códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 2 horas 5 min

Comeza o novo programa Yuzz achegando 40 prazas para os emprendedores innovadores da UDC

Mar, 10/31/2017 - 09:41

Santander Yuzz, o programa que durante oito edicións impulsou o espírito innovador e as iniciativas creativas dos novos emprendedores universitarios (un total de 4.200 participantes de todo o ámbito estatal e centos de empresas xeradas en toda España), vén de subir un chanzo evolutivo para a súa vindeira convocatoria. E faino converténdose no programa Explorer Mozos con Ideas, dirixido para xente nova de entre 18 e 31 anos e co obxectivo de fornecela dunha contorna dixital, cooperativa e aberta para que os seus proxectos abrollen e maduren no mellor dos escenarios posíbeis. Esta iniciativa, impulsada por Banco Santander a través de Santander Universidades e coordinada polo CISE (Centro Internacional Santander Emprendimiento), foi presentada os meses pasados na USC (Campus de Santiago e de Lugo) e agora na Universidade da Coruña, que xa participou en catro edicións e que vén de pór en marcha a nova entrega do programa.
Segundo puidemos saber, Explorer Mozos con Ideas achega 40 prazas para os vindeiros emprendedores da UDC. Como novidade este ano, haberá dous espazos de formación e impulso de iniciativas, un na Coruña e outro en Ferrol
Os seleccionados poderán beneficiarse do acceso ao Explorer Space UDC, un centro de coworking de alto rendemento onde poderán desenvolver as súas ideas de forma cooperativa, conectándose con outros emprendedores e recibindo asesoramento personalizado e formación dunha rede de máis de 200 expertos en innovación e modelos de negocio.
Ao remate dos cinco meses de formación e ideación, o proxecto mellor valorado do Explorer Space UDC viaxará a Silicon Valley, o referente mundial en innovación e emprendemento do ámbito dixital, xunto a outros 50 emprendedores de todo o territorio estatal, onde recibirán clases maxistrais e empresas tecnolóxicas punteiras, asesoramento en internacionalización e contacto con inversores. Ademais, os tres mellores proxectos recibirán 30.000, 20.000 e 10.000 euros para acelerar o seu desenvolvemento.
Ademais, grazas á colaboración coa Fundación EY, Explorer conta tamén co premio Woman Explorer Award que ofrece 20.000 euros para financiar o mellor proxecto liderado por unha emprendedora e o premio de innovación Disruptive Technology Explorer Award (impulsado por Indra) que brindará 3.000 euros e asesoramento por parte de expertos de Indraventures ao proxecto de negocio máis innovador. Os interesados en participar poden inscribirse a través da plataforma global www.jointheX.org.

Categorías: Ciencia

BIDI, o buscador da UVigo, acubilla preto de dous milleiros de investigadores

Lun, 10/30/2017 - 22:17

A Universidade de Vigo presentou hoxe o seu buscador de recursos innovadores. Trátase de BIDI, en palabras da UVigo “o escaparate das capacidades de I+D” da institución académica”, dispoñíbel no enderezo bidi.uvigo.es e poñendo a disposición da comunidade mundial preto de dous milleiros de investigadoras/es de arredor de 200 grupos de todos os eidos do coñecemento. Segundo fixo saber na presentación o reitor Salustiano Mato, amais dun buscador, trátase dunha ferramenta con capacidade para pórr en valor o traballo da Universidade e que a sociedade poida buscar solucións a problemas de I+D+i.
O buscador, que se pretende áxil e de utilidade, indexa os datos gardados na base de datos da Universidade BBDD SUXI-XC, que se actualiza coa información máis recente inserida polo persoal investigador, que, segundo se fixo saber na presentación, é o encargado de mantelos ao día. Ademais, engadiuse que o traballo co rexistro de investigación fai que o buscador acubille información sobre proxectos de investigación, contratos con empresas, patentes, teses defendidas, artigos de revistas, congresos, etc.
Os principais destinatarios da ferramenta son os integrantes do tecido socio-económico, o persoal investigador e o de apoio á investigación e transferencia. “O BIDI”, engadiuse, “dotará ao tecido socio-económico dunha ferramenta para que poida consultar de xeito doado a investigación e transferencia que se fai na Universidade”, unha ferramenta, por outra banda, transparente e con capacidade para captar socios para proxectos de I+D+i, así como interese das empresas polos desenvolvementos da Universidade.
O buscador, que permite buscas simples e avanzadas en galego, español e inglés, salienta por ser unha ferramenta “moi intuitiva, que permite refinar a busca e exportar os resultados a Excel”.

Categorías: Ciencia

A Xunta mobilizará un millón de euros para que as PEME fagan uso do comercio electrónico para exportar

Lun, 10/30/2017 - 17:34

O conselleiro de Economía, Emprego e Industria, Francisco Conde visitou hoxe á compañía de Mesía Cerámica Verea co gallo do seu 50º aniversario, avanzando un novo programa de internacionalización dixital dotado cun millón de euros para que as PEME galegas comecen a utilizar as plataformas de comercio electrónico como inicio da súa estratexia de exportación.
O conselleiro apuntou que o feito de que as exportacións galegas estean en cifras récord e medrasen un 8,4% no que vai de ano é mostra do esforzo que están a facer compañías como Cerámica Verea e a industria galega no seu conxunto por ser máis competitiva no exterior. Conde sinalou que o obxectivo da Xunta é consolidar, e mesmo redobrar, ese récord exportador que xa se leva conquistado durante catro anos consecutivos, con programas como o que hoxe anunciou, e outras como unha nova edición do programa Galicia Exporta e das axudas á contratación de xestores de internacionalización, o plan FOEXGA ou as bolsas de promoción exterior.
O responsable da Consellería de Economía, Emprego e Industria apuntou que a Xunta traballa para axudar a que as empresas, igual que o fixo Cerámica Verea, incorporen a innovación ao seu día a día, mobilizando máis de 900 millóns de euros en proxectos innovadores a través da Estratexia de Especialización Intelixente de Galicia (RIS3), con programas como as Unidades Mixtas de Investigación ou o mapa de aceleradoras de emprendemento, aos que se lles dará continuidade o vindeiro ano.
Ademais de impulsar a Industria 4.0, Conde fixo fincapé en que tamén se busca poñer ao alcance das empresas recursos financeiros, con programas como o dos novos instrumentos financeiros innovadores (IFI), cos que se prevé mobilizar 60 millóns de euros.

Categorías: Ciencia

Gradiant e Everis impulsaron a través da súa unidade mixta 43 empregos e un feixe de innovadoras aplicacións da eSaúde

Lun, 10/30/2017 - 17:23

O Centro Tecnolóxico Gradiant e a multinacional Everis (coa Fundación Ramón Domínguez como entidade subcontratada) presentaron hoxe os resultados da unidade mixta de investigación posta en marcha por estas entidades en 2014, unidade de colaboración que deu como resultado o centro compostelán eJKC (eHealth Joint Knowledge Centre) e diversas ferramentas (OnCare, OnTime, Saludei) tecnolóxicas pioneiras de gran potencial para a personalización e para mellorar a calidade de vida de determinados doentes e o día a día dos facultativos e o persoal que os atende. Na presentación dos resultados celebrada hoxe, na que participou a directora da Axencia Galega de Innovación, Patricia Argerey, lembrouse que o investimento do proxecto foi de 2 millóns de euros, que ao seu abeiro creáronse 43 empregos de calidade e que obxectivo da unidade mixta materializada no centro eJKC foi “fomentar a innovación sanitaria e xerar solucións concretas baseadas nas TIC para o ámbito galego da eSaúde”.
Segundo indicou Helena Fernández, directora de eSaúde de Gradiant, “a colaboración establecida no marco do eJKC permitiunos explorar problemas enfocados ás necesidades dos usuarios finais, xa sexan pacientes, facultativos ou xestores hospitalarios”.
Tamén se fixo saber que para o desenvolvemento da actividade innovadora, a unidade contou coas colaboracións da Fundación Ramón Domínguez e do centro AtlantTIC, da Universidade de Vigo, cuxa concorrencia no proxecto permitiu o desenvolvemento dun algoritmo matemático que se incorporou a unha ferramenta prototipo de análise de proxectos. Por medio da dita Fundación, a unidade Everis-Gradiant cooperou con varias áreas clínicas do Complexo Hospitalario Universitario de Santiago (CHUS), entre as que se atoparon Oncoloxía Clínica, Pediatría, Admisión e Aparello Dixestivo. “Desta cooperación”, explicouse no acto de hoxe, “desenvolvéronse solucións tecnolóxicas que permiten aos facultativos obter información directamente dos pacientes e ademais melloran a satisfacción dos pacientes co coidado”.
A colaboración Gradiant-Everis centrouse en cinco eixos temáticos.
O primeiro ocupouse do desenvolvemento de aplicacións para modelos de atención intelixente. Baixo a denominación Smart Care Models desenvolvéronse módulos de software para axudar aos profesionais sanitarios a mellorar a organización do servizo asistencial. O resultado desta liña de traballo foi a aplicación OnTime, unha ferramenta que axuda a planificar as citas dos pacientes dos hospitais de día oncolóxicos, co obxectivo de “reducir os tempos de espera e balancear as cargas de traballo dos profesionais ao mesmo tempo”.
O segundo eixo centrouse na “experiencia de usuario no sector saúde”. Ao seu abeiro deuse forma a solucións TIC “ergonómicas, accesíbeis e doadas de empregar”. Un exemplo é ReSViNET App que aplica a escala ReSViNET, deseñada para a avaliación de nenos menores de dous anos, condoenza respiratoria aguda. Para o desenvolvemento desta escala contouse coa participación do doutor. Federico Martinón-Torres, pediatra do Servizo Galego de Saúde.
En terceiro lugar, coa iniciativa de soporte á toma de decisións clínicas, a unidade mixta traballou en solucións de axuda para os profesionais, por exemplo para axudar na codificación de informes clínicos ou outros documentos médicos xerados.
Na liña de “empoderamento” do paciente a intención era “crear ferramentas para involucrar e dotar de autonomía aos pacientes na toma de decisións relacionadas co coidado da saúde, incluíndo actuacións nos distintos niveis de risco da poboación e potenciando un estilo de vida saudábel”. Segundo se fixo saber no acto de hoxe, o exemplo máis salientábel desta liña de traballo foi a aplicación OnCare, centrada no paciente oncolóxico. Esta ferramenta tira proveito das escalas clínicas validadas que permiten aos pacientes controlar os seus rexistros, tanto do nivel de dor como da calidade de vida durante o seguimento da enfermidade.
Por último, a liña de saúde conectada potenciou o deseño de solucións e dispositivos que permitisen fornecer de servizos innovadores aos cidadáns e pacientes baseados no uso de dispositivos móbiles (smartphones e tabletas). Desta contorna de colaboración abrollou a aplicación OnTrack, desenvolvendo módulos de software que se poden integrar para realizar un seguimento global sobre o estado dos pacientes.
Investimento
Con máis de 2 millóns de euros de investimento no período 2014-2017, este proxecto foi seleccionado pola GAIN (Axencia Galega de Innovación), en réxime de concorrencia competitiva, no marco de Plan galego de investigación, innovación e crecemento 2011-2015 (Plan I2C), que contemplaba a creación de unidades mixtas entre organismos de investigación e empresas, como vía de achegamento entre o mundo empresarial e o ámbito científico-técnico para desenvolver liñas de investigación e posta en valor conxunta. En concreto, o goberno galego colaborou cun investimento de 628.878 euros, para apoiar a actividade do eJKC.

Categorías: Ciencia

Vitae adéstranos nas moitas posibilidades do software Docker e dos contedores

Lun, 10/30/2017 - 16:23

As tecnoloxías innovadoras de contedores teñen demostrado un importante potencial para as nosas empresas e administracións, contribuíndo á súa axilidade e a ser máis competitivas e innovadoras. Por outra banda, ten dado múltiples probas de eficacia á hora de “axudar” ás empresas que non estaban afianzadas plenamente no dixital a consolidarse integramente nas TIC. Introducir de cheo estas posibilidades no noso tecido profesional é o gran obxectivo do Curso en aberto Docker e Contedores (PDF), que organiza Vitae Consultores na Coruña. Segundo explica a organización desta actividade formativa, os contedores e Docker (proxecto de software libre encamiñado a automatizar o despregue de aplicacións dentro de contedores de programa) teñen revolucionado a forma de correr aplicacións a escala. Ademais, benefician no desenvolvemento e nas probas de ferramentas informáticas. Este é o alicerce do devandito curso, que se celebra o 24 e o 25 de novembro e o 1 e 2 de decembro no Hotel Attica 21 da Coruña.
Segundo explican dende Vitae, “usando contedores pódense executar procesos totalmente illados cunha mínima sobrecarga, maior velocidade con respecto a máquinas virtuais, configuración máis sinxela e menor complexidade”. Por se isto fose pouco, nos eidos do desenvolvemento e do testing, os contedores permiten execucións en escenarios totalmente novos eliminando os problemas causados polo contorno, á vez que permiten reempregar imaxes de contedores para unha manchea de tarefas.
En definitiva, estes son os obxectivos do curso: aprender a usar Docker para o desenvolvemento de ferramentas e servizos en si mesmo, para a realización de probas (testing) ou para o que se coñece como continuous delivery (que é como se coñece en termos informáticos o proceso de poder ceibar software estábel de maneira rápida, o que se basea, á súa vez, na adopción de metodoloxías eficaces de automatizado).
O obradoiro está dirixido a profesionais do desenvolvemento, o testing e as operacións de software.
O curso virá da man de Carlos Sánchez, profesional con máis de 12 anos de experiencia en diferentes firmas innovadoras con sede en California, onde se especializou na automatización de programas, dende ferramentas de desenvolvemento ao devandito concepto de continuous delivery. Sánchez é un profesional moi involucrado no ámbito do software libre e é membro da Apache Software Foundation, entre outros grupos e comunidades, dende onde contribúe a unha manchea de proxectos de gran importancia, como Jenkins, Apache Maven ou Puppet.
A día de hoxe traballa en CloudBees escalando a plataforma Jenkins. Ten achegado múltiples relatorios e conferencias por todo o mundo, incluíndo ApacheCON, JavaOne, PuppeCon ou Fosdem. Entre as entidades que ten asesorado atópanse American Express, Wells Fargo ou o Goberno dos Estados Unidos.

Categorías: Ciencia

Os nosos profesionais da ilustración avanzan en Santiago as liñas básicas da súa nova web

Lun, 10/30/2017 - 14:49

Este sábado 28 celebrouse en Compostela o XIV Encontro Galego da Ilustración, organizado pola AGPI (Asociación Galega de Profesionais da Ilustración) no auditorio da Fundación ABANCA. A cita, que serviu para mostrar os amplos horizontes da nosa riqueza ilustrativa, contou coa participación das creadoras Mar Hernández Malota (que falou da súa experiencia na ilustración e en ámbitos lindeiros como o audiovisual, a publicidade ou a mercadotecnia) e Giovanna Lopalco (italiana afincada na Coruña que fixo un percorrido polo desenvolvemento dun filme de animación e de como este proceso se nutre do ámbito ilustrativo). No encontro, no que tamén participou o secretario xeral de Cultura, Anxo Lorenzo, celebrouse a asemblea xeral da asociación e, tamén, presentáronse os que serán os elementos fundamentais da nova web da AGPI.
A través deste adianto da que será a nova faciana de agpi.es (dispoñíbel en cuestión dunhas poucas semanas), a asociación fixo saber que vai estar ateigada de contidos e servizos e que achegará unha ampla marxe de participación para socios e usuarios. De feito, a web porá en xogo unha sección de traballos dos socios a xestionar por cada un deles, coa novidade de que agora cada membro da asociación terá a posibilidade de incorporar proxectos ao seu perfil, desbotándose o apartado de galería única de traballos. A web, segundo nos fixo saber a dirección da AGPI, estará plenamente operativa a finais de ano ou a comezos de xaneiro.
Como dixemos, no acto participou o secretario xeral de Cultura, Anxo Lorenzo, en representación da Consellería de Cultura e Educación. Segundo fixo saber Lorenzo, Cultura e Educación está a apoiar a renovación da web da asociación (a través dun convenio de colaboración), amais doutras actividades de divulgación (por exemplo o propio Encontro Galego da Ilustración). Lorenzo deulles a benvida aos participantes “a esta cita de diálogo e de conversa” que reúne na capital de Galicia, dixo, “algúns dos ilustradores máis destacados do panorama nacional, así como profesionais doutros sectores afíns, como o editorial, o do deseño, o da publicidade e o da animación”. Lorenzo salientou no acto de apertura “a alta calidade que caracteriza a produción galega actual de deseño e de ilustración, cun traballo que enriquece o noso universo de imaxe e a construción visual da cultura galega”.

Categorías: Ciencia

GameStop prepara nos EE.UU. unha tarifa plana de xogos de segunda man

Lun, 10/30/2017 - 14:45
Imaxe filtrada sobre o lanzamento do Power Pass por parte de GameStop

As grandes cadeas de tendas de videoxogos levan anos apoiando boa parte do seu negocio na compra-venda de xogos usados, pese á oposición da industria (que non recibe compensación polas vendas de segunda man), pero GameStop quere revolucionar este tipo de negocio estreando nos EE.UU. o vindeiro 19 de novembro o Power Pass, un servizo que por 60 dólares ofrecería 6 meses de xogos usados ilimitados.
Deste xeito, o usuario que goce do servizo poderá ter sempre un xogo usado consigo, e poderá cambialo por outro sempre que queira dentro dos 6 meses contratados, o que é unha atractiva opción para moitos, que poderán ter acceso a unha ampla variedade de títulos polo prezo dun único xogo, reducindo así a molestia de estar a mercar e vender constantemente xogos usados, e gozando así dun xeito máis áxil de acceder ao grande catálogo de xogos de segunda man que teñen nas tendas actualmente.
O Power Pass podemos velo como algo semellante ao aluguer de películas en DVD con tarifa plana como MediaXpress (que en 2003 replicara o funcionamento de Netflix no mercado español con pouco éxito), polo que agora resultará interesante ver se GAME ou algunha outra compañía ousa a replicar a fórmula no resto do mundo.

Categorías: Ciencia

A reparación da pantalla do iPhone X custará 321,10 euros

Lun, 10/30/2017 - 14:00

O vindeiro venres algúns afortunados comezarán a gozar dun iPhone X por acudir cedo a unha Apple Store ou por ser dos primeiros en reservar o novo smartphone de Apple, e ante as dúbidas sobre se contratar un seguro ou mercar unha funda para protexer o novo trebello habería que advertir que Apple xa publicou os prezos de reparación do iPhone X en España, e son algo moi en conta ao facerse cun destes teléfonos.
De xeito xeral Apple ofrece poucas modalidades de reparacións do iPhone X, que consisten realmente en substituír o teléfono por outro en bo estado, cobrando o que custaría a reparación en si no caso de que o problema non estivese cuberto pola garantía, de xeito que un cambio de batería custaría 89 euros, un cambio de pantalla 321,10 euros e outros tipos de reparacións (normalmente complexas) custarían 611,10 euros.
O prezo de cambiar a batería sería o habitual en Apple, pero no caso das pantallas a partires do iPhone 6S o prezo de substituír a pantalla sería de 181,10 euros, mentres que nos modelos Plus sería de 201,10 euros, polo que o incremento de prezo de reparación do iPhone X é máis que notable, o que parece ser consecuencia non só da pantalla en si, senón tamén polo feito de que agora tamén integra máis sensores (para o Face ID).

Categorías: Ciencia

Chega ao seu remate o segundo Concurso de Robots Mecano da UDC

Lun, 10/30/2017 - 13:59

Podemos ser creadores de tecnoloxías amais de usuarios? Sen dúbida si, e subliñar esta mensaxe con probas palpábeis é un dos grandes obxectivos da segunda edición do Concurso de Robots Mecano para alumnado de Secundaria que organiza a Universidade da Coruña no Campus Industrial de Ferrol. Celébrase este 31 de outubro e nel está previsto que participen seis institutos galegos (Saturnino Montojo e Sofía Casanova, de Ferrol; Ortigueira; Virxe do Mar, de Noia; Leiras Pulpeiro, de Lugo, e Pontepedriña, de Santiago) mostrando os seus enxeños e logo sendo avaliados por un tribunal formado por investigadores e profesores universitarios. O certame inclúe ademais unha visita guiada polas instalacións da Universidade da Coruña en Ferrol, aos centros formativos e laboratorios de investigación. As actividades comezarán ás 10:00 horas, cun acto de inauguración e benvida a cargo da vicerreitora e o director do Campus, Araceli Torres e Ginés Nicolás, e rematarán sobre as 15:00 horas.
Para quen non o saiba, o Concurso Mecano é unha actividade promovida polo Campus Industrial de Ferrol da Universidade da Coruña que ten por obxecto e”stimular a creatividade, o traballo en equipo e achegar o mundo da enxeñaría e as tecnoloxías aos estudantes de último ano dos institutos galegos a través da construción e programación dun robot para posteriormente superar unha serie de obstáculos proxectados nunha xincana”.
O concurso consta de dúas fases, a primeira, que xa se realizou, consistía na elaboración dun vídeo explicativo da proposta de cada grupo participante, unha peza audiovisual para subir ao Facebook e, en virtude dos gústame acadados, acadar máis ou menos puntos (o máximo son cinco puntos).
A segunda proba, que é a que terá lugar mañá, consiste na presentación e defensa da proposta ante un xurado formado por persoal docente e investigador do Campus Industrial de Ferrol. O premio será unha cámara de VicTsing Eypro Cámara Acción Deportiva 1080P para cada un dos estudantes gañadores.
As presentacións das propostas ao tribunal teñen o seguinte horario:
10:30h IES Leiras Pulpeiro (Lugo)
10:45h IES Ortigueira (Ortigueira)
11:00h IES Pontepedriña (Santiago de Compostela)
11:15h IES Saturnino Montojo (Ferrol)
11:30h IES Sofía Casanova (Ferrol)
10:45h IES Virxe do Mar (Noia)
Ao remate, ás 12:00 horas, Araceli Torres fará unha presentación do Campus Industrial de Ferrol e das súas titulacións. Media hora máis tarde procederase á entrega de diplomas e farase unha foto de grupo. O Concurso Mecano rematará ás 13:00 horas coa visita guiada aos laboratorios do Campus: Plásticos; Aplicacións Industrial do Láser; Mecánica de Fluídos, túnel aerodinámico; Canle de probas hidrodinámicas; Enxeñaría Mecánica e Laboratorio de Robótica.

Categorías: Ciencia

Despiden a un enxeñeiro de Apple por permitir que a súa filla gravase un vídeo do iPhone X

Lun, 10/30/2017 - 12:48
Brooke Peterson amosando o iPhone X nun Caffé Macs do campus de Apple

Nos últimos días sorprendeu en YouTube un vídeo dunha rapaza chamada Brooke Peterson visitando o campus de Apple, onde traballa seu pai. Alí podemos ver como visitan un Caffé Macs, onde pagan a consumición co iPhone X e a moza fai toda unha demostración do funcionamento do smartphone que aínda non saíu á venda, o que fixo que o vídeo rematase converténdose en viral.
As consecuencias desta ousadía non se fixeron esperar, e non só Apple denunciou o vídeo que foi retirado de YouTube (aínda que actualmente hai outra copia do mesma circulando), senón que tamén despediu ao pai da rapaza por violar as normas da compañía ao permitir a divulgación de detalles do iPhone X antes do seu lanzamento.
A youtubeira di que todo «foi un erro inocente», e asegura que seguirá a mercar produtos da compañía da mazá e incluso que o seu pai non garda rancor por Apple, pois entende que cometeron un erro. De feito, non só está prohibido divulgar información de produtos non comercializados (especialmente no caso de unidades de empregados, que poden incluír numerosa información confidencial), senón que incluso está prohibido gravar vídeo en todo o campus de Apple, de aí que tivesen que tomar medidas drásticas para que non se entenda que a compañía é flexible coas súas propias normas e pode xustificar a imprudencia dos seus traballadores.

A youtubeira asegura estar sorprendida pola viralidade acadada polo seu vídeo
Categorías: Ciencia

Pobra de Trives achega un obradoiro para afianzar aos seus maiores no uso do WhatsApp

Lun, 10/30/2017 - 12:16

O Concello de Pobra de Trives está a organizar unha actividade directamente encamiñada a conseguir que os veciños estean mellor comunicados entre eles e co mundo, ao tempo que incrementan as súas posibilidades de lecer e mesmo de envellecemento activo (pola vía das TIC). O Curso de WhatsApp para Adultos vaise desenvolver entre o 13 e o 15 de novembro pola tarde, na sala de reunións do edificio novo do Concello. Segundo informa o Goberno local, ten a súa orixe na importancia das novas ferramentas dixitais para comunicármonos co mundo actual, facendo fincapé en recursos como o correo electrónico, o chat, as redes sociais e, por suposto, o servizo WhatsApp de mensaxes instantáneas.
“Internet proporciónanos unha mellor calidade de vida e é unha oportunidade para vencer o illamento nos máis maiores”, explican fontes do Concello ourensán sobre as razóns que xustifican o obradoiro, engadindo a necesidade de facer fincapé no feito de que as persoas tamén viven no mundo e “deben adaptarse para que a propia tecnoloxía non os desterre da sociedade”. A organización do curso tamén quere desmentir a falsa crenza de que as persoas de idade non estean capacitadas xa para manexar tecnoloxías. En definitiva, os obxectivos do taller son ensinar a tirar proveito do WhatsApp, achegar aos participantes as vantaxes de chatear e estar cun contacto máis estreito con amigos e familiares e, tamén, introducir nas súas vidas un elemento de actualización. As inscricións, engade o Concello, deberán facerse na Oficina de Turismo antes do 8 de novembro.

Categorías: Ciencia

Lugo introduce á cidadanía nas principais utilidades das redes sociais

Lun, 10/30/2017 - 11:35

O Edificio de Novas Tecnoloxías de Lugo, centro neurálxico da formación TIC na cidade da Muralla, está a acubillar estes días unha actividade divulgativa sobre redes sociais, achegando conceptos e habilidades sobre como comezar a tirarlles proveito, que tipo delas convén para os intereses de cada quen ou como iniciarnos en cada unha das máis relevantes. Este venres o obradoiro chegou ao seu punto álxido coa visita da concelleira de Concello e Cidadanía, Rosana Rielo, quen compartiu impresións cos participantes do curso que se está a desenvolver na sala de formación do Edificio de Novas Tecnoloxías ao abeiro do programa de ensino Tecnoloxíza-T!
Segundo lembrou, o Concello está a organizar até decembro diferentes alternativas de formación TIC dende o Edificio, entre as que se inclúen un obradoiro sobre mercadotecnia dixital, outro taller sobre trámites bancarios en liña, outro sobre comunicación dixital, outro sobre os principais servizos e rendementos da nube, outro sobre como atoparmos os mellores resultados nas procuras feitas nos buscadores (posicionamento e SEO), outro sobre as vantaxes e beneficios do Whatsapp, outro sobre creación de aplicacións, outro obradoiro sobre tabletas, outro sobre programación e, para rematar, outro obradoiro sobre retoques fotográficos co noso smartphone.
Todas as persoas interesadas en participar poden inscribirse no Edificio de Novas Tecnoloxías, na Praza de Anxo Fernández Gómez, aberto de luns a venres, de 10:00 a 13:00 horas, e de 17:00 a 21:00 horas, e os sábados de 17:00 a 21:00 horas. A data de inscrición, que é distinta para cada actividade, pode consultarse ben no propio centro, a través do teléfono de atención cidadá 010 ou en www.lugo.gal.

Categorías: Ciencia

Entrégase o Premio ao Mellor Proxecto Universitario con Licenza Libre

Ven, 10/27/2017 - 22:30

Hoxe fallouse o premio da X edición do Premio ao mellor Proxecto Universitario con Licenza Libre convocado pola AMTEGA coa colaboración da Oficina de Software Libre do CIXUG, recaendo o primeiro premio en Pablo Grela Palleiro, da Universidade de A Coruña polo proxecto Radiocom consistente nunha aplicación móbil para unha radio comunitaria que permite escoitar podcast, streaming, ver a programación da semana, reportar incidencias, solicitar recursos e poder acceder de maneira áxil aos programas. Este recoñecemento ten unha dotación económica de 1.500 euros achegada polo CIXUG ao abeiro do Convenio de colaboración asinado coa AMTEGA.
Ademais, concedeuse tamén un segundo premio a segundo premio a Michael García Rodríguez da Universidade de Vigo polo proxecto Estudo da reproducibilidade do CMIP5 consistente nun estudo realizado sobre os modelos pertencentes ao CMIP5 acerca da súa reproducibilidade científica, centrándose na dispoñibilidade do código do modelo e da calidade do mesmo, cunha dotación económica de 750€ achegados pola Asociación GPUL, colaboradora da iniciativa ao abeiro do convenio de colaboración asinado coa AMTEGA.

Finalistas

Os outros finalistas do premio, a quen o xurado felicitou polo seu traballo foron:
– Óscar Núñez Aguado. Web do audiovisual escolar galego. Unha aplicación web que permite xestionar unha videoteca e organizar concursos audiovisuais relacionados con contornas escolares.
– Daniel Pereira Alonso. GASATaD. Proxecto que permite procesar ficheiros CSV ou XLSX e xerar diferentes tests estatísticos e gráficos a partir dos seus datos.

Xurado

O xurado estivo composto por Nieves Pedreira Souto en representación da Universidade da Coruña; José Varela Pet en representación da Universidade de Santiago de Compostela; Francisco Javier Rodríguez Martínez en representación da Universidade de Vigo; David Maseda Neira en representación da Asociación de Programadores e Usuarios de Linux, GPUL; Breogán Cinza Cabarcos en representación da AMTEGA e Mar Castro Pereiro en representación da Oficina de Software Libre da AMTEGA.

Categorías: Ciencia

Recuncho Maker achega esta finde unha sesión argalleira dupla sobre Escornabots e Arduino

Ven, 10/27/2017 - 17:30

A asociación Recuncho Maker está a brindarnos un inicio de finde argalleiro a mans cheas. Ou sexa, unha nova oportunidade para demostrarnos a nós mesmos e ao mundo que construír tecnoloxías e facer innovación está ao alcance de todas e todos. Hoxe venres celébrase un obradoiro sobre o Escornabot, o trebello galego “encargado” de introducir na robótica e na programación ás crianzas. Mañá é a quenda dunha cita con Ardunio: unha porta aberta para comezar a darmos pasos firmes na placa-software por excelencia do ámbito da tecnoloxía sen cancelas nin licenzas privativas.
O roteiro deste obradoiro é, primeiro, “partir de cero con Arduino” para logo facer unha sesión práctica e aprender o que son as entradas e saídas da dita tecnoloxía, con exemplos ilustrativos sobre como facer as conexións físicas e cargar os programas no microcontrolador (polo camiño, aprenderanse conceptos de valor sobre compoñentes básicos de electrónica, circuítos básicos para controlar LED e detectar pulsación botóns, etc).
Os dous obradoiros terán lugar no Centro Socio-Cultural de Caramoniña, en Santiago de Compostela, o primeiro este 27 de outubro a partir das 17.00 horas, e o do sábado previsto para as 11 horas. A duración aproximada nos dous casos é de tres horas.
Esta actividade forma parte das actividades que a asociación Recuncho Maker realiza no marco do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2017 da Xunta de Galicia.

Categorías: Ciencia

O enxeñeiro galego Antonio Vidal, mellor científico de datos do ano

Ven, 10/27/2017 - 16:30

O premio ao Mellor Científico de Datos de España, edición 2017, vén de ir dar a mans galegas. Máis polo miúdo, foi dar a Antonio Vidal, enxeñeiro de Telecomunicación pola Universidade de Vigo e arestora responsábel de Ciencia de Datos na empresa SIVSA, da que temos falado en Código Cero para salientar as vantaxes e características pioneiras das plataformas Fenix (para facilitar o día a día de clínicas e centros médicos) e Geenie (para axilizar nos organismos públicos a compra de bens dentro do sistema de Contratación Centralizada do Ministerio de Facenda). Segundo nos contan dende a UVigo, Vidal está a compatibilizar o traballo en SIVSA coa elaboración da súa tese de doutoramento na Universidade, baixo a dirección do catedrático Javier González Casteño e co obxectivo de dar forma a algoritmos que axuden a predicir o prezo de poxa dun servizo na nube, con vistas a minimizar custes na contratación dun servizo. E facelo, ademais, de xeito automático.
Trátase do proxecto AWS SpotPred, en palabras de Vidal “un sistema que predí os prezos das poxas das máquinas virtuais Amazon EC2 e especialmente deseñado para asegurar que as subastas gáñanse ao menor prezo posíbel”, o que posibilitaría a optimización de custes de infraestrutura nas empresas que usan os servizos de Amazon AWS na nube.
Os premios Data Science Awards Spain 2017, impulsados por Synergic Partners, empresa do grupo Telefónica, distinguen as mellores iniciativas particulares e empresariais e de xornalismo de datos no eido da información a gran escala (Big Data). Para esta segunda edición recibíronse máis de 300 propostas, a distribuír en tres categorías. O xurado elixiu aos gañadores nas categorías de científico de datos, na que triunfou Antonio Vidal; na modalidade de empresas que foi para Ebury e con mención de honra PepsiCo; e o premio ao mellor traballo de xornalismo de datos en España foi para Mar Cabra. Ademais, o xurado decidiu outorgar dúas mencións de honra na categoría de científicos de datos por un lado a Roberto Martín, como Mellor Visualización de Datos e, por outro, a Alejandro Baldominos coa mención á Mellor Solución de Arquitectura Big Data.


Categorías: Ciencia

O Salón do Libro de Pontevedra estrea web

Ven, 10/27/2017 - 12:57

O Salón do Libro Infantil e Xuvenil de Pontevedra vén de estrear nova web en salondolibro.gal. A páxina foi presentada este 26 de outubro pola concelleira de Cultura, Carme Fouces, salientando o principal obxectivo do sitio acabado de estrear: que o salón achegue unha imaxe máis moderna e adaptados aos tempos. Amais disto, preténdese contribuír a seguir facendo comunidade arredor do evento literario pontevedrés e da literatura galega en xeral, cousa que se complementa coa creación dun club de lectura formado por 12 persoas entre as que se atopan libreiros/as, bibliotecarios/as, docentes e xornalistas da cidade. “A nosa intención”, dixo, “é crear unha rede na cidade que teña continuidade e percorrido, e que chegue a funcionar case dun xeito automático”.
Volvendo á páxina acabada de estrear (e con dominio galego), a intención é que “sexa un escaparate ao mundo do que é o Salón e que se converta tamén nunha fonte de recursos para os centros escolares”. Segundo indicou Fouces, contará cun apartado de TeleSalón, Podcasting e Clubes de lectura “que se irán enchendo co contido que produzan os centros logo de asistir aos tres cursos formativos que se impartirán en novembro, dous deles a través do apartado de Audiovisuais da Universidade (TeleSalón e Podcasting)”.
O resto dos apartados da web están destinados ao Concurso Internacional de Ilustración, á vindeira edición de Mulleres de Conto (fío temático da convocatoria 2018 do Salón), ao país convidado na vindeira edición do evento (México), ás anteriores edicións do encontro literario pontevedrés e a facilitar aos centros unha bibliografía, realizada por Gálix.
Para quen non o saiba, o Salón do Libro Infantil e Xuvenil de Pontevedra naceu en 1999 como “un sinal de identidade” e, en palabras do Concello, “unha maneira de construír unha cidade ao redor das crianzas”. A aposta do Goberno local baséase no seguinte: no convencemento de que os libros e a lectura, sobre todo nas primeiras idades, son a “mellor maneira que temos de transformar a nosa realidade para crear outra máis xusta e máis libre”.

Categorías: Ciencia

WhatsApp permite revogar mensaxes até 7 minutos despois do seu envío

Ven, 10/27/2017 - 12:31
Agora o borrado de mensaxes de WhatsApp poderá ser no terminal do usuario ou tamén no do destinatario

Nas últimas horas están a producirse cambios en WhatsApp a nivel mundial, xa que tras varios meses de probas por fin decidiron activar unha funcionalidade reclamada dende hai moito tempo: a posibilidade de eliminar mensaxes de conversas cando se remitiron accidentalmente (por ter algún erro ou por publicarse na conversa que non correspondía).
Até o momento, cando un usuario de WhatsApp eliminaba unha mensaxe nunha conversa a acción só tiña efecto no teléfono do usuario, pero a partires das vindeiras horas (a novidade aínda está a espallarse globalmente e podería tardar bastantes horas en chegar a todo o mundo, e só tería efecto entre usuarios cunha versión actualizada da aplicación) cando eliminemos un texto ou calquera outro contido compartido nunha conversa individual ou de grupo será posible eliminar para todos, o que suporía a anulación do seu envío.
Esta nova funcionalidade non só elimina mensaxes das conversas, senón tamén das notificacións, aínda que compra destacar un detalle: o borrado para todos non afectará ás listaxes de difusión, coas que haberá que ter un coidado especial, xa que non será posible revogar os envíos.
Cando procuremos borrar unha mensaxe para todos, no caso de que non fose posible eliminar o contido dos terminais receptores, o usuario recibirá unha notificación, de xeito que terase consciencia das mensaxes recibidas ou non, evitando así confusións.
O borrado para todos non pode facerse sen límites, senón que terá un prazo de 7 minutos tras o seu envío.

Categorías: Ciencia

Premio Greenweekend para unha ferramenta dixital galega que optimiza o rendemento das parcelas forestais

Ven, 10/27/2017 - 12:01
De esquerda a dereita, José Luis Gude e Siro González, na final da Greenweekend celebrada na Coruña

O proxecto de negocio SmartWood xurdido ao abeiro da USC vén de obter un importante recoñecemento estatal en materia de innovación: o primeiro premio da Greenweekend que promove o portal de emprego Enviroo para visualizar, distinguir e impulsar as máis relevantes propostas do ámbito das tecnoloxías verdes. Segundo nos lembra a Universidade de Santiago, SmartWoord vén da man do investigador de doutoramento do Campus Terra José Luis Gude (Escola Politécnica Superior de Enxeñaría) e trátase dunha ferramenta dixital que ofrece aos usuarios asesoramento e axuda para o optimizar o rendemento de parcelas forestais. No certame de Greenweekend acabado de resolver participaron arredor de 30 emprendedores do sector ambiental interesados no desenvolvemento de proxectos que contribúan a dinamizar a chamada economía verde.
Máis polo miúdo, o proxecto SmartWood consiste nunha ferramenta dixital baseada en sistemas de información xeográfica e datos recollidos por drons que axuda a unha planificación forestal “máis eficiente e sustentábel”. A iniciativa, que vén colleitando outros recoñecementos dende a súa orixe, tivo ocasión de fortalecerse e coller pulo ao abeiro de Yuzz Lugo, o programa-palestra de emprendemento do Banco Santander desenvolvido en colaboración coas universidades (neste caso concreto a de Santiago).
Segundo indica Gude, trátase dunha aplicación tecnolóxica feita a medida dos propietarios de parcelas forestais, con capacidade para mellorar o rendemento económico das fincas ao xeito dun asistente interactivo. Neste senso, SmartWood ofrece recomendacións e información sobre cales son as plantacións máis rendíbeis para cada parcela, complementando este servizo dun mercado dixital (marketplace) que xunta produtores e empresas dos servizos forestais.
O proxecto SmartWood, xerminado inicialmente por Gude, é agora unha startup en fase de constitución, impulsada por José Luis Gude con Begoña L. Castro e Siro González Rodríguez, dous emprendedores cos que coincidiu na edición do programa Yuzz Lugo deste ano.

Categorías: Ciencia

Os expertos coinciden no Campus de Pontevedra: cos xogos apréndese mellor

Ven, 10/27/2017 - 11:36

A Facultade de Ciencias de Educación e o Deporte (UVigo) de Pontevedra acolleu este 26 de outubro unha xornada sobre gamificación destinada a mostrar os valores e posibilidades dos xogos como ferramentas de ensino e de motivación. Abriu o encontro Jacobo Feijóo, experto nestas técnicas inversas de interacción entre planos e conceptos (desta volta, do virtual ao real), quen fixo un percorrido pola súa propia experiencia na materia (aplicando as ditas metodoloxías en eidos como o empresarial e o sanitario a través da empresa galega Gamisolution) e lembrou que, de facto, a gamificación non é unha técnica nova, e de feito xa se tiraba proveito dela no século XIX, de maneira indistinta pero sobre todo buscando reforzar a aprendizaxe das crianzas. A xornada, desenvolvida baixo o epígrafe Estratexias para mellorar a implicación do alumnado a través da gamificación, veu da man do investigadores do grupo Remoss Cristina Varela, Roberto Silva e Adrián Paramés.
Volvendo á intervención de Feijóo, o experto en gamificación sinalou que unha das cousas máis positivas destas prácticas “é que xa se están a estruturar, que xa hai unha metodoloxía, uns pasos estudados, e podemos usar esa liberdade que dá o xogo, o feito de que o estean pasando ben, para que os nenos aprendan”. O gran segredo, dixo, “é dar co que motiva a xente”, engadindo exemplos concretos de éxito neste punto, como o de Pokemon Go!, que en menos dun ano xa conseguira 47 millóns de usuarios.
No coloquio introdutorio ao mundo da gamificación, o relator afondou tamén en como a súa experiencia profesional levouno a desenvolver unha metodoloxía para o deseño deste tipo de iniciativas, uns pasos a seguir que comezan co achado dos factores que poden espertar o interese dos grupos de persoas aos que se dirixe a proposta. “Se un alumno é deportista, motivaralle competir, pero se o alumno é investigador, motivaralle o misterio, o descubrimento”, explicou o conferenciante, que incidiu nese senso na importancia de deseñar xogos capaces de “conseguir o interese” de persoas diversas.

Categorías: Ciencia

Ábrense as reservas do iPhone X

Ven, 10/27/2017 - 11:36

Esta mañá abriuse a reserva do iPhone X na tenda en liña de Apple e en numerosos establecementos comerciais de toda España, de xeito que os máis afortunados poderán facerse cun destes novos smartphones o venres que vén, aínda que a meirande parte de usuarios terán que esperar máis dun mes para recibilo, xa que o número de unidades producidas non chega para satisfacer a demanda inicial, de xeito que conseguir un destes teléfonos antes de que remate o ano non parece que sexa doado, de xeito que o seu elevado prezo non está a mitigar a situación.
O novo teléfono pode adquirise en dous acabados (con traseira en cor prata ou gris espacial) e en dúas capacidades (64 e 256 GB) con prezos de 1.159 e 1.329 euros respectivamente, o que está a ter como consecuencia que os modelos máis asumibles sexan os primeiros en esgotar unidades de reserva en varias cadeas comerciais. Amais, aínda que nos primeiros minutos (a reserva abriuse ás 9:01 horas) xa de indicaba que os teléfonos poderían non chegar aos compradores até dentro de 4-5 semanas, pero un par de horas despois xa se indica que o prazo de espera podería ser de 5-6 semanas, constatando os problemas de subministro dos que se viñan falando nas anteriores semanas.
Temos que lembrar o iPhone X é o redeseño dos smartphones de Apple máis drástico dos últimos 10 anos, xa que por primeira vez prescíndese dun elemento tan icónico como o botón de inicio redondo na parte frontal, que desta volta está ocupada por unha pantalla Super Retina de 5,8 polgadas que case non presenta marcos, de xeito que convértese na grande protagonista do novo dispositivo que tamén prescinde do lector de pegadas dixitais para apostar polo recoñecemento facial, é resistente á auga e ao po e integra cámaras de grande calidade que tiran proveito do procesador A11 Bionic para conseguir grandes efectos e incluso posibilita a gravación de vídeo Full HD en cámara lenta a 240 imaxes por segundo. Tampouco lle faltan elementos como a carga sen fíos e Apple Pay, converténdose no que posiblemente sexa o deseño de referencia para os iPhone do futuro, que para moitos chama a atención por ser o de maior pantalla do catálogo de Apple mentres que as súas dimensións quedan nun punto intermedio entre o iPhone 8 e o 8 Plus.

Categorías: Ciencia

Páxinas