 20 e Emprego de vídeos nas redes sociais: Youtube, Periscope… o venres 22. Para rematar, o luns 25 desenvolverase o obradoiro que leva por título Unifica a xestión das túas redes con Hootsuite. Lembrar que a oficina SmartPEME de Vigo está emprazada na sede da Deputación da cidade, na Rúa Oporto, nº 3.
Polo que atinxe á oficina de Ponteareas, acollerá os seguintes obradoiros: o martes 5, Plataformas online para crear o teu e-commerce. O xoves 7 será a quenda de Facebook Ads, que dará paso o mércores 13 a Promove o teu negocio: mercadotecnia sectorial. O venres 15 seguiralle Seguridade informática: conceptos básicos e, por último, o xoves 21 desenvolverase Fotografía de vehículos para a súa venda online. A oficina de Ponteareas, no Centro de Desenvolvemento Local, atópase en Lomba do Cruceiro, nº 5.
A oficina do Porriño acollerá os seguintes obradoiros: o mércores 6 Mostrario virtual: a fotografía é o produto no medio en liña. O seguinte martes, día 12, A túa páxina web con Wordpress. Rendibiliza o teu perfil profesional aumentando seguidores en Facebook desenvolverase o xoves 14 de marzo, ao que lle seguirá Xestión da túa empresa: Facturación e ferramentas integradas o luns 18. Despois, Como facturar electronicamente para as empresas e administracións públicas chegará o venres 22 e, a última quenda, será a de Promove o teu negocio: mercadotecnia sectorial o mércores 27. A oficina SmartPEME do Porriño, no Multicentro do concello, atópase na rúa Ribeira, s/n.
No que respecta a Cambados, todos os cursos celebraranse no Centro ExpoSalnés en horario de 19:00 horas. O luns 4 de setembro, A túa páxina web con WordPress. O xoves 7 impartirase Google Analytics: Iniciación á analítica web. O martes da semana seguinte, día 12, Xestiona o teu negocio desde o teléfono móbil, ao que lle seguirá o mércores 20 A túa información sempre á man: almacenamento na nube e, xa por último, o mércores 27 de setembro, desenvolverase o obradoiro Redes sociais para a empresa: é Twitter a túa solución?.
Por último, os obradoiros de Lalín terán lugar no Viveiro de Empresas do Polígono Lalín 2000. As quendas para o mes de setembro son as seguintes, todas elas en horario de 19:00 horas: o martes 5 de setembro, A túa páxina web en menos de 90 minutos. O luns 11 impartirase Imos chamar á porta da túa clientela: posicionamento SEO. O seguinte mércores, día 13, Deseña sinxelamente imaxes abraiantes e profesionais, ao que lle seguirá o martes 19 Rendibiliza o teu perfil profesional aumentado seguidores en Facebook. A seguinte quenda será a de Vén descubrir que son e para que serven as redes sociais o xoves 21 e, xa por último, o venres 29 de setembro, desenvolverase o obradoiro Xestiona o teu negocio desde o móbil.
O Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.

Categorías: Ciencia

María Yáñez e Juan Lesta amosan en Sadurniño os segredos dos memes e dos móbiles como ferramentas audiovisuais

Xov, 08/31/2017 - 10:04

O Concello de San Sadurniño segue adiante coas súas xeiras divulgativas de traballo arredor dos novos xeitos de crear audiovisual e facer coñecemento. Materializadas nas Chanfaina Labs, estas xeiras chegan esta fin de semana á súa cuarta edición, abranguendo dous obradoiros e dúas charlas na Casa da Xuventude. Os dous obradoiros desenvolveranse o venres, o primeiro deles a partir das 10.00 e contando coa presenza da xornalista transmedia e investigadora en múltiples eidos dixitais María Yáñez, quen exporá (entre outras cousas) as metolodoxías a seguir para facer un meme que deixe pegada nas redes (ou sexa, un concepto ou contido multimedia, principalmente humorístico, que teña a capacidade de estenderse en Internet e nas ferramentas de comunicación dixital).
Pola tarde, a partir das 16.30 horas, o realizador Juan Lesta mostrará como montar un vídeo usando unicamente unha tableta ou un móbil. Para inscribirnos nalgunha das prazas dispoñíbeis para estas actividades teremos que chamar ao 616 332 919 ou enviar un correo á conta agustin.perez@sansadurnino.gal.
Segundo nos lembra o Concello de San Sadurniño, María Yáñez é a responsábel do Laboratorio Audiovisual de Innovación e Creación (o LAIC) impulsado recentemente pola Concellaría de Culturas da Coruña. Antes diso foi guionista para distintos programas da TVG, directora durante unha etapa do xornal dixital Vieiros, co-fundadora da empresa A Navalla Suíza, co-impulsora, entre outros proxectos, da desaparecida Flocos.tv e da web Fálame de San Sadurniño. Na súa intervención nos Chanfaina Labs, titulada Folclore dixital: o uso cultural dos memes, os microvídeos e os gifs animados, poderemos coñecer a fondo a orixe e a gramática destes contidos virais e aprenderemos tamén algunhas bases prácticas para producir as nosas propias pezas e crear memes que poidan funcionar a nivel local.
Na sesión da tarde, o realizador Juan Lesta ofrecerá un curso acelerado de edición de vídeo usando dispositivos móbiles. Segundo informa o Concello, a idea é prepararnos para tirar o máximo proveito do potencial creativo destes trebellos: “Cámaras de alta definición, procesadores ultrarrápidos, pantallas hiperluminosas e cristalinas, e centos de aplicacións converten o móbil non só nun fantástico elemento de captura de imaxe, senón tamén nun estudio de edición e posprodución co que elaborar vídeos de calidade fantástica para publicalos de inmediato nas redes, para compartilos con familia e amizades ou para velos na casa”, explica a organización do obradoiro sobre as posibilidades que se abren co mesmo, lembrando tamén que para participarmos nel deberemos dispor dun móbil intelixente ou unha tableta compatíbel con Premiere Clip (ou sexa, cos sistemas operativos iOs 8.1 ou Android 4.4) e espazo e memoria de abondo para poder traballar con vídeo.
Juan Lesta, pola súa banda, é especialista en imaxe e en formación relacionada coa posprodución dixital. Participou canda Belén Montero no primeiro Chanfaina Lab, con quen (precisamente) fundou Esferobite, xermolo dunha manchea de documentais, videoclips e cursos como o de San Sadurniño desta fin de semana. Lesta-Montero impartiron recentemente o Noroeste Videocamp como acción que vencellou a música e o audiovisual no Festival Noroeste Estrella Galicia, no marco do programa Coruña Dixital.
O sábado a xornada estará centrada na gravación de pezas polo territorio e ás 20.00 horas realizarase o pase dunha escolma de curtametraxes portuguesas producidas en contextos rurais coma o de San Sadurniño. A proxección presentaraa o realizador luso Carlos Viana e a entrada é libre.
Por último, o domingo celebrarase unha clase maxistral ofrecida polo director galego Óliver Laxe ás 17.00h. na Casa da Cultura. Laxe (gañador do Gran Premio da Semana da Crítica en Cannes co filme Mimosas) achegará unha ollada á creación audiovisual do rural galego desde a súa andaina creativa como director independente e cun marcado compromiso social.

Categorías: Ciencia

Constrúen unha Polaroid de imaxes GIF

Mér, 08/30/2017 - 23:00

Aínda que pode parecer absurdo, non son poucas as persoas que ao introducirse nos últimos anos no mundo da Internet teñen dificultades para entender conceptos como que non poden imprimir imaxes animadas en formato GIF (conservando a animación), pero hai quen ten imaxinación dabondo para superar tal atranco, e o argalleiro Abhishek Singh conseguiu facer realidade a Instagif NextStep, unha modificación dunha clásica cámara fotográfica Polariod OneStep que en vez de disparar fotografías que se revelan automaticamente no seu cartucho inclúe unha pequena pantalla que simula ser unha fotografía Polaroid animada.
Os interesados poden ver todo o proceso de creación desta cámara capaz de disparar imaxes GIF, aínda que o cartucho só ten batería dabondo como para funcionar uns 20 minutos fóra da cámara (por ter que contar cunha batería o suficientemente pequena para integrala nun cartucho de Polaroid).
Para facer realidade este proxecto empregáronse distintos elementos baseados en Raspberry Pi tanto na cámara como no cartucho, de xeito que por un lado constrúese unha cámara baseada en hardware libre e, polo outro temos unha pequena pantalla de 2,8 polgadas para amosar as imaxes animadas captadas.
Estamos ante unha creación moi intelixente, na que conséguese recrear dun xeito revolucionario un produto clásico, facendo uso de elementos relativamente doados de conseguir e cun resultado final que deixa a calquera coa boca aberta.

Vídeo de presentación da Instagif NextStep

Categorías: Ciencia

A web galega de videoxogos Vandal cumpre 20 anos

Mér, 08/30/2017 - 21:00
Pablo Grandío é o fundador de Vandal.net

Unha das páxinas web do mundo dos videoxogos de maior repercusión entre o público de fala hispana, Vandal.net, resulta ser galega, e hoxe mesmo está a celebrar os seus 20 anos de actividade facendo un repaso da súa historia. Este espazo na Rede creado polo coruñés Pablo Grandío inicialmente no servizo de hospedaxe web de balde Geocities botou a andar o 30 de agosto de 1997, e non foi até marzo de 1998 cando adoptou un dominio de Internet de seu, ao redor do que se sostiña tanto un medio informativo con cada vez maior frecuencia de actualización, así como tamén se asentaría un foro, creando unha grande comunidade de afeccionados aos videoxogos.
Nesta traxectoria Vandal pasou por numerosas fases, en grande medida pola evolución que tiveron tanto a industria dos videoxogos (que pasou de ser minoritaria a converterse na principal industria cultural) como a penetración da Internet (que evolucionou dende certa precariedade até unha situación actual na que incluso transcendeu da pantalla do ordenador para invadir os móbiles).
Vandal non quedou nun espazo con novas, senón que tamén foi enriquecéndose con contidos como coberturas de eventos internacionais, vídeos en alta definición, presenza en redes sociais, un podcast de grande éxito que axuda a consolidar a comunidade ao redor do medio e, máis recentemente, optouse incluso a mudar de imaxe e ter fillos, de xeito que Vandal conta agora compleméntase con Vandal Sports (cabeceira destinada aos deportes electrónicos), Vandal Ware (centrada no mundo do hardware e o software para xogadres) e Vandal Random (que achégase ao cine, á televisión, a cultura dixital e outras temáticas coa que os seus lectores habituais teñen certa afinidade).
Con dúas décadas ás costas temos aquí un grande exemplo do que pode emprenderse dende Galicia, conseguindo proxectar a súa sombra non só ao territorio español, senón tamén ao público de fala hispana ao outro lado do Atlántico.

Categorías: Ciencia

A nova xira @asLAN chega en setembro a Santiago da man do COETG

Mér, 08/30/2017 - 17:22

A nova edición da xira Tour Tecnolóxico @asLAN, que organiza a asociación do mesmo nome por unha manchea de localidades estatais, terá novamente unha parada galega. Será en Santiago, o 21 de setembro no Hotel Araguaney, baixo o epígrafe Transformación dixital, Todo Conectado e contando coa colaboración (un ano máis) do Colexio Oficial de Enxeñeiros de Telecomunicación de Galicia (COETG). A xira pasará por diferentes cidades españolas como Valencia (28 de setembro), Barcelona (18 e 19 de outubro), Vitoria (7 de novembro) e Málaga (23 de novembro).
O encargado de abrir os relatorios da cita compostelá (logo da benvida oficial) será precisamente o decano do COETG, Julio Sánchez Agrelo. Farao ao fío das 9.00 horas na compaña de Francisco Verderas, director xerente da Asociación @asLAN. De contado, presentarán tecnoloxías avanzadas os responsábeis de empresas como Nutanix, Flytech, Schneider ou Dell.
Segundo reflicte o COETG, desenvolverase na xornada “un extenso programa no que se abordará o papel das tecnoloxías en rede para impulsar a transformación dixital” e ofrecerase “unha ampla perspectiva sobre importantes tendencias de futuro e solucións tecnolóxicas dispoñíbeis para construír plataformas dixitais aliñadas co negocio, tocando cuestións como a Internet das Cousas, a mobilidade ou a nube híbrida”.

Categorías: Ciencia

A Finca Mouriscade aposta pola eficacia e a operatividade na súa nova web

Mér, 08/30/2017 - 14:10

A semana pasada a Deputación de Pontevedra presentou a nova web da Finca Mouriscade, unha presenza na web que salienta por querer incluír un extra de eficacia e operatividade na actividade da estación. Ou sexa, por estar concibida para que as comunicacións entre os usuarios deste laboratorio dependente da Deputación e os seus responsábeis sexan o máis rápidas e doadas posíbeis (facendo especial fincapé en que os resultado das análises se reciban o antes posíbel). A web foi dada a coñecer pola deputada provincial Eva Vilaverde, no salón de actos do laboratorio, acompañada pola xefa do servizo, María Hermida, e polo responsábel de portais web da Deputación, Rubén Gómez. Coincidiron na necesidade de acometer a renovación (logo de 17 anos de actividade dixital previa) e nas facilidades de uso que pon en xogo a nova páxina, “máis intuitiva e accesíbel”.
Segundo fixo saber Eva Vilaverde, o sitio fornece de acceso privado para os usuarios, achegándolles unha área de consulta de resultados aos que poderán ter conexión, tamén, a través de dispositivos móbiles. Precisamente unha das grandes novidades é a versión para móbil e para tableta, “porque non podemos esquecer que hoxe en día moito traballo se realiza desde este tipo de dispositivos, o que mellora a nosa capacidade de resposta”, sinalou a deputada delegada de Finca Mouriscade, lembrando que o laboratorio de Finca Mouriscade superou as 85.500 mostras recibidas para análise durante o pasado ano e que a día de hoxe e desde o 1 de xaneiro de 2017 xa se recibiron preto de 52.000 mostras.
Vilaverde engadiu que “é unha satisfacción dispor dunha páxina web máis operativa, porque segue no camiño de mellorar o servizo que se fai desde a propia finca e chegar mellor ao sector, permitindo que as persoas usuarias accedan máis rápido e teñan un recurso doado de utilizar”.
A deputada tamén fixo fincapé nos idiomas nos que se poderá acceder á páxina. Se ben neste momento está operativa nos idiomas galego e español, nas vindeiras semanas habilitarase tamén o inglés e o portugués, “atendendo aos clientes de fóra do país, e nomeadamente aos do norte de Portugal”. Lembrou tamén que a esta nova páxina xa se pode acceder a través do enderezo mouriscade.depo.es e ao longo dos vindeiros meses iranse implementando novos contidos e servizos, a maiores dos relativos ao laboratorio.

Categorías: Ciencia

Google competirá coa realidade aumentada de Apple

Mér, 08/30/2017 - 13:51

Na pasada edición da WWDC Apple adiantou novidades que chegarán ao público no outono, entre as que chamou moito a atención a súa solución de realidade aumentada (ARKit) para facilitar que os desenvolvedores creen ferramentas que aproveiten esta tecnoloxía, e agora Google move ficha, e presenta ARCore, un kit de desenvolvemento para facilitar a creación de software que aproveite a realidade aumentada baixo Android, tanto para teléfonos actuais como futuros.
Google leva tres anos traballando coa realidade aumentada a través do proxecto Tango, para o que precisaba de smartphones con sensores de profundidade específicos, pero con ARCore queren aplicar todo este traballo a dispositivos que non precisen de hardware específico, de xeito que funcionen en todo o ecosistema de Android. Polo momento ARCore está dispoñible para os Google Pixel e Samsung Galaxy S8, pero pretende chegar a 100 millóns de dispositivos en poucos meses, mentres proban esta prometedora tecnoloxía.
ARCore funciona con Java/OpenGL, Unity e Unreal (o que facilitará o seu aproveitamento en aplicacións e xogos) enfocándose en tres piares: o seguimento do movemento (determina a posición e orientación do teléfono para que os elementos virtuais aparezan colocados axeitadamente), a comprensión do contorno (o sistema ten que identificar as superficies horizontais nas que se colocarán os obxectos virtuais) e a estimación da luz (deste xeito os obxectos virtuais poderán aparecer correctamente iluminados e xerar sombra, para ter un acabado máis realista).

Vídeo de presentación de ARCore

Categorías: Ciencia

Afundación retoma este 1 de setembro as súas actividades de dinamización dixital para maiores

Mér, 08/30/2017 - 11:36

Logo da pausa do verán, os Espazos +60 de Afundación (ABANCA) abrirán de novo as súas portas o vindeiro 1 de setembro, con novas propostas de formación e divulgación que teñen como finalidade xerar novas canles de intercomunicación entre diferentes xeracións, fomentar o voluntariado (no plano físico e no dixital) e, tamén, pór en valor o papel dos maiores de idade na nosa sociedade. O programa, por temáticas, estará centrado en diferentes xeitos de favorecer os hábitos saudábeis, incluído un achegamento directo ás novas tecnoloxías da información.
En palabras de Sabela Couceiro, coordinadora da área de Envellecemento Activo de Afundación, seguir hábitos saudábeis na terceira idade “permite incrementar a satisfacción, o benestar, a calidade de vida e, indirectamente, contribúe a unha diminución dos problemas de saúde física e psicolóxica”.
Lembrar que Afundación dispón dunha rede propia de 11 espazos, situados nas sete principais cidades galegas e noutras catro poboacións (Betanzos, Monforte, Pontedeume e Viveiro).
Os centros, que contan na actualidade con máis de 12.000 persoas socias, foron concibidos como “espazos destinados a conseguir que a etapa vital que iniciamos coa xubilación siga ofrecéndonos oportunidades de medrar persoalmente e estarmos conectados cos temas emerxentes”. Con esta finalidade, cada ano proponse “unha ampla e innovadora programación”, incluído o deste curso que está a piques de comezar.
A proposta de programación nos Espazos +60 estrutúrase en seis programas:
• O valor da experiencia, co que se propician oportunidades para que as persoas socias poidan compartir a súa experiencia profesional e de vida a través de accións de voluntariado. Nesta liña enmárcase a iniciativa Fálame dá emigración na que participaron no curso pasado 71 voluntarios e voluntarias, 18 IES e 825 mozas e mozos. A programación inclúe tamén conferencias e obradoiros, actuacións musicais e teatrais ou clubs de lectura impartidos todos por persoas socias.
• Formación e coñecemento, con actividades que favorecen a aprendizaxe de idiomas, o coñecemento do patrimonio, as humanidades ou a formación en novos temas e fenómenos sociais emerxentes.
• Cultura dixital, mediante unha formación centrada no uso das Tecnoloxías da Información e da Comunicación (TIC), desde a perspectiva da revolución tecnolóxica actual e o alcance da Internet.
• Hábitos saudábeis, con actividades físicas pero tamén de desenvolvemento cognitivo, benestar psicolóxico ou nutrición, entre outras.
• Expresión artística, a través dun achegamento á música, debuxo, teatro ou artesanía, entre outros.
• Lecer activo, coa programación de viaxes nacionais e internacionais e visitas culturais a museos, rutas históricas etc.
Segundo lembra Afundación, a partir do venres 1 de setembro, as persoas interesadas en facerse socias poden dirixirse aos Espazos +60 das súas cidades para informarse e/ou facer a súa reserva.

Categorías: Ciencia

EGATEL formará a xente nova en Linux e servidores

Mér, 08/30/2017 - 10:29

EGATEL, empresa con sede na Tecnópole (Ourense) centrada no desenvolvemento e fabricación de equipos para a radiodifusión de TV e comunicación vía satélite, vén de anunciar que impartirá un curso sobre Linux, servidores e sistemas embebidos para xente nova (mozos de entre 16 e 25 anos). Será un obradoiro de formación en modalidade presencial e celebrarase a finais do próximo mes de setembro. A data concreta está suxeita ao peche dun grupo mínimo de cinco persoas.
Segundo informa a Tecnópole, o curso abranguerá 300 horas de actividade docente e impartirase en xornadas de oito horas de luns a venres. Das cinco persoas seleccionadas para recibir a formación, tres optarán a unhas prácticas na empresa de 200 horas e destas tres, dúas conseguirán un contrato de seis meses. Na selección de participantes valorarase o coñecemento previo do temario para “avanzar coa programación de maneira máis rápida e produtiva”.
Os participantes deben estar inscritos no sistema de garantía xuvenil e cumprir os requisitos que alí se esixen. EGATEL habilitou na Rede, nun documento en PDF, toda a documentación ao respecto.

Categorías: Ciencia

Senseitrade, entre os finalistas dos premios Fintech European Awards

Mar, 08/29/2017 - 23:42
David Conde e Juan Carlos Díaz, cofundadores da empresa

Estes días a comunidade en liña está a elixir coas súas votacións os gañadores do certame Fintech European Awards. Entre os finalistas deste prestixioso concurso de innovación europea hai presenza galega. Máis polo miúdo a da firma Senseitrade, con sede na Tecnópole. O palmarés daranse a coñecer durante a conferencia internacional do sector programada en Bruxelas o 27 de setembro. A firma Senseitrade parte dos mellores precedentes: foi gañadora na edición 2015 da aceleradora ViaGalicia. O motivo? A súa tecnoloxía innovadora, un recurso que nos permite tomarlle o pulso ás redes sociais en materia bolsista.
Trátase, máis en detalle, dunha aplicación que nos axuda a tirar proveito da inxente información de valor que se publica nas redes sociais (o que se coñece como Big Data social) para tomarmos as mellores decisións en materia de investimento en bolsa. A app Senseitrade está dispoñíbel para iOS e para Android e foi desenvolvida co obxectivo de tirar proveito das comunidades 2.0, en especial Twitter, como emprazamentos de información onde se deciden boa parte dos camiños que vai seguir a bolsa
O xermolo desta iniciativa empresarial partiu dun estudo da Universidade de Múnic no que, tras avaliar polo miúdo máis de 250.000 chíos sobre bolsa, concluíuse que é posíbel predicir a súa evolución cun 87% de acerto. A partir da análise das redes sociais, Senseitrade ofrece unha serie de funcionalidades para que calquera persoa poida acceder ao investimento en bolsa sen ser un experto. A día de hoxe, conta xa con máis de oito millóns de usuarios en España.

Categorías: Ciencia

Borran centos de apps para Android que se empregaban para lanzar ataques de denegación de servizo

Mar, 08/29/2017 - 23:00

Dende Akamai, compañía especializada en redes de distribución de contido para facilitar a súa dispoñibilidade global, detectou unha rede de bots chamada WireX que dedicábase a lanzar ataques de denegación de servizo aproveitando móbiles con Android infectados con malware para lanzar os seus ataques, para extorsionar ás vítimas destes ataques, e sorprendentemente o código malicioso que permitía secuestrar os smartphones para empregalos para colapsar servidores en liña chegou a coarse en moitas aplicacións de Google Play, aínda que, advertidos da situación, finalmente borraron preto de 300 aplicacións da tenda dixital de aplicacións para Android.
As aplicacións que incluían o malware parecían do máis inocente, e ían dende administradores de ficheiros até programas de descargas de melodías, e aínda que o número de aplicacións que conseguiron chegar a Google Play foi bastante elevado, o seu impacto foi bastante reducido (estiman que infectaron 70.000 dispositivos).

Categorías: Ciencia

WhatsApp proba as contas de empresa verificadas

Mar, 08/29/2017 - 22:00

Dende que WhatsApp é unha aplicación completamente de balde están a explorar canles para rendibilizar a aplicación economicamente, de xeito que levamos meses esperando a que cheguen novidades como a posibilidade de contar con servizos para empresas que puidesen ir dende o envío de mensaxes de xeito automatizado (herdando así o uso actualmente das mensaxes de texto) até facilitar o uso de WhatsApp a través dunha aplicación independente dun teléfono móbil.
Nesta última liña WhatsApp confirma na súa axuda en liña que xa contan con contas verificadas de negocios, ou sexa, que unhas poucas empresas que están a participar no programa piloto desta funcionalidade poden ter un número de teléfono asociado que na aplicación de WhatsApp estarán destacadas cunha aspa para marcar que se tratan de contas verificadas na liña de como funcionan as contas verificadas de Twitter, como un xeito de que os usuarios poidan saber que a compañía que está ao outro lado do WhatsApp é quen di ser. Deste xeito quere fomentarse o uso de WhatsApp como canle de atención ao cliente.
Dende WhatsApp lembran que se un usuario quere que unha empresa deixe de contactar con el sempre pode bloquear o seu número na aplicación.

Categorías: Ciencia

Instagram mellora a publicación de álbums

Mar, 08/29/2017 - 22:00

Dende o pasado mes de febreiro Instagram permite incluír até 10 fotografías e vídeos nunha única publicación, pero estes novos álbums tiñan unha importante limitación: os contidos tiñan que ser cadrados. Pero este formato de grande éxito por fin dá un paso adiante, adaptándose mellor aos contidos que queremos compartir, facilitando a posibilidade de publicar fotografías e vídeos en vertical ou horizontal, aínda que mantendo todos os contidos na mesma orientación para manter a consistencia e facilitar unha experiencia fluída.
Pero esta non é a única mellora que ten este formato, senón que agora os álbums tamén permitirá editar as persoas etiquetadas nas imaxes despois da súa publicación. Estas melloras chegarán a Instagram na súa versión 12 para iOS e Android.

Categorías: Ciencia

Xeopesca introdúcenos nas moitas posibilidades de GIMP

Mar, 08/29/2017 - 18:16

Este sábado 2 de setembro imos ter en Santiago unha boa oportunidade de coñecer o programa GIMP e todas as súas funcionalidades, dende as básicas até as máis avanzadas. A cita vén da man da Asociación Xeopesca e celébrase no Centro Sociocultural de Caramoniña. Este obradoiro de iniciación a edición fotográfica a través de GIMP desenvolverase en horario de 10:30 a 13:30 horas e será gratuíto e aberto.
Como lembraremos, a ferramenta GIMP (GNU Image Manipulation Program) é con toda probabilidade a alternativa libre ao Photoshop máis viábel, completa, competitiva e avanzada. Está localizada ao galego e, por ser aberta, ten a vantaxe de ser de balde e estar dispoñíbel para múltiples plataformas, coma Windows, Linux, Mac OS X e outros sistemas operativos.
No obradoiro que organiza Xeopesca aprenderásenos a manexar as diferentes capas e ferramentas que nos proporciona o GIMP, a aplicar ao xeito recursos diversos (filtros, balances de cor, brillo e contraste, ton e saturación), a introducirnos no escalado e exportación de fotografías e a publicar imaxes con licenzas libres.
Este obradoiro conta coa colaboración do Recuncho Maker que cedeu o espazo do Centro Socio Cultural de Caramoniña para a súa realización.
A actividade forma parte das que a Asociación Xeopesca realiza no marco do Convenio de colaboración asinado coa Axencia para a Modernización Tecnolóxica de Galicia (AMTEGA) para a difusión do software libre e incluídas no Plan de Acción de Software Libre 2017 da Xunta de Galicia.

Categorías: Ciencia

O GPUL celebra en outubro unha nova edición do seu Hackatiño

Mar, 08/29/2017 - 14:23

O Grupo de Programadores e Usuarios de Linux (GPUL), con sede de operacións na Facultade de Informática da Coruña, recolle o fío da súa incansábel actividade a prol da difusión do software libre e organiza, a comezos do outono, a segunda edición do seu Hackatiño de datos abertos, que desta volta centrará boa parte do seu programa en ferramentas e solucións para o fomento da mobilidade sustentábel. O evento conta coa colaboración das asociacións Árticos, o GDG Coruña e mailo Concello (a través da área de Participación e Innovación Democrática que dirixe Claudia Delso). Celebrarase no centro municipal Ágora o vindeiro 7 outubro. Terá formato de xornada aberta á cidadanía.
Segundo informa o Concello, o Hackathiño é un evento que xuntará a profesionais do desenvolvemento de datos abertos, xornalistas, deseñadores e deseñadoras co obxectivo de idear proxectos que melloren, a través de datos abertos, un aspecto en concreto da sociedade. Como na anterior edición, os e as asistentes a este encontro tratarán de aproveitar ou xerar datos en formato aberto e a tecnoloxía sen cancelas. Estes serán publicados cunha licenza de carácter libre que permitirá a súa reutilización para calquera uso.
Do mesmo xeito có ano pasado, varios e varias expertas en temas como a liberación, a visualización ou a análise de datos, traballarán cos equipos que terán a oportunidade de aprender da súa experiencia de primeira man. Os mellores proxectos do presentados recibirán un agasallo. O prazo de inscrición xa está aberto, e pode realizarse a través da web https://hackathino.gpul.org, onde está dispoñíbel toda a información acerca do evento.
Segundo lembra o Concello, o evento contribuíu o ano pasado ao pulo de iniciativas tan salientábeis como a integración de datos de uso en tempo real dos servizos de BiciCoruña ao abeiro do proxecto aberto e internacional Citibik.es, e outros proxectos como OpenPet, para agrupar datos de protectoras de animais.

Categorías: Ciencia

Páxinas